لينك التسجيل الصوتي علي ساوند كلاود:
https://on.soundcloud.com/dQrLf
المعلومة اللي يمكن عند أغلبنا بخصوص صناعة السينما هي إن المنتج هو الكل في الكل .. ده الرجل اللي بيدفع و بناء عليه كلمته تمشي علي أطخن طخين .. الكلام ده يمشي علي مصر و بره مصر .. هنا عندنا (السبكي) و (تامر مرسي) .. هناك كان فيه (هارفي واينستين) ربنا ياخده اللي في مرة (ميريل ستريب) وصفته و هي بتستلم جايزة الجولدن جلوب إنه إله السينما .. في هوليوود شركات الإنتاج هي الكبير أوي .. هي اللي بتقول لأجدعها نجم شباك إمسك السلك يا أشرف .. حكاية النهاردة اللي حنتكلم عنها هي عن حالة شاذة شوية عن اللي إنت متعود عليه .. حكاية جوازة بتحكمها المصالح بس كلها خناق و حرقة دم و أعصاب .. حكاية العلاقة بين (توم كروز) و شركة باراماونت Paramount اللي بقالها 37 سنة بتنتجله أفلامه .. علاقة فيها شركة باراماونت بتاكل الشهد من ورا شغل (توم كروز) في مقابل إن (توم كروز) بيعمل اللي هو عايزه من غير ما حد يقوله مش لازم أو بلاش أو كده كتير .. علاقة دايماً بتبوظها حاجة واحدة إسمها باراماونت بلاس Paramount+.
الموضوع بدأ بالنجاح اللي محدش شافه قبل كده في الدنيا لمسلسل Game of Thrones اللي أنتجته شركة HBO .. إنت ممكن تكون شخص ملكش في المسلسلات ولا الأفلام و مبتتفرجش عليهم بس أراهنك إنك سمعت عن مسلسل Game of Thrones .. يدوبك الموسم الثامن و الأخير من المسلسل خلص و ربنا إبتلانا بجائحة فيروس كورونا و لإن عندنا في مصر إحنا مطبقناش حظر النزول للشارع بما يرضي الله فإنت مش متخيل أوي اللي حصل بره و خصوصاً في أوروبا و أميركا .. لمدة سنتين هم كانوا قافلين .. لمدة سنتين محدش كان بينزل الشارع غير العاملين الأساسيين أو Essential Workers زي البوليس و الدكاترة .. لمدة سنتين مكنش فيها سينما .. طب الناس قاعدة في بيوتها محتاجة تتسلي .. ده فتح الباب لماسورة قنوات بتعرض مسلسلات إتكسرت و غرقت الدنيا .. تقريباً كل أستوديو و شركة إنتاج أفلام في أميركا عملت قناة بحيث كده إنت كمشاهد عندك القنوات القديمة اللي إنت عارفها اللي هم HBO و Netflix و Showtime بس بقي عندك فوقيهم كمان Disney+ و دي القناة بتاعة شركة Disney .. بقي عندك أمازون برايم Amazon Prime .. بقي عندك HBO Max و دي بتعرض الأفلام اللي بتنتجها شركة Warner Bros. .. و طبعاً بقي فيه Paramount+ .. أه صحيح و لسه فيه Apple tv+.
زي ما إنت شايف كل قناة عمالة تعرض مسلسلات بالهبل لدرجة إن المشاهد مش لاقي وقت يتفرج .. يعني مثلاً .. خلال شهر يونيو 2022 بس قناة زي Disney+ عرضت 3 مسلسلات ورا بعض تقال أوي هم Moon Knight تبع سلسلة أفلام Marvel و اللي بمجرد ما خلص عرضت مسلسل Obi-Wan Kenobi من سلسلة Star Wars و قامت لاحمه في ظهره مسلسل Ms. Marvel من سلسلة Marvel .. قناة تانية زي Amazon Prime منزلة مسلسلين أحلي من بعض في وقت واحد اللي هم الموسم الثالث من مسلسل The Boys و الموسم الأول من مسلسل The Terminal List .. طب Paramount+ يتعرض عليها إيه؟ .. هم عرضوا علي (توم كروز) يعملوا مسلسل مبني علي أحداث فيلمه Days of Thunder و ده فيلم إتعمل في الثمانينات يعني كتير منكوا مشافهوش و بيتكلم عن حياة السواقين بتوع سباقات ناسكار بس (توم كروز) رفض .. عرضوا علي (توم كروز) يعملوا مسلسل مشتق من سلسلة Mission: Impossible بس برده (توم كروز) رفض مع إن السلسلة أساساً بدأت كمسلسل في الستينات من إنتاج قناة CBS.
