مفيش سلاح القوات البحرية الأميريكية معتمدة عليه قد صواريخ توماهوك Tomahawk .. توماهوك ده بيتحط تحت عيلة صواريخ كروز Cruise Missiles .. هي مش متسمية علي إسم (توم كروز Tom Cruise) لو ناوي تقلش .. دي صواريخ بتطير زيها زي الطيارة المقاتلة جوه الغلاف الجوي للأرض و حضرتك بتوجهها للهدف اللي إنت عايز تدمره عن طريق حاجات كتير من ضمنها GPS أو عن طريق Data Link يعني إشارة جايه بالقمر الصناعي أو حتي بالليزر .. الصواريخ دي بدأ الشغل في تصنيعها في السبعينات و دخلت الخدمة لأول مرة سنة 1983 و لحد دلوقتي الأمريكان تقريباً إستخدموا 2,300 صاروخ من دول في حروبهم يعني بمعدل إنهم بيفرقعولهم 62 صاروخ من دول في السنة الواحدة .. عشان بس تستوعب قد إيه الصواريخ دي مهمة للقوات البحرية الأميريكية فعايزك تعرف إن ال145 قطعة بحرية اللي تحت إيد الأمريكان كلهم فيهم صواريخ توماهوك .. أهمية صواريخ توماهوك للبحرية الأميريكية زي أهمية البصل عند الست والدتك .. بمعني أخر القوات البحرية الأميريكية تحت إيدها أكتر من 4,000 صاروخ توماهوك .. بس هي فيه مشكلة صغيرة.
التصميم بتاع صواريخ توماهوك إتعمل علي أساس إننا عايزين صواريخ سريعة أوي بغض النظر بقي عن هي بتحرق بنزين قد إيه وعشان كده الصواريخ دي دونا عن باقي الصواريخ اللي في الدنيا بدل ما يتركبلها محرك صاروخي Rocket Engine إتركبلها محرك نفاث Turbine Engine زي اللي حتلاقيه في أي طيارة مقاتلة .. صحيح إن المحرك النفاث اللي في صواريخ توماهوك أصغر شوية من المحركات النفاثة بتاعة الطيارات بس بيمشي بنفس الفكرة .. المحركات دي إسمها F415 Turbofan من تصنيع شركة وليامز انترناشيونال Williams International .. برده المشكلة فين؟ .. المشكلة إن صواريخ توماهوك بتستخدم وقود طيارات مخصوص شوية إسمه JP-10 و ده وقود غالي حبتين .. زي ما إنت عارف بما إن عندك 4,000 صاروخ يبقي لازم يبقي تحت إيدك كمية JP-10 تكفي وده بفلوس .. فلوس كتير.
الحل إن قيادة القوات البحرية راحت لمعمل أبحاث محترم أوي إسمه لوس ألاموس الوطني Los Almos National Labs عشان يلاقولهم بديل لJP-10 ده .. بعد شوية شغل طلع المعمل بوقود جديد معمول من الذرة .. أيوه معمول من الذرة .. ده معناه إن أولاً إنت مش حتبقي محتاج إنك تروح لشركات البترول سواء بقي الأميريكية أو إنك تروح تجيب بترول من بره و البترول ده تعمله مصنع بتروكيماويات مخصوص عشان تنتج منه JP-10 .. كل دي فلوس إنت حتوفرها .. فوق ده كله إن الوقود اللي معمل لوس ألموس عمله بيتصنع بنفس طريقة تصنيع الإيثانول .. يعني طريقة التصنيع نفسها رخيصة .. طب أزيدك من الشعر بيت .. الأمريكان كل سنة بيزرعوا 90 مليون فدان ذرة و الذرة ده غالباً يا بتروح لتصنيع مشروب الفركتوز اللي هو بديل السكر أو بيروح عشان يبقي علف للمواشي .. يعني الذرة موجود و التصنيع سهل .. مش بس كده .. لو بصيت علي الحسبة اللي معمل لوس ألموس عملها حتلاقي إنك لو بطلت تستخدم JP-10 و بقيت تعتمد علي وقود الذرة بتاعهم ده فسعر صاروخ توماهوك حيقل حوالي 50% .. سعر JP-10 حوالي 27.5 دولار للجالون في حين إن سعر الوقود المعمول من الذرة حيوصل 10.7 دولار للجالون بس .. في حالة إنك بتسأل نفسك طب وقود JP-10 ده حنعمل بيه إيه؟ فإنت ممكن تستخدمه كوقود للطيارات أو تشوف عايز تعمل بيه إيه ينفعك بس متقلقش مش حيترمي في الزبالة.
المصادر:
- مقالة بعنوان The new and improved Tomahawk missile now runs on corn نشرت في مجلة Popular Mechanics وده لينك المقالة الأصلية:
https://www.popularmechanics.com/military/research/a32631489/tomahawk-missile-new-fuel/ - مقالة بعنوان Revolutionizing Tomahawk fuel نشرت علي الموقع الرسمي لمعمل لوس ألاموس الوطني Los Alamos National Laboratory:
https://www.lanl.gov/discover/publications/national-security-science/2020-spring/tomahawk.php
