لينك التسجيل الصوتي للمقاله علي Sound Cloud:
https://soundcloud.com/user-112011687-312727988/batman-begins
السنة دي حيكون عدي 15 سنة علي عرض فيلم Batman Begins الجزء الأول من ثلاثية باتمان اللي أخرجها (كريستوفر نولان Christopher Nolan) و اللي الحقيقة هو فيلم غريب جداً لسبب بسيط هو إنه أكتر فيلم Underrated عمله (نولان) .. أنا أتحداك و برهان الخمسين جنيه اللي في جيبي إنك لو نزلت الشارع سألت الناس الي عارفه مين هو (كريستوفر نولان) إيه أكتر فيلم هو أخرجه الناس بتحبه ففيلم Batman Begins مش حيجي أصلاً ضمن أكتر خمس أفلام حتتقال .. طب إيه رأيك بقي إنك لو ركزت سؤالك علي إيه أكتر فيلم من ثلاثية باتمان الناس بتحبه فالأغلبية العظمي يا حتقولك The Dark Knight أو The Dark Knight Rises .. محدش بيجيب سيرة Batman Begins وده السبب في إنه فيلم غريب.
الفيلم ده هو أول فيلم يعمله (كريستوفر نولان) يحقق نجاح تجاري يعني أول فيلم هو يعمله يجيب فلوس كتير و مش كتير أوي الصراحة .. الفيلم ده جاب 371 مليون دولار أرباح علي ميزانية 150 مليون دولار .. الفيلم ده إنتاج سنة 2005 ودي أغرب حاجة فعلاً لو فكرت فيها شوية .. عارف إن ناس كتير ضعيفة في التواريخ بس خليني أفكرك .. فيلم Iron Man اللي كان هو الشرارة اللي ولعت مشروع MCU أُنتج سنة 2008 .. فيلم Batman Begins كان فيلم سوبرهيرو قبل ما Marvel تفكر تعمل فيلم سوبرهيرو .. الفيلم ده كان سابق عصره بسنين و رغم كده محدش بيجيب سيرته .. لكن اللي مخليني فعلاً بحب الفيلم ده جداً هو الطريقة اللي (كريستوفر نولان) بيعمل بيها أفلامه واللي تتلخص في كلمة واحدة .. التصعيد.
عشان تفهم أنا قصدي إيه إسمحلي أرجعك لأخر مشهد في فيلم Batman Begins لما باتمان كان واقف فوق سطوح قسم البوليس ومعاه شخصية (جيم جوردن Jim Gordon) اللي جسدها الممثل (جاري أولدمان Gary Oldman) .. المشهد ده يحسسك إنه Post Credit Scene من بتوع أفلام مارفل و بفكرك تاني إن ده كان قبل 3 سنين من عرض فيلم Iron Man و قبل 5 سنين من عرض الجزء الأول من فيلم Avengers.. في المشهد ده باتمان و (جيم جوردن) بيتكلموا كصحاب أكتر من أي حاجة تانية و (جيم جوردن) بيدي لباتمان ورقة كوتشينة سابها الجوكر في مسرح جريمة .. (جيم جوردون) رأيه إن المجرمين زي الجوكر ده حيبدأوا يظهروا بشكل كبير في مدينة جوثام زي ما تكون حنفية مجانين و إتكسرت .. الرأي ده كان غريب علي دماغ باتمان وهو سأل (جيم جوردن) إنت إيه اللي يخليك تقول كده فكان رده هو كلمة واحدة .. التصعيد Escalation .. لما البوليس بدأ يمسك مسدسات المجرمين مسكوا بنادق ألي .. لما البوليس بدأ يلبس دروع واقية ضد الرصاص فالمجرمين بدأوا يستخدموا طلقات خارقة للدروع .. دلوقتي إنت يا باتمان ظهرت .. رجل لابس ماسك بيتنطط فوق أسطح العماير .. خد عندك الرجل ده مثلاً وهو قصده علي الجوكر .. سطو مسلح و جريمتين قتل و بيلبس لبس غريب شبه الشخصيات المسرحية زيك بالضبط لا و كمان بيسيب الكارت بتاعه في مسرح الجريمة.
المشهد ده هو مجرد تسخين عشان يدخلك في جو الأداء الأسطوري للمثل (هيث ليدجر Heath Ledger) الله يرحمه في دور الجوكر في الجزء الثاني من الفيلم اللي لسه مكنش إتصور أصلاً .. هو ده التصعيد .. الجوكر هو العدو الأزلي لباتمان .. من غير جوكر مفيش باتمان .. ورغم كده في أول فيلم لباتمان و اللي بتتحكي فيه قصة إزاي (بروس واين Bruce Wayne) بقي باتمان تلاقي (كريستوفر نولان) مختارش الجوكر يبقي الشرير .. ليه؟ .. عشان التصعيد.
