لينك التسجيل الصوتي علي ساوند كلاود:
https://on.soundcloud.com/EnvMw7SgDG5AWL54A
عادة لما بتحب تتكلم عن نجاح فرقة كورة فبتلاقي نفسك بشكل أوتوماتيكي جداً بتسأل نفسك هو النجاح ده إتبني علي ايه؟ .. إجابة السؤال ده بتخليك تشوف هو في السنين اللي قبلها إيه اللي حصل وإيه إتعمل عشان يمهد الطريق للنجاح ده؟ .. ده إحنا شفناه لما إتكلمنا عن فرقة تشيلسي موسم 2004-2005 الأسطورية ولقينا إن نجاح (جوزيه مورينيو Jose Mourinhu) إعتمد بشكل كبير علي شغل المدير الفني اللي قبله (كلاوديو رانييري Claudio Ranieri) .. لما بتيجي تتكلم عن اللي حققته فرقة إنتر ميلان موسم 2009-2010 فإنت فعلياً مش حتعرف تعمل ده .. الفرقة دي دخلت التاريخ وقعدت ودلدلت رجلها بمجهود شيطاني كده متحسش إن قبليه أي مشروع .. أول فرقة إيطالية تاخد ثلاثية الدوري والكأس ودوري الأبطال بس صدقني الفرقة دي إتشكلت بفعل الظروف .. نجاح فرقة إنتر ميلان في الموسم الإستثنائي ده لا وراه شغل سنين ولا وراه تخطيط .. النجاح ده وراه إزاي القدر ممكن يحط البني أدمين الصح في المكان الصح عشان يشتغلوا مع بعض ويحققوا حاجة التاريخ حيفضل فاكرها .. النجاح ده وراه حاجتين ملهمش ثالث .. أول حاجة صفقات شراء لاعيبه إتعملت بمعلمه والحقيقة إن الظروف ساعدت كمان إن الصفقات دي تتعمل .. ثاني حاجة دماغ (مورينيو) اللي أثبت فعلياً إنه بني أدم مرن لأقصي درجة ودماغه مش ناشفة زي ما الصورة المتاخدة عنه دايماً بتقول.
صفقات شراء اللاعيبه .. قيراطين حظ ولا فدانين فهلوة:
لو مُصر يعني إني ألاقي نقطة بداية ينفع تقول عليها إن دي اللحظة اللي رحلة إنتر ميلان للنجاح طلعت منها فخليني أختار فترة الإنتقالات الصيفية اللي قبل ما الموسم يبدأ .. نادر أوي لما تلاقي نادي يقرر يبعزق فلوس ويشتري 5 لاعيبه مرة واحدة وبسم الله ما شاء الله ال5 لاعيبه يبقوا مش بس عتاولة إنما كمان يبقوا صفقات ناجحة .. في ميركاتو واحد بس إنتر ميلان إشتري (دييجو ميليتو Diego Milito) و(ثياجو موتا Thiago Motta) و(صامويل إيتو Samuel Eto’o) و(لوسيو Lucio) و(ويسلي شنايدر Wesley Sneijder) .. خمس صفقات من العيار التقيل علي رأي (تركي أل شيخ) .. تلاتة جم بسعر التراب اللي هم (ميليتو) و(موتا) اللي النادي إشتراهم من جنوة بعشرين مليون يورو بس و(لوسيو) اللي جه من بايرن ميونيخ بخمسة مليون يورو ..لكن إتنين منهم ويمكن أهم إتنين حصلوا بسبب الظروف .. ظروف بره إرادة إنترميلان.
