سيدنا (أبوبكر الصديق) رضي الله عنه كانت له مقولة حلوة أوي بيقول فيها وإني لأبغض أهل بيت ينفقون رزق أيام في يوم واحد .. بالنسبة للناس اللي مش بتحب تتعلم من التاريخ الإسلامي وشايفه إنه دقة قديمة وإن مفيش أحسن من التراث الأجنبي فاللي سيدنا (أبوبكر) كان بيتكلم عنه حاجة إسمها Overspending .. اللي بيتكلم عنه سيدنا (أبوبكر) مش بس بيمشي علي مصروف البيت .. الكلام ده بيمشي علي إقتصاد الدول كمان .. ناس كتير بتنسي إن زي ما مصروف البيت بيمسكه بني أدمين فبرده إقتصاد الدول ماسكه بني أدمين .. البيت اللي ربنا بيكرمه بمصدر دخل كبير بتلاقي إن معدل إنفاق اهل البيت بيكون كبير والعكس صحيح .. البيت اللي بيخشله في الشهر يدوبك 1000 جنيه أكيد بيصرف أقل بكتير من البيت اللي بيخشله 100,000 جنيه .. الدول برده كده خصوصاً الدول العربية .
خد عندك بلد زي كوريا الجنوبية مثلاً .. سنة 2017 البلد دي إقتصادها كان بيخشله فلوس واللي الإخوة بتوع الإقتصاد بيسموه الناتج الوطني الإجمالي أو GDP حوالي 2 ترليون دولار .. من جواك بتقول واااااو بصوت شخصية (ونيس) بس إستني وااااو أنقح منها جاية في السكة دلوقتي .. كوريا الجنوبية سنة 2017 كانت بتتصنف علي إنها الإقتصاد رقم 14 علي مستوي العالم بناء علي كلام صندوق النقد الدولي .. عارف مين الدولة اللي إقتصادها في المركز 15؟ .. المملكة العربية السعودية اللي إقتصادها كان بيخشله GDP حوالي 1.7 ترليون دولار .. طب دلوقتي كوريا الجنوبية بلد بتصنع وبتنتج وبتبيع .. دي البلد اللي عملت العربيات الكيا KIA .. دي البلد اللي قدمت للعالم شركة سامسونج Samsung .. لكن مع كامل إحترامي للأخوة السعوديين وليكن ما يكون يعني هو بالصلاة علي النبي هي السعودية قدمت للعالم إيه؟ .. شطور يا اللي بتقول ورا أومال أرامكو Aramco راحت فين؟ .. فعلياً لو فكرت فيها أرامكو هي أكبر وأهم حاجة قدمها الإقتصاد السعودي للعالم .. وهي دي المشكلة .. لو حبيت نرجع تاني لمقولة سيدنا (أبوبكر الصديق) فالدول العربية الغنية اللي بيخشلها فلوس كتير وصدقني أنا مش بقر ولا بحسد فالدول دي كانت بتصرف كتير .. كتير أوي .. كتير أوفر .. حط ده قصاد معلومة إن سعر بيع برميل البترول اللي الدول دي كانت معتمدة علي إتخسف بيه الأرض وإنت حتلاقي نفسك قصاد واقع ما يعلم بيه إلا ربنا.
