ناس كتير متعرفش إن محطة الفضاء الدولية أو ISS ودي إختصار International Space Station واللي الأمريكان والغرب عموماً بيعتبروها أكبر جميلة عملتها الحضارة الغربية للبشرية اللي بدأها أساساً مكنش الأمريكان إنما الروس .. اللي حصل إن محطة الفضاء الدولية عشان هي عبارة عن معمل تحاليل كبير شوية متعلق في الفضاء الخارجي وبيدور حول الأرض زيها زي القمر فمكنش ينفع إن المهندسين يبنوها زي ما هي كاملة كده ويطلقوها للفضاء .. محطة الفضاء الدولية كانت لازم تتقطع حتت بتتسمي موديول Module بحيث كل موديول يطلع لوحده وبعد كده رواد الفضاء يجمعوهم سواء زي ما إنت لو عندك عيل صغير بيجمع مكعبات الليجو في بعض .. أول موديول يتم إطلاقه ضمن مشروع محطة الفضاء الدولية كان إسمه زاريا Zarya ودي كلمة روسي معناها شروق الشمس واللي إنطلقت من الأرض يوم 20 نوفمبر 1998 من محطة إطلاق فضائية في كازاخستان .. بس إطلاق زاريا كان أخر حلقة من مسلسل طويل من المناهدة والهري والخناق.
من بعد ما أخر طلقة إتضربت في الحرب العالمية الثانية سنة 1945والبشر بقوا عارفين اللي فيها .. العالم رايح في سكة إن اللي حيتخانق علي السيطرة عليه قوتين عظمتين ربنا يستر علينا منها .. دي مكانتش أول مرة علي فكرة ده يحصل في تاريخنا .. الأمويين وأسرة تانج الصينية .. العثمانيين والأوروبيين .. الفرنساويين والإنجليز .. دلوقتي جه وقت الأمريكان والسوفييت اللي الخناقة بينهم إتسمت الحرب الباردة Cold War وخلصت سنة 1989 بإنهيار سور برلين .. تخيل حضرتك إنت متخانق مع حد لأكتر من أربعين سنة .. أربعين سنة وإنت لو مشيت في شارع لقيته قصادك بتودي وشك ناحية الثانية .. هل إنت متخيل إن بعد العداوة اللي استمرت سنين دي ممكن في يوم من الأيام تقبل إن إبنه يتجوز بنتك؟ .. بعد نهاية الحرب الباردة إتولد مشروع محطة الفضاء الدولية ولأكتر من عشر سنين والمفاوضات بين الروس والأمريكان شغالة .. تفاصيل التفاصيل إتكلموا فيها بس النية كانت واضحة .. روسيا هي اللي حتفتح الباب للبشر عشان يبدأوا مرحلة جديدة من استكشاف الفضاء .. زاريا كانت تجسيد لمقولة صافي يا لبن حليب يا قشطة .. لو البشر مش حيعرفوا يبطلوا يمسكوا في خناق بعض علي الأرض يمكن يتعلموا يبقوا صحاب في الفضاء .. لحد ما جه (فلاديمير بوتين).
يوم 26 يوليو 2022 وفي وسط ما الغزو الروسي لأوكرانيا مخلي الناس كلها قلقانه علي أكل عيشها بيطلع (يوري بوريسوف Yury Borisov) رئيس وكالة الفضاء الروسية روسكوزموس Roscosmos ودي تبقي النسخة الروسي من NASA عشان يقول إن علي سنة 2024 وعليكوا خير روسيا حتنسحب من برنامج محطة الفضاء الدولية .. ليه يا عم الحاج؟ .. قالك أصل روسيا حتعمل محطة الفضاء الخاصة بيها .. بعدها بيوم روسكوزموس بعتت إيميل رسمي لNASA بتقولها إن القرار إتعدل بحيث روسيا حتنسحب من برنامج محطة الفضاء الدولية سنة 2028 اللي هو حاجة غريبة في حد ذاته لإن الناس كلها عارفه إن محطة الفضاء الدولية حتطلع بره الخدمة سنة 2030.
