أطلانطا .. حنهاجم وانتوا مالكوا خلوا الدفاع ينفعكوا.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/ovwu6571zvxs

اللي عايز أتكلم عنه النهارده هو فرقة كورة لما بتيجي تتفرج عليها بتحس نفسك بتلعب مع صحابك في ملعب خماسي .. عارف لما تلعبوا سوا و كلكوا تهاجموا و ميبقاش فيه حد بيدافع .. لما تلعبوا وكل واحد فيكوا ما بيصدق تبقي معاه الكورة عشان يرقص اللي قدامه و يجيب جون .. لما بتبقي زعلان عشان انت كنت فاضي و صاحبك مباصاش ليك الكورة .. لما بتجروا بقلبكوا علي كل كورة .. لما وانت بتلعب بتنسي الدنيا و بتنسي الدراسة و بتنسي مشاكلك و بتنسي الشغل و بتنسي كل حاجة في حياتك .. مش بتفكر غير في الكورة و الشبكة و زميلك الفاضي اللي ممكن تباصيله عشان يجيب جون أو في المدافع اللي قدامك اللي بتحاول ترقصه و تعدي منه .. أهي كورة القدم البريئة دي هي موضوعنا وهي دي الكورة اللي بيلعبها فريق أطلانطا الإيطالي.

تخيل انت و صحابك بتلعبوا في فريق كورة و الموسم ده أنتوا مركز رابع في الدوري الإيطالي يعني إتاهلتوا لبطولة Champions League الموسم الجاي إن شاء الله و الموسم ده أنتوا وصلتوا لدور الثمانية من البطولة .. إنجاز حلو مش كده .. إنجاز بيحلم بيه أي نادي كبير في إيطاليا .. المشكلة إن النادي بتاعكوا اللي هو أطلانطا مش نادي كبير .. الحقيقة هو نادي مينفعش أساساً بالورقة و القلة إنه يحقق أي حاجة من اللي إتحققت دي كلها .. انت شوية وفعلاً حتشد في شعرك وانت مش مصدق إن ده حصل و الأهم إنك عمرك ما حتصدق الطريقة اللي الإنجاز ده إتحقق بيها.

تعالوا نبدأ بالأساسيات .. أطلانطا أو زي ما الطليان بيسموه La Dea يعني الإلهة أو The Goddess هو رقم 12 من حيث ترتيب الأندية اللي بتدي مرتبات في إيطاليا .. بمعني أخر أطلانطا نادي بيدفع مرتبات في الإسبوع 40 مليون دولار .. عشان بس أحطك في الصورة لاعيبه زي (ليونيل ميسي Lionel Messi) و (كريستيانو رونالدو Cristiano Ronaldo) الواحد فيهم مرتبه لوحده لو جمعته كل 6 شهور حيوصل 40 مليون دولار دول .. فكده أول معلومة معانا إن اطلانطا ده نادي ميزانيته علي قدها شوية .. مش عيب .. الفقر عمره ما كان عيب .. نادي أطلانطا ده موجود في حتة اسمها بيرجامو Bergamo في إيطاليا و الحقيقة إن الإستاد بتاعهم صغير لدرجة إن الإتحاد الأوروبي لكرة القدم UEFA رفض إن النادي يلعب ماتشات Champions League بتاعته علي الإستاد ده و الإتحاد أصر إن النادي يلعب ماتشاته في استاد سان سيرو في مدينة ميلان اللي هي أساساً علي بعد ساعة بالعربية من بيرجامو .. فكده إحنا عرفنا إن مش بس نادي أطلانطا نادي فقير ده كمان بيلعب في استاد علي رأي (سامح عبدالشكور) في مسرحية سك علي بناتك مطرح و صالة و عفشه مياه .. برده مش عيب .. لا الفقر ولا الإستاد الصغير عمرهم ما كانوا عيبه في حق نادي.

هل تعلم سيدي الفاضل إن بيرجامو دي مدينة .. لا مدينة إيه دي محصلتش قرية حتي عايش فيها 120,000 بني أدم بس .. تقريباً حي شبرا عايش فيه ناس أكتر منها .. طب هل تعلم إن في تاريخ بطولة Champions League محصلتش إلا مرتين بس إن نادي من حتة صغيرة في عدد السكان زي كده وصل لدور الثمانية من البطولة .. المرة الأولانية كانت مع فرقة فياريال الإسبانية في موسم 2005-2006 ومن بعدها و مشفناش فياريال في البطوله تاني .. Fun Fact بخصوص نادي فياريال إن الإستاد بتاعهم بيستوعب 25,000 متفرج و المدينة أصلا عايش فيها 50,000 يعني يوم ما بيلعبوا ماتش علي أرضهم نص البلد حرفياً بتكون في الإستاد .. المرة الثانية كانت مع فرقة موناكو الفرنسية اللي طبعا مش عايز أقولك إن ده نادي مسنود من ناس تقيلة أوي .. مش بقولك حتلاقي نفسك بتشد في شعرك وانت مش مصدق إن نادي إمكانياته علي قد حالها زي كده يحقق الإنجاز  ده .. وعلي فكرة انا لسه مخلصتش .. فقرة الإبهار لسه مجتش.

زي ما قلتلك في الأول أطلانطا دي فرقة بتلعب كأنك انت و صحابك بتلعبوا كورة في ملعب خماسي .. أهم حاجة تجيبوا جوان .. أهم حاجه تتبسطوا .. أهم حاجة تدوسوا علي وش الفرقة اللي قدامكوا .. أطلانطا فرقة بتهاجم بتهاجم بتهاجم من هنا لحد بكره .. فرقة بتجيب جوان بالعبيط .. في المتوسط أي ماتش بتلعبه الفرقة دي بتجيب فيه 2.8 جون وده ثاني أعلي نسبة تهديف وسط كل أندية أوروبا الكبيرة و مفيش نادي بيجيب نسبة تهديف أعلي إلا بايرن ميونيخ الألماني بمتوسط 2.92 جون في الماتش .. طبعاً مش محتاج أشرحلك إن فرق ميزانية المرتبات بين بايرن ميونيخ و أطلانطا زي ما انت تقارن مرتبك في الشهر بثروة (نجيب ساويرس) كده.

الفكرة اللي فرقة أطلانطا إتبنت عليها هي بسيطة جداً .. إحنا حنجيب جوان أكتر من الفرقة اللي بنلاعبها .. مش مشكلة يخش فينا كام جون .. المهم إننا نجيب جوان أكتر .. هنا انت محتاج تعرف حاجتين .. مين هي الدماغ الألماظ اللي زرعت الفكر ده في الفرقة؟ .. و إزاي الأفكار دي بتترجم في الملعب؟ لإن زي ما انا طول عمري بقول الكلام معلهوش ضرايب .. فخلينا نبدأ نتعرف شوية علي دماغ المدير الفني للفرقة (جيان بييرو جاسبيريني Gian Piero Gasperini) .. دماغ (جاسبيريني) تقدر تلخصها في الكام نقطة دول:

• دايماً ننقل الكوره لقدام .. مفيش حاجة اسمها اننا نباصي الكورة لورا .. .. تاني .. دايماً الكورة تتنقل لقدام.
• لما نهاجم الفرقة كلها تهاجم .. عادي جداً في أي هجمة لينا يبقي عندنا 7 أو 8 لاعيبه جوه منطقة جزاء الخصم.
• متسيبوش الخصم يمرر الكورة و يستلم براحته .. نضغط عليهم في كل حتة .. حلقوا عليهم زي الفراخ.
• لو جتلك فرصة إنك ترقص واحد لواحد جرب حظك و متترددش .. جاتلك فرصة إنك تشوط شوط و متخافش.

بس أرجوك بلاش تتخيل إن أطلانطا بتلعب بطريقة الفوضي الخلاقة .. لا خالص .. الفرقة هجومها منظم بشكل مستفز .. اللاعيبه حافظه بعض كويس لإن (جاسبيريني) من أكتر المديرين الفنيين اللي بيهتموا بالتقسيمات في التدريب .. من الحاجات الغريبة في (جاسبيريني) إنه وهو لاعيب مكنش مهاري ومكنش بيرقص و مكنش بيخاطر .. هو كان لاعيب تقليدي جداً بس متفهمش إيه اللي حصله لما بقي مدير فني .. حتي هو كمدير فني هو مش من نوعية المديرين الفنيين اللي زي (يورجين كلوب Jurgen Klopp) إنه قريب من اللاعيبه بتاعته و اللاعيبه بتعتبره صاحبهم مش مديرهم  .. (جاسبيريني) شخص عملي جداً .. علاقته بلاعيبته هي علاقة مدير بموظفينه .. بس تقدر تقول عليه المدير الفرفوش .. مدير بيحبك تشتغل وانت مبسوط لإن انت كموظف لما تبقي مبسوط فانت بتشتغل أكتر و مش بتتعب أسرع .. بلغة الكورة لو انت لاعيب بتلعب وانت مبسوط فانت بتجري أكتر و بتعمل سبرينتات أكتر.

