طيارات بدون طيار .. خاف من اللي بيروح ومبيرجعش.

الطيارات بدون طيار بحرها واسع .. إحنا إتكلمنا عنها كتير بس النهاردة أنا عايز أركز كلامي علي حاجة معينة .. حاجة إسمها Loitering Munitions وفيه ناس بتسميها Kamikaze Drones .. دي الطيارات بدون طيار اللي بتروح ومبترجعش .. دي الطيارات مش اللي بتطير عشان متركب فيها كاميرات تصور الناس أو تراقب تحركات العدو .. مش دي الطيارات اللي بيتركب عليها صواريخ جو- أرض عشان تقصف أهداف أرضية .. أنا بتكلم عن الطيارات اللي بتروح تنفذ مهمة ومبترجعش تاني وعشان كده إتسمت كاميكازي ودي كلمة يابانية كانت بتتقال علي الطيارين اليابانيين اللي كانوا بيطيروا بطيارتهم المقاتلة زيرو Zero ويخشوا بيها في أقرب سفينة أو حاملة طائرات .. يمكن أول ناس فكروا يعملوا النوع ده من Drones كانوا الإسرائيليين اللي فكروا يستخدموها لضرب بطاريات الدفاع الجوي للدول المعادية وعملوا طيارة حلوة أوي إسمها هاربي Harpy والنسخة الأقوي منها سيكا Harpy 2 واللي فيها ناس بتسميها هاروب Harop والطيارتين من تصنيع شركة Israeli Aerospace Industries أو IAI إختصاراً .. النهاردة عايز أتكلم عن 3 طيارات من النوع ده .. الطيارة كارجو إتنين Kargu-2 التركي .. الطيارة فايرفلاي Firefly الإسرائيلي .. الطيارة قاصف واحد Qasif-1 الإيراني.

طيارة بدون طيار إسرائيلي من طراز هاروب Harop وفيه ناس بتسميها Harpy-2 معروضة في معرض باريس الدولي للطيران سنة 2013.

خلينا نبدأ بالطيارة Kargu-2 .. هي من تصنيع شركة تركي إسمها Defense Technologies and Trade Inc. وإختصاراً باللغة التركية بتتسمي S.T.M. وهي طيارة بمراوح عشان كده بيتقال عليها Multi-copter .. هي طيارة إلي حد كبير صغيرة وزنها يدوبك 6.5 كيلوجرام منها كيلوجرام رايح في وزن العبوة الناسفة اللي حتتركب فيها بس هي مش بتشتغل لوحدها .. هي متصممة عشان حضرتك بتشتري منها سرب كامل من 20 طيارة .. عشان إنت مش حتجيب 20 طيار يسوقوا ال20 طيارة فهم بيشتغلوا Autonomously يعني بتسوق نفسها بنفسها عن طريق برنامج كومبيوتر Algorithm فيه خاصية البحث عن وشوش الناس اللي هي Facial Recognition Software .. البرنامج هو اللي بيودي السرب لحد الهدف بتاعه ولما بيقربوا منه بيقدروا يزودوا سرعة طيرانهم ل40 كيلومتر في الساعة والطيارات بيتحطلها 3 أنواع عبوات ناسفة مختلفة علي حسب الوظيفة اللي كل طيارة من العشرين طيارة في السرب حتقوم بيها .. زي ما إنت شايف الطيارة دي إتصممت وإتصنعت عشان تنفذ عمليات إغتيال وأقرب الظن إن الأتراك حيستخدموها ضد عناصر تنظيم حزب العمال الكردستاني اللي سواء هم أو الأمريكان بيعتبروه تنظيم إرهابي.

طيارة بدون طيار التركية Karhu-2 وزي ما إنت شايف هي بمراوح عشان كده بتتسمي Multi-copter.

الإسرائيليين عندهم طيارة تبقي بنت عم Kargu-2 إسمها Firefly بس هي يمكن أصغر وأبطأ شوية ومن تصنيع شركة رافاييل Rafael Advanced Defense Systems .. العبوة الناسفة اللي حتتركب في الطيارة Firefly يدوبك 400 جرام وأقصي سرعة ليها هي حوالي 20 كيلومتر في الساعة بس هي حتبقي جزء أساسي من تسليح قوات المشاة الإسرائيلية .. أي فصيلة في القوات البرية حيبقي فيها عسكري متخصص في Drones معاه كذا طيارة Firefly عشان يصطاد بيها مثلاً القناصة المستخبيين في بيوت أو مدفع رشاش متعدد فوق سطوح بيت .. الطيارة Firefly لما تخش الخدمة حتبقي مع أختها الطيارة Hero-30 .. الإتنين بيعملوا نفس الوظيفة وهي ان القوات البرية بتستخدمهم ضد القناصة والنقاط الحصينة بس يمكن الفرق إن Hero-3 أقوي حبتين تلاتة .. أقصي سرعة ليها بتوصل 50 كيلومتر في الساعة وبتشيل عبوة ناسفة 3 كيلوجرام.

الطيارة بدون طيار الإسرائيلية الخفيفة Firefly من تصنيع شركة رافاييل الإسرائيلية .. لو أنا العسكري اللي بتحكم في الطيارة وهي قدامي يعني هي في Line of Site بتاع عيني فأنا أقدر اتحكم فيها حتي لو كانت المسافة بيني وبينها بقت 1.5 كيلومتر .. لكن لو الطيارة أنا مش شايفها يعني هي مش في Line of Site بتاع عيني فأخري إني أتحكم فيها وبين بينها مسافة 500 متر.

ده حيبقي دور العسكري في الفصيلة الإسرائيلية المسئول عن الطيارة بدون طيار Firefly .. الباشمنهدس حيمسك تابليت زي ما إنت شايف وزي ما يكون بيلعب PUBG بس بحق وحقيقي.

الطيارة بدون طيار الإسرائيلي Hero-3 بيتم إطلاقها من الإسطوانة اللي إنت شايفها دي بالهواء المضغوط وبمجرد ما تطلع بتفرد الأجنحة بتاعتها.

الطيارات بدون طيار الإيراني غريبة جداً .. إيران هي اللي بتصنعهم بس مش هي اللي بتستخدمهم .. الإيرانيين بيصنعوا موديل إسمه رعد-85 أو Ra’ad-85 ودي طيارة بدون طيار ليها مدي طيران بيوصل 40 كيلومتر وبتطير بسرعة ممكن توصل 100كيلومتر في الساعة والإيرانيين وروها للعالم في عرض عسكري في ديسمبر 2016 بس اللي أستخدمها كان الحوثيين اللي ضربوا بيها محطة تكرير بترول سعودية في سبتمبر 2020 .. الإيرانيين برده بيصنعوا طيارة بدون طيار إسمها قاصف -1 أو Qasif-1 واللي أستخدمها برده كان الحوثيين لما ضربوا بيها بطارية صواريخ MIM-104 Patriot سعودي .