فيروس كورونا و الإقتصاد .. ست نقط حيفهموك الدنيا.

اللي عايز أوصله معاك من المقالة دي إنك تخرج وانت فاهم إزاي فيروس كورونا Covid-19 أثر علي الإقتصاد العالمي بشكل عام؟ .. انت مش محتاج تبقي معاك بكالريوس إقتصاد و علوم سياسية عشان تبقي عندك معلومة إن الإقتصاد العالمي إتضرب جامد بس انت محتاج تفهم هو إتضرب إزاي؟ و إيه نتايجه علينا بالضبط؟ وده اللي حنحاول نفهمه سوا مع بعض.

مبدأياً البورصة .. مشكلة البورصة و إن سعر أسهم الشركات يطلع و ينزل هي إن كتير من النقابات و حتي الحكومات بتحط فلوس المعاشات بتاعة الناس كإستثمار في البورصة .. انا ميهمنيش شخصياً إن سهم شركة طلعت مصطفي يطلع أو ينزل .. مش دي القضية .. القضية إن فيه مواطن له معاش و معاشه إتأثر بسبب إن النقابة بتاعته إستثمرت فلوس المعاشات في سهم الشركة وهي دي المشكلة أو إن شركة حطت فلوس المرتبات بتاعة موظفيها كإستثمار في البورصة عشان الأرباح بتاعتها أعلي من فوايد البنوك .. بورصة داو جونز Dow Jones مثلاً إتضربت بأكبر نسبة خساير ربع سنوية (يعني خلال 6 شهور من السنة) تحصل من 1987.

الفكرة في حاجه .. الشركات اللي ليها أسهم في البورصة حتبدأ تلاقي إن خسايرها عماله تزيد وبالتالي حتقلل من حجم نشاطها أو توقفه خالص زي ما حصل في مصر مثلاً إن شركات كتير مشت موظفين .. ده حيسمع إن معدل النمو للإقتصاد بتاع البلد كله حيقع .. الحل اللي دول كتير لجأته هي إنها خسفت بسعر الفايدة الأرض عشان الشركات يبقي أسهلها إنها تستلف فلوس و بالتالي ممكن تدفع مرتبات موظفيها و ده اللي لحد دلوقتي القرار اللي مطلعش من البنك المركزي المصري وده لوحده في رأيي شيء غريب و عجيب و مريب.

خلال أقل من 6 شهور بس بورصات تقيلة في أميركا زي نيكي و داو جونز حققت خساير تاريخية وصلت 18.5% من قيمتها.

شركات مصرية كتير ليها أسهم في البورصة إتبهدلت خلال الفترة اللي فاتت .. شركة زي طلعت مصطفي رغم إن من بداية قرار تعويم الجنيه اللي هو من أكتر من سنة السهم بتاعها خسر 18% من قيمته بس إلا إن خلال 5 شهور من ساعة ظهور فيروس كورونا السهم بتاعها خسر 40% من قيمته.

تاني حاجه هي معدلات البطالة .. النقطة دي مرتبطة بالنقطة الأولانية .. الشركات بتخسر فلوس في البورصة فبتعوض ده إنها تقلل من مصاريفها و بما إن المرتبات بتاكل جزء كبير من ميزانية أي شركة فالإتجاه اللي شركات كتير داست فيه هي إنها تمشي موظفيها .. في أميركا خلال 6 أسابيع بس عدد الناس اللي مشت من شغلها نط 30 مليون .. في أخر إسبوعين في شهر مارس 2020 فيه 2 مليون مواطن بريطاني مبقوش لاقيين شغل .. في مصر مفيش رقم أو أي بيانات رسمية تقول هو معدل البطالة حصله إيه في 6 شهور اللي فاتوا بس لو إعتبرنا اللي حصل في أميركا مقياس فإحنا فعلاً قدام مشكلة كبيرة.

في أميركا خلال 5 شهور بس عدد العاطلين نطوا 30 مليون و ده رقم كبير خصوصاً إنهم مشيو من شغلهم خلال فترة صغيرة أوي.

ثالث حاجه هي سعر البترول .. زي ما حكيت لما شرحت أسباب الخناقة بين السعودية و روسيا فالمشكلة إن بسبب فيروس كورونا فالسوق مبقاش محتاج بنزين ولإن سعر البترول زيه زي سعر الجبنة الإسطنبولي محكوم بالعرض و الطلب فلما الطلب قل فطبيعي عشان السعر يثبت إن العرض هم كمان يقل .. اللي حصل إن روسيا و السعودية إتخانقوا علي حكاية تقليل العرض وبالتالي الإتنين بقوا بينتجوا أوفر فوق حاجة السوق و عشان كده سعر برميل البترول إتخسف بيه الأرض.