اللي حصل إن مع نهاية موسم 2008-2009 إنترميلان جالهم Offer من برشلونة بإنهم عايزين يشتروا المهاجم (زلاتان إبراهيموفيتش Zlatan Ibrahimovic) .. وقتها (مورينيو) مكنش عايز يبيع (زلاتان) اللي كان هداف الدوري ويمكن أهم لاعيب في تشكيلة إنترميلان بس هي الفكره في إن الOffer كان صعب يترفض .. برشلونة عرضوا علي إنتر ميلان إنهم ياخدو (إيتو) وفوقيه 46 مليون يورو .. المفروض إن وقتها إدارة النادي كانت خلصت صفقة إنتقال (ميليتو) من نادي جنوة الإيطالي فإنت كده بتتكلم إن (مورينيو) الموسم الجاي حيبقي تحت إيده إتنين مهاجمين فراوده اللي هم (ميليتو) و(إيتو) لا وكمان حيبقي معاه 46 مليون يورو يصرفهم علي لاعيب أو لاعيبين كمان .. تفتكر ده Offer يترفض؟ .. مش بس كده .. لو تفتكر في موسم 2008-2009 برشلونة حققوا الثلاثية أيام (بيب جوارديولا Pep Guardiola) الله يمسيه بالخير وده خلي إدارة ريال مدريد تقرر إنها لازم تشتري لاعيبه سوبر عشان يقدروا ينافسوا برشلونة .. في فترة الإنتقالات دي ريال مدريد إشتروا (كريستيانو رونالدو Cristiano Ronaldo) و(كاكا Kaka) .. طب ده معناه ايه؟ .. معناه إن ريال مدريد مبقاش فعلياً محتاج لا الجناح (أريين روبين Arjen Robben) ولا صانع الألعاب (ويسلي شنايدر) اللي يدوبك بمجرد ما إتعرض للبيع إنترميلان خدوه ب15 مليون يورو.
فيه صفقات تانية عدت من غير ما حد ياخد باله منها زي صفقة إنتقال (جوران بانديف Goran Pandev) الجناح اللي (مورينيو) بقي بيعتمد عليه بشكل أساسي .. اللاعيب ده جه إنترميلان في فترة إنتقالات يناير مش في الصيف وهو اللي سعي إنه يجي إنترميلان من لاتسيو بعد ما دخل في خناقة مع إدارة النادي وخلوه يقعد علي الدكة ميلعبش .. شراء اللاعبين عامل زي التعيينات في الشركات .. إنت ممكن تقرأ الCV بتاع موظف كلمة كلمة .. ممكن تكلم ناس تعرفها في الشركة اللي الموظف كان شغال فيها تسأل عليه .. بس ده مش معناه إن لو CV بتاعه حلو وإن الناس بتشكر فيه إنه حيبقي مناسب لشركتك .. فيه ظروف كتير بتخش في الموضوع ومتغيرات إنت ممكن متبقاش عامل حسابك عليها .. إن نادي يعمل الصفقات دي كلها وبسم الله ما شاء الله كلهم يبقوا ناجحين فده فيه اه نسبة كبيرة إن الناس في لجنة الإنتقالات شايفه شغلها بس برده فيه نسبه توفيق بيحلم بيها أي نادي.
المدير الفني .. تسلم دماغك يا كابتن (مورينيو).
(مورينيو) إتعين مدير فني لإنترميلان في موسم 2008-2009 يعني قبل موسم الثلاثية بسنة وفي أول موسم له خد الدوري بس صدق أو لا تصدق وقتها إن إنترميلان ياخد الدوري كان زي ما الأهلي ياخد الإيجيبشن بريميير لييج في مصر كده .. إيه الجديد يعني .. أنا عارف إن ده يبان كلام غريب بالنظر لإزاي في الوقت بتاعنا دلوقتي يوفينتوس ماسك في لقب الدوري زي ما (ياسمين صبري) ماسكه في فلوس (أحمد أبو هشيمة) بس ده كان حقيقي وقتها .. الحكاية دي بدأت سنة 2006 بفضيحة كبيرة إسمها كالتشيوبولي Calciopoli ملخصها بإختصار إن فيه أندية كانت بتتعمد تخسر نفسها قصاد يوفينتوس عشان هو ياخد الدوري .. بسبب الفضيحة دي يوفينتوس إتعاقب بإنه هبط دوري درجة ثانية وفيه أندية كتير زي إيه سي ميلان وفيورنتينا ولاتسيو إتداس علي وشها .. فتاني .. كون إن إنترميلان ياخد الدوري في أول موسم ل(مورينيو) مكنش إنجاز .. ده كان المتوقع .. (مورينيو) كان مطلوب منه إنه يجيب بطولة أوروبية وده التارجت اللي هو حيتحاسب عليه .. الحقيقة إن أول موسم له مع إنترميلان في أوروبا مكنش بيقول خالص إن الموسم اللي وراه الفرقة دي حتكسب البطولة .. إنترميلان إتأهل كثاني مجموعته ورا باناثانايكوس اليوناني عشان تعرف بس إن وقتها الكورة كانت مختلفة كتير عن أيامنا دلوقتي إن فرقة يوناني إنت غالباً مش عارف تنطق إسمها كانت متصدرة مجموعتها ومش بس كده .. إنترميلان خرجوا من دور ال16.
وقتها إدارة النادي قعدت مع (مورينيو) سألوه إنت محتاج إيه عشان تنجح في أوروبا؟ فكانت إجابته إن والله انا عايز إتنين وينجات .. متنساش إن وقتها رئيس نادي إنترميلان كان طيب الذكر (ماسيمو موراتي Massimo Moratti) اللي كان بقاله 15 سنة رئيس النادي ونفسه ياخد بطولة أوروبية ومش عارف رغم الفلوس اللي كان بيبعزقها .. أيام ما كان (مورينيو) ماسك تشيلسي زي ما قلنا قبل كده كان بيلعب 4-3-3 وكان الثلاثي الهجومي بتاعه بيتكون من (ديديه دروجبا Didier Drigba) و(أرين روبين) و(جو كول Joe Cole) .. الإتنين الوينجات اللي تحت إيده دلوقتي في إنتر سواء (ريكاردو كواريزما Ricardo Quaresma) أو (مانشيني Mancini) مش نافعين .. هم صحيح حلوين في البلاي ستيشن بس في الواقع ملهمش لازمة.
الصفقات اللي عملها إنترميلان في بداية الموسم عملت حاجتين .. أول حاجة إنها حطت تحت إيد (مورينيو) لاعيبه درجة أولي وكتير منهم حاسين إنهم مشيوا ظلم من أنديتهم القديمة وكل واحد فيهم جواه نار قايده عشان يثبت للناس كلها إنه أحسن من اللاعيبه اللي جت مكانه .. خد عندك (إيتو) مثلاً اللي من جواه شايف إنه أحسن من (إبراهيموفيتش) فكان مستعد ياكل النجيلة عشان يثبت للعالم إنه كلاعيب مفيد لفرقته أكتر منه .. مثال تاني هو (شنايدر) اللي طبيعي يبقي شايف إنه أحسن من (كاكا) .. بس في نفس الوقت أنا مش عارف إنت خدت بالك أو لا إن الصفقات دي مفيهاش وينجات .. غريبة أنا عارف .. يعني إدارة النادي قعدت مع (مورينيو) سألوه عايز إيه عشان تنجح فقالهم عايز وينجات فجابوله 6 صفقات ولا واحد فيهم وينج .. ده خلي (مورينيو) يبدأ الموسم بتاعه بتشكيلة 4-3-1-2 .. حارس المرمي بتاعه كان (خوليو سيزار Julio Cesar) اللي تقدر تقول عليه (مانويل نوير Manuel Neur) قبل ما يبقي فيه (مانويل نوير) يعني حارس المرمي اللي بيعرف يلعب ليبرو .. قدامه إتنين قلوب دفاع تقال أوي اللي هم (لوسيو) و(والتر صامويل Walter Samuel) .. باك شمال غالباً بيدافع اللي هو (خافيير زانيتي Javier Zanetti) وباك يمين مبيدافعش تقريباً اللي هو (مايكون Maicon) .. ثلاثي خط وسط محترم جداً من (إستيبان كامبياسو Esteban Cambiasso) و(ديجان ستانكوفيتش Dejan Stankovic) و(تياجو موتا) .. بيلعب بإتنين مهاجمين اللي هم (إيتو) و(ميليتو) وتحتهم (شنايدر) كلاعيب صانع ألعاب حر .. الطريقة دي كانت زي الفل في إيطاليا بس زي الزفت في أوروبا.
محلياً الموسم بدأ بهزيمة صعبة أوي قصاد لاتسيو في كأس السوبر 2-1 مع إن إنترميلان كان مسيطر علي الماتش .. أول ماتش ليهم في الدوري إتعادلوا 1-1 ضد فرقة باري اللي كانت لسه صاعده الدوري الممتاز .. الماتش اللي وراه داسوا علي وش إيه سي ميلان 4-0 علي ملعب ميلان .. بعد مذبحة ميلان كسبوا 3 ماتشات ورا بعض لحد ما خدوا أول خسارة في الموسم قصاد سامبدوريا .. لما جه الإسبوع السابع من الدوري إنترميلان كان متصدر ومعاه 16 نقطة .. طريقة 4-3-1-2 مشيت مع إنترميلان زي السكينة في الجاتوه لحد ما جت الأجازة الشتوية بتاعة يناير .. بعد 17 ماتش في الدوري الإنتر كان متصدر ب39 نقطة بفرق 6 نقط عن الثاني إيه سي ميلان وبأداء فعلاً حلو .. الفرقة كسبت جنوه مثلاً 5-0 وكسبت بارما 5-3 .. غريبة أنا عارف إن فرقة بيدربها (مورينيو) تكسب بالخمسة بس ده كان حقيقي .. أي فرقة كانت بتلاعب إنترميلان في الدوري كانت بتنزل خسرانة الماتش قبل ما الحكم يصفر صفارة البداية.
في دوري الأبطال الدنيا كانت ماشية بالعكس .. إنترميلان إتعادل أول 3 ماتشات في دور المجموعات اللي هي أساساً كانت مجموعة صعبة فيها برشلونة وديناموكييف الأوكراني وروبين كازان الروسي وال3 أندية كانوا أبطال الدوري في دورياتهم .. الماتش الرابع قصاد فرقة دينامو كييف علي ملعبهم في كييف كان لازم يكسبوه .. لحد الدقايق الأخيرة وإنترميلان خسران 1-0 .. في الوقت بدل الضايع (شنايدر) بيجيب جون عالمي و(دييجو ميليتو) بيجيب جون بالحظ .. في الماتش الخامس ليهم في دور المجموعات إتداس علي وشهم من برشلونة بس فوزهم علي روبين كازان في الماتش الأخير خلاهم يتأهلوا لدور 16 كثاني مجموعة بعد برشلونة .. صحيح إنترميلان صعد كثاني مجموعته بس صعد وهو متشلفط .. فوزين بس من 6 ماتشات فعايزك بس تبقي فاهم إن أداء إنترميلان في دور المجموعات مكنش بيوحي خالص إن الفرقة دي حتوصل النهائي حتي فمابالك بإنها تكسب البطولة.