المشكلة بدأت و (توم كروز) بيصور الجزء السابع من سلسلة Mission: Impossible اللي حيبقي عنوانه Dead Reckoning Part 1 .. واضح من الإسم إن مش محتاجة ذكاء يعني إن حيبقي فيه جزء ثامن .. المهم .. الوضع الحالي إن الجزء السابع تقريباً تصويره خلص و شغالين دلوقتي في تصوير الجزء الثامن و الإتنين من إخراج (كريس ماكوري) .. جميل .. من سنة تقريباً لما (توم كروز) كان بيصور الجزء السابع جت شركة باراماونت قالتله بص يا أسطي إنت في المعتاد يعني لما بننتجلك فيلم جديد بيفضل معروض في السينمات حوالي 3 شهور بس الجزء السابع من السلسلة حينزل في السينمات 45 يوم بس عشان بعد كده حينزل علي قناة Paramount+ بدل ما إحنا مش لاقيين حاجة نعرضها علي القناة كده .. فعلياً كانت حتبقي خناقة لرب السما في المحاكم لولا إن (توم كروز) قال خلينا بس نأجل الخناقة دي لحد ما نخلص ميتين الفيلم و بعد كده نتكلم .. مع العلم إن معاد عرض الجزء السابع إترحل 4 مرات بحيث المعاد اللي شبه رسمي هو يوليو 2023.
إذن المشكلة واضحة .. الشركة عايزة تسترزق من شغل (توم كروز) عشان تشغل القناة بتاعتها اللي هي عاملاها و هو مش في دماغه أصلاً .. هو مش بتاع مسلسلات ولا يفرق معاه الكلام ده .. هو بتاع أفلام و مش أي أفلام و يمكن عشان كده دماغه مولفة أوي مع (كريس ماكوري) .. الإتنين أول مرة يشتغلوا مع بعض كان سنة 2008 في فيلم Valkyrie اللي (كريس ماكوري) كتبله السيناريو .. سنة 2011 (توم كروز) كان بيصور الجزء الرابع من سلسلة Mission: Impossible اللي هو Ghost Protocol و اللي في نص التصوير حصلت مشكلة في السيناريو ف(توم كروز) لإنه هو المنتج المنفذ بتاع السلسلة جاب (كريس ماكوري) عشان يلحق الفيلم و الحق يتقال ناس كتير شايفه إن Ghost Protocol يمكن هو أحلي جزء في السلسلة .. متفهمش كنوع من المكافأة ولا إيه سنة 2015 (توم كروز) إختار (كريس ماكوري) عشان يخرج الجزء الخامس Rogue Nation .. هنا بدأ التريند اللي كان مخلي الناس اللي ماسكة شركة باراماونت تحط إيدها علي قلبها .. دخلنا مرحلة الإعداد للتصوير و إختيار الأماكن اللي حنصور فيها و لسه السيناريو مخلصش .. إخترنا الممثلين و لسه السيناريو مخلصش .. بدأنا نصور و خلصنا تصوير نص الفيلم و لسه السيناريو مخلصش .. هي دي طريقة شغل (كريس ماكوري) و اللي لسبب ما لا يعلمه إلا الله عاجبه دماغ (توم كروز) .. إحنا مش بنصور بسيناريو .. إحنا بنصور بأفكار .. يعني إحنا و إحنا شغالين حنلاقي فكرة جديدة مطرقعة متعملتش قبل كده و نحطها في السيناريو .. دي نفس الطريقة اللي إتصور بيها الجزء السادس Fallout سنة 2018 .. يحكي أن (سايمون بيج) واحد من الممثلين بتوع الفيلم كان كل شوية يروح لأوضة (كريس ماكوري) يسأله ممكن أعرف حنصور إيه النهاردة فيرد عليه (كريس) إديني سيكا بس و حقولك أنا بكتب السيناريو و الحوار أهو.
