ناس كتير رأيها في الكورة دلوقتي إن النادي اللي معاه فلوس هو اللي بينجح .. معاك فلوس يبقي حتقدر تشتري لاعيبه تجيبلك بطولات .. هو الكلام ده صح بس هو عامل زي إنك تقول إن ربنا قال ولا تقربوا الصلاة بس إنت محتاج تكمل الأية الكريمة لأخرها عشان تفهم ربنا عايز يقولك إيه؟ .. النجاح في أي شغل سواء كان كرة القدم أو غيره مش الفلوس قد التعيينات .. إنك تجيب أكتر ناس بتفهم في شغلها عشان تمشيلك الدنيا والناس دي عشان تجيلك إنت بتدفع فيها فلوس .. إنك تدفع فلوس عشان تعين الناس الغلط فإنت كده كإنك بترمي فلوسك في الزبالة .. الكلمتين دول مهمين عشان تفهم اللي حقوله دلوقتي.
لو أنا جيت سألتك إيه رأيك في (بيب جوارديولا Pep Guardiola)؟ فإنت يا حتقولي إنه مبالغ فيه وإنه عمره ما راح نادي إلا وخلي النادي يدفع ملايين عشان يشتري أحسن لاعيبه في العالم أو حتقولي إن الرجل ده هو تاني أحسن حاجة في كورة القدم بعد قرار إلغاء فكرة الهدف الذهبي .. فعلياً لو إنت شايف إن (جوارديولا) بيشتري النجاح بالفلوس فأنا مش حقدر أقولك إنت غلطان خصوصاً لو عرفت إن خلال Career بتاعته كمدير فني هو ثالث أكتر مدير فني في التاريخ صرف فلوس علي شراء اللاعيبه .. الرجل صرف 998 مليون جنيه إسترليني .. بس تاني حرجع لنقطة التعيينات .. عارف مين أكبر صفقة عملها (جوارديولا) كمدير فني؟ لما إشتري (زلاتان إبراهيموفيتش Zlatan Ibrahimovic) لما كان بيدرب برشلونة واللي تعتبر أسوأ صفقة هو عملها.
اللي أنا عايز أتكلم عنه النهاردة هو مين أكتر المديرين الفنيين اللي صرفوا فلوس علي شراء اللاعيبه؟ .. تاني أرجوك حاول متبصلهاش علي إن الأسامي اللي حقولها دي ناس إستسهلت وقررت تصرف فلوس عشان تضمن النجاح .. حاول تبصلها إن الناس دي كانت عايزه تحقق حاجة فقرروا يعينوا أكتر ناس هم كانوا شايفينهم مناسبين بس زي أي تعيينات في الدنيا فيه تعيينات بترفع الشركة السماء وفيه تعيينات بتخسف بيها الأرض .. الصورة اللي جايه بتوريك أكتر 10 مديرين فنيين صرفوا فلوس خلال Career بتاعتهم بس أنا النهاردة عايز أقف عند الثلاثه الكبار .. (جوزيه مورينيو Jose Mourinho) .. (كارلو أنشيلوتي Carlo Ancelotti) .. (بيب جوارديولا).
خلال Career بتاعته سواء كانت في تشيلسي أو ريال مدريد أو حتي مانشستر يونايتد فبسم الله ما شاء الله (مورينيو) بعزق 1.3 مليار جنيه إسترليني .. أراك توزع من مال الست الوالدة يا سي سبيشال وان .. أغلي صفقة عملها ويمكن أسوأ صفقة برده كانت لما قرر يرجع (بول بوجبا Paul Pogba) من يوفينتوس بعد ما دفع فيه 89.3 مليون جنيه إسترليني .. مشكلتي معاه إني بقيت حاسس إنه مؤخراً لما كبر في السن مبقاش يعرف يحكم علي شخصيات اللاعيبه اللي هو حيشتريها .. يعني مثلاً .. في فترته كمدير فني لمانشستر يونايتد هو زي ما قلتلك جاب (بوجبا) وجاب (روميلو لوكاكو Romelu Lukaku) بعد ما دفع فيه 75 مليون جنيه إسترليني وجاب (فريد Fred) مقابل 53 مليون جنيه إسترليني .. 3 صفقات كلها زي الزفت كلفت النادي 217 مليون دولار .. خلال فترتيه مع تشيلسي أغلي 3 صفقات عملهم كانوا (أندريه تشيفتشينكو Andriy Shevchenko) ودفع فيه 40 مليون جنيه إسترليني و(ديديه دروجبا Didier Drogba) ودفع فيه 35 مليون جنيه إسترليني و(دييجو كوستا Diego Costa) ودفع فيه 34 مليون جنيه استرليني .. 3 صفقات ل3 مهاجمين منهم واحد بقي أسطورة النادي وواحد جاب بطولتين دوري .. لما كان في ريال مدريد أغلي صفقتين عملهم كانوا (لوكا مودريتش Luka Modric) مقابل 31.5 مليون جنيه إسترليني و(أنخل دي ماريا Angel Di Maria) مقابل 30 مليون جنيه إسترليني .. صفقتين يعتبروا من أحسن الصفقات اللي عملها ريال مدريد في السنين اللي فاتت .. بدأت تفهم أنا ليه قلت إنه مؤخراً بقي مش عارف يحكم علي الصفقات أو خلينا نقول التعيينات الجديدة كويس؟ .. مش بس كده .. مدير فني إتعود يبعزق فلوس زي (مورينيو) مستني إيه لما يشتغل مع نادي نتن ورئيس نادي أنتن زي (دانييل ليفي Daniel Levy)؟ فعلياً والله إبقوا قولولي إنتوا متوقعين (مورينيو) يسيب توتنهام إمتي؟
إن (أنشيلوتي) يبقي تاني أكتر مدير فني صرف فلوس كانت بالنسبة لي شخصياً مفاجأة .. خلال Career خلته يمسك عتاولة أوروبا من إيه سي ميلان لتشيلسي لباريس سانجيرمان لريال مدريد الرجل ده صرف 998 مليون جنيه إسترليني وعلي فكرة ده نفس الرقم اللي (جوارديولا) صرفه .. أغلي صفقه عملها (أنشيلوتي) في حياته كانت شراء (جاريث بايل Gareth Bale) لما كان في ريال مدريد ودفع فيه 85.3 مليون جنيه إسترليني .. لما كان في تشيلسي أغلي صفقة عملها كانت شراءه (فيرناندو توريس Fernando Torres) ب50 مليون جنيه إسترليني .. فعلياً (جوارديولا) مصرفش في حياته قد ما صرف وهو مدير فني لمانشستر سيتي .. بسم الله ما شاء الله حنفية فلوس ومفتوحه .. هو شاري 4 لاعيبه دافع فيهم 220 مليون جنيه إسترليني اللي هم (رياض محرز) و(إيميريك لابورتا Aymeric Laporte) و(بينجامين ميندي Benjamin Mendy) و(جون ستونز John Stones).
المصدر:
- مقالة بعنوان Arsene Wenger has spent 767m In the transfer market, Max Allegri 884m and Pep Guardiola 1 billion. But one manager blows them all out of the water when it comes to splashing the cash. نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-7890135/How-prominent-managers-spent-transfer-market-careers.html
