العلاقات الإسرائيلية الخليجية .. صدق اللي قال السياسة نجاسة.

واحدة من الدروس اللي إتعلمتها في حياتي إن عشان تلعب سياسة وتبقي شاطر فيها لازم تبقي شخصية سايكوباتية .. الشخص السايكوباتي هو شخص حرفياً حاطط مشاعره في ثلاجة .. عشان تبقي سياسي ليك مكانتك في السوق لازم يبقي ليك القدرة إنك تبص في عين حد إنت بتلعن سلسفين أهله وتبوسه من خده وتاخده بالحضن .. مش لسبب غير إن في اللحظة دي مصلحتك إنك تبقي صاحبه .. ده مش معناه إن الدنيا مش زي المرجيحة يوم تحت ويوم فوق لإن ممكن بكره الصبح الظروف تتغير وترجعوا تمسكوا في خناق بعض تاني .. لكن في اللحظة دي مصلحتك إنك تبقي صاحبه فبتحط مشاعرك جوه الثلاجة .. يمكن عشان كده اليهود شاطرين جداً في اللعبة دي ومش بتكلم عن الإسرائيليين بالذات علي فكرة أنا بتكلم عن اليهود بشكل عام.

اليهود فيهم خاصية بتميزهم عن باقي شعوب الأرض الحقيقة في وجهة نظري وهي إن عندهم قدرة غريبة إنهم يبقوا سايكوباتيين .. مفيش إمبراطورية فيكي يا أرض إلا و فشختهم في أفكارهم .. من أول الإمبراطورية الفارسية للرومانية للإسبانية .. ده غير النازيين .. و شوف رغم كده اليهود عندهم قدرة غريبة إنهم يرجعوا تاني حبايب (أو علي الأقل يمثلوا إنهم حبايب) أعداءهم اللي داسوا علي وشهم .. ليه؟ .. عشان خاطر مصلحتهم في كده .. المقدمة دي هي يمكن الحاجة اللي بتقدر تفسرلي أنا شخصياً سر شهر العسل اللي عايشة فيه إسرائيل مع دول الخليج وأخص بالذكر ثلاثي أضواء المسرح السعودية والإمارات والبحرين واللي عشان تفهمه لازم القصة تتحكالك من بدايتها بشيء من التفصيل.

سنة 2015 اللي كان بيحكم أميركا وقتها (باراك أوباما) فضل يسعي إن بلده ومعاها الدول الخمسة دائمة العضوية في مجلس الأمن وزود عليهم كمان ألمانيا يمضوا الإتفاق النووي الإيراني .. الفكرة بمنتهي البساطة إن إنتي يا إيران حتوقفي البرنامج النووي بتاعك في مقابل إن العقوبات الإقتصادية اللي الغرب فارضها عليكي ومكلبشة إقتصادك تتشال .. سنة 2016 الإتفاق بدأ يتنفذ واللي بدل ما إيران تاخد الفلوس الزيادة اللي دخلت ليها دي عشان تصلح في البنية التحتية وتصرفها علي شعبها فالحرس الثوري الإيراني خد منها نصيب الأسد وبدأ يبعزق الفلوس دي علي رجالته في لبنان وسوريا والعراق .. طبعاً دول الخليج وخصوصاً ثلاثي أضواء المسرح شافوا اللي بيحصل ورقعوا بالصوت .. الدنيا كانت سودا حرفياً في وشهم لحد ما جت سنة 2018 وتحصل المعجزة اللي هم مستنيينها .. (دونالد ترامب) كسب الإنتخابات الرئاسية الأميريكية .. كيس الشيتوس الحجم العائلي سياسته الخارجية كانت سهلة جداً .. شوف هو (أوباما) عمل إيه وألغيه ومن ضمن اللي لغاه كان مشاركة أميركا في الإتفاق النووي الإيراني.

