سد النهضة .. ميكس بين النصاحة و النتانة يودي في داهية.

سد النهضة من المواضيع اللي فعلياً محدش مذاكرها كويس .. أنا كواحد مصري اللي بيتقالي عن الموضوع ده إن الأثيوبيين عايزين يسرقوا ميتنا و يموتونا من العطش .. إنت مش محتاج غير إنك تفتح سوشيال ميديا و إنت حتلاقي بوستات كتير منها بيقول إن الأيام الجاية حتبقي ولا الأيام العجاف اللي عدت علي مصر أيام سيدنا (يوسف) عليه السلام بإستثناء إن إحنا حالياً معندناش سيدنا (يوسف) بس عندنا فرعون سيدنا (موسي) عليه السلام بس مش دي القضية .. أنا أساساً مش حتكلم عن سد النهضة من وجهة نظرنا إحنا كمصريين خالص .. النهاردة حنشرح سد النهضة من وجهة نظر الأثيوبيين و عشان تفهم ده أنا محتاج أجاوب علي شوية أسئلة تفهمك هو فيه إيه و الحقيقة هم 3 أسئلة بس اللي أنا ححاول أجاوب عنهم عشان متوهكش:

• ليه أثيوبيا محتاجه سد النهضة أساساً؟
• ليه السد ده مش عايز يخلص؟
• الدنيا حتمشي علي فين؟

هي أثيوبيا بالصلاة علي سيدنا النبي (عليه الصلاة و السلام) عايزه سد النهضة ليه؟

السد إسمه بالكامل Grand Ethiopian Renaissance Dam أو GERD و دي معناها سد النهضة الأثيوبي الكبير و اللي فعلياً هو أكبر مشروع بنية تحتية يتعمل في تاريخ أفريقيا .. براحة كده و تعالي نحسبها سوا .. أثيوبيا هي تاني أكبر دولة في أفريقيا من حيث عدد السكان بعد نيجيريا .. بلد لو جيت مسكت أرقام الإقتصاد بتاعها تلاقيها بتحقق معدل نمو سنوي شبه ثابت ب10% و ده رقم محترم جداً .. لسه حتقول هييييه تيجي تقسم الدخل القومي لأثيوبيا علي عدد السكان تلاقي إن نصيب كل مواطن أقل من 1000 دولار في السنة .. ده معناه إن أثيوبيا كبلد إقتصادها ماشي كويس بس كبني أدمين هم فقراء فشخ .. دي بلد عدد سكانها معدي 100 مليون يعني قريبين من عدد سكانا بس أكتر من 66% منهم معندهمش كهربا .. فعلياً الصين حاطة فلوس بالمليارات كمشاريع بنية تحتية هناك بس ده مش مسمع إن في الأخر مرتب المواطن الأثيوبي يكفيه لحد أخر الشهر .. الصين عملت مشروع خطوط سكة حديد سريع في العاصمة أديس أبابا و بعد ما حطت القضبان و بنت محطات السكة الحديد اللي القطر حيقف فيها و كمان بنت شبكة كهرباء ضغط عالي عشان تشغل خط السكة الحديد إتكلفت لوحدها 1.8 مليار دولار و ده من غير تكلفة خط السكة الحديد علي فكرة .. تاني لسه الأثيوبيين حيقولوا هييييه لقوا إن قطارات السكة الحديد كل شوية تعطل عشان الكهرباء بتقطع.

بلاش كل ده .. الصين بانيه في أثيوبيا 16 منطقة صناعية كلها مصانع لسه مشتغلتش عشان مفيش كهرباء .. هنا يجي دور السد .. الأثيوبيين بيقولوا إن بمجرد ما ال16 تربينة في السد تشتغل و يبدأ ينتج ال6000 ميجاوات كهرباء اللي هو إتصمم عليها فإنتاج البلد من الكهرباء حينط 150% مرة واحدة .. دي كهرباء كفيلة إنها تكفي إحتياجات أثيوبيا و كمان تصدر منها لجيرانها .. ده بالضبط عامل زي حد قلبه بطل يدق و دكاتره الطواريء يدوله صدمة كهربية عشان قلبه يشتغل تاني .. هنا برده السياسة الخارجية حتظهر معاك لإن أثيوبيا لاسه ماضية إتفاقية سلام مع أريتريا و عايزه يبقي ليها شغل مع جنوب السودان و كنت إتكلمت إن ليهم شغل برده في جيبوتي في مقالة قديمة فطبيعي إنهم يكونوا عايزين السد يكمل و يشتغل عشان يصدروا كهرباء لجيرانهم و نفوذهم عندهم هو كمان يكبر.

فعلياً هو مشروع كبير فشخ .. كموقع هو مبني فوق هضبة الحبشة علي بعد 20 كيلومتر بس من الحدود الأثيوبية السودانية .. البحيرة الصناعية اللي وراه طولها 246 كيلومتر و عشان تتحفر الحكومة مشت الالاف من بيوتهم اللي هو حاجة شبه تهجير أهل النوبة عندنا في مصر لما حبوا يبنوا السد العالي .. السد نفسه إرتفاعه 170 متر بطول 1.8 كيلومتر يعني إرتفاعه تقريباً نفس إرتفاع برج القاهرة .. كل ده تقريباً خلص المشكلة إن الجزء الأوسط من السد لسه لحد دلوقتي محدش رص فيه طوبة .. المشروع حالياً متأخر عن معاد التسليم بتاعه 5 سنين .. شركة المقاولات اللي واخده شغل الStructure أو الإنشاءات و هي شركة ساليني أمبريجيلو Salini Impregilo SpA الإيطالية مش راضية تشتغل إلا لما تاخد فلوسها والكلام ده من أكتوبر 2018.

و دلوقتي بعد ما حضرتك فهمت الليلة تعالي نفهمك بقي هم إزاي الأثيوبيين لبسوا أحلي خازوق في حياتهم من ساعة ما قرروا يبنوا السد ده و نسأل سوا هو إيه مشكلة السد اللي تحس إن فلوسه حرام ده؟

لسنين و سنين من ساعة ما الأثيوبيين قالوا إنهم عايزين يبنوا سد النهضة و الحكومة عندهم سألت نفسها السؤال اللي حكومتنا بتسأله .. هو إحنا لما بنتزنق في حاجة بنرميها لمين؟ شطور .. المؤسسة العسكرية .. سد النهضةمن بدايته و هو مرمي للمؤسسة العسكرية الأثيوبية تهبد فيه زي ما هي عايزه .. فعلياً هم كانوا بيتعاملوا مع سد النهضة علي إنه مشروع التخرج بتاع المهندسين العسكريين .. عارف إنت بعد ما إتخرجت و إشتغلت و خدت خبرة حلوة لما بترجع بذاكرتك كده لمشروع التخرج بتاعك و إزاي و إنت في المناقشة لابس بدلتك و متشيك و دافع دم قلبك ثمن الجاتوه و الحاجة الساقعة و يجيلك الدكتور اللي دايماً بيكون الضيف اللي دكتور المشروع بتاعك جايبه يسألك سؤال يطلع الهبيد اللي إنت دافنه جواك؟ .. مين فينا مهبدتش الهبدات العابرة للقارات دي في مناقشة مشروع التخرج بتاعه؟ .. و هي دي مشكلة سد النهضة.

المؤسسة العسكرية هبدت فيه لحد ما في سنة 2018 إتقال إن لو الوضع كمل علي كده السد ده مش حيخلص ولا بعد 10 سنين .. اللي إيدهم تتلف في حرير و السبب في المصايب دي كلها هي شركة ميتيك Metec .. ميتيك ده إختصار Metals and Engineering Corp و ده الإسم بتاع شركة المقاولات الهندسية اللي تبع المؤسسة العسكرية الأثيوبية و اللي كانت مسئولة عن الجزء بتاع تربينات الكهرباء في السد .. المشروع زيه زي أي مشروع ضخم بتتقسم التاسكات بتاعته علي شركات مختلفة يعني زي ما قلت شغل الإنشاءات خدته شركة Salini Impregilo SpA الإيطالية و جزء التربينات خدته شركة Metec الأثيوبية .. مش عارف إنت خدت بالك ولا لا إني قلت إن الشركة كانت مسئولة عن شغل التربينات .. الشركة إتطردت من المشروع و فككوها و ال14 جنرال سابق في مجلس الإدارة بتاعتها يا إما إتحبسوا بتهم فساد أو هربوا بره البلد عشان مطلوب القبض عليهم في تهم فساد .. رغم إن الشركة خدت تلتين فلوسها في معادها بس فعلياً Metec هي السبب في المصيبة اللي أثيوبيا فيها دلوقتي .. التأخير اللي هي السبب فيه خلي الأثيوبيين يتكلموا إن عملية مليء البحيرة الصناعية حتبدأ في 2020 و حتستمر 7 سنين كاملة .. الوضع دلوقتي إن شغل Metec إتقسم علي شركات أجنبية من ضمنها شركة كومبوزيت جروب كورب Composite Group Corp و شركة سينوهايدرو كورب ليميتيد Sinohydro Corp. Ltd الصينية و فرع شركة General Electric في فرنسا اللي هو GE France SASU.