التصعيد اللي عمله (كريستوفر نولان) مش أي مشاهد سينما يحبه و يقبله ومش أي أستوديو إنتاج أفلام يقدر يغامر بيه .. فكرة Batman Begins إنك تحكي قصة إزاي سوبرهيرو بقي سوبرهيرو فيه ناس كتير حاولت تجربها بعد (كريستوفر نولان) و لبسوا في الحيط .. (أنتوان فوكوا Antoine Fuqua) المخرج اللي قدملنا فيلم Training Day حاول يعملها في فيلمه King Arthur و فرقعت في وشه .. مخرج تقيل أوي زي (ريدلي سكوت Ridley Scott) حاول يعملها في فيلمه Robin Hood و برده فرقعت في وشه .. زي ما قلتلك فيلم Batman Begins كان تجربة ناجحة تجارياً بس مش أوي يعني لكن الظاهرة السينمائية اللي إسمها The Dark Knight اللي جاب أكتر من مليار دولار أرباح في شباك التذاكر هو اللي خلي ناس كتير تقول إن مفيش حد عرف يتقن فكرة التصعيد دي زي (كريستوفر نولان).
خد عندك السبب اللي خلي (بروس واين) يبقي باتمان أصلاً .. كلنا عارفين القصة .. القصة إتهرست في كل الأفلام اللي حكت حكاية باتمان .. أبوه و أمه خدوه يحضروا مسرحية و خرجوا بدري يوميها ومشيوا في شارع ضيق طلع عليهم حرامي قتل أبوه و أمه و سرق فلوسهم و العقد بتاعها اللي كانت لابساه و جري و ساب الولد الصغير جنب جثتهم .. زي ما قلت قصة كلنا عارفينها .. الفكرة هي كانت بتتحكي إزاي؟ .. (زاك سنايدر Zack Snyder) في فيلم Batman V Superman: Dawn of Justice حكهالنا بالتصوير البطيء بموسيقي تصويرية درامية جداً لدرجة إنه خلانا نعد حبات اللؤلؤ اللي في العقد بتاع أم (بروس واين) وهو بيتفرط و يقع علي الأرض .. فيه ناس شافت المشهد ده علي إنه عبقري و واحد من أكتر المشاهد المتصورة بالتصوير البطيء عبقرية في تاريخ السينما .. لو ده رأيك فأنا فاهمه بس ده السبب اللي بيخلي فيلم Batman Begins في حتة تانية خالص وهي الطريقة اللي (كريستوفر نولان) شاف بيها أهمية المشهد ده .. في فيلم Batman Begins المشهد كان في نص الفيلم و يدوبك إستمر حوالي 80 ثانية وكان خلص .. وهي دي القضية .. (كريستوفر نولان) عكس كل الأفلام اللي حكت قصة باتمان مكنش شايف إن موت أبوه و أمه بالطريقة دي هو السبب الوحيد اللي خلي (بروس واين) يبقي باتمان.
حط موت أبوه و أمه جنب شعوره إن كل فلوسه اللي ورثها دي ملهاش لازمة جنب إحساسه بإنه لازم ينتقم مش بس من اللي قتل أبوه و أمه إنما من المدينة و النظام اللي سمح بجريمة زي دي انها تحصل .. حط ده كمان جنب إنه قرر يبقي مجرم هو شخصياً و إنه إتقبض عليه و فضل محبوس سنين .. لحد نص الفيلم تقريباً و (بروس واين) شخصياً مش عارف هو عايز إيه من الدنيا لحد ما بيقع تحت إيد شخصية (راس الغول) اللي جسدها الممثل (ليام نيسون Liam Neeson) .. حتي تدريبه القاسي مكنش لوحده السبب اللي خلي (بروس واين) يبقي باتمان .. اللي خلي (بروس واين) يبقي باتمان هو الفشل .. (بروس واين) فشل في كل حاجة هو كان عايز يعملها .. كان نفسه يحمي أبوه و أمه و فشل .. كان نفسه ينتقم من اللي قتلهم و فشل .. حتي لما بقي باتمان وفي أول مواجهة بينه و بين شخصية سكيركرو Scarecrow فشل برده وكان حيموت فيها .. فشل ورا فشل ورا فشل لحد ما في مشهد واحد أخيراً الدنيا بتمشي مع (بروس واين) و بيعرف يبقي باتمان لما عمل كمين لرجالة (كارمين فالكون Carmine Falcone) في الميناء .. المشهد ده بالذات أنا عايز أقف معاه شوية.