ممكن السؤال اللي إنت بتسأله لنفسك دلوقتي هو ليه شركة باراماونت ساكته؟ .. دي مش طريقة شغل و أي حد شغال في صناعة السينما حيشهد بالعشرة بده .. كونك معاكش سيناريو واضح بيخلي شركة الإنتاج مش عارفه تحدد هي ميزانية الفيلم حتوصل كام .. لو إنت بتسأل السؤال ده خليني معلش أرد عليك بسؤال .. إزاي تقول للسوبرستار اللي جابلك أرباح 3.6 مليار دولار في سنين شغله معاك يعمل إيه و ميعملش إيه؟ .. بذمتك حيبقي ليك وش؟ .. إنت شفت النجاح الرهيب اللي حققه فيلم Top Gun: Maverick؟ .. الفلوس اللي هو بيدخلها للشركة بتخليهم يحطوا جزمة في بقهم و يعملوله اللي هو عايزه .. عايز يتعلق بره طيارة حاضر .. عايز يتشعبط بره إزاز برج خليفة حاضر .. عايز يسوق طيارة هليكوبتر يخمس بيها في الجو حاضر .. ميزانية الجزء السابع من السلسلة وصلت 290 مليون دولار يتقاله حاضر و بس .. في نفس الوقت (توم كروز) عارف معلومة مهمة .. باراماونت محتاجاه أكتر ما هو محتاجهم.
باراماونت معندهاش حاجة تجيب فلوس .. سلسلة Transformers خلاص مبقاش عليها الطلب و أخر جزء اللي هو The Last Knight اللي إتعمل سنة 2017 مش بس منجحش ده خسّر الشركة 100 مليون دولار .. يا مؤمن ده أكتر فيلم من سلسلة Mission: Impossible فشل في السوق كان الجزء الثالث و جاب أرباح 398 مليون دولار .. الجزء السادس Fallout جاب أرباح 791.6 مليون ولار .. الجزء الخامس اللي في رأيي أضعفهم فنياً جاب أرباح 690 مليون دولار .. حتي لو ميزانية الجزء السابع زادت أوي فرقم 290 مليون دولار ولا حاجة لو قارنته بالفلوس اللي بتتصرف علي أي فيلم من سلسلة Marvel أو جيمس بوند .. الجزء السادس ميزانيته وصلت 180 مليون دولار .. عادي يعني .. خصوصاً لو عرفت إن السبب ورا الميزانية اللي عمالة تزيد دي مش سببه إن (توم كروز) بيحرق في فلوس علي الفاضي .. لا خالص .. ده حظ إبن تييييت بعيد عنك.
عارف إنت المثل الشعبي اللي يقولك قليل البخت يلاقي العظم في الكرشة .. يوم 24 فبراير 2020 كان المفروض يبقي أول يوم تصوير للجزء السابع من السلسلة و كان حيبدأ في مدينة فينيسيا أو البندقية الإيطالية .. جت شركة باراماونت قالتلك إحنا حنوقف تصوير كل الأفلام بتاعتنا عشان إجراءات الأمان ضد فيروس كورونا .. طب موقف (توم كروز) كان إيه؟ .. أه نسيت أقولك كان هو و (كريس ماكوري) في المستشفي في العاصمة الإنجليزية لندن بيتعالجوا من فيروس كورونا و علي فكرة (كريس ماكوري) حالته كانت حرجة جداً .. الحمد لله الإتنين خفوا و كان المفروض التصوير يكمل في مارس في العاصمة الإيطالية روما لما فجأة الحكومة الإيطالية يوم 9 مارس أعلنت حظر كامل في البلد .. التصوير فضل عطلان لحد ما الحكومة البريطانية سمحت ليهم يصوروا في لندن في يوليو 2020 و بعدها (توم كروز) بنفسه كلم وزير الثقافة النرويجي عشان يستأذنه إن التصوير يبدأ في بلده و عشان التصوير يمشي مع معايير الحظر بتاعة النرويج ف(توم كروز) دفع من جيبه الشخصي 676,000 دولار عشان يأجر سفينة كاملة عشان طاقم التصوير يعيش فيها وهم بيصوروا في