مفيش حاجه توصف السياسة الخارجية العمانية غير إنهم فندق الكونتينتال اللي في سلسلة أفلام John Wick .. في حالة إنك ملكش في الأفلام الأجنبي فالفكرة بمنتهي البساطة إن في عالم القتلة المحترفين و إن أي حد معاه فلوس ممكن يأجر أي حد عشان يقتل أي حد فكان طبيعي وسط الفوضي و الدم اللي فوق الركب بشوية ده إن يتعمل مكان أي حد يقدر يقعد فيه وأي طرفين يتقابلوا من غير ما يكونوا خايفين إن واحد فيهم يرفع سلاح علي التاني .. المكان ده في سلسلة أفلام John Wick كان فندق الكونتينتال .. أهو فندق الكونتينتال بتاع السياسة الخارجية للشرق الأوسط هو سلطنة عمان .. عشان تبقي فندق الكونتينتال فإنت محتاج تعمل حاجتين: أول حاجه إنك تقدر تدافع عن نفسك لو حد قل أدبه .. الفندق فيه خزنة أسلحة تكفي لتسليح جيش .. عمان محتاجه إن يبقي عندها القدرة تعض لو حد مد إيده عليها وده الجزء السهل لإن فعلياً إنت مش محتاج غير إنك تبعزقلك قرشين .. ثاني حاجه إنك تبني سمعة إنك مش مع حد ضد حد ودي بتاخد وقت لإن الثقة مش بتتبني في يوم و ليلة .. الحاجتين دول هم اللي حنتكلم عنهم دلوقتي.
سلطنة عمان بتصرف كتير فشخ علي جيشها .. هو الموضوع نسبي أنا عارف بس لو جيت تشوف العمانيين بيصرفوا قد إيه علي جيشهم و تقسمه علي عدد أفراد القوات المسلحة بتاعتهم اللي هم حوالي 42,600 تلاقي إن العمانيين بيدفعوا 2,500 دولار لكل عسكري .. عٌمان إنفاقها العسكري بيوصل 12% من إجمالي الناتج الإجمالي أو GDP بتاعهم وده يعتبر أعلي نسبة ضمن كل دول الشرق الأوسط .. وكل ده في رأي ناس كتير له مبرراته .. عُمان ليها حدود مشتركة مع اليمن و ما ادراك ما اليمن .. عُمان ليها ساحل علي الخليج العربي و قصاد منها علي الناحية الثانية حتلاقي إيران .. حدود عُمان مع الإمارات اترسمت بشكل نهائي مع بدايه القرن العشرين يعني مش من زمان .. صحيح إن عُمان و السعودية و الإمارات يبانوا قدام الناس حبايب بس فعلياً عٌمان عمرها ما حتثق في نوايا السعوديين و الإماراتيين .. خلال السنين اللي فاتت عُمان دفعت 6.5 مليار دولار عشان تشتري صفقة طيارات F-16 من اميركا و دفعت زيهم عشان تشتري صفقة طيارات تايفوون Typhoon من بريطانيا .. بمناسبة بريطانيا .. سنة 2018 العمانيين مضوا مع الإنجليز صفقة إنشاء قاعدة تدريب عسكرية مشتركة في عُمان وفي فبراير 2019 الاتنين مضوا إتفاقية دفاع مشترك.
خلال الفترة اللي فاتت عُمان عاشت حاجة هي مشافتهاش من أكتر من خمسين سنة .. تسليم و تسلم سلمي للسُلطة .. وفاة السلطان (قابوس) الله يرحمه وجه مكانه السلطان (هيثم بن طارق ال سعيد) واللي حيتفشخ شغل عشان يكمل نفس الدور اللي عمله السلطان (قابوس) .. متفتكرش إنك عشان تبقي سمسار علاقات دبلوماسية دي حاجة سهلة .. حاول تفكر فيها مثلاً من وجهه نظر الإماراتيين .. دلوقتي العُمانيين كان ليهم دور كبير في ان الإتفاق النووي الإيراني يتمضي سنة 2015 .. لو إنت إماراتي فأكيد حتبقي متضايق من العمانيين .. بلاش دي .. هو لما كيس الشيتوس جه الحكم و لغي الإتفاق مش إنت لو مكان العُمانيين كان دمك إنت حيتحرق بعد كل الشغل و الوقت و التعب اللي اتعمل عشان تقعد الإيرانيين و الأمريكان علي طرابيزة واحدة؟ .. لا و إيه لحد دلوقتي لو الأمريكان حبوا يوصلوا أي حاجه للإيرانيين بيرفعوا سماعة التليفون و يقولوها للعُمانيين وهم يوصلولها و العكس .. بلاش دي كمان .. الإماراتيين و السعوديين أنا في رأيي إن علاقاتهم بإسرائيل أقوي بكتير من عُمان بس السلطان (قابوس) برده هو الحاكم الخليجي الوحيد اللي استقبل رئيس وزراء إسرائيلي لما قابل (بنيامين نتنياهو) في مسقط سنة 2018 و طبعاً خد تريقة و تهزيق علي الخطوة دي بما فيه الكفاية .. زي ما عُمان عضوة في مجلس التعاون الخليجي فهي كمان أكتر حد بيعرف يتفاهم مع الحوثيين .. هل السلطان (هيثم) حيعرف يكمل نفس الدور اللي اتقنه السلطان (قابوس)؟ .. دي حاجة الزمن بس حيقدر يجاوب عليها.
المصدر:
- مقالة بعنوان Which country spends most per person on defense? It might not be the one you think نشرت في مجلة Forbes وده لينك المقالة الأصلية:
https://www.forbes.com/sites/dominicdudley/2020/02/19/country-spends-most-on-defense/#4cb70f4012f8
