موضوعنا النهاردة اللي حنتكلم عنه هو أشهر ممثل في العالم .. هو أكتر نجم شباك الناس كلها عارفاه .. إنت ممكن تكون ماشي في شوارع واحدة من قري الصعيد اللي مفيهاش لا مياه و صرف صحي و تلاقي أم بتهزق إبنها تقوله “لاتكونش فاكر نفسك (توم كروز Tom Cruise)” .. عشان كده إحنا حنتكلم عن (توم كروز) .. مش عشان نثبت إن الأم عندها حق في تهزيق إبنها إنما لإن عشان (توم كروز) مؤخراً عمل حاجة مكناش متوقعين إنه يعملها و الحاجة دي إنه عمل فيلم حلو.
زي ما إنت قريت كده .. أخر فيلم نزل في السينمات ل(توم كروز) هو فيلم American Made أو صنع في أميركا و اللي بناء علي رأي النقاد السينمائيين إنه أحسن فيلم يعمله (توم كروز) من سنين .. صحيح الفيلم إيراداته في شباك التذاكر الأميريكي مكنتش كويسة أوي بس اللي منقدرش ننكره إن الفيلم فضل متربع علي عرش شباك التذاكر لمدة أسبوعين ورا بعض .. لو قارنت فيلم American Made بالفيلم اللي قبله اللي عمله (توم كروز) اللي هو فيلم The Mummy أو المومياء فإنت كأنك بتقارن ما بين فيلم الأرض و فيلم اللمبي ثمانية جيجا و هي دي المشكلة و المشكلة مش واضحة أوي زي ما إنت قد تكون متخيل.
زمان و زمان ده اللي هو في التسعينات و أوائل الألفينات كنت ممكن تلاقي ممثل نجم شباك زي (توم هانكس Tom Hanks) ينزل بفيلم مش مصروف عليه كتير زي فيلم Cast Away مثلاً و يكسر به الدنيا أو ممثل تاني زي (دينزل واشنطن Denzel Washington) لما أبهر الدنيا كلها بأداءه في فيلم Training Day و أساساً الفيلم مش مصروف عليه خالص تقريباً .. دلوقتي عشان ممثل من دول ينزل بفيلم و يكسر الدنيا زي ما بنقول يبقي لازم يبقي فيلم Superheroes من بتوع Marvel ولا DC Comics .. اللي عمله (توم كروز) في فيلم American Made إنه رجعك تاني لأيام زمان إن ممثل تقيل أوي له إسمه و له معجبينه يعمل فيلم بميزانية صغيرة مش مصروف عليه و مفيهوش مشاهد أكشن بمؤثرات خاصة متكلفة ملايين و تلاقي الفيلم حلو و تبقي مبسوط و إنت بتتفرج عليه .. هنا (توم كروز) كان قدامه حاجة من إتنين يقدر يعملهم:
الحاجة الأولي إنه يمشي مع التيار .. يختار إنه يعمل أفلام بميزانية ضخمة مبنية علي سيناريو ضعيف بس مؤثرات بصرية و شغل جرافيك مكلف ملايين و أقرب حاجة لفيلم بالمواصفات دي هو الجزء الثاني من فيلم Top Gun اللي فيه كلام إنه حيتعمل .. فيلم Top Gun لما نزل في السينمات سنة 1988 هو اللي نقل (توم كروز) للعالمية بس مش معني إنك ممثل كبرت شوية في السن و عايز تحافظ علي مكانتك في السوق و إنت شايف إن البساط بيتسحب من تحت رجلك إنك تروح تعمل الجزء الثاني لفيلم إتعمل في الثمانينات .. فكرة الجزء الثاني من Top Gun فكرة فاشلة و لازم (توم كروز) يبعد عنها .. أنا فاهم أوي إحساس إنك تبص علي سنة 2016 و تسأل نفسك يا تري مين أكثر الممثلين اللي جابوا إيرادات فتلاقي نفسك بتبص علي أسامي (روبيرت داوني جونيور Robert Downey Jr.) و (كريس إيفانز Chris Evans) و (بين أفليك Ben Affleck) و الثلاثة عملوا أفلام Superheroes فتقول لنفسك ليه مبقاش زيهم و أعمل شخصية من بتوع الSuperheroes دول و أجيب فلوس كتير بس صدقني حتندم .. إنت معاك سلسلة ناجحة أوي زي Mission: Impossible جابت أرباح تجاوزت ال2 مليار دولار .. ركز عليها و خليها تكمل معاك.
