نادر أوي لما تلاقي سلاح أو فكرة جديدة تطلع فتقول إن البتاعة دي حتغير مفهومنا عن الحروب .. كل فين وفين لما بتلاقي نقلة نوعية في السلاح زي دي .. حاجة كده زي لما البشر اخترعوا البندقية أو لما اخترعنا الطيارة .. بس فيه اختراع جديد جاي في السكة فعلياً حيخلينا كبشر نعيد كل حساباتنا تاني بتاعة ازاي نخش حروب؟ وندافع نفسنا ازاي؟ والاختراع ده اسمه رادار الكم Quantum Radar .. اللي حصل إن مجلة MIT Technology Review العلمية نشرت Paper كتبها مهندسين من معهد العلوم والتكنولوجيا النمساوي بيقولوا فيها إنهم لقوا الخلطة السحرية بتاعة ازاي تعمل Quantum Radar .. بسرعة أوي تعالي أفهمك هو بالصلاة علي النبي يعني إيه Quantum Radar ده؟ وبيشتغل ازاي؟
البتاع ده فكرته إنه ماشي علي نظرية اسمها Quantum Entanglement .. فكك من اسمها .. تخيل إن عندك جسمين ليكن مثلاً كورتين بس صغيرين أوي اللي هم عشان تشوفهم لازم تحطهم تحت المايكروسكوب بس الجسمين أو الكورتين دول توأم يعني ربنا خلاهم يحسوا ببعض أيا كانت المسافة بينهم قد إيه .. لو واحد فيهم جاله خبر وحش أخوه التوأم بيحس به وبيرفع سماعة التليفون يكلمه يسأله هو فيه إيه اللي حصل؟ .. أهو ده بالضبط معني Quantum Entanglement .. لو كورة من الكورتين مثلاً سخنت فبرده بتلاقي الكورة أختها لوحدها هي كمان سخنت رغم إن ممكن الكورة التانية دي تكون محطوطة جوه تلاجة .. لما حاجة تحصل في كورة فتسّمع في الكورة أختها التوأم فالظاهرة دي بتتسمي Quantum Illumination .. طيب إيه علاقة كل الهري ده بالرادارات؟ .. كل اللي حضرتك بتعمله إنك تجيب اتنين فوتون بينهم Quantum Entanglement بحيث واحد تطلقه في الهوا والتاني تفضل تخليه متعلق وده اللي انت عينك عليه وبتراقب أي تغيير يحصل فيه .. الفوتون اللي انت طلقته في الهوا ده بيفضل يطير ويخبط في أي حاجة ماشية .. افرض مثلاً عدي جنب موتور طيارة مقاتلة فيسخن والسخونية دي تسّمع في الفوتون اللي انت معلقه في الهواء قصاد عينك .. فجأة بتعرف إن الفوتون اللي انت طالقه ده عدي علي موتور طيارة وهكذا .. حلو أوي الشرح ده بس هو أنا كده كضابط دفاع جوي قاعد علي بطارية S-300 في سيناء استفدت إيه؟
الرادارات اللي انت بتلاقيها في أي بطارية دفاع جوي شاطرة أوي في إنها توريك إن فيه هنا طيارة .. انت بيبقي قدامك شاشة خضراء فجأة بتلاقي نقطة منورة والشاشة بتقولك إن فيه طيارة هنا .. طب الطيارة دي إيه؟ الله أعلم .. سرعتها كام؟ الله أعلم .. علي ارتفاع كام؟ الله أعلم .. طب رايحه فين؟ الله أعلم برده .. بطاريات الدفاع الجوي بيبقي فيها رادارات وأجهزة تانية عشان تجاوب علي كل الأسئلة دي زي مثلاً بيبقي معاهم جهاز بيلقط الإشارات اللاسلكية اللي طالعة من الطيارة عشان يحدد هل هي طيارة مقاتلة ولا طيارة مدنية .. لما بتستخدم فكرة Quantum Radar انت مش محتاج فرح العمدة ده .. انت الفوتون اللي انت طالقه في الهوا ده لو انت عندك منه كذا واحد و ليكن 100,000 فوتون مثلاً فانت فعلياً تقدر تخليهم يرسمولك شكل الطيارة بأبعادها علي شاشة الكومبيوتر بتاعة ضابط الدفاع الجوي .. بسهولة أوي الضابط يقدر من الرسم اللي بيترسمله إنه يعرف هل دي طيارة مقاتلة ولا لا و يعرف كمان الموديل بتاعها ونوعها.
نقطة تانية وهي إن Quantum Radar مش بيتلقط .. حاول تتتخيل إن منظومة الدفاع الجوي بتاعتك عامله بالضبط زي انت واتنين صحابك ادخلكوا اوضة ضالمة خالص عشان تمسكوا واحد صاحبكوا وكل واحد فيكوا معاه كشاف .. صحيح أنتوا 3 كشافات اللي معاكوا بتخليكوا شايفين الأوضة بس صاحبكوا الرابع اللي مستخبي منكوا شايف الكشافات دي ويقدر يمشي ورا مسار الضوء عشان يعرف مكان كل واحد فيكوا .. ده اللي بيحصل في الرادارات العادية .. الرادار العادي بيطلع كمية إشعاع وطاقة كافية أوي إن طيارة استطلاع أو أي طيارة مقاتلة محطوط فيه أجهزة تشويش إنها تعرف مكان الرادار فين ويا إما تشوش عليه يا إما تضربه .. بس Quantum Radars مبتطلعش كمية طاقة كافية إنها تتلقط .. ده معناه إن لو مثلاً أميركا بعتت علينا سرب طيارات F-35 وإحنا عندنا بطاريات دفاع جوي فيها Quantum Radars فانت تقدر بسهولة أوي تلقطهم وتوقعهم قبل ما حتي الطيارين الأمريكان يلحقوا يرقعوا بالصوت .. إذا كانت تكنولوجيا Stealth أو التخفي من الرادارات هي مستقبل الطيارات المقاتلة فتكنولوجيا رادارات الكم هي مستقبل الدفاع الجوي.
المصدر:
- مقالة بعنوان How Quantum Radar Could Completely Change Warfare .. نشرت في مجلة Popular Mechanics وده لينك المقالة الأصلية:
http://ww.popularmechanics.com/military/a28818232/quantum-radar/
