هو إزاي (بيب جوارديولا Pep Guardiola) لسه قاعد في مانشستر سيتي؟ .. عارف إنه سؤال غريب إنه يطلع مني لإن اللي عارفيني شخصياً عارفين إني من أكتر الناس اللي بتحب الرجل ده و بعتبره من أحسن المديرين الفنيين في التاريخ بس ده ميمنعش إني أستغرب إزاي الرجل ده بعد المصيبة اللي عملها في ماتش دور الثمانية من بطولة Champions League قصاد ليون إنه يفضل مكمل في منصبه عادي جداً؟ .. المشكلة مش إنك تغلط .. أي حد معرض إنه يغلط و إحنا مش ملايكة .. أنا مشكلتي في الهبد .. و الهبد المتكرر كمان .. في ماتش العودة في دور ال16 قصاد ريال مدريد كلنا إتفاجئنا ب(جوارديولا) و هو بيلعب باللاعيب اللي لسه ورور صغير (فيل فودين Phil Foden) في نفس مركز (ليونيل ميسي Lionel Messi) اللي هو لاعيب رقم 9 أو المهاجم الصريح اللي بينزل يستلم من نص الملعب .. الحقيقة إن الواد (فودين) أبدع في الماتش ده و كلنا طلعنا من الماتش عاملين أحلي دماغ فلسفة في كرة القدم و بنقول و الله و رجعت أيامك يا فيلسوف .. جينا في ماتش ليون إذ كلنا ناخد علي قفانا بإن (جوارديولا) مقعد (فودين) دكة و بيلعب مكانه لاعيبه في الملعب فعلياً أقل في إمكانياتهم الفنية من لاعيب لسه عنده 19 سنة .. معلش ليه تلعب قصاد ليون ب3 قلوب دفاع و قدامهم (إليكاي جوندوجان Ilkay Gundogan) إرتكاز؟ .. ده إنت لو بتلاعب منتخب فرنسا مش حتعمل كده .. اللي عمله (جوارديولا) في ماتش ليون ده مش غلطة .. ده إسمه هبد .. و المصيبة إن الهبد ده بقاله سنين عمال يتكرر هو هو و عشان كده أنا برجع و أسأل .. هو بالصلاة علي النبي (جوارديولا) لسه قاعد في مانشستر سيتي ليه؟
الرجل ده بقاله في مانشستر سيتي 4 سنين .. في الأربع سنين دول هو خرج من دور الثمانية 3 مرات و خرج مرة من دور ال16 في بطولة Champions League و دي البطولة اللي إدارة السيتي حتموت و تاخدها .. هل الفلوس اللي إتصرفت علي الفرقة دي فلوس حرام مثلاً؟ .. هل (جوارديولا) متخصص في الفشل في البطولة دي؟ .. فاكرين حتة المتخصص في الفشل دي؟ .. للي مش فاكر مرة (جوزيه مورينيو Jose Mourinho) إتسأل في مؤتمر صحفي عن رأيه في (أرسين فينجر Arsene Wenger) فقال الجملة دي .. غريبة صح؟ .. غريبة إن أرسنال تحت قيادة (فينجر) فعلاً في المواسم من 2011 لحد 2017 و هم دايماً يطلعوا من دور ال16 في بطولة Champions League يعني بتتكلم عن 7 سنين من الفشل .. الأولانية خرج من برشلونة .. الثانية خرج من ميلان .. الثالثة و الرابعة خرج من بايرن ميونيخ .. الخامسة من موناكو .. السادسة من من برشلونة و السابعة من بايرن ميونيخ .. بس خلي بالك .. في ولا مرة أرسنال كان داخل الماتش و الناس حاطه أمل إنه يعدي .. في السبع ماتشات الفرقة اللي قدامه كانت أقوي منه .. يا رجل ده حتي موناكو في السنة اللي أرسنال خرج منهم كانوا كسبوا بطولة كأس فرنسا .. بس لو حتقارن 7 سنين الفشل بتوع أرسنال ب4 سنين الفشل بتوع السيتي حتلاقي إن فيه حاجة غريبة أوي.