هل اللي بيعمله (جاسبيريني) مع أطلانطا ده حاجة جديدة لانج في كورة القدم متعملتش قبل كده؟ .. بص هي الإجابة علي السؤال ده صعبة لسبب وهي إن كل فرق أوروبا الكبيرة بتحاول يبقي عندها اللاعيبه اللي تخلي الفرقة تنفذ أكبر قدر ممكن من أفكار (جاسبيريني) لإن خلينا نكون صرحاء مع بعض إن صعب أوي يبقي عندك فرقة بتعرف تهاجم بالشكل اللي أطلانطا بتهاجم به و في نفس الوقت يكون دفاعها قوي .. الخلطة دي دايماً بتبوظ .. الأهم من كده إنك لو بصيت علي فرقة زي مانشستر سيتي مثلاً فانت من حقك تقول لنفسك طب ما (بيب جوارديولا Pep Guardiola) المدير الفني بتاعهم  بيحاول يخلي الفرقة تلعب بنفس الطريقة بس انت محتاج تقارن هو أطلانطا دفع كام و مانشستر سيتي دفع و بيدفع و حيدفع كام .. اللي انا نفسي إنك تعمله فعلاً انك تحاول تتفرج علي ماتشات مسجلة لأطلانطا الموسم ده خصوصاً ماتشين الذهاب و العودة مع فالنسيا في دور ال16 من بطولة Champions League لإنهم فعلاً ماتشين مسليين بس في نفس الوقت لما تركز شوية حتلاحظ إزاي فرقة فالنسيا فعلياً مش عارفه تدافع قصاد فرقة أطلانطا مش لسبب غير إن مفيش فرقة في أوروبا بتلعب بالطريقة الإنتحارية دي.

انا بس عايز أقول نقطة وهي إن عادة يعني لما فرقة صغيرة تطلع تفجع الفرق الكبيرة بالشكل ده فاللي بيحصل بعد كده إن اللاعيبه اللي الفرقة الصغيرة قامت عليها بتتخطف بعروض بملايين .. الكلام ده حصل مع ليستر سيتي بعد ما خدوا الدوري الإنجليزي في موسم 2015-2016 و خلال سنتين كان الثلاثي (إنجولو كانتي N’Golo Kante) و (داني درينك ووتر Danny Drinkwater) و (رياض محرز) إتباعوا .. نفس الكلام حصل مع أياكس أمستردام الله يمسيهم بالخير وبعد ما وصلوا نص نهائي بطولة Champions League إتباع (ماتياس دي ليجت Matthijs De Ligt) و (فرانكي دي يونج Frankie De Jong) و أدي (كريم زياش) حيحصلهم بداية من الموسم الجاي .. بس لما تيجي تبص علي فرقة أطلانطا و تسأل نفسك طب هو مين اللاعيب اللي ممكن يتخطف من الفرقة حتلاقي نفسك فعلياً مش لاقي حد.

فرقة أطلانطا دي عبارة عن لاعيبه وصلت أخر الخط .. دي لاعيبه لسنين فضلت تحفر في الصخر و موصلتش لحاجة و يشاء ربنا إنه يجمعهم كلهم في حتة واحدة عشان يمكن في أخر موسم أو موسمين ليهم كلاعيبه كورة يحققوا الحاجة اللي طول حياتهم بيحلموا بيها .. خد مثلاً (أليخاندرو جوميز Alejandro Gomez) اللي بيدلعوه بيقولوله (بابو Papu) أو بابا لإنه فعلياً كابتن الفرقة و الأخ الكبير للاعيبه .. هو جناح أرجنتيني عنده 32 سنة فهو مش صغير في السن واللي تخيل يا مؤمن إنه لعب أول ماتش دولي له مع منتخب الأرجنتين وهو عنده 29 سنة .. (أليخاندرو) واحد من أحرف اللاعيبه اللي انت ممكن تتفرج عليهم و رغم كده عمره ما لعب لمنتخب الأرجنتين .. انت متخيل فيه كام لعيب كحول ميسواش تلاتة تعريفة لعب للأرجنتين .. و تيجي تسأل انتوا ليه طول السنين دي كلها مخدتوش بالكوا منه؟ يقولك أصل جسمه صغير ده حتي أصغر من جسم (ميسي) .. بلاش (أليخاندرو) .. خد لاعيب زي (جوزيب إليشيتش Josip Ilicic) .. ده قلب هجوم عنده 32 سنه برده يعتبر من أحسن اللاعيبه رقم تسعة اللي انت ممكن تشوفهم في حياتك ورغم كده لسنين و سنين محدش عبره و كتير من أندية أوروبا الكبيرة رفضت تشتريه مش لسبب غير إنه إتقال عنه إنه كسلان و مبيجريش كتير في الملعب .. ده لاعيب الموسم ده جاب 20 جون في الدوري و في ماتشين الذهاب و العودة في دور ال16 في بطولة Champions League جاب 5 جوان في مرمي فالنسيا اللي يعتبر واحد من أهم و أكبر أندية اسبانيا.

