لما (تياجو الكانتارا Thiago Alcantara) جه ليفربول فالسوشيال ميديا اتملت بوستات علي ان ازي (تياجو) ده ولا كأنه (زين الدين زيدان) زمانه .. لما عرفنا ان في الشوط اللي هو لعبه قصاد تشيلسي لمس فيه الكوره اكتر من كل لاعيبه تشيلسي طول الماتش الناس اللي بتحب ليفربول قالت يا سلاااااام زي ما نكون اشترينا (اندريا بيرلو Andrea Pirlo) .. حتي لما اتسبب في ضربه جزاء اتقال بس بص الشياكه اللي هو وقع بيها (تيمو فيرنر Temo Werner)؟ .. جماهير بايرن ميونيخ من ناحيتها بتبص للزياط بتاع جماهير ليفربول و بتقول لنفسها هو انتوا عبط يا جدعان؟ .. (تياجو) صحيح لاعيب كبير وكل حاجه بس مش للدرجه دي .. حاول لما تيجي تقيم (تياجو) بصله من وجهه نظر حد بيشجع بايرن ميونيخ وحتلاقي نفسك قصاد حاجه غريبه اوي.
(تياجو) قعد مع بايرن ميونيخ 7 سنين .. 7 سنين دي فتره طويله اوي في اي شغلانه مش بس كره القدم .. الرجل ده جه بايرن ميونيخ عشان حاجه واحده بس و الحاجه دي ان لما النادي جاب (بيب جوارديولا Pep Guardiola) عشان يمسك الفرقه قالهم نصا كده Thiago or Nothing اللي هو عيل صغير شبطان في لعبه وحالف ما يبطل عياط الا لما مامته تجيبهاله .. الجمله دي هي اللي خلت جماهير بايرن ميونيخ تبص ل(تياجو) بشكل مختلف .. بالنسبه ليهم هو مش لاعيب عادي .. بالنسبه ليهم هو اللاعيب اللي الفيلسوف قال عليه ان من غيره انا مش حعرف العب وهي دي المشكله .. المشكله ان اللي بيشكل الرأي العام في اي لاعيب كوره هو كلام المحللين .. انت بتشوفها بنفسك دلوقتي .. تلاقي صفحه زي اليوم السابع او يلا كوره جايبه تصريح للاعيب سابق بيقول رايه في اي حاجه و بشكل اوتوماتيكي بتلاقي السوشيال ميديا بتكرر نفس الكلام .. في المانيا زيها زي مصر اللاعيبه اللي بطلت كوره و شغالين محللين هم اللي بيشكلوا الراي العام علي سوشيال ميديا و الناس دي في رايهم ان طريقه لعب (تياجو) دي متنفعش .. واحد زي (لوثار ماتيوس Lothar Matthaus) مثلا وده كان لاعيب خط نص فشيخ زمان شايف ان لاعيب خط النص المثالي هو حاجه شبه (طارق حامد) كده .. او بلاش (طارق حامد) عشان الزياط .. حاجه شبه (روي كيين Roy Keane) الله يمسيه بالخير اللي هو لاعيب ماشي يلطش و يضرب في خلق الله .. يعني ايه لاعيب خط نص مياخدش انذارات و ميتطردش .. عشان كده هو كان شايف و غيره الحقيقه شايفين ان (تياجو) ده لو مشي بكره الصبح فالفرقه مش حتتهز و علي راي (احمد حلمي) عادي اهو.
في راي الناس اللي بتحب (تياجو) جوه المانيا و اللي واحد منهم مثلا يبقي زميله في الفرقه (توماس مولر Thomas Muller) فانت عشان تبقي لاعيب ارتكاز كويس مش لازم تبقي بلطجي .. انت دورك انك تقطع الكوره .. (تياجو) مش بيكعبل .. (تياجو) بيعرف يسرق الكوره كويس .. الحقيقه ان مشكله جماهير بايرن ميونيخ في رايي انا الشخصي هي انهم مش عارفين اوي هو (تياجو) مركزه ايه بالضبط .. هو ينفع يلعب صانع العاب بس عشان (مولر) اساسي فهو مينفعش يلعب في المركز ده .. ده بيخليه دايما يلعب ارتكاز رغم ان ده مش مركزه اوي برده .. ده برده بيخليه بيحارب علي مركز بيلعب فيه اتنين عتاوله اللي هم (جوشوا كيميتش Joshua Kimmich) و (ليون جوريتزكا Leon Goretzka) اللي بيلعبوا جنب بعض كثنائي ارتكاز سواء في بايرن ميونيخ او في منتخب المانيا .. اساسا سبب ان (تياجو) يلعب اساسي في ماتشات Champions League هو ان الباك اليمين (بينجامين بافارد Benjamin Pavard) اتصاب و المدير الفني (هانسي فليك Hansi Fleck) ملقاش حل غير انه يرجع (كيميتش) يلعب باك يمين و (تياجو) يلعب جنب (جوتيزكا).
اداره بايرن ميونيخ من ناحيتها كانت شايفه (تياجو) و أهميته للفرقة بشكل مش بس منطقي انما فلسفي حتي .. رئيس النادي (كارل هاينز رومينيجيه Karl-Heinz Rummenigge) لما أتسال عن الموضوع قال ان ده لاعيب لما لعب في اسبانيا كان بيلعب في برشلونه .. لما لعب في المانيا لعب في بايرن ميونيخ .. فانا اقدر افهم انه لما حب يروح يجرب اللعب في الدوري الانجليزي راح ليفربول .. (تياجو) عنده 29 سنه اللي هو السن اللي لما بتوصله كلاعيب كره قدم و بتقول لنفسك انا عايز اجرب حاجه معينه لو معملتهاش دلوقتي فخلاص مش حتعملها تاني .. اللي هو انت عايز تقوله مالك يا عم (رومينيجيه) قالب علي سقراط ليه كده .. او يمكن الرجل حاسبها صح .. (تياجو) لاعيب كبير بس هو مش احسن حاجه في الدنيا .. ولو هو مشي مش محتاجين نجيب حد مكانه لان فيه (كورينتين توليسو Corentin Tolisso) موجود وفيه (كيميتش) اللي يمكن انت لو مش بتتفرج علي الدوري الالماني كتير فمتعرفوش اوي بس هو فعلا لاعيب محترم اوي .. بس حنقول ايه .. في واقع السوشيال ميديا اللي احنا عايشينه فالزياط كنز لا يفني.
المصدر:
مقاله بعنوان Thiago Alcantara is a world-class talent, so just why are Bayern Munich so philosophical about him leaving for Liverpool? Well, its complicated نشرت في جريده The Daily Mail وده لينك المقاله الاصليه:
https://www.dailymail.co.uk/sport/football/article-8659025/Thiago-world-class-Bayern-philosophical-leaving-Liverpool.html