في فترة الأجازة بتاعة الشتاء وبعد الأداء اللي زي الزفت في أوروبا (مورينيو) إتأكد إن طريقة 4-3-1-2 دي مش جايبه همها .. هو محتاج يرجع يلعب بوينجات .. في نص الموسم (مورينيو) قرر يغير طريقة اللعب ل4-2-3-1 .. (دييجو ميليتو) لوحده قدام وتحت منه 3 منهم صانع ألعاب اللي هو (شنايدر) وإتنين وينجات اللي هم (إيتو) و(بانديف) .. (بانديف) ده اللي إنترميلان إشتروه في فترة إنتقالات يناير زي ما قلت في البداية .. هنا برده يبان النقطة اللي قلتلك عليها من شوية إن كتير من الصفقات اللي جت وخصوصاً (إيتو) كان عايز يثبت للدنيا كلها إنه مش زي ما بيتقال عليه لاعيب مش بينفذ تعليمات المدير الفني بتاعه .. (إيتو) لما مشي من برشلونة الكلام كان إنه مكنش عاجبه إن (جوارديولا) عايز يلعبه وينج ويجيب مكانه (ليونيل ميسي Lionel Messi) كمهاجم .. في إنترميلان حصل نفس الموقف إن (مورينيو) كان عايزه يلعب وينج و(ميليتو) يبقي مهاجم صريح وسبحان الله يا أخي (إيتو) بيسمع الكلام من سكات .. بس مش معني كده إن الطريقة دي جابت نتيجة .. عارف في مسرحية المتزوجون لما (سمير غانم) الله يرحمه قال إنه جه يصلح البنطلون فالكمام ضربت .. لما (مورينيو) غير طريقة اللعب فهي جابت معاه نتيجة في أوروبا بس بوظت الدنيا في الدوري.
طريقة اللعب الجديدة (مورينيو) بدأ يطبقها بداية من الجولة 21 لما كسبوا إيه سي ميلان 2-0 .. ده كان ماتش ما يعلم به إلا ربنا .. كان ماتش العودة قدام ميلان يعني تخيل ماتش الديربي اللي ممكن يحسم الدوري و(شنايدر) يتطرد في أول 26 دقيقة وبرده إنترميلان يكسب 2-0 رغم إن الماتش خلص وإنترميلان كان مطرود منهم إتنين .. خلال 30 يوم إنترميلان كان مطلوب منهم يلعبوا 8 ماتشات .. ده لوحده كابوس .. زود عليه إن في الموسم ده يوفينتوس وفيرونتينا طلعوا من الكأس بدري فالدنيا إتعقدت كتير .. المصايب بدأت تهل بداية من الجولة 23 لما ماتش بارما اللي المفروض إنه كان يبقي سهل خلص بتعادل .. الماتش اللي وراه في الجولة 24 خلص بتعادل سلبي برده ضد نابولي علي ملعبهم سان باولو اللي دلوقتي بقوا بيسموه استاد (دييجو أرماندو مارادونا) .. وراها كانت هزيمة ضد فرقة من تحت بير السلم إسمها كاتانيا .. لما الجولة 30 جت كان روما بيقول لإنترميلان سامع ركبك بتخبط بعد ما روما لعبوا 21 ماتش ورا بعد من غير أي هزيمة .. في الجولة 31 روما بقي المتصدر .. في الفترة من 16 يناير لحد 10 إبريل الفرقة لعبت 14 ماتش في الدوري مكسبوش منهم إلا خمس ماتشات بس.
في أوروبا بقي الدنيا كانت ماشية زي الفل بالطريقة الجديدة .. في دور ال16 إنترميلان واجه تشيلسي وكسبوهم في الذهاب في ميلان 2-1 وكسبوهم كمان في العودة علي ملعب ستانفورد بريدج 1-0 .. في دور الثمانية طلعوا فرقة سيسكا موسكو الروسية عشان إنترميلان يوصلوا المربع الذهبي لأول مرة من سبع سنين وحزر فزر حيلاعبوا مين؟ .. برشلونة.