سعر برميل برينت قل لأقل مستوياته في العشرين سنة اللي فاتوا و بقي بيتباع ب20.59 دولار للبرميل.

سعر برميل غرب تكساس المتوسط West Texas Intermediate هو اللي وصل سالب 37.63 دولار للمرة الأولي في التاريخ.

رابع حاجه هي إن إحتمال كبير الإقتصاد العالمي يخش مرحلة الكساد Recession .. عشان الشركات خسرت فلوس في البورصة وده سمع بإنهم عشان يقللوا خسايرهم مشوا موظفين يعني معدل البطالة زاد .. اللي أكتر من كده إن سعر برميل البترول إنهار فشركات البترول هي كمان بقت بتمشي موظفين .. معني إن الناس مش لاقيه شغل إنها مش حتصرف فلوس عشان تشتري بضايع غير الأساسيات خالص اللي هي الأكل و الشرب .. ده معناه إن مش حيبقي فيه فلوس في السوق وده بيسموه كساد .. بناء علي توقعات صندوق النقد الدولي IMF فالإقتصاد العالمي متوقع إنه ينكمش بنسبة 3% .. في حالة إن فيروس كورونا ده إختفي في النص الثاني من سنة 2020 فالمتوقع إن الإقتصاد العالمي حينط نطة حلوة أوي في 2021 و ينمو بنسبة 5.8% عشان يعوض خسايره.

اللي قدامك دول يبقوا الدول الصناعية الثمانية الكبري وزي ما انت شايف فيه دول منهم إحتمال كبير تخش مرحلة الكساد خلال سنة 2020 .. مش ملاحظ إن كلهم تقريباً فيه إحتمالات يخشوا مرحلة الكساد ما عدا الصين .. غريبة صح.

خامس حاجة هي إن فعلاً مصائب قوم عند قوم فوائد .. فيه ناس جابت فلوس زي الفل في فترة فيروس كورونا .. بسبب موضة الشغل من البيت فشركة زي Zoom اللي بتعمل Software بتاع الVideo Calling السهم بتاعها في البورصة نط في السما .. نفس الكلام علي شركتي Amazon و Netflix .. لك أن تتخيل إن بسبب الأزمة دي فشركة زي Netflix بقت قيمتها في السوق أغلي من شركة زي Exxon Mobil بتاعة البترول .. في نفس الوقت فيه شركات تانية إتداس علي وشها و يمكن أكترها كان شركات الطيران .. فيه أكتر من 100 دولة وقفت رحلات الطيران منها و إليها بما فيهم مصر.

أكتر 3 شركات عملوا فلوس زي الفل في الفترة بتاعة فيروس كورونا هم Zoom و Amazon و Netflix.

أكتر من 100 دولة علي مستوي العالم وقفت رحلات الطيران منها و إليها.

عدد رحلات الطيران إتخسف بيها الأرض خلال سنة 2020 وبعد ما كنا بنتكلم عن أكتر من 200,000 رحلة طيران في اليوم بقينا بنتكلم عن متوسط 50,000 رحلة طيران في اليوم بس.

سادس حاجة هي إن البيئة بتتعافي .. زي ما حكيت قبل كده إن عشان المصانع في كتير من الدول الصناعية وقفت شغلها فإنبعاثات أكاسيد النيتروجين قلت .. فيه دول كتير كانت بيموت ليها ناس بسبب التلوث زي الهند مثلاً دلوقتي أهلها بيتنفسوا هواء نقي لأول مرة من سنين .. بس زي ما قلت بمجرد ما الإقتصاد يبدأ يرجع يشتغل تاني فصدقني لو قلتلك إن حترجع ريما لعادتها القديمة.

إنبعاثات أكاسيد النيتروجين فوق سماء أوروبا قلت جداً وده خلي إن الهواء اللي الناس بتتنفسه يبقي أنقي.

حتي الهند اللي لسنين و سنين كانت بتعاني من التلوث لأول مره الهنود بقوا يتنفسوا هواء نظيف .. صدق أو لا تصدق ده بسبب فيروس كورونا.

المصدر:

مقالة بعنوان Coronavirus: A visual guide to the economic impact نشرت علي موقع هيئة الإذاعة البريطانية BBC وده لينك المقالة الأصلية:
https://www.bbc.com/news/business-51706225