لينك التسجيل الصوتي للمقالة علي Sound Cloud:
https://soundcloud.com/user-112011687-312727988/5x5xekuyo1ym?si=d47915c6d1d443059ece9f22c93ec3dd
فيه شخصيات بتبقي عاطفية أوي .. شخصيات لو أنا أو أي حد تاني قرب أو أهان الحاجة اللي هي بتحبها بتلاقي نفسك قدام بكابورت تهزيق و شتيمة .. شخصيات في وقت الغلط بتحدف زلط .. من ضمن الشخصيات اللي أنا بتكلم عنها (أولي هوينيس Uli Hoeness) رئيس نادي بايرن ميونيخ الألماني .. الرجل ده بيحب النادي بشكل مش طبيعي و خليني أديك مثال علي ده .. الناس اللي بتتابع كورة قدم عارفه إن المدير الفني للمنتخب الألماني (يواكيم لوف Joachim Low) بيتعامل مع المنتخب زي ما أي شاب خد شقة علي الطوب الأحمر و بيشطبها .. هو تقريباً بيغير ملامح المنتخب خالص و من ضمن الحاجات اللي هو كان عايز يعملها إن جه الوقت إن (مانويل نوير Manuel Neuer) حارس المرمي بتاع بايرن ميونيخ و منتخب ألمانيا يقعد علي جنب و يحل محله (مارك- أندريه تير شتيجين Marc-Andre ter Stegen) حارس مرمي برشلونة و يمكن أهم لاعيب في الفرقة بعد (ليونيل ميسي Lionel Messi) .. رد (أولي هوينيس) هو إنه قال ل(لوف) لا ده أنا كده حغلط و أجيب ناس تغلط .. هو قال إن لو ده حصل فهو حيرفض إنضمام أي لاعيب من بايرن ميونيخ للمنتخب .. (نوير) ميقعدش دكه يا (لوف).
موقف زي ده كفيل إنه يخلي أي حد في ألمانيا مش بيشجع بايرن ميونيخ يقول إنت مالك يا رجل يا عجوز إنت شايف نفسك إيه بالضبط .. و الحقيقه أنا مقدر الموقف ده جداً .. تخيل (محمود الخطيب) يطلع يقول إن لو حصل و (حسام البدري) المدير الفني للمنتخب مختارش (محمد الشناوي) عشان يبقي حارس المنتخب فمفيش ولا لاعيب في الأهلي حينضم للمنتخب .. تخيل جماهير الزمالك و الإسماعيلي و أي نادي في مصر حتسب و تلعن في (الخطيب) إزاي .. و ده اللي إنت محتاج تفهمه عن (أولي هوينيس) .. ده بني أدم تنك مش بيهمه حد .. بني أدم لو حماته عزمته علي الغدا و عملت مكرونة بالبشاميل و طلعت محروقة حيقولها قدام مراته إيه الهباب اللي إنتي عاملاه ده يا ست إنتي .. بني أدم معندوش فلتر بيفلتر الكلام من مخه للسانه .. بلاش قصته مع (نوير) .. واحدة من أشهر خناقاته كانت مع (مسعود أوزيل) بعد ما قرر يعتزل اللعب الدولي بعد خروج ألمانيا من الدور الأول في كأس العالم اللي فات في روسيا.
واحد .. مشكلة الألمان مع (أوزيل) إن مستواه مع المنتخب في كأس العالم كان زي الزفت .. الحقيقة هو مكنش لوحده المنتخب كله كان تقريباً نسي الكورة بتتلعب إزاي .. رقم إتنين إن غضب الألمان عليه كان بسبب الصورة اللي هو إتصورها مع الرئيس التركي (رجب طيب أردوغان) .. بغض النظر عن السياسة و إيه رأيك أو رأي الألمان في (أردوغان) فخلينا نتفق إن زي ما يكون الإعلام الألماني مستقصد (أوزيل) و ده اللي خلاه يطلع يقول إن الإتحاد الألماني لكرة القدم بيتعامل مع (أوزيل) علي إنه ألماني لما المنتخب يكسب و بيتعامل معاه علي إنه مهاجر من أصل تركي لما المنتخب يخسر مع إن الناس بتنسي معلومة مهمة أوي و هي إن (أوزيل) أساساً من مواليد ألمانيا .. لما (أولي هوينيس) إتسأل عن رأيه في اللي عمله (أوزيل) كان رده زي تحديف الطوب بالضبط .. هو قال إن “أنا فرحان إن (أوزيل) غار في داهية .. في رأيه إن (أوزيل) مستواه بقاله كذا سنة في النازل .. إحنا كل ما لاعيبه بايرن ميونيخ يلعبوا ضد أرسنال بندوس علي وشه عشان إحنا عارفين إنه هو نقطة الضعف بتاعتهم .. ده لاعيب محلتوش حاجة غير 35 مليون متابع علي تويتر كلهم بيزقططوا من الفرحة لما يباصي كورة صح .. إحنا في ألمانيا بطلنا نطلع مواهب كويسة يلعبوا كورة كويس لإن في لعب الكورة (أوزيل) خلص خلاص”.
