دبي .. الهجرة الجماعية لأصحاب المال والأعمال.

فيه حاجة غريبة بتحصل في دبي .. الناس دي لما ربنا إبتلي البشر بفيروس Covid-19 إقتصادهم إتضرب جامد وكان من نتايج ده إن كتير من العمالة الأجنبية هناك رجعت بلدها تاني .. ناس كتير وأنا منهم بسبب أزمة ديون دبي وبسبب Covid-19 توقعت إن الإقتصاد بتاع دبي لو متلحقش من أبوظبي فهو في طريقه إنه يروح في ستين داهية .. شركات كتير لقت نفسها بتخسر فلوس وقررت تمشي الموظفين بتوعها والموظفين لقوا إن الحياة غالية عليهم ومشيوا من البلد .. المشكلة إنك مش حتعرف تعوض الناس اللي مشيت دي .. ده بيسموه Brain Drain إن الناس اللي بتشتغل عندك واللي ممشية الشغل مشيت وإنت مش عارف تعوضهم .. حكومة دبي قررت تعالج المشكلة دي بإفتكاسة اسمها الفيزا الذهبية Golden Visa.

بداية من 2019 دبي بدأت تدي فيزا إقامة لمدة 10 سنين لكذا فئة منها الطلبة المتفوقة ورجال الأعمال والفنانين .. يعني مثلاً في يوليو 2021 الفيزا الذهبية دي عطوها ل45 طالب وطالبة جابوا فوق 95% في إمتحاناتهم .. في نفس الشهر عطوا الفيزا دي ل10,000 مُبرمج .. برده سبحان الله يعني الممثلة المصرية (ياسمين عبدالعزيز) خدت الGolden Visa دي عشان تنضم للفنانين اللبنانيين الثلاثة (نجوي كرم) و (مروان خوري) و (راغب علامة).

بس فيه حاجة حصلت غيرت كل ده وعشان تفهم الحاجة دي خليني أرصلك شوية إحصائيات وأرقام عشان تتحط في الصورة:

بناء علي كلام (روهال كوهيار Rohal Kohyar) مدير التسويق في شركة التطوير العقاري Luxhabitat Sotheby’s International Realty فخلال سنة 2021 لوحدها فيه أكتر من 20 ملياردير إشتروا عقارات في دبي .. شركته لوحدها حجم البيزنس بتاعها زاد 300% مقارنة بالفترة دي من السنة اللي فاتت.
دائرة الأراضي والأملاك ودي تقدر تقول كده وزارة الإسكان بتاعة دبي قالت إن نسبة بيع العقارات زادت 136.5% في أغسطس 2021 مقارنة بنفس الشهر السنة اللي فاتت .. مبيعات الفلل نطت 124% وسبب الزيادة دي هي إن كذا فيلا إتباعت في كومباوند Dubai Hills Grove Area واللي في المتوسط يعني ثمن الفيلا الواحدة بيوصل 27 مليون دولار .. عادة يعني شركة زي Luxhabitat Sotheby’s International Realty ممكن تبيع فيلا أو فيلتين في السنة بس لحد دلوقتي وأدينا في أكتوبر أهو هم بايعين 9 فلل.

عربية رولز رويس في مطار دبي الدولي مملوكة لرجل أعمال جايبها معاه وهو جاي.

الناس اللي بتشتري دول مش مجرد ناس معاها فلوس وعايزة تشتري عقار .. لا دول رجال أعمال قرروا يسيبوا كل حاجة وينقل شغله وحياته وعيلته لدبي .. ناس من إنجلترا وأميركا وألمانيا وحتي هونج كونج وسنغافورة .. يبقي السؤال هو ليه؟ إيه اللي يخلي رجل ألماني معاه فلوس يقرر يسيب ألمانيا ويجي يعيش في دبي؟ .. الحقيقة فيه كذا سبب:

واحد من الأسباب إن ناس كتير عجبها الطريقة اللي دبي بتعاملت بيها مع Covid-19 .. إنت بتتكلم عن بلد عايش فيها 3 مليون بني أدم عرفت توفرلهم المصل بتاع الفيروس بسهولة .. إختبارات PCR رخيصة وفي كل حتة .. وفي وسط الأزمة دي كلها فترة الحظر في دبي يدوبك إستمرت مدة صغيرة ما بين مارس وإبريل 2020.
برده من الأسباب إن إنت لو رجل أعمال عندك البيزنس بتاعك فإنت لو دفعت 2.7 مليون دولار تقدر تاخد الGolden Visa وبناء علي القانون 19 اللي أُقر في فبراير 2021 فإنت تقدر تنقل البيزنس بتاعك كله لدبي.
بس يمكن أهم سبب إن دبي ممكن تديلك إعفاء من الضريبة علي الدخل فلو إنت بيزنس مان عايش في بريطانيا أو أميركا وبتلاقي الحكومة كل شوية تاخد منك قرشين عشان تعوض المليارات اللي راحت بسبب فيروس كورونا فده بيخلي دبي تزغلل عنيك.

المصدر: