نادر أوي لما تلاقي سلاح أو فكرة جديدة تطلع فتقول إن البتاعة دي حتغير مفهومنا عن الحروب .. كل فين و فين لما بتلاقي نقلة نوعية في السلاح زي دي .. حاجة كده زي لما البشر إخترعوا البندقية أو لما إخترعنا الطيارة .. بس فيه إختراع جديد جاي في السكة فعلياً حيخلينا كبشر نعيد كل حساباتنا تاني بتاعة إزاي نخش حروب؟ و ندافع نفسنا إزاي؟ و الإختراع ده إسمه رادار الكم Quantum Radar .. اللي حصل إن مجلة MIT Technology Review العلمية نشرت Paper كتبها مهندسين من معهد العلوم و التكنولوجيا النمساوي بيقولوا فيها إنهم لقوا الخلطة السحرية بتاعة إزاي تعمل Quantum Radar .. بسرعة أوي تعالي أفهمك هو بالصلاة علي النبي يعني إيه Quantum Radar ده؟ و بيشتغل إزاي؟
البتاع ده فكرته إنه ماشي علي نظرية إسمها Quantum Entanglement .. فكك من إسمها .. تخيل إن عندك جسمين ليكن مثلاً كورتين بس صغيرين أوي اللي هم عشان تشوفهم لازم تحطهم تحت المايكروسكوب بس الجسمين أو الكورتين دول توأم يعني ربنا خلاهم يحسوا ببعض أيا كانت المسافة بينهم قد إيه .. لو واحد فيهم جاله خبر وحش أخوه التوأم بيحس به و بيرفع سماعة التليفون يكلمه يسأله هو فيه إيه اللي حصل؟ .. أهو ده بالضبط معني Quantum Entanglement .. لو كورة من الكورتين مثلاً سخنت فبرده بتلاقي الكورة أختها لوحدها هي كمان سخنت رغم إن ممكن الكورة التانية دي تكون محطوطة جوه تلاجة .. لما حاجة تحصل في كورة فتسّمع في الكورة أختها التوأم فالظاهرة دي بتتسمي Quantum Illumination .. طيب إيه علاقة كل الهري ده بالرادارات؟ .. كل اللي حضرتك بتعمله إنك تجيب إتنين فوتون بينهم Quantum Entanglement بحيث واحد تطلقه في الهوا و التاني تفضل تخليه متعلق و ده اللي إنت عينك عليه و بتراقب أي تغيير يحصل فيه .. الفوتون اللي إنت طلقته في الهوا ده بيفضل يطير و يخبط في أي حاجة ماشية .. إفرض مثلاً عدي جنب موتور طيارة مقاتلة فيسخن و السخونية دي تسّمع في الفوتون اللي إنت معلقه في الهواء .. فجأة بتعرف إن الفوتون اللي إنت طالقه ده عدي علي موتور طيارة و هكذا .. حلو أوي الشرح ده بس هو أنا كده كضابط دفاع جوي قاعد علي بطارية S-300 في سيناء إستفدت إيه؟
الرادارات اللي إنت بتلاقيها في أي بطارية دفاع جوي شاطرة أوي في إنها توريك إن فيه هنا طيارة .. إنت بيبقي قدامك شاشة خضراء فجأة بتلاقي نقطة منورة و الشاشة بتقولك إن فيه طيارة هنا .. طب الطيارة دي إيه؟ الله أعلم .. سرعتها كام؟ الله أعلم .. علي إرتفاع كام؟ الله أعلم .. طب رايحه فين؟ الله أعلم برده .. بطاريات الدفاع الجوي بيبقي فيها رادارات و أجهزة تانية عشان تجاوب علي كل الأسئلة دي زي مثلاً بيبقي معاهم جهاز بيلقط الإشارات اللاسلكية اللي طالعة من الطيارة عشان يحدد هل هي طيارة مقاتلة ولا طيارة مدنية .. لما بتستخدم فكرة Quantum Radar إنت مش محتاج فرح العمدة ده .. إنت الفوتون اللي إنت طالقه في الهوا ده لو إنت عندك منه كذا واحد و ليكن 100,000 فوتون مثلاً فإنت فعلياً تقدر تخليهم يرسمولك شكل الطيارة بأبعادها علي شاشة الكومبيوتر بتاعة ضابط الدفاع الجوي .. بسهولة أوي الضابط يقدر من الرسم اللي بيترسمله إنه يعرف هل دي طيارة مقاتلة ولا لا و يعرف كمان الموديل بتاعها و نوعها.
نقطة تانية و هي إن Quantum Radar مش بيتلقط .. حاول تتتخيل إن منظومة الدفاع الجوي بتاعتك عامله بالضبط زي إنت و إتنين صحابك أدخلكوا أوضة ضالمة خالص عشان تمسكوا واحد صاحبكوا و كل واحد فيكوا معاه كشاف .. صحيح أنتوا 3 كشافات اللي معاكوا بتخليكوا شايفين الأوضة بس صاحبكوا الرابع اللي مستخبي منكوا شايف الكشافات دي و يقدر يمشي ورا مسار الضوء عشان يعرف مكان كل واحد فيكوا .. ده اللي بيحصل في الرادارات العادية .. الرادار العادي بيطلع كمية إشعاع و طاقة كافية أوي إن طيارة إستطلاع أو أي طيارة مقاتلة محطوط فيه أجهزة تشويش إنها تعرف مكان الرادار فين و يا إما تشوش عليه يا إما تضربه .. بس Quantum Radars مبتطلعش كمية طاقة كافية إنها تتلقط .. ده معناه إن لو مثلاً أميركا بعتت علينا سرب طيارات F-35 و إحنا عندنا بطاريات دفاع جوي فيها Quantum Radars فإنت تقدر بسهولة أوي تلقطهم و توقعهم قبل ما حتي الطيارين الأمريكان يلحقوا يرقعوا بالصوت .. إذا كانت تكنولوجيا Stealth أو التخفي من الرادارات هي مستقبل الطيارات المقاتلة فتكنولوجيا رادارات الكم هي مستقبل الدفاع الجوي.
المصدر:
مقالة بعنوان How Quantum Radar Could Completely Change Warfare .. نشرت في مجلة Popular Mechanics و ده لينك المقالة الأصلية:
http://ww.popularmechanics.com/military/a28818232/quantum-radar/