سنة 2011 لما بدأ المشروع إتعين إتنين اللي هم (سميجنو بيكيلي Simegnew Bekele) و معاه (كيفل هورو Kifle Horo) عشان يبقوا مديري المشروع .. (كيفل هورو) مكملش كتير في المشروع و إتشال بسبب خناقاته مع جنرالات شركة Metec حول النقطة اللي كانت السبب في تأخير تسليم المشروع لحد دلوقتي و هي إن جنرالات Metec كانوا عايزين بعد ما التنفيذ بدأ إنهم يغيروا في التصميمات عشان يزودوا سقف القدرة الإنتاجية لتربينات السد و دي نقطة إنت لازم تفهمها .. سنة 2011 التصميم الأولاني خالص اللي المفروض إن مهندسين الموقع ياخدوه زي ما هو كده يطبقوه كان بيقول إن عندك 15 تربينة الواحدة فيهم بتطلع 350 ميجاوات يعني بتتكلم عن قدرة إجمالية 5,250 ميجاوات .. الجنرالات قالوا إن ده مش كفاية .. إحنا عايزين 16 تربينة كل تربينة بتطلع 375 ميجاوات عشان السد يدي 6000 ميجاوات .. طبعاً تربينات أكبر يعني أبعاد أكبر يعني الأوضة اللي إتبنت ليهم حتوسع يعني حجم البحيرة الصناعية حتكبر و كل ده هدر فلوس .. (كيفل هورو ) قالهم إن ده هبد .. قدرة السد خلال سنة علي إنتاج الكهرباء هي رقم ثابت بتتحسب بإنك تجيب حجم المياه اللي في البحيرة الصناعية و بحسبة بسيطة تحولة لميجاوات كهرباء .. اللي كان الجنرالات عايزينه حيخلي ميزانية المشروع تزيد و وقت البناء يزيد و كمان الكهرباء الزيادة حتبقي مجرد نبضات في وقت قليل زي ما كده كهرباء البيت عندكوا تعلي لحظياً أوي بس كلامهم مشي عليه و هو إضطر يقدم إستقالته.

سنة 2017 الجنرالات بتوع Metec ضغطوا تاني علي مدير المشروع (سميجنو بيكيلي) إنهم عايزين يزودوا من قدرة السد أكتر بإنهم حيشيلوا 14 تربينة من ال16 اللي خلاص الأوض و القواعد الخرسانة بتاعتها إتصبت و اللي الوصلات بتاعتهم إتركبت عشان يخلوهم بدل ما الواحدة فيهم بتطلع 375 ميجاوات حنجيب تربينات بتطلع 400 ميجاوات .. ولإن ده معناه Selection جديد بRequirements جديدة فهدلي يا إبني القواعد الخرسانة تاني و شيل المواسير و المحابس و الكونترول إياكش المشروع يخلص و نروح بيوتنا .. كل تعديلة أو بلاش نقول تعديلة خلينا نقول هبداية بتتعمل بتسمع في كل حتة من المشروع.

في يوليو 2018 صحي الأثيوبيين علي خبر إن مدير المشروع (سميجنو بيكيلي) البوليس لقاه مقتول جوه عربيته و هو قافل السنتر لوك و مضروب بطلقة من مسدسه في دماغه .. تقرير الطب الشرعي طلع قال إن دي حالة إنتحار .. قلنا حلو .. رجل مضغوط و حاسس إن عليه حمل كبير مش قادر يستحمله ففي لحظة ضعف قرر ينهي حياته .. قصة شفناها في مليون فيلم أجنبي .. جينا عرفنا إن (سميجنو بيكيلي) كان يومها رايح المطار عشان ياخد طيارة توديه هو و وفد معاه لموقع السد عشان يحلوا شوية مشاكل فالأثيوبيين قالوا يادي النيلة يعني هو إزاي قام الصبح لبس هدومه و حضر شنطته و خد تذكرة الطيارة عشان يموت نفسه في عربيته؟ .. علي فكرة مش بس مشكلة التربينات كانت هي اللي معطلة الدنيا لإن بسبب تعديل التصميم الجزء الأوسط من السد بعد ما إتبني قرروا يهدوه و لحد دلوقتي متبناش تاني .. لو عملية مليء البحيرة الصناعية بدأت في 2019 فلسه عملية البناء بتاعة كل حاجة ناقصة في السد حتفضل مكملة لحد سنة 2022 .. هندسياً الوضع زي الزفت بس يمكن فيه منكوا كتير بيسأل نفسه طب هم ليه الأثيوبيين عملوا في نفسهم كده؟ .. ليه أدوا شغلانة صعبه بالشكل ده لناس مش مؤهلة تمسكها؟

الإجابة عن السؤال ده هو ميكس بين النصاحة و النتانة .. النصاحة إنهم كانوا عايزين Metc تبقي حاجة شبه Samsung و Hyundai كده اللي هي شركة كوري شغال فيها ناس كوريين عشان تصنع و تبيع منتجات كوري في كل حتة في العالم .. هم كانوا عايزين يصدروا لجيرانهم كهرباء ناقص يكتبوا علي فواتير الكهرباء بتاعتها صنع في أثيوبيا .. نقطة تانية و هي إن الشركات الكبيرة اللي شغالة في مجال السدود مش كتير و كلهم ليهم شغل مع مصر عشان السد العالي فالأثيوبيين خافوا يعتمدوا عليهم فتيجي الشركات تخاف تخسر شغلها في مصر بس ده أنا شايفه مبرر أهبل شوية .. بس اللي خرب الدنيا هو النتانة .. الحكومة الأثيوبية قررت فجأة إنها تقلل مليار دولار من ميزانية المشروع و عشان يعملوا ده قالوا لنفسهم طب ما ندي الشغل لMetec و نحاسبها بالعملة المحلية أرخص من إننا نجيب شركة أجنبية ندفعلها بالدولار .. علي فكرة (سميجنو بيكيلي) كان شايف إن دي فكرة حلوة جداً بس الأفكار الحلوة لازم تطبق صح .. إنك تجيب طالب هندسة مدني لسه متخرج تقوم راميه في مشروع فشيخ زي ده الغلطة فيه ممكن تودي في ستين داهية بس عشان توفر مرتب مهندس أجنبي بيبقبض بالدولار يبقي إنت كده بتهزر .. المهندس حديث التخرج ده ممكن تشغله تحت إيد مهندسين أجانب ينقلوا ليه خبرتهم و اللي إتعلموه مش تسيبه زي ما قلت في الأول يتعامل مع المشروع علي إنه مشروع التخرج بتاعه.

لما Metec مشيت من المشروع كل المهندسين اللي قعدوا سنين في الموقع مشيوا معاها و حتي مش لاقيين شغل عشان الCV بتاعهم مكتوب فيه إنهم إشتغلوا في Metec اللي خلاص سمعتها في السوق بقت إنها شركة فاشلة لإن اللي ماسكها كانوا جنرالات لو جيت تكتب Email كمهندس تقول فيه إن فيه حاجة غلط بتتعمل و إن رأي اللواء فلان حيدمر الدنيا فاللواء فلان ده بمكالمة تليفون حيرميك في السجن .. لو إنت مهندس شغال في السد فإنت حتي لو شايف مصايب بتسكت .. و هنا مش بس هبد Metec اللي أنا عايز أتكلم عنه لإن دلوقتي الهبد حيخش مع السياسة في الخلاط عشان تشرب أحلي سموذي.

مش بس هبد المؤسسة العسكرية هو اللي عطل المشروع إنه يخلص .. أثيوبيا أصلاً بلد أهلها مش طايقين بعض .. عشان تفهم أثيوبيا حاول تتخيل شوية طلبه ميعرفوش بعض و أجروا شقة سوا .. كل واحد فيهم له عاداته و تقاليده و دماغه فطبيعي تبقي بينهم خناقات لرب السما .. صحيح كلهم عايشين في نفس الشقة بس كل واحد بيحلم باليوم اللي يخلص فيه من جيرانه .. سنة 2018 بناء علي كلام مركز رصد النزوح الداخلي فأكتر من 3 مليون بني أدم في أثيوبيا إضطروا إنهم يسيبوا بيوتهم عشان أعمال العنف اللي لحد دلوقتي محدش عايز يسميها حرب أهلية بس فعلياً الوضع في أثيوبيا زي الزفت بس يمكن أكبر مشكلة معطلة الدنيا هي وضع اليد .. خليني بس أديلك مثال بسيط عشان منغوطش أوي في مشاكل أثيوبيا الداخلية .. في شهر يونيو 2018 حصلت عملية إنقلاب عسكري ضد رئيس الوزراء الجديد (أبي أحمد Abiy Ahmed) في ولاية أمهرة و عملية الإنقلاب دي كانت السبب في مقتل محافظ الولاية و وزير الدفاع .. في حالة إنك بتسأل هو كان إيه سبب الإنقلاب فركز معايا شوية.

دلوقتي سد النهضة مبني في ولاية إسمها بنشينقول-قماز .. فكك من إسمها .. المشكلة إن الناس بتوع ولاية أمهرة راسهم و ألف سيف إن الأرض اللي إتبني عليها سد النهضة دي تبعهم .. طب ليه يا عم الحاج؟ .. هو كده .. وضع يد .. بس بلاش تتخيل إنك ممكن تلعب علي الوتر ده إن السد ميكملش .. عارف إن فيه منكوا دماغهم دماغ شياطين بتقول طب ما المخابرات العامة عندنا تحط السم في العسل و تخلي الأثيوبيين يضربوا في بعض عشان السد ميكملش .. أحب أقولك إن لما الأثيوبيين عرفوا إن الفلوس اللي كانت محطوطة لبناء السد و كانت حوالي 3.4 مليار دولار خلصت و السد لسه مكملش هم قرروا يتبرعوا بفلوس عشان المشروع يكمل .. فيه موظفين حكوميين كتير إتبرعوا بمرتباتهم عشان السد ده .. الأثيوبيين عايزين السد يكمل .. المشكلة إن كل مجموعة منهم عايزاه لنفسها .. شوفت الأمهرة؟ .. أهو دول غلابة مقارنة بالتجراي .. بص يا سيدي لسنين و سنين المؤسسة العسكرية الأثيوبية من ناس إسمهم التغراي و الناس دول كبروا و طلعوا علي المعاش و بقوا هم اللي ماسكين Metec و لما جه (أبي أحمد) شالهم كلهم و فيه اللي إترموا في السجن و فيه اللي هربانين في مدينة إسمها ميكيلي تبع التجراي و البوليس في أديس أبابا مش عارف يقبض عليهم.

عارف إنك دلوقتي بتنهج من كتر المعلومات و إنك فعلياً حاسس إنك سخنت بس خلاص معلش هانت .. دلوقتي حنتكلم عن ماذا بعد؟ إيه اللي حيحصل بعد كده؟

طبعاً حضرتك بتشوف علي سوشيال ميديا كم البوستات بتاعة مفيش غير الحرب .. أحب أطمنك إحنا مش حنحارب .. ليه مش حنحارب دي ممكن انا و انت نتكلم فيها براحتنا بعدين بس فعلياً رغم إن 80% من إستهلاك مصر من المياه بيجي من نهر النيل و إن السد ده بيشكل تهديد صريح لحصتنا من المياه فإحنا مش ناويين ناخد أي أكشن يندرج تحت بند العمل العسكري .. (أبي أحمد) اللي إحنا المفروض بنتفاوض معاه بيحكم بلد هو مش عارف يمسكها و كل يوم هو في خطر إنه يتعرض لمحاولة إنقلاب تشيله من منصبه .. نقطة تانية إنت برده مهم تحطها في إعتبارك إن أثيوبيا بنت السد ده بفلوسها زي ما إحنا بنينا السد العالي من جيبنا .. هم خدوا قرض ب1.8 مليار دولار من بنوك صينية عشان يشتروا التربينات و كل ما له علاقة بالكهرباء في السد و ال3 مليار دولار اللي باقيين أثيوبيا هي اللي دافعه ثمنهم .. تكلفة المشروع واقفه علي أثيوبيا ب4.8 مليار دولار يعني بتتكلم عن 5% من إجمالي الدخل القومي بتاعهم و ده رقم أولا ًمش كبير و ثانياً هو مش كبير لإن أثيوبيا زي ما قلت جابت Metec اللي هي شركة محلية عشان تبني السد .. كل ده أنا قلته عشان أوريك إن مفيش حد تقدر تكلمه فيلوي دراع الأثيوبيين.

أنا عارف إني طولت و أكيد دي مش حتبقي أخر مرة نتكلم عن سد النهضة بس أنا حاولت أوصلك النقطة اللي يمكن إنت متكونش قادر تفهمها و هي إن الاثيوبيين كعبلوا نفسهم .. السد ده كان المفروض يخلص من 5 سنين و لسه مخلصش .. كل ده وقت .. وقت ربنا إداهولنا إننا نلاقي حل بس إحنا بنتدلع .. السد ده عطله ميكس بين النصاحة و النتانة بس اللي حيجيب أجلنا إحنا هو العلو%#^.

المصادر:
مقالة بعنوان Death on the Nile haunts Ethiopia’s Rebirth نشرت في مجلة Bloomberg و ده لينك المقالة الأصلية:
ps://www.bloomberg.com/graphics/2019-nile-river-ethiopia-dam/