حتلاقي لاعيبه زي (دوفان زاباتا Duvan Zapata) إتكرش من نادي نابولي و قالوله انت مينفعش تبقي لاعيب كورة و يمكن لقي إن الفترة اللي بيلعب فيها مع أطلانطا أخر فرصة إنه يقول للناس كلها انا مش زي ما انتوا قلتوا عليا .. لاعيبه زي (ماريو باساليتش Mario Pasalic) اللي لحد دلوقتي محسوب علي نادي تشيلسي و إتبعت إعارة لحوالي 25 نادي إتطرد منهم كلهم و متفهمش ليه دلوقتي بس قرر يفوق مع أطلانطا و يحس إنه بني أدم .. حارس المرمي بتاعهم (بيرلويجي جوليني Pierluigi Gollini) كان يأس إنه ممكن يعمل Career محترمة كحارس مرمي و جرب حظه في غناء الراب وعلي فكرة له ألبوم ناجح جداً.

تجربة اطلانطا لازم نقف قدامها و ندرسها و نفهمها لإنها فعلاً تجربة بتحصل في العمر مره .. مفيش فرقة في أوروبا بتلعب بالطريقة دي .. مفيش فرقة بتلعب بفلسفة حنهاجم حنهاجم حنهاجم و انتوا مالكوا خلوا الدفاع ينفعكوا .. مفيش فرقة فيكي يا أوروبا لعبت قصاد أطلانطا و خرجت بالكلين شيت .. الفرقة دي جابت جوان في مانشستر سيتي .. جابت جوان في يوفينتوس .. جابوا 8 جوان في فالنسيا .. جابوا سبع جوان في أودينيزي و زيهم في تورينو و زيهم في ليتشي .. جابوا خمس جوان في إيه سي ميلان و زيهم في بارما .. في دور ال16 من بطولة Champions League هم كسبوا فالنسيا علي أرضهم 4-1 .. في ماتش العودة علي ملعب ميستايا بتاع فالنسيا في الشوط الأول هم كانوا كسبانين 2-1 .. المنطقي وقتها إن أطالاتطا يقفل الملعب لإنك كسبان دلوقتي 6-2 .. بس أطلانطا مبيعملوش كده .. هم مبيعرفوش يعملوا كده .. أطلانطا بتلعب كأنك بتلعب FIFA أو PES مع صحابك .. حتي لما الماتش قلب بقي 3-2 لفالنسيا وكان ممكن فالنسيا تطلع أطالانطا لو الوضع كمل علي كده بس أبداً .. تقول إيه في الدماغ الجزمة القديمة .. أطالانطا فضلت تهاجم لحد ما الماتش خلص 4-3 ليهم .. أطالانطا بتلعب بالطريقة اللي عجباهم ودي أكتر حاجة عاجباني فيهم .. فعلياً الله يكون في عون الفرقة اللي حتلاعبهم في دور الثمانية .. أتمني إني أشوفهم تاني الموسم ده لما الأزمة اللي إحنا عايشينها تعدي علي خير.

المصادر:
مقالة بعنوان Atalanta’s throwback attack has opponents befuddled and Bergamo buzzing نشرت علي موقع قناة ESPN وده لينك المقالة الأصلية:
https://www.espn.com/soccer/atalanta/story/4072406/atalantas-throwback-attack-has-opponents-befuddled-and-bergamo-buzzing
فيديو علي YouTube بعنوان ‘Nobody plays like this!’ Atalanta’s Serie A & UCL success explained-ESPN FC وده لينك الفيديو:
http://w.youtube.com/watch?v=6jdrsO1STdM
فيديو علي YouTube بعنوان How dangerous will Atalanta be in the quarterfinals?-UEFA Champions League وده لينك الفيديو:
http://://www.youtube.com/watch?v=8xjLWqQnWJo