ده كلام في رأي ناس ميطلعش غير من بق بني أدم فعلياً مش متربي .. و في رأي ناس تانية ممكن يوصل لمرحلة العنصرية .. بس اللي أنا حابب أوصله ليك إن (أولي هوينيس) مشكلته إنه صريح أوفر .. هو بني أدم جلف بكل ما تحمله الكلمة من معني .. و رغم كده أنا شايف إن (أولي هوينيس) ده رجل فشيخ و شخصية لازم نتعلم منها و خليني أفهمك ليه.
عادة لما بتتخرج و تروح تشتغل فإنت بتبقي حاطط لنفسك خطة .. أنا حقضي مثلاً سنتين تلاتة في أول شركة ليا أتعلم فيها و بعد كده حفضل أتنقل بين الشركات .. نادر أوي إنك تروح تشتغل في شركة و يكون عندك 18 سنة و تفضل مكمل فيها 49 سنة .. سنة 1970 (أولي هوينيس) لعب أول ماتش ليه كلاعيب كورة في فرقة بايرن ميونيخ و كان لسه عنده 18 سنة .. هو كان ضمن الدريم تيم بتاع بايرن ميونيخ اللي كان بيلعب فيه (فرانز بيكينباور Franz Beckenbauer) و (سيب ماير Sepp Maier) و (جيرد مولر Gerd Muller) .. في أول موسم له مع الفرقة كسب معاهم كأس ألمانيا .. هو أساساً لما جه بايرن كان معروف إنه لاعيب خط نص بس بسبب سرعته الفشيخة إتحول بقي جناح .. الأخ ده كان بيجري 100 متر في أقل من 11 ثانية و ده كان بيخليه من أسرع مهاجمي أوروبا كلهم .. الدريم تيم بتاع بايرن ميونيخ ده الموسم اللي بعده كسب الدوري الألماني و فضل يكسبه 3 سنين ورا بعض .. ده الفريق اللي كسب بطولة Champions League برده 3 مرات .. اه نسيت أقولك .. (أولي هوينيس) كسب كمان كأس العالم و بطولة أمم أوروبا مع منتخب ألمانيا الغربية .. وقتها ـوروبا كلها كانت بتلعب 3-5-2 و كان هو و المهاجم الأسطوري (جيرد مولر) بيلعبوا مع بعض في بايرن ميونيخ و في المنتخب.
لما بقي عنده 27 سنة إتصاب إصابة جامدة أوي في ركبته في ماتش نهائي دوري أبطال أوروبا ضد ليدز يونايتد سنة 1975 .. الإصابة دي قعدته في البيت 6 شهور و لإن الطب الرياضي مكنش بتطور اليومين دول فالدكاتره نصحوه إنه يبطل كورة .. حاول يرجع تاني يلعب و راح إعارة لنادي إسمه نورينبيرج بس فعلاً الإصابة كانت أقوي منه و قرر إنه يعتزل كورة و الكلام ده كان سنة 1979 .. 9 سنين بس كانت عمر (أولي هوينيس) كلاعيب كورة قضاها كلها لابس تي شيرت بايرن ميونيخ .. 9 سنين جاب فيهم 10 بطولات و الله أعلم لوكان نصيبه إنه كان يكمل كورة كمان كام سنة كان جاب كام بطولة .. بس لو إنت فاكر إن شغل (أولي هوينيس) مع بايرن كان بس إنه لاعيب كورة يروح يتمرن و يلعب ماتشات فالرجل ده كان أفشخ من إنه بس يكون كده.
و هو لسه لاعيب في الفرقة كان ضمن الفريق اللي إدارة بايرن ميونيخ إختارته عشان يدخل في مفاوضات مع شركة تصنيع الترلات الألمانية ماجيروس دويتز Magirus-Deutz عشان تبقي هي الراعي الرسمي للنادي و هو اللي خلص الصفقة .. الفلوس اللي النادي خدها إستخدمها (أولي هوينيس) عشان هو اللي يقنع نجم منتخب ألمانيا الغربية (بول برايتنر Paul Breitner) إنه ييجي بايرن ميونيخ من نادي براونشفايج Braunschweig .. إدارة النادي شافت قدرة (أولي هوينيس) علي التفاوض و إنه يخلص صفقات و قالتله لا ده إنت تيجي تمسك النادي بقي .. في 1 مايو 1979 إتعين (أولي هوينيس) مدير للنادي و بكده بقي أصغر مدير نادي في تاريخ الدوري الألماني.
