لنفترض إن عندك طيارة من طيارات الجيل الخامس اللي ليها القدرة علي التخفي من الرادار زي F-22 Raptor أو F-35 Lightening II فإنت عشان تخلي الطيارة فعلاً تختفي من الرادار فلازم ترص كل أسلحتها وخزان الوقود بتاعها جواها .. جوه جسم الطيارة فيه مخزنين اللي هو حاجة كده شبه دولاب الهدوم في أوضة النوم أبو ضرفتين .. بتفتح الضرفتين وترص فيهم صواريخك وقنابلك وخزان الوقود بتاعك .. ده بيحطك قدام مشكلة .. يا إما تختفي من الرادار وتشيل تسليح يدوبك قد ما الدولاب بتاع الطيارة بيقدر يشيل .. أو إنك تضحي بالتخفي من الرادار وترص القنابل والصواريخ بتوعك بره جسم الطيارة وعلي جناحاتها .. عشان تقدر حجم المشكلة دي تعالي خد الطيارة F-35 مثلاً.
الدولاب بتاع الطيارة دي أخره يشيل 4 صواريخ جو- جو من طراز AMRAAM .. عارف بقي طيارة F-16 Fighting Falcon زي مثلاً اللي عندنا في القوات الجوية المصرية بتشيل كام صاروخ من دول؟ 8 صواريخ .. عشان تحل المشكلة دي عندك حل من إتنين: يا تكبر الدولاب .. يا تتعلم إزاي تطبق الهدوم بتاعتك بحيث تقدر تحط أكبر عدد من القمصان والتي- شيرتات والبوكسرات جوه الدولاب وده اللي أنا عايز أتكلم عنه النهاردة .. صواريخ AMRAAM دي صواريخ قديمة من أيام ما كنا بنرص الصواريخ علي أجنحة الطيارة ولا كأننا بننشر الغسيل عشان ينشف .. الجديد هو صاروخ صنعته شركة أميريكية إسمها رايثون Raytheon والصاروخ ده هم سموه شاهين أو Peregrine وكلمة شاهين دي إحدي مسميات اللغة العربية لفصيلة من فصائل الصقور .. السؤال دلوقتي .. يفرق إيه الشاهين عن الفيات 128 .. أو يفرق إيه Peregrine عن AMRAAM؟
الفكرة كلها في الأبعاد و الوزن .. صواريخ AMRAAM القديمة طول الواحد فيها تقريباً 3.5 متر ووزنه حوالي 150 كيلوجرام .. يعني بتتكلم في صاروخ طوله قد دور في عمارة بيتكوا .. علي الناحية الثانية صواريخ Peregrine طول الواحد فيها 1.8 متر ووزنه 67 كيلوجرام .. يعني تقريباً نص الطول ونص الوزن .. غير كده هو بيطير بنفس الفكرة بتاعة صواريخ AMRAAM إن بيبقي متركب فيه حاجة إسمها Multimode Autonomous Seeker يعني بيتركب عليه حساسات رادار Radar Sensor وحساسات أشعة تحت الحمراء Infrared Sensor بحيث إن الصاروخ وهو بيجري ورا الطيارة يا إما يجري ورا شكلها أو يجري ورا الحرارة اللي بتطلع من المحرك بتاعها .. لما بيقرب أوي من الطيارة بيبقي فيه عبوة ناسفة عشان تفجره لحتت قبل ما يلمس الطيارة المعادية .. كونه أخف في الوزن فده بيخلي قدرته علي المناورة عالية ودي حاجة مفهومة .. هي الفكرة كلها في المحرك بتاعه .. إزاي تعمل محرك يخلي صاروخ حجمه صغير وأبعاده صغيرة يطير مسافات طويلة بسرعات عالية عشان يوقع طيارة؟ .. ده سر الصنعة .. وده اللي مخلي الناس كلها تتكلم عن الصاروخ ده.
نقطة تانية مهمة وهي السعر .. خد عندك صاروخ زي AIM-120C7 وده أحدث صاروخ نزل السوق من عيلة صواريخ AMRAAM .. الصاروخ ده لما أميركا باعته لليابان وللمجر من كام شهر سعره وصل ما بين 2 ل2.7 مليون دولار للصاروخ الواحد .. اه ده شامل الصاروخ بالSoftware بتاعه بقطع الغيار بالصيانة بس برده 2 مليون دولار للصاروخ الواحد ده رقم عالي فشخ .. ده بيخلي شركة Raytheon بتقول إن صواريخ شاهين الجديدة دي سعرها تقريباً النص .. فكرة إن سعر الصاروخ يقل النص مخلي الأمريكان يفكروا في حاجة لطيفة أوي .. ليه لا لو أنا ناوي أضرب إيران مثلاً أبعت سربين طيارات F-35 .. السرب الأولاني شايل صواريخ Peregrine جوه الدولاب عشان ميطلقتش من الرادارات بتاعة الدفاع الجوي الإيراني بس السرب التاني عنده حل من إتنين: يا يشيل 16 صاروخ AMRAAM بعيد المدي و 12 صاروخ Sidewinder قصير المدي .. أو إنهم يشيلوا 20 صاروخ Peregrine بس الصواريخ دي كلها حتتركب علي جناحات الطيارة من بره وه الConcept اللي هم بيسموه Beast Mode أو مرحلة الوحش اللي هو انت بتقرأ الكلام ده و مش بتقول غير إحمينا يارب.
المصدر:
- مقالة بعنوان The F-35 is about to Enter Beast Mode .. نشرت في مجلة Popular Mechanics و ده لينك المقالة الأصلية:
tps://www.popularmechanics.com/military/weapons/a29071628/f-35-raytheon-peregrine-missile/