سلسلة النتايج اللي زي الزفت في الدوري كان ممكن تهز الروح المعنوية لأي فرقة بس هنا تبان دماغ (مورينيو) .. الرجل كان محتاج يحسس لاعيبته إنهم في حالة حرب ضد الدولة العميقة زي ما تقول كده .. هي حرب وهمية مش موجوده أصلاً بس هو كان محتاج يدخل اللاعيبه في حالة إنهم يصدقوا إن إتحاد الكورة والإعلام مش عايزهم ينجحوا .. هجوم (مورينيو) علي الإعلام وعلي الحكام كان شرس .. في مرة وصف الإعلام الكروي الإيطالي بإنه دعارة فكرية Intellectual Prostitution .. هجومه علي الحكام خلي إن فيه حكام طليان كتير يقدموا طلبات لإتحاد الكورة إنهم مش عايزين يحكموا أي ماتشات لإنترميلان خصوصاً بعد ماتشهم ضد نابولي اللي قلتلتك إنهم إتعادلوا صفر صفر لما (مورينيو) شاور للجمهور بإنه زي ما يكون إيديه متكلبشه في بعض كإشارة يعني إن التحكيم هو اللي مخليه مش عارف يكسب .. زي ما قلتلك هي مكنتش حرب ولا نيلة .. هي كانت Mind Trick أو خدعة عقلية عشان (مورينيو) يلعب في دماغ لاعيبته .. أقفوا جنب بعض .. حاربوا مع بعض .. أكسبوا عشان الضباع مستنيه إننا نقع .. ده سمّع في كلام اللاعيبه نفسهم عن (مورينيو) .. (شنايدر) مرة قال إنه مستعد يقتل ويموت عشان خاطر (مورينيو) .. لاعيب خط النص (ديجان ستانكوفيتش) مرة قال إنه مستعد يرمي نفسه في النار عشان خاطره.
في الأيام الأخيرة من الموسم شخصية لاعيبه إنترميلان هي اللي حسمت الدوري .. لحد الجولة 34 كان ممكن يا روما يا إنترميلان ياخدوا الدوري .. في الجولة دي روما خسروا ضد سامبدوريا وإنترميلان كسب أطلانطا .. في الجولة 36 الإنتر كسب لاتسيو واللي جمهوره كان بيشجع الإنتر مش لسبب غير إنهم مكانوش عايزين روما هو اللي ياخد الدوري .. في الجولة 37 كان ماتش العودة برده قدام يوفينتوس لما لحد الدقيقة 75 والماتش صفر- صفر ولازم إنترميلان يكسب .. في الماتش ده يوفينتوس ركنوا الأوتوبيس وحارس المرمي بتاعهم كان (جيجي بوفون Gigi Buffon) وقدامه (فابيو كانافارو Fabio Cannavaro) و(جيورجيو كيليني Giorgio Chiellini) ومتفهمش إزاي الباك اليمين (مايكون) يشوط كورة من بره ال18 تدخل جون يوفينتوس وهي بتزغرط .. (دييجو ميليتو) لاعيب محترم جداً بس للأسف محدش بيتكلم عنه كتير .. يمكن بعد (مورينيو) هو كان أهم بني أدم في إنجاز إنترميلان في الموسم ده .. (ميليتو) هو اللي حسم ماتش نهائي كأس إيطاليا ضد روما .. هو اللي جابلهم الدوري بالجون اللي جابه في سيينا في الجولة الأخيرة .. هو اللي جاب الجونين في نهائي دوري الأبطال قصاد بايرن ميونيخ والغريب فعلاُ إن الماتش ده كان أسهل ماتش لإنترميلان في الموسم كله.