الحاجة الثانية إن (توم كروز) يكمل علي نفس سكة American Made .. و عشان تفهم ليه هو محتاج فعلاً يكمل في السكة دي ركز شوية في اللي حصل في الأسابيع الأولي اللي إتعرض فيها الفيلم في أميركا .. في الوقت ده الخناقة علي صدارة شباك التذاكر الأميريكي كانت بين 3 أفلام مختلفين خالص عن بعض .. فيلم It و ده فيلم رعب عن مهرج بيقتل الأطفال و مبني علي رواية للكاتب الروائي الأميريكي الشهير أوي (ستيفن كينج Stephen King) .. فيلم Kingsman: The Golden Circle و ده الجزء الثاني من فيلم Kingsman و ده فيلم إتعمل عشان يجيب فلوس من طقم الممثلين اللي كله نجوم للمصاريف المدفوعة علي مشاهد الأكشن و إنه تكملة لجزء أول حقق نجاح محترم أوي في شباك التذاكر ففي الأخر إنت بتتكلم عن فيلم أستوديو الإنتاج عمله عشان يجيب فلوس و أخر حاجة فكروا فيها هو ياتري الجزء الثاني حيبقي أحسن أو علي الأقل في نفس مستوي الجزء الأول ولا لا .. الفيلم الثالث هو فيلم American Made بتاع (توم كروز).
ده يحطك قدام حقيقتين:
- الحقيقة الأولي مش معني إن فيلم زي Kingsman: The Golden Circle هو الجزء الثاني من فيلم ناجح و الCast بتاعه عبارة عن طقم عمل من ممثلين درجة أولي إن الفيلم نجاحه مضمون .. و دي حاجة لازم الناس اللي بتسعي إنها تعمل الجزء الثاني من Top Gun إنها تكون فاهماها إن الفيلم نجاحه مش حيبقي مضمون لمجرد إنه الجزء الثاني لفيلم كسر الدنيا من 30 سنة.
- الحاجة الثانية إن إستطلاعات الرأي اللي إتعملت علي فيلم American Made قالت إن أكثر من 50% من الأمريكان اللي راحوا إتفرجوا علي الفيلم في السينمات معدل أعمارهم فوق الخمسين سنة .. ده يوريك إن الFan Base أو القاعدة الجماهيرية ل(توم كروز) إتغيرت و مبقتش زي زمان .. عشاقه مبقوش البنات اللي تحت العشرين ولا الشباب اللي في الكليات إنما جيل أكبر شوية اللي هو جيل الثمانينات و السبعينات و دي النقطة المهمة .. (توم كروز) محتاج يبطل يعمل أفلام زي The Mummy اللي المفروض ممثل في نص عمره هو اللي يعملها و يبدأ يعمل أفلام عن بني أدمين في سنه .. اللي هم الرجاله في الخمسينات و الأربعينات المتجوزين و بكروش و تعساء في جوازاتهم .. حاجة كده زي فيلم It’s Complicated اللي كان من بطولة (أليك بولدوين Alec Baldwin) و إخراج (نانسي مايرز Nancy Meyers) و الحقيقة إن الفيلم ده كان حاجة حلوة في الCareer بتاعة (أليك بولدوين) اللي علي فكرة في نفس سن (توم كروز) .. ده اللي (توم كروز) محتاجه إنه يعمل فيلم عن شخصية بني أدم طبيعي قدام ممثلة في سنه و تكون بتعرف تمثل عشان تتفرج عليه و تقول لنفسك أهو ده (توم كروز) بتاع زمان.
بس خلي بالك .. حتي لو (توم كروز) قرر إنه يمشي في السكة الثانية إنه يعمل أفلام ليها معني و تناسب سنه زي American Made فده مش معناه إنه حيبقي هو النجم اللي بيجيب فلوس و نجاحه المادي مضمون .. فيلم American Made كان من أقل الأفلام اللي عملها (توم كروز) جابت إيرادات في شباك التذاكر العالمي و يمكن ده سببه عنوان الفيلم .. فكر فيها .. إنت شاب في مصر خارج مع صحابك أو مع خطيبتك و قررتوا تروحوا سينما إيه اللي يخليك تتفرج علي فيلم عنوانه American Made .. و فيه نقطة كمان لازم اللي حولين (توم كروز) ينبهوه ليها و هي علاقته بالمخرجين بتوعه.