المشهد ده لو فكرت فيه هو أول حاجة صح و ناجحة مفيهاش غلطات يعملها (بروس واين) من ساعة ما قرر يبقي باتمان .. التخطيط و التنفيذ كان عشرة علي عشرة .. عشان كده (كريستوفر نولان) عمل المشهد ده بحيث ميبقاش فيه أي CGI أو جرافيك .. هو كان عايز يخليك تعيش المشهد كأنك (بروس واين) .. قبل المشهد ده باتمان يعني إتضرب بكل شكل و لون .. (بروس واين) إتضرب علي إيد رجاله (كارمين فالكون) بره المطعم .. دخل السجن و اللي معاه في السجن رموه علي الأرض وهم بيضربوه .. طلع بره السجن العساكر رموه من العربية علي الطريق .. راح يقابل (راس الغول) إترمي في بحيرة ثلجية .. حتي لما بقي باتمان إترمي من الشباك في أول مواجهة بينه وبين سكيركرو .. دي كانت أول مرة باتمان ميترميش و ميتضربش فيها.
انك تعمل فيلم من اللي بيتقال عليهم Origin Story يعني تحكي القصة بدأت إزاي من الأول موضوع مش سهل خالص علي فكرة .. يمكن عشان كده لو بصيت علي Storyline بتاعة سبايدرمان Spider-Man في شكله الجديد هو أساساً مشرحش هو إزاي (بيتر باركر Peter Parker) بقي سبايدرمان .. مشفنهاش في Captain America: Civil War و كمان مشفنهاش في Spider-Man: Homecoming .. فيه ناس شافتها كسل من الناس بتوع مارفل بس أنا الصراحة شايفها نصاحة .. فيه مليون حاجة ممكن تطلع غلط .. لما الناس دي جت تحكي قصة Captain America في الجزء الأول The First Avengers كانوا مستعجلين حبتين عشان يخلوك تتعلق بالشخصية فجابوا العدو الأزلي لCaptain America في القصص المصورة اللي هو Red Scull و قاموا رازعينه في السيناريو وانت ياعيني بتتفرج مش فاهم هو فيه إيه .. نفس الغلطة اتعملت في فيلم Thor لما بدري أوي في الجزء الأول بقي باين إن الصراع حيكون بين (ثور Thor) و أخوه (لوكي Luki) .. محدش عنده الصبر بتاع (كريستوفر نولان) .. محدش بيشتغل بفكرة شوق قبل ما تدوق إلا هو خصوصاً في أفلام السوبرهيروز .. هو كان فاهم إن قبل ما تشوف باتمان الأسطورة اللي طايح تلطيش في خلق الله لازم تفهم هو إزاي بقي كده؟ .. معلش يعني في الكلمة بس هو إنت متخيل ليه فيلم The Dark Knight نجح بالشكل ده؟
أرجوك متقوليش عشان أداء (هيث ليدجر) لوحده .. الرجل الله يرحمه أبدع في دور الجوكر بس الفيلم طلع جامد زحليقة عشان هو إتبني علي أرضية صح .. إنت عمرك ما كنت حتشوف باتمان واقف علي طرابزين الرامب بتاع الParking عشان يظبط توقيت نطته فوق العربية اللي بيهرب بيها سكيركرو Scarecrow في The Dark Knight إلا لو كان هو إتعلم عليه في فيلم Batman Begins وخلاه نايم بين الحياة و الموت لحد ما (لوشيوس فوكس Lucios Fox) أنقذه و اللي جسده الممثل (مورجان فريمان Morgan Freeman) .. عمرك ما كنت حتحس بحرقة قلب (بروس واين) وهو بيشوف المكان اللي ماتت فيه (رايتشل) في The Dark Knight إلا لما كنت شفت بعنيك إزاي هو كان متعلق بيها في Batman Begins.