الأربع سنين بتوع (ترامب) كانوا فترة الخطوبة بين الخلايجة وإسرائيل .. إتفاقيات إبراهيم إتمضت .. ده السبب إن لما جت سنة 2018 حصلت حاجة غريبة جداً وهي إن فيه واحد إسرائيلي إسمه (شمول بار Shmuel Bar) كان ضابط سابق في المخابرات العامة الإسرائيلية اللي إنت يمكن تكون عارفها باسم الموساد ولما طلع علي المعاش أسس شركة إسمها IntuView ودي شركة فيها مهندسين معلومات أو زي ما بيتسموا Data Engineers عشان يفضلوا يدعبسوا ويدوروا وسط بوستات السوشيال ميديا علي التهديدات الإرهابية  .. أنا شخصياً شايف إن ده هبد لإن مفيش إرهابي بيحترم نفسه حيبعت لزميله تفاصيل عملية تفجير في رسالة علي الواتس أو الإنستجرام .. دي مجرد واجهة  .. الحقيقة إنك بتراقب البوستات المعارضة للحكومة عشان إنت بتبقي مرعوب من كابوس إن ثورات الربيع العربي تولع تاني .. علي الورق فيه أجهزة مخابرات أوروبية وأميريكية وحتي في الهند بتتعاون مع الشركة دي بس في السنة دي (شمول بار) جاله تليفون من السعودية بيقول إن الحكومة هناك عايزة تفتح شغل مع شركته.

دلوقتي إحنا دخلنا مرحلة الدخلة شهر العسل .. الرئيس الأميريكي الجديد (جو بايدن) واحد من الحاجات اللي قال إنه حيشتغل عليها إنه يرجع أميركا تاني للإتفاق النووي مع إيران و ده عطي إسرائيل الفرصة إنها تدوس بنزين في تعاونها مع الخلايجة  .. هم باعوا للخلايجة فكرة إن محدش خايف علي مصلحتكوا قدي .. زي ما بنقول المتغطي بأميركا عريان بس اللي متكلفت بإسرائيل متدفي .. في فبراير 2021 إسرائيل طلعت قالت ليه لا نعمل تحالف عسكري بينا و بين الإماراتيين و السعوديين و البحرينيين .. هم مضوا إتفاقيات بالعبيط مع الإمارات حتخلي حجم التجارة بين البلدين ينط من 300,000 دولار في السنة يبقي 500 مليون دولار في السنة .. و بما إننا بنتكلم عن الفلوس فلازم نجيب سيرة نيوم.

نيوم Neom تقدر تقول عليها إنها النسخة السعودي من العاصمة الإدارية الجديدة .. ده مشروع بتكلفة 500 مليار دولار علي مساحة قد مساحة بلجيكا علي الحدود بين السعودية و الأردن .. في حالة إنك شاطر في الجغرافيا فإنت أكيد بتهرش في شعرك لإن موقع نيوم بيخليها يدوبك فردة كعب من ميناء إيلات الإسرائيلي .. عايزك تعرف إن في نوفمبر 2020 مكتب رئيس الوزراء الإسرائيلي وقتها (بنيامين نتنياهو) سرب خرب للإعلام إن حصل إجتماع بين (نتنياهو) و بين (محمد بن سلمان) ولي العهد السعودي و معاهم (مايك بومبيو Mike Pompeo) وزير الخارجية الأميريكي وقتها في الموقع بتاع نيوم .. من وجهة نظر (محمد بن سلمان) فمشروع نيوم ده هو اللي حيحقق حلمه بإ ن الإقتصاد السعودي يبطل يعتمد بشكل مبالغ فيه علي عائدات النفط و يبدأ يتجه لسكه إنه إقتصاد بيبيع تكنولوجيا و هو شايف إن إسرائيل تقدر تساعده في ده.

المصدر:

مقالة بعنوان Israel is the Arab World’s new soft power نشرت في مجلة Foreign Policy و ده لينك المقالة الأصلية:
https://foreignpolicy.com/2021/03/08/israel-is-the-arab-worlds-new-great-power/