النرويج .. في أكتوبر 2020 التصوير بدأ في إيطاليا بعد ما البلد شالت الحظر بس التصوير وقف لتالت مرة عشان كذا فرد من طاقم التصوير إتصاب بفيروس كورونا .. شوية و التصوير راح فينيسيا تاني عشان التصوير يقف لرابع مرة بسبب برده حالات إصابة بفيروس كورونا .. في ديسمبر 2020 إتسرب التسجيل الصوتي للتهزيق اللي (توم كروز) وجهه لطاقم التصوير عشان مش بيلتزموا بالقواعد بتاعة التباعد الإجتماعي و الحقيقة التسجيل ده لو سمعته عايزك تتخيل نفسك موظف في شركة و مديرك بياخدك غسيل و مكواه بالشكل ده قدام الشركة كلها و قولي حتحس بإيه .. بالمناسبة يوم 14 فبراير 2021 التصوير وقف للمرة الخامسة في لندن بسبب برده حالات إصابة بفيروس كورونا .. في يونيو 2021 التصوير وقف للمرة السادسة بعد ما 14 شخص من ضمنهم (توم كروز) و (كريس ماكوري) إتصابوا بفيروس كورونا بسبب مشهد تصوير في Night Club.
في صيف 2021 كانت فيه إشاعة مالية البلد إن شركة باراماونت ناوية تمشي (جيم جيانوبولوس) و ده اللي كان ماسك منصب المدير التنفيذي للشركة و حيجيبوا مكانه (برايان روبينز) و ده اللي ماسك المدير التنفيذي لقناة نيكولوديان Nickelodeon و هو المسئول عن محتوي الأطفال علي قناة Paramount+ .. في الوقت ده (جيم جيانوبولس) راح سافر لندن يتكلم مع (توم كروز) و (كريس ماكوري) عشان كانت فيه مشكلة .. فاكر لما قلتلك إن الإتنين طريقة شغلهم إن مفيش سيناريو إنما فيه أفكار .. كان المفروض إن فيه إتفاق إن فيه مشهد أكشن حيتصور بغواصة و كان المفروض المشهد ده حيتحط في الجزء الثامن يعني حيتحمل علي ميزانية الجزء الثامن .. هوبا (توم كروز) و (كريس ماكوري) غيروا رأيهم و عايزين يحطوا المشهد ده في الجزء السابع .. (جيم جيانوبولوس) راح يقنعهم بإن ده مينفعش و كده ميزانية الجزء السابع حتضرب أكتر ما هي ضاربه .. وهو في الإجتماع جاله خبر إن الإشاعة بقت بجد و إتشال من منصبه و جه مكانه (برايان روبينز) .. بمجرد ما الخبر إتأكد مش بس (توم كروز) و (كريس ماكوري) إنما كل الناس اللي شغالة في بيزنس صناعة السينما كانت فاهمه كويس القرار ده معناه إيه .. باراماومت خلاص مبقتش شركة إنتاج أفلام بقت شركة إنتاج مسلسلات.
(برايان روبينز) ده رجل دماغه واضحة .. ده بتاع سينما الأطفال و كرتون و ماما (سامية) .. ده مش بتاع Mission: Impossible و Transformers .. هو جاي عشان الشركة مش عايزه تعمل أفلام مكلفة تاني خلاص .. التوجه الجديد إننا مش ناويين ننافس Warner Bros و Disney .. لا خالص .. إحنا جايين ننافس Netflix و HBO .. غالبا الجزء الثامن من سلسلة Mission: Impossible مش بس حيكون أخر فيلم يعمله (توم كروز) في دور (إيثان هانت) إنما كمان ممكن يبقي أخر فيلم كبير تعمله شركة باراماونت.
المصادر:
- مقالة بعنوان The Real Mission Impossible: Saying “No” to Tom Cruise نشرت في مجلة Hollywood Reporter و ده لينك المقالة الأصلية:
https://www.hollywoodreporter.com/movies/movie-features/tom-cruise-mission-impossible-paramount-1235116830/