حتفضل النقطة اللي بتتاخد علي فيلم Batman Begins إن الفيلم مجابش فلوس كتير زي The Dark Knight .. مهما حاولت تشرح لأصحاب الرأي ده إن شخصية باتمان كانت إتداس علي وشها في فيلم Batmen and Robin علي إيد المخرج اللي فعلياً مكنش فاهم هو بيعمل إيه اللي إسمه (جول شوماخر Joel Schumacher) واللي لوحده بسم الله ما شاء الله كان حيحرق الCareer بتاعة إتنين من أكتر الممثلين موهبة في هولييود اللي هم (جورج كلوني George Clooney) و (فال كيلمر Val Kilmer) .. مهما حاولت تفهم الناس إن الجمهور كان خلاص فقد الأمل إن ممكن فيلم يحكي قصة باتمان يكون كويس فبرده مفيش فايدة .. خليني أبقي صريح معاك و أقولك إن فيلم Batman Begins كان زي ما تقول كده إتعمل و (كريستوفر نولان) عنده يقين متفهمش جابه منين إن الفيلم حيجيب فلوس يدوبك تكفي إن شركة الإنتاج تقتنع بإنها تنتج الجزء الثاني .. الكاست بتاع الفيلم كان قوي أوي من أول (ليام نيسون) ل(مورجان فريمان) و (مايكل كاين Michael Cane) و (كريستيان بايل Christian Bale) و (سليان ميرفي Cillian Murphy) .. كلهم ممثلين معروفين للمشاهد الأمريكاني بس هي الفكرة إن لما الناس سألت هو معلش يعني مين الشرير اللي في الفيلم و إتقالهم إن الفيلم فيه إتنين اللي هم (راس الغول) و سكيركرو اللي هم كانوا أول مرة يتقدموا للسينما الناس خافت .. الناس إتعودت إن فيلم باتمان يبقي فيه الجوكر أو فيه كات وومان .. الشرفاء اللي كانوا قاريين القصص المصورة و فاهمين مين هو باتمان كويس أول ما سمعوا إسم (راس الغول) إتكيفوا .. الناس اللي كانت قاريه القصص المصورة ومش بس علاقتهم بباتمان هو الأفلام فاهمين إن (راس الغول) ده يبقي النسخة الأدمية من (ثانوس Thanos) .. ده رجل شايف إن أحسن حل لأي مشكلة هي موت الناس كلها و إبدأ من جديد.
فيلم Batman Begins حيفضل في الذاكرة عشان ده بحق ربنا يعني من الأفلام اللي ينفع يتقال عليها الجزء الأول من ثلاثية .. إنت تقدر تحطه جنب The Matrix و The Lord of the Rings: Fellowship of the Rings .. يعني سلسلة أفلام رتمها بيعلي من كل جزء و اللي بعده مش العكس .. غير كده صعب .. سامعك يا اللي بتقولي طب و Iron Man؟ طب و Thor؟ .. طب بالله عليك فكر في اللي إنت قلته ده كده .. فيلم Iron Man ممكن يكون هو الشرارة اللي بدأت مشروع أفلام مارفل بس الجزئين الثاني و الثالث بتوعه أضعف بكتير من الجزء الأول .. نفس الكلام علي Thor .. بس الرتم بتاع سلسلة The Dark Knight بدأ يعلي و يعلي بداية من Batman Begins لحد The Dark Knight Rises .. أنا متفهم جداً رأي الناس اللي بتقول إن فيلم The Dark Knight هو اللي غير شكل فيلم السوبرهيرو .. هو اللي خلانا كمشاهدين نتعلق أوي بفكرة إن فيلم السوبرهيرو يبقي واقعي و متصور بشكل كويس و يبقي كله دراما جنب الأكشن بس صدقني ده مش حقيقي .. فيلم The Dark Knight رغم عبقريته إلا إنه إتبني علي الأساس اللي حطه فيلم Batman Begins.
المصادر:
- مقالة بعنوان Batman Begins at 15: Why Christopher Nolan’s bat-flick remains the best superhero origin movie ever made نشرت في موقع Games Radar وده لينك المقالة الأصلية:
https://www.gamesradar.com/batman-begins-15th-anniversary-superhero-origin-movie/ - مقالة بعنوان Why ‘Batman Begins’ still contains the best sequel tease of all time نشرت في مجلة Forbes وده لينك المقالة الأصلية:
https://www.forbes.com/sites/scottmendelson/2020/06/15/chris-nolan-batman-begins-beat-marvel-iron-man-to-the-punch-earned-climactic-joker-tease/#6ccf90435912 - مقالة بعنوان Batman Begins: The birth of a legend نشرت في جريدة The Indian Express وده لينك المقالة الأصلية:
https://indianexpress.com/article/entertainment/hollywood/batman-begins-the-birth-of-a-legend-christopher-nolan-5219122/
من افضل الافلام اللي شوفتها في حياتها و افضل من the dark knight لانه فيلم غني بكل حاجة واقوي دراميا