كان نفسي و الله أقولك إني خايف أحرقلك الفيلم بس أنا حابب أقولك إن منتجي الفيلم نفسهم حرقوه من أول ما قالوا إن ده الفيلم الأخير اللي يعمله (دانييل كريج Daniel Craig) في دور (جيمس بوند James Bond) .. بس في حالة إنك مشفتش الفيلم متكملش قراية .. أديني بقول أهو .. شوف يا ريس (جيمس بوند) بيموت في أخر الفيلم و دي أكتر حاجة معصباني و مزعلاني .. منكرش إنه فيلم حلو .. الفيلم متصور حلو .. متمثل حلو .. الموسيقي التصويرية (هانز زيمر Hans Zimmer) عمل فيها شغل محترم بس أرجع و أقولك فكرة إن (جيمس بوند) مات معصباني جداً لإننا إحنا أتولدنا علي فكرة إن (جيمس بوند) فكرة و الأفكار لا تموت.
أساساً فكرة السلسلة إن فيه حد إسمه (جيمس بوند) و هو نسوانجي و خمورجي و بيعرف يقتل و مش بيموت .. هم دول الأربع ثوابت اللي في أجزاء السلسلة مع تغيير الممثل اللي بيجسد الشخصية .. أي حاجة تانية ممكن تتغير .. الموبايل اللي بيمسكه إتغير ما بين Sony Ericson وبعد كده iPhone و أخيراً Nokia .. نوع الخمرة اللي بيشربها بتتغير من الفودكا مارتيني مروراً ببيرة Heineken و عودة مرة أخري للفودكا مارتيني .. عربيته اللي بيسوقها بتتغير من الأستون مارتن و غيرها لBMW و بعد كده رجع تاني للأستون مارتن .. كل ده علي حسب الشركة اللي بتحط فلوسها و عايزه يتعملها دعاية بس إنك في الأخر تموت (جيمس بوند) .. كنت سميه (هاني) بقي .. صحيح إن في أخر الفيلم و بعد ما التتر خلص كتبوا James Bond will Return بس أكيد قصدهم بممثل تاني و بأحداث تانية أو حتي يحكي القصة من الأول خالص تاني .. الله أعلم .. بس أنا حابب أأكدلك إن (جيمس بوند) زي ما جسده (دانييل كريج) مات.
تبقي الطريقة اللي (دانييل كريج) جسد بيها الشخصية هي أحلي حاجة مش بس في فيلم No Time to Die إنما في السلسلة كلها .. هو قدمه علي إنه بني أدم بيتألم و بيحس و بيزعل و بيعيط .. الناس اللي شافت الفيلم حتشوف بنفسها إن (جيمس بوند) ضاع من عمره خمس سنين هدر مكنش يعرف فيهم إنه أب و إن عنده بنت زي القمر بسبب إن دي الطريقة اللي عدوه (إيرنستو ستافرو بلوفيلد Ernesto Stavro Blofeld) كان عايز يعاقبه بيها .. دي الحاجة المختلفة في السلسلة و اللي (دانيل كريج) إشتغل عليها كتير أوي .. قبل كده الأفلام بتاعة (جيمس بوند) مش حقول مملة بس مفيهاش جديد يتشاف بإستثناء مشاهد الأكشن .. مع (دانييل كريج) إنت بقيت مبسوط بمشاهد الأكشن .. مستني بمنتهي الصبر علي المشاهد اللي بتحضرك لمشاهد الأكشن .. بس حاسس إن قلبك مقبوض في المشاهد اللي فيها تمثيل بجد لإن الحلو في السلسلة من أول Casino Royal لحد No Time to Die إن مفيش ممثل أو ممثلة بينضم للسلسلة عشان شكله أو شكلها حلو بس مبيعرفش يمثل.
متهيألي إن فيلم No Time to Die فيه 3 حاجات هم اللي خلوه مختلف خالص عن باقي السلسلة بتاعة (جيمس بوند) و سبحان الله ال3 حاجات كلهم بنات:
- أول حاجة إن دي أول مرة نشوف بنت بتقدم دور عملية في المخابرات البريطانية MI6 برتبة صفرين .. مش كده بس .. دول إدوها الإسم الكودي 007 بعد ما (جيمس بوند) طلع معاش وهي الممثلة السمرا (لاشانا لينش Lashana Lynch).
- ثاني حاجة هي السيناريو و اللي كتبته (فيبي والر بريدج Phoebe Waller-Bridge) و لمن لا يعلم يعني دي هي الممثلة و المخرجة و المنتجة للمسلسل الكوميدي Fleabag .. الحقيقة إن دورها مينفعش نهمله إنها كتبت سيناريو مسلي جداً .. دمه خفيف في الأفيهات و النكت اللي فيه بس مؤلم جداً في نهايته.
- ثالث حاجة هي فاكهة الفيلم بلا منازع (أنا دي أرماس Ana de Armas) .. منكرش إن من اول مشهد ليها لما (جيمس بوند) راح يقابلها و لقيتها لابسه فستان سواريه ولا اللي بتلبسه الممثلات العرب في مهرجان الجونة و أنا قلت بااااس (جيمس بوند) مش حيعتقها .. شوية و خدته لمخزن خمور و بتفكله زراير قميصه فقلت يا دي النيلة .. من هنا و إنت طالع و عينك ما تشوف إلا النور .. كاراتيه تلاقي .. ضرب نار بالمدافع الرشاشة تلاقي .. سواقة عربيات تلاقي .. بسم الله ما شاء الله البنت متدربة علي أعلي مستوي لدرجة إن أخر حاجة (جيمس بوند) قالها إنتي كنتي تجنني .. بس هو مقالهاش بطريقة قليلة الأدب .. لا .. قالها بالطريقة لما إنت تبقي مدير و تحت منك بنت شغاله معاك و تعمل تاسكاية صعبة عليها و من غير ولا غلطة .. قالها بطريقة فيها فخر مش شقط .. يمكن عشان كده أنا حفتقد الطريقة اللي (دانييل كريج) قدم بيها (جيمس بوند).
المصادر:
- مقالة بعنوان Ah, Mr. Bond. I was expecting you-to entertain me نشرت في جريدة The Guardian و ده لينك المقالة الأصلية:
https://www.theguardian.com/commentisfree/2021/oct/10/ah-mr-bond-i-was-expecting-you-to-entertain-me - مقالة بعنوان Never mind the explosions-how sexist is No Time to Die? نشرت في جريدة The Guardian و ده لينك المقالة الأصلية:
https://www.theguardian.com/film/2021/sep/30/never-mind-the-explosions-how-sexist-is-no-time-to-die