أنا متفهم إيه اللي يخلي (بوتين) ياخد قرار زي ده .. وجهة نظره إن هو في حالة حرب مع الغرب .. صحيح برنامج الفضاء ملوش علاقة بكل ده بس هو قرر يضرب كرسي في الكلوب وده مفهوم حتي لو حد زي حالاتي شايفه قرار غلط بس مش مهم .. أنا اسمي في البطاقة (أحمد) مش (سيرجي) ومن مواليد إسكندرية مش سان بطرسبرج .. المشكلة بتظهر لما بتيجي تسأل طب هي محطة الفضاء اللي روسيا حتعملها لوحدها دي حتبقي شكلها إيه؟ .. مبدأياً اسمها حيكون محطة الخدمة الفضائية الروسية Russian Orbital Service Station وإختصاراً حتتعرف بإسم ROSS .. فكك من اسمها اللي يحسسك إنها محطة بنزين بس الغريب إن الروس صمموها عشان تبقي محطة Fully Autonomous يعني مش بتشتغل برواد فضاء .. ده في حد ذاته غريب لإن التوجه بتاع مش بس أميركا إنما الصين كمان إن مستقبل استكشاف الفضاء هو إن البشر يبدأوا يعملوا محطات فضاء فيها رواد فضاء عشان تبقي بداية إن البشر كلهم يهاجروا بره كوكب الأرض .. عندك NASA شغاله علي كذا مشروع لمحطات فضاء بالشكل ده وحتي محطة الفضاء الصينية تيانجونج Tiangong فيها رواد فضاء .. الفكرة إن في الفضاء دايماً فيه حاجة غلط بتحصل .. دايماً فيه مكنة بتبوظ .. دايماً فيه حاجة بتسرب .. عشان كده بيبقي مفيد إن يبقي عندك رائد فضاء عامل زي الصنايعي اللي معاه صندوق عدة عشان يصلح أي حاجة بايظة .. بس فكرة إن ROSS مفيهاش رواد فضاء مش هي الحاجة الوحيدة اللي مخليه الناس تهرش في شعرها:
- (بوتين) بيعتبر مشروع ROSS ده من المشاريع المميزة في فترة حكمه .. هو عايز الناس تفضل فاكراله إنه هو الرجل اللي طلع بره روسيا بره مشروع محطة الفضاء الدولية عشان ترجع تاني روسيا ليها مشروع فضائي مستقل زي ما كان ليها محطة الفضاء مير أيام الإتحاد السوفيتي الله يمسيه بالخير .. بس ده ميمنعش إن Deadline أو معاد التسليم بتاع 2030 ده مش منطقي .. يا مؤمن دي حتي NASA اللي تحت إيدها ضعف ميزانية روسكوزموس عمرها ما حتقدر تنفذ مشروع زي ده في وقت ضيق أوي كده.
- برنامج الفضاء بيفشخ ميزانية أي بلد .. مشروع زي ROSS ده ممكن يقطم ظهر الإقتصاد الروسي في الظروف العادية فمابالك بإن عندهم حنفية مصاريف مفتوحة في أوكرانيا .. وبسبب النقطة الأولانية إن (بوتين) عايز يخلي المشروع ده مكتوب عليه صنع في روسيا من الألف للياء فصعب إنه يقبل فكرة إن الصين مثلأ تساعده.
ناس كتير بتنسي إن الفكرة ورا مشاريع الفضاء المشتركة هي إن الدول اللي حاطه فلوسها في المشروع تبقي عارفه إن كلنا في الهواء سوا .. لو حاجة باظت فالخسارة حتتوزع بينا كلنا .. لما كل دولة يبقي ليها مشروع محطة الفضاء الخاصة بيها فكل بلد حتبقي مرعوبة حاجة غلط تحصل .. ده حيخلي الدول تبطل تخاطر .. تقول لنفسها خلينا في Safe Side .. مفيش داعي نجرب تكنولوجيا جديدة ممكن تبوظ مننا .. حقيقي أنا شايف (بوتين) ماسك برنامج الفضاء الروسي بيكسره طوبة طوبة .. ليه؟ .. عشان خاطر يخلد إسمه هو .. بس تولع البلد مش مشكلة.
المصدر:
- مقالة بعنوان Russia might just plunge the world into a dark era for space نشرت في موقع The Daily Beast وده لينك المقالة الأصلية:
https://www.thedailybeast.com/russias-withdrawal-from-iss-to-start-ross-space-station-might-plunge-the-world-into-a-dark-era-for-space?source=articles&via=rss