دولة زي الجزائر محتاجة بقدرة قادر إن سعر برميل البترول يبقي 157 دولار للبرميل عشان يبدأ اقتصادها يجيب فلوس يدوبك يخلي ميزانية البلد مش بالسالب .. دولة تانية زي سلطنة عمان محتاجة سعر برميل البترول يبقي 87 دولار .. فعلياً مفيش ولا دولة عربية من الدول اللي إقتصادها فضل لسنين معتمد علي عائدات النقط مش حتلبس في الحيط بإستثناء دولة واحدة يتيمة هي قطر .. ده حقيقي .. سلطنة عمان وصلت لمرحلة إن وكالات تقييم الإئتمان العالمية ودي عبارة عن شركات بتقيم هي لو بالصلاة علي النبي عمان حبت تستلف فلوس فهل حتعرف تسددها في معادها ولا لا .. كتير من الوكالات دي بقت بتقول علي الإقتصاد العماني إنه Junk Status يعني فعلياً مش حيقدر يسدد ولا مليم ولما وكالات زي دي تطلع تقول كده علي إقتصاد بلد فده زي ما تقول كده كإنهم بيقولوا للعالم بلاش تتعاملوا مع العمانيين عشان مفلسين ومعهمش فلوس .. دولة زي الكويت رايحة في سكة إن عجز الموازنة بتاعها يوصل 40% من GDP ولو ده حصل فالكويت حتبقي أكتر دولة مديونة في العالم .. سعر برميل البترول الحالي اللي هو 40 دولار وده خراب بيوت مستعجل للدول العربية اللي بتصدر بترول وده اللي حيخلي الدول دي تلجأ لإجراءات كانت بالنسبة ليهم زمان مش مطروحة ومش علي الطرابيزة أصلاً .. الجزائر بتفكر إنها تخسف بإنفاقها السنوي النص .. العراق بتفكر تخسف بمرتبات موظفي الحكومة الأرض.
لو حبيت نتكلم بما يرضي الله فالأزمة دي الحقيقة ليها سببين .. السبب الأولاني هو إن مصادر الطاقة المتجددة Renewable Energy بقت متوفرة بأسعار رخيصة بتنافس سعر البترول وفوق ده إنها بتيجي بميزة إنها مش بتلوث البيئة .. السبب الثاني هو فيروس كورونا Covid-19 واللي إذا كان في الأول أجبر الناس إنها تقعد في البيت فدلوقتي مع عودة التجارة والناس نزلت شغلها إلا إن برده بقي عندنا مشكلة كبيرة هي Over Supply .. السوق بقي مليان بترول ومش لاقيين مشتري .. وبما إن مش لاقيين مشتري فالبترول مش بيتباع .. بما إن البترول مش بيتباع فالدول العربية المنتجة للبترول مبقاش يخشلها فلوس زي الأول .. بناء علي كلام صندوق النقد الدولي الدول العربية سنة 2012 دخلها من بيع البترول فوق الترليون دولار .. سنة 2019 الرقم قل النص تقريباً بقي 575 مليار دولار .. السنة دي اللي هي 2020 صندوق النقد الدولي بيتوقع إن الدول العربية حيخشلها من بيع البترول يدوبك 300 مليار دولار .. لو فكرت فيها 300 مليار دولار ده رقم محترم جداً .. ميزانية مصر كلها شاكب راكب حوالي 136 مليار دولار .. بس حنرجع تاني للمشكلة اللي سيدنا (أبوبكر) كان بيتكلم عنها اللي هي Overspending.
لو إنت بتقرأ الكلام ده وإنتماءك أو رأيك السياسي مخليك فرحان في دول الخليج وبتقول زي (محمد هنيدي) في فيلم فول الصين العظيم أحسن أحسن فأحب أقولك إتنيل إتنييييييييييل .. فيه حاجة في الإقتصاد بيسموها Remittance وده الإسم السيكسي لوصف العمالة الأجنبية في دول الخليج .. هو معلش يعني مش السعودية دي شغال فيها مصريين؟ .. هم المصريين دول مش كانوا بيبعتوا فلوس لأهاليهم هنا في مصر؟ .. هو مش لو الشغل في السعودية قفل ففيه ناس في مصر هنا حتتاخد في الرجلين؟ .. علي فكرة فيه دول إقتصادها كان قائم علي حكاية الفلوس اللي بيبعتها الناس اللي شغالة في الخليج دي .. دولة زي لبنان مثلاً 10% من GDP بتاعها كان من فلوس اللبنانيين اللي شغالين في الخليج واللي بسبب إن الشغل في الخليج بيقفل فالناس بطلت تبعت فلوس وده واحد من أسباب الفشخة الإقتصادية اللي هم عايشين فيها دلوقتي.
المصدر:
- مقالة بعنوان The end of the Arab World’s oil age is nigh نشرت في مجلة The Economist وده لينك المقالة الأصلية:
https://www.economist.com/middle-east-and-africa/2020/07/18/the-end-of-the-arab-worlds-oil-age-is-nigh