يمكن الماتش اللي معلق في دماغ الناس هو ماتش العودة بتاع نص النهائي ضد برشلونة .. الماتش ده فعلاً كان غريب .. هو غريب من ماتش الذهاب أساساً .. مش عارف إنت تفتكر أو لا بس وقتها حصل إنفجار في بركان في أيسلندا والرحلات الجوية وقفت وعشان كده فرقة برشلونة إتضطرت تسافر ميلان بالأوتوبيس عشان يلعبوا ماتش الذهاب .. الماتش ده خلص 3-1 لصالح إنترميلان .. في ماتش العودة النتيجة صفر – صفر لحد الدقيقة 62 لما (سيرجيو بوسكيتس Sergio Busquets) تقريباً حسسنا إنه إتضرب بالنار مع إنه كان بيمثل و(تياجو موتا) إتطرد .. لحد الدقيقة 84 وبرشلونة اللي وقتها كان فرقة عتاوله مش عارفة تعمل حاجه لحد ما (جيرارد بيكيه Gerard Pique) جاب جون مع إنه كان أوفسايد بس مش مشكلة والماتش خلص 1-0 وإنترميلان إتأهل للنهائي بعد ما الفرقة قدمت أداء دفاعي لازم أي مدير فني لناشئين يوري فيديو الماتش ده للاعيبه الصغيرة عشان يعرفوا يعني إيه تقفل ملعب قصاد فرقة كلها حريفة وإنت أساساً مطرود منك واحد ويمكن مفيش حاجة تعبر عن ده أكتر من إن (إيتو) كان علي قلبه زي العسل إنه يلعب باك يمين بعد طرد (تياجو موتا).
مع صفارة الحكم اللي بتعلن نهاية ماتش الفاينال لبطولة دوري أبطال أوروبا اللي إتلعب في إستاد سانتياجو برنابيو اللي هو الإستاد بتاع نادي ريال مدريد (مورينيو) كان عارف إنه مينفعش يرجع مع الفرقة لميلان .. مش لسبب إنه كان خلاص قرر يروح يشتغل في ريال مدريد .. لا .. عشان هو كان عارف إنه لو كان رجع ميلان وإحتفل مع اللاعيبه كان حيغير رأيه .. ريال مدريد كلموه قبل كده مرتين عشان يمسك الفرقة وفي المرتين رفض ومش حينفع يرفض للمرة الثالثة .. اللي حققته فرقة إنترميلان في الموسم ده يوريك كذا حاجة الحقيقة .. أول حاجة إنك حاول تختار صفقاتك صح .. إستغل الفرص اللي ممكن تتفتح قدامك في الميركاتو .. ثاني حاجة هي إن شخصية اللاعيبه بتفرق .. فيه لاعيبه وقت الجد بتعرف تبقي رجاله وتبقي محظوظ لو فرقتك فيه كام لاعيب من دول .. ثالث حاجة هي إنك لما تيجي تتكلم عن بني أدم حاول متاخدش بالمظاهر .. سمعة (مورينيو) إنه بني أدم بيموت في الخناق وإنه بيحب اللعب الدفاعي وركنة الأوتوبيس .. بس الموسم ده مع إنترميلان يوريك عكس كده .. هو بدأ يتخانق مع خلق الله عشان يحسس اللاعيبه إنهم في حالة حرب مع إنها مكنتش حالة حرب ولا نيلة .. في الدوري كان بيكسب بالخمسة والستة .. وحتي ماتش العودة بتاع برشلونة ما هو مطرود منه لاعيب فإزاي متوقع منه إنه يهاجم؟ .. دروس كتير أوي ممكن تقف قدامها في موسم إستثنائي لفرقة إستثنائية.
المصادر:
- مقالة بعنوان Mourinho, tears and defiance: the story of Inter’s 2009-2010 season نشرت في جريدة The Guardian وده لينك المقالة الأصلية:
https://www.theguardian.com/football/2020/apr/20/mourinho-tears-and-defiance-the-story-of-inters-2009-10-season - مقالة بعنوان Inter Milan 2009/10: The story of a Historic Season نشرت علي موقع The Hard Tackle وده لينك المقالة الأصلية:
http://www.thehardtackle.com/2010/inter-milan-200910-the-story-of-a-historic-season/ - مقالة بعنوان The Price of Inter Milan’s Success نشرت علي موقع Bleacher Report وده لينك المقالة الأصلية:
https://bleacherreport.com/articles/442218-the-price-of-inters-success