السنة دي السيتي خرج من ليون سابع الدوري الفرنسي .. السنة اللي قبلها في موسم 2018-2019 طلعوا من توتنهام و وقتها في الدوري الإنجليزي الفرق بين السيتي و توتنهام كان 27 نقطة .. الموسم اللي قبله 2017-2018 خرجوا من ليفربول و اللي في الدوري الإنجليزي وقتها كان السيتي فارق عن ليفربول 25 نقطة .. السنة اللي قبلها خرجوا من موناكو و كانت فضيحة .. و ياتري السيتي عملوا إيه وقتها؟ .. راحوا إشتروا (بيرناردو سيلفا Bernardo Silva) و (بينجامين ميندي Benjamin Mendy) من موناكو .. مش معني كلامي إني لا سمح الله بقلل من إمكانيات المدير الفني بتاع أوليمبيك ليون (رودي جارسيا Rudi Garcia) .. بالعكس الرجل ده علي عيني و علي راسي .. كفاية إنه إستلم ليون و هم في المركز 14 في الدوري الفرنسي و وصل بيهم للمركز السابع و لنص لنهائي Champions League .. بس بحسبة رجل لرجل المفروض إن فرقة السيتي كانت تدوس علي وش ليون .. و ده بيخليني أرجع أسأل .. هو الفيلسوف قاعد لحد دلوقتي ليه؟
الحقيقة إن فيه سببين .. السبب الأولاني إن (جوارديولا) مش شغال لوحده في السيتي .. ده شغال هو و صحابه .. (فيران سوريانو Ferran Soriano) اللي يبقي الCEO أو المدير التنفيذي للنادي غير إنه صاحب (جوارديولا) إلا إنه كمان شريكه .. (تيكي بيجرستين Txiki Begiristain) مدير نشاط الكورة كان شغال مع (جوارديولا) أيام ما كان في برشلونة و الإتنين صحاب برده .. أساساً إدارة السيتي عينتهم قبل ما تجيب (جوارديولا) عشان يخلوا (جوارديولا) يبقي شغال و هو مبسوط .. السبب الثاني الحقيقة هو طب لنفترض جدلاً إنهم مشوا (جوارديولا) حيجيبوا مين؟ .. (ماوريسيو بوتشتينو Mauricio Pochettino)؟ .. طب بذمتك حتمشي رجل كسبان 29 بطولة و تجيب رجل حيكسب أول بطولة في حياته معاك؟ .. طب بالذمة ده كلام؟
مشكلة (جوارديولا) مش إنه مدرب وحش أو مبالغ فيه زي ما ناس كتير بتقول أو إن مجده الشخصي إتبني علي كتاف (ميسي) .. لا خالص .. مشكلة (جوارديولا) إنه هبيد و زي أي هبيد في الدنيا هو مش طول الوقت بيهبد .. الهبيد بتلاقي دايما حاجة بتستفزه إنه يطلع الهبد اللي جواه .. في حالة (جوارديولا) الحاجة دي هي دور الثمانية و انت طالع من Champions League .. ده حقيقي علي فكرة .. (جوارديولا) إدالنا شوية أفكار لوز العنب في الكورة .. هو صاحب فكرة إن ليه لا لعيب زي (كايل ووكر Kyle Walker) بدل ما بيلعب باك يمين يلعب قلب دفاع و الفكرة دي وصلت إنجلترا لحد نص نهائي كأس العالم 2014 .. هو صاحب فكرة ليه لا أجيب لاعيب زي (كيفين دي بروينه Kevin De Bruyne) طول عمره بيلعب جناح أخليه صانع ألعاب صريح و أديه بقي يمكن أحسن Playmaker في العالم دلوقتي .. هو صاحب فكرة ليه لا نخلي حارس المرمي يقوم بدور الليبرو .. و شوف رغم كل الأفكار دي كلها بتلاقيه بيهبد هبد ملوش أي معني أول ما يوصل بفرقته مرحلة خروج المغلوب من Champions League .. السيتي لا محتاج لاعيبه ولا محتاج يغير (جوارديولا) .. السيتي محتاج إن (جوارديولا) يقعد مع دكتور نفسي عشان يقوله بطل هبد يا فيلسوف الغبرة.
المصدر:
مقالة بعنوان At any other club of Manchester City’s size the boss would be facing the sack after losing to Lyon in the Champions League نشرت في جريدة The Daily Mail و ده لينك المقالة الأصلية:
