موضوعنا النهاردة اللي حنتكلم عنه هو سلسلة أفلام (جيمس بوند James Bond) .. السلسلة دي لحد سنة 2006 لما إتعرض في السينما فيلم Casino Royal كانت كل الأفلام بتاعة السلسلة قبل الفيلم ده كنت تحس إن كل فيلم بينتج بتشم فيه ريحة التراث الإنجليزي .. كل فيلم من سلسلة James Bond تحس إنه معمول بالإيد أو Hand Made من كتر الإهتمام بجودة الإخراج و التركيز أوي علي الحس الوطني البريطاني .. كنت تتفرج علي أي جزء و بعد ما يخلص و إنت بتسمع الموسيقي الشهيرة للسلسلة إنك مستعد تروح تطوع في المخابرات البريطانية MI6 عشان تبقي زي (جيمس بوند ) .. طول السنين دي كلها و أي جزء جديد بينزل من سلسلة (جيمس بوند) الناس بتستناه بفارغ الصبر و بيجيب فلوس حلوة أوي في شباك التذاكر .. بس طول السنين دي كلها محصلش إن أي فيلم من السلسة خلاك تقول واو إيه العظمة دي .. مفيش ولا فيلم خلاك تحس إنك بتتفرج علي سينما إنت مشفتهاش قبل كده .. الأكشن كويس بس فيه أفلام كتير فيها أكشن زي الفل .. كسيناريو ناس كتير بتقول إن سلسلة The Bourne و اللي بدأت بعرض فيلم The Bourne Identity سنة 2002 مكتوبة بشكل أحسن بكتير من أي جزء من سلسلة (جيمس بوند) .. بس كل ده إتغير لما الناس إنبهرت بفيلم Casino Royal .. (دانيل كريج Daniel Craig) كان عبقري في دوره و قدر إنه يعمل ثورة علي الطريقة اللي شخصية (جيمس بوند) كانت بتتعرض بيها في السينما.
لما (دانيل كريج) إختاره المخرج (مارتن كامبل Martin Campbell) عشان يبقي هو (جيمس بوند) الجديد ده كان ثورة علي كل المعايير القديمة لإختيار الممثل اللي يقوم بتجسيد الشخصية دي .. فكر فيها كده .. قبل ما (شون كونري Sean Connery) أو (روجر مور Roger Moore) أو حتي (بيرس بروزنان Pierce Brosnan) يتم إختيارهم إنت كمشاهد مكنتش تعرف عنهم حاجة .. كلهم كانوا ممثلين شهرتهم مش قد كده .. و بإستثناء (شون كونري) فعلياً مكانوش بيعرفوا يمثلوا أوي .. بس لما إختاروا (دانيل كريج) هم إختاروا ممثل مش وسيم أوي بس بيعرف يمثل .. (دانيل كريج) كان رائع في فيلم Munich و كان مذهل في فيلم Layer Cake و فظيع في Road to Perdition .. من المشهد الإفتتاحي في Casino Royale و إنت عرفت إنك حتشوف تجسيد مختلف و صادم لشخصية (جيمس بوند) .. مشهد القتال في الحمام أشك إنك حتلاقي في أي جزء قبل كده من السلسلة مشهد إتعمل بالحرفنة دي و بالواقعية دي .. إنت شفت (جيمس بوند) مش لابس بدلة و بيضرب و بيتضرب و بيتعور و بيقع و بينزف.
سيبك من الجزء اللي بعده Quantum of Solace .. تخيل إنه محصلش و إنه متعملش .. النقلة اللي بعد كده كانت مع عرض فيلم Skyfall اللي كان الجزء ال23 للسلسلة و الكلام ده كان سنة 2012 .. لما فيلم Skyfall إتعرض في بريطانيا كسر كل الأرقام اللي حققتها كل مبيعات الأفلام اللي قبله .. الفيلم ده بقي أكتر فيلم حقق أرباح في شباك التذاكر البريطاني من ساعة ما قالوا يلا نعمل سينما في بريطانيا و فضل متربع علي العرش ده لحد سنة 2015 لما إتعرض فيلم Star Wars: The Force Awakens .. مش كده و بس .. فيلم Skyfall هو ثاني أكثر فيلم بريطاني جاب فلوس في تاريخ السينما البريطانية بعد فيلم Harry Potter and The Deathly Hallows Part 2 .. لو حتشبه اللي حصل ده بالعربيات فتقدر تقول إن عرض فيلم Skyfall حول سلسلة (جيمس بوند) من عربية BMW لعربية Ferrari أو Lamborghini .. لو إنتي بنت ملكيش في العربيات أوي ففيلم Skyfall ده زي ما يكون حول السلسلة من حاجة زي ماركة أوريفلام Oriflame بتاعة الMakeup و خلاها براندات عالمية زي MAC او NARS Cosmetics.
النقلة اللي عملها فيلم Skyfall لسلسلة (جيمس بوند) هو السبب إن الشركة المنتجة للسلسلة اللي هي Eon كانت حتموت و تخلي (دانيل كريج) يرجع تاني يجسد شخصية (جيمس بوند) في الجزء الجديد .. إنت لازم تكون فاهم كويس أوي ليه شركة Eon كانت عايزة (دانيل كريج) يكمل في أداءه للشخصية؟
فاكر لما فيلم سبيكتر Spectre اللي هو أخر جزء من سلسة (جيمس بوند) إتعرض و خلال واحد من اللقاءات الصحفية حد سأل (دانيل كريج) هل إنت مستني التحضير للجزء الجديد؟ فكانت إجابته الصادمة إنه قال نصاً إنه بيفضل إنه ينتحر بإنه يقطع شرايينه علي إنه يشارك في جزء جديد من السلسلة .. وقتها فيه ناس بدأت تتكلم علي مين من الممثلين ينفع يكمل الشخصية و وقتها أراء راحت ل(إدريس إلبا Idris Elba) و فيه ناس رشحت (توم هاردي Tom Hardy) .. بس شركة Eon كانت بتفكر في حاجة تانية .. هم كانوا بيفكروا في إيه اللي حصل لمسلسل Doctor Who و إن إزاي كل شوية يغيروا الممثل اللي بيقوم بالبطولة لدرجة إن ده أثر علي نجاح المسلسل .. اللي خلي الشركة مصره أكثر علي إنهم لازم يقنعوا (دانيل كريج) إنه يكمل هو إن المخرج (سام مينديز Sam Mendes) اللي أخرج Skyfall و كسر به الدنيا و أخرج Spectre و منجحش النجاح اللي الناس كانت متوقعاه قال إنه مش حيشتغل تاني في إخراج أي جزء جديد من سلسلة (جيمس بوند) .. ده خلي شركة Eon تقول لنفسها يعني هو إحنا حنغير المخرج و كمان البطل؟ .. ده لوحده ممكن يقتل السلسلة .. ده يفسرلك ليه هم كانوا مصرين علي إن (دانيل كريج) يكمل لدرجة إنهم عرضوا عليه 120 مليون دولار عشان يعمل الجزء الجديد و ده تقريباً زيادة الضعف عن مرتبه اللي وصل 50 مليون دولار عشان يعمل فيلم Spectre.
أنا بس عايز أختملك المقالة دي بإني أحاول أوصلك صورة إنت محتاج تفهمها و هي ليه (دانيل كريج) وصل لمرحلة إنه مبقاش عايز يكمل في تجسيد شخصية (جيمس بوند) لإن الموضوع مش بس مجرد فلوس و الحقيقة هم نقطتين: الإعلانات و السيناريو.
أهم حاجة في سلسلة أفلام (جيمس بوند) هو الدعاية التجارية .. الموضوع مش بس إن المنتجين بيحطوا ماركات معينة بوضوح كدعاية ليها و ده بيسموه Product Placement .. يعني مثلاً في Casino Royale و Quantum of Solace الموبايلات اللي بيستخدمها (جيمس بوند) كانت Sony Ericson و في Skyfall كانت Sony .. العربية اللي بيستخدمها هي Aston Martin .. الساعة اللي بيلبسها Omega .. الموضوع أكبر من كده .. إنت ممكن متكونش خدت بالك بس بداية من Skyfall و مروراً ب Spectre حتلاقي إنك لو إتفرجت علي الفيلمين (جيمس بوند) مطلبش مشروبه الشهير فودكا مارتيني إنما حتلاقيه بيشرب بيرة ماركة هاينيكين Heineken و السبب في كده إن شركة Eon عملت عقد دعاية مع شركة Heineken بقيمة 45 مليون دولار .. كون (دانيل كريج) هو اللي بيجسد شخصية (جيمس بوند) خلاه ملزم هو كمان إنه يروج للشركات الراعية للسلسلة .. هو بحكم عقده بقي ممثل و مروج و بتاع إعلانات و بيبقي ضيف في برامج .. بإختصار هو بقي الوجه الإعلامي و الإعلاني لشخصية (جيمس بوند) .. كل ده بيرهق جداً الممثل .. حتي المخرجين .. أكتر مخرجين أخرجو أفلام للسلسة هم إتنين قلنا أساميهم في المقالة .. (مارتن كامبل) و ده اللي أخرج Casino Royale و قبله Golden Eye .. و (سام مينديز) اللي أخرج Skyfall و Spectre و أخدت بالك إن الإتنين عملوا فيلمين بس .. طب إنت إزاي متخيل إن (دانيل كريج) يستحمل يعمل أكثر من 4 أفلام؟
النقطة التانية أكيد كانت سبب في إن (دانيل كريج) ميحبش يرجع تاني هو طبيعة سيناريو أفلام (جيمس بوند) .. لما المخرج (مارتن كامبل) جابوه عشان يخرج فيلم Golden Eye ده كان فيلم فيه حاجات كتير أول مرة تتعمل .. كان أول مرة (مارتن كامبل) يخرج جزء من سلسلة لشخصية (جيمس بوند) .. كانت أول مرة (بيرس بروزنان) يجسد الشخصية .. كانت أول مرة مديرة المخابرات البريطانية MI6 تبقي واحدة ست و جسدت دورها الممثلة (جودي دينش Judi Dench) .. بس الأهم من كل ده إنها كانت أول مرة يتم إفتتاح الفيلم بمشهد طويل أكشن ينتهي بأغنية الفيلم .. ده بقي الرتم بتاع أي جزء من السلسلة إتعمل بعد كده .. مشكلة ده إنك ككاتب سيناريو لازم تخلي المشهد الإفتتاحي ده مربوط بقصة الفيلم بحيث إنك كمشاهد و إنت بتتفرج تبدأ تربط النقط ببعضها .. أحياناً كتير ده مبيحصلش و الفيلم بيبوظ .. نقطة تانية و هي إن فيلم Spectre لما إتعرض و الناس حست إن الفكرة كانت إن بقدرة قادر سلسلة (جيمس بوند) تبقي عاملة زي سلسلة Avengers كده بتاعة Marvel إن الدنيا كلها متربطة ببعضها و إن أفلام Casino Royale و Quantum of Solace و Skyfall و Spectre كلهم مربوطين ببعض فرقعت في وش الفيلم.
أنا شخصياً معرفش ليه (دانيل كريج) وافق يرجع تاني؟ و لحد دلوقتي الشركة المنتجة مختارتش المخرج و دي حاجة تقلق .. فيه أسئلة كتير أوي بسألها لنفسي بس خليني أريح نفسي مؤقتاً و أريحكم معايا بإننا ننبسط بإن (دانيل كريج) راجع.
المصدر:
مقالة بعنوان Why James Bond couldn’t afford to lose Daniel Craig, a true Hollywood heavyweight نشرت في جريدة The Guardian البريطانية و ده لينك المقالة الأصلية:
https://www.theguardian.com/film/2017/aug/16/daniel-craig-james-bond-spectre-skyfall-new-film