(توم كروز) إشتغل مع (ستانلي كوبريك Stanley Kubrick) في فيلم Eyes Wide Shut و إشتغل مع (ستيفن سبيلبيرج Steven Spielberg) في أفلام Minority Report و War of The Worlds و إشتغل مع (مايكل مان Michael Mann) في فيلم Collateral و كلها أفلام مهمة في تاريخ السينما و سبب إنها أفلام مهمة إن (توم كروز) كان بيسيب نفسه للمخرج .. المشكلة بدأت تظهر لما (توم كروز) في أفلامه الأخيرة بقت كلمته أهم من كلمة المخرج و ده بيخلي الفيلم يطلع زي الزفت .. خليني أفكرك بفيلم زي Jack Reacher اللي تأثير (توم كروز) فيه كان أقوي من تأثير المخرج و في الأخر الفيلم طلع زفت سواء هو ولا الجزء الثاني بتاعه Jack Reacher: Never Go Back .. لما (توم كروز) بيسيب نفسه للمخرج بتاعه بيطلع من جواه الممثل اللي كلنا حبيناه .. خليني أفكرك بمثال تاني هو فيلم Magnolia و ده فيلم أنتج سنة 1999 و أخرجه (بول توماس أنديرسون Paul Thomas Anderson) و دي كانت واحدة من ال3 مرات اللي (توم كروز) يترشح فيها لجائزة الأوسكار كانت عن دوره في الفيلم ده.
نقطة أخيرة إحنا في مصر مش فاهمينها و يمكن حتي مش عارفينها و هي علاقة (توم كروز) بديانة إسمها ساينتولوجي Scientology .. مش مجالنا دلوقتي إننا نتكلم عن إيه هي الديانة دي و بتقول إيه بس المشكلة إن (توم كروز) معين نفسه محامي للديانة دي .. عشان أقربلك الصورة تخيل معايا إن ممثل زي (أحمد عز) مثلاً مؤمن بالمذهب الشيعي .. مش معني كلامي إنه كده أنا بس بديلك مثال توضيحي .. هو حر يعمل اللي هو عايزه بس مش معني كده إنه كل شوية يطلع في الإعلام يدافع عن المذهب الشيعي .. أميركا مش زي مصر .. أميركا عادي إنك تطلع تقول إنك بتعبد اللي إنت عايزه إياكش حتي تعبد البقر مش قضية بس القضية إن دفاعك عن معتقداتك يبدأ يؤثر علي نجاحك في شغلك خصوصاً في مهنة التمثيل اللي جزء كبير من نجاحك فيها مربوط بوجهة نظر الناس فيك .. بص علي ممثلة زي (إليزابيت موس Elizabeth Moss) .. دي ممثلة موهوبة جداً بس مش مشهورة أوي و زيها زي (توم كروز) مؤمنة برده بالساينتولوجي بس خلال ترويجها لأحدث أعمالها مسلسل The Handmaid’s Tale بعدت نفسها خالص عن أي كلام عن الساينتولوجي و رفضت تجاوب علي أسئلة الصحفيين بخصوص الموضوع و المسلسل مكسر الدنيا و كل الناس بره بتتكلم عنه .. يمكن (توم كروز) محتاج يتعلم شوية منها.
المصدر:
مقالة بعنوان Ten Ways to Fix Tom Cruise’s Career- First, Step Away From that Top Gun Sequel نشرت في جريدة The Guardian البريطانية و ده لينك المقالة الأصلية:
https://www.theguardian.com/film/2017/oct/05/fix-tom-cruise-career-top-gun-sequel-flops
توم كروز له اكتر من ترشيح للاوسكار.. مرة احسن دور رئيسي سنة ١٩٨٩ عن فيلم ((مولود في الرابع من يوليو)) و مره تانية عن فيلم ((جيري ماجواير)) مش متذكر السنة…. و مرة في دور مساعد عن ((ماجنوليا)) سنة ٩٩