إيه اللي يخلي بلد في أقل من 10 سنين تتحول من بلد مش عارفة يعني إيه طيارات بدون طيار لبلد بتصنعها زي ما الست والدتك كل ما تبقي مش لاقية حاجة تعملها تعمل حلة محشي؟ .. إيه اللي يخلي تركيا تتحول من بلد ماشية تشحت طيارات بدون طيار في 1996 لبلد الطيارات بدون طيار بتاعتها هي اللي خلت أذربيجان تكسب أرمينيا في 2020؟ .. التفسير المنطقي في رأيي هو إن فعلياً شرا الدماغ مش بفلوس .. سنة 1996 كانت تركيا طالع عينها في حربها ضد حزب العمال الكردستاني اللي المسلحين بتوعه كانوا بيستخبوا في الجبال في جنوب شرق تركيا علي الحدود بينها و بين سوريا .. حاجة كده شبه الوضع اللي في سيناء .. المؤسسة العسكرية التركية بعد ما زهقوا من لعبة القط و الفار دي قالك يبقي أكيد الطيارات بدون طيار هي الحل اللي بندور عليه .. في السنة دي إشتروا طيارات مراقبة بدون طيار من أميركا عشان الطيارات تفضل طايرة في السما تصور الجبال اللي بيستخبي فيها عناصر حزب العمال الكردستاني .. لما الطيارة تصور حد فيهم فالأتراك بيطلعوا طيارة مقاتلة F-16 Fighting Falcon تقصف المكان اللي المسلحين إتصوروا فيه .. فضلت المشكلة إن الوقت ما بين إن الأمر يطلع بإقلاع الطيارة لحد ما الطيارة توصل فعلياً للمكان اللي فيه المسلحين الأكراد بيكون حوالي 20 دقيقة و دي فترة كافية إنك تطلع بعربيتك من أكتوبر لحد المهندسين لو السكة فاضية يوم الجمعة الصبح .. إنت متخيل تبقي طيار مقاتل و يتقالك إن الهدف اللي إنت حتضربه قاعد قدام بوابة المشاة بتاعة مول العرب في أكتوبر و لما توصل فعلياً يتقالك معلش أصله ركب عربية و وصل بوابة نادي الزمالك في ميت عقبة؟
سنة 2006 الأتراك إشتروا طيارات بدون طيار إسرائيلي مش مسلحة بس الصفقة باظت بعد ما الإسرائيليين سلموا الأتراك الطيارات بعد خمس سنين من مضي العقد و مش بس كده .. الإسرائيليين قالوا إن الطقم اللي يشغل الطيارات لازم يكون إسرائيلي .. طبعاً الأتراك طلعوا صوت من مناخيرهم .. معلش يعني إيه اللي يمنع إن العساكر الإسرائيليين اللي حيشتغلوا علي الطيارات دي يوصلوا كل حاجة بيعملوها للمخابرات الإسرائيلية؟ .. زي ما قلتلك المشكلة دي سببت خناقة كبيرة بين الأتراك و الإسرائليين سنة 2010-2011 لما الأتراك إستلموا الطيارات .. وقتها الأتراك طلبوا من الأمريكان يشتروا منهم طيارات بدون طيار بتقدر تشيل صواريخ و ساعتها الإسرائيليين هم اللي قالوا للأمريكان بلاش يدوا الطيارات دي للأتراك .. وقت ثورات الربيع العربي بقي و جو قلق و بتاع .. هنا الأتراك إقتنعوا بإن شرا الدماغ مش بفلوس .. أنا ليه أوجع دماغي و أفضل أتحايل علي اللي يسوا و اللي ميسواش إنه يديلي طيارات بدون طيار؟ هو إحنا ناقصين إيد ولا رجل عشان نصنعها بنفسنا؟ .. هي صعبة يعني؟
وقتها كان فيه كيانين هم اللي شغالين في مشروع برنامج الطيارات بدون طيار التركي .. الكيان الأول هو الشركة التركية لصناعات الفضاء Turkish Aerospace Industries و إختصاراً بتتسمي TAI .. دي شركة حكومة اللي هي حاجة كده شبة الهيئة العربية للتصنيع عندنا في مصر .. شركة TAI دي كانت واخدة رخصة تصنيع طيارات F-16 من شركة General Dynamics الأميريكية و بالتالي الناس دي كانت فاهمة شوية يعني إيه طيارات أصلاً بس عشان هم شركة حكومة فده خلاهم زي الديناصور في الوقت اللي صناعة الطيارات بدون طيار محتاجة شركة مش حقول صغيرة بس تبقي شركة مرنة شوية .. شركة عملية إتخاذ القرار فيها بتبقي أسهل و مفيهاش روتين كتير و ده حيخلينا نتكلم عن الكيان الثاني .. شركة بايكار Baykar Makina.
سنة 2005 كان فيه شاب تركي إسمه (سلجوق بيرقدار Selcuk Bayraktar) بيدرس هندسة كهربية في معهد MIT المحترم جداً في أميركا .. سنة 2007 كان بيحضر الدكتوراة هناك لما فجأة قرر إنه يسيب الدكتوراة و الدكتور راح الدكتور جه و يرجع تاني تركيا عشان يفتح شركة تصنيع طيارات بدون طيار .. بعدها بسنتين كانت شركته مضت عقد مع وزارة الدفاع التركية لبيع طيارة بدون طيار اللي سماها علي إسمه بيرقدار TB2 .. علي فكرة هو معملش كل حاجة بنفسه .. يعني شركته كانت بتجيب الموتور و Sensors كلها من بره .. سنة 2015 إتعملت أول تجربة بالذخيرة الحية لطيارة TB2 و الأرقام بتاعة التجربة لوحدها تخض .. حاول تتخيل إن أنا مهندس طيران عملت طيارة بدون طيار و القوات الجوية بتاعتنا جربتها بحيث إن الخبر اللي طلع علي السوشيال ميديا إن الطيارة بتاعتي عرفت تضرب صاروخ موجة بالليزر و هي علي إرتفاع 5,000 متر فوق سطح الأرض و ضربت هدف علي بعد 8,000 متر بنسبة Error في التصويب 2 متر .. إنت مستوعب الأرقام؟ .. عشان كده الأتراك بقوا بيحلوا كل مشاكلهم بالطيارات بدون طيار .. الأكراد مطلعين عينا يبقي نضربهم بالطيارات بدون طيار .. محتاسين في سوريا يبقي نضرب قوات (بشار الأسد) بطيارات بدون طيار .. واقعين في مشكلة في ليبيا يبقي نضرب اللي يقف قدامنا بطيارات بدون طيار .. صحابنا في أذربيجان مش عارفين يكسبوا أرمينيا يبقي نضرب الأرمن بطيارات بدون طيار .. تقريباً لو (أردوغان) طلب أودر من كنتاكي و طلع وحش حيضرب فرع كنتاكي بطيارة بدون طيار.
المصدر:
مقالة بعنوان How Turkey became a drone power (and what that tells us about the future of warfare) نشرت في موقع The Correspondent و ده لينك المقالة الأصلية:
https://thecorrespondent.com/832/how-turkey-became-a-drone-power-and-what-that-tells-us-about-the-future-of-warfare/110071049088-d67e839e