لما (أولي هوينيس) مسك إدارة النادي لقي نفسه في رقبته 12 موظف و ميزانية سنوية حوالي 12 مليون مارك ألماني و دي كانت عملة ألمانيا زمان قبل اليورو .. بس الديون كانت عمالة تتراكم علي النادي و وصلت وقتها 7 مليون مارك .. جري الشريط لحد دلوقتي تلاقي نفسك قصاد كيان شغال فيه 1000 بني أدم أرباحه السنوية وصلت 732.8 مليون دولار و الرقم ده بيقولك إن بايرن ميونيخ بقاله 26 سنة ميزانيته كل سنة بتطلع كسبانه .. أول موسم له كمدير للنادي الفرقة خدت بطولة الدوري و دي كانت أول بطولة ضمن 16 بطولة دوري بايرن ميونيخ ياخدها و (أولي هوينس) ماسك النادي .. أظن السؤال دلوقتي هو إزاي .. أصلها لو سهلة كده كان كل الناس عملوها .. السر يا حضرات إنك تحاوط نفسك بناس إنت فاهمها و فاهمينك و ناس العلاقة بينكوا إنكوا مش بتتحرجوا تقولوا لبعض لو حد فيكوا غلط .. الدريم تيم بتاع إدارة بايرن ميونيخ كان الثلاثي (أولي هوينز) و( فرانز بيكينباور) و (كارل هاينز رومينيجيه) .. التلاتة بصوا للوضع في ألمانيا وقتها و إكتشفوا إن بايرن موينيخ صحيح كيان كبير بس حالياً هو مش أكبر كيان في ألمانيا .. فرقة إسمها بروسيا مونشنجلادباخ و أنا عارف إن إسمها زي ما يكون حد نايم علي الKeyboard و هو شغال كانت أقوي فرقة في ألمانيا و بقالهم 3 سنين بتاخد الدوري .. فرقة تانية إسمها هامبورج كانت فرقة تقيلة فشخ وقتها و قدروا إنهم يشتروا واحد من أحسن لاعيبه إنجلترا و العالم (كيفن كيجان) و اللي كان واخد قبلها جايزة الكرة الذهبية Ballon d’Or .. الثلاثة بدأوا يلفوا العالم يتعلموا إزاي تدير نادي .. راحوا أميركا إتعلموا البيزنس بتاع الإدارة من أندية كرة السة NBA و كرة القدم الأميريكية NFL .. راحوا هولندا خبطوا علي باب نادي أياكس أمستردام قالولهم علمونا إزاي بتديروا أكاديمية ناشئين ناجحة .. الثلاثة بدأوا يجيبوا ورقة و قلم و يكتبوا إيه اللي إتعلموه و بدأوا يرسموا خريطة مستقبل النادي و اللي السر فيها هو الإستقلال المادي.
سر الخلطة إن فلوس النادي تتقسم علي حتتين .. حتة جايه من 3 رعاة بتمثل 25% من الفلوس اللي بتيجي للنادي و الرعاة اللي ماسكين بايرن ميونيخ حالياً هم أديداس Adidas و شركة التأمين أليانز Allianz و شركة العربيات أودي Audi .. ال75% الفاضلين من الميزانية بيجوا من جيوب أبناء النادي .. فلوس الإشتراكات هي اللي بتصرف علي النادي و ده بيخلي بايرن ميونيخ مش مديون و مش محطوط تحت رقبة حد و دي الفكرة اللي هم إتعلموها من الأندية الأمريكية .. مفيش (تركي أل شيخ) .. مفيش تبرعات رجال الأعمال .. أبناء النادي هم اللي بيصرفوا علي النادي .. الفكر ده تجسد لما إتقال سنة 2000 إن الفرقة محتاجة إستاد جديد .. لحد الوقت ده الإستاد اللي بايرن ميونيخ كان بيلعب فيه ماتشاته كان الإستاد الأوليمبي Olympiastadion في ميونيخ بس (أولي هوينيس) كان من الناس اللي مع إن جه الوقت إن بايرن يبقي له الإستاد بتاعه اللي دلوقتي بقي أليانز أرينا Allianz Arena .. الإستاد ده إتكلف 340 مليون يورو و إتبني في الفترة من 2002 لحد 2005 و كان متوقع إن بايرن يفضل يسدد في الديون بتاعته لحد سنة 2028 بس بسبب زي ما قلتلك إن ولاد النادي هم اللي بيصرفوا علي النادي فالديون دي إتسددت كلها سنة 2014 قبل 14 سنة من المعاد اللي إتحدد .. بس ده مش معناه إن الفترة دي كانت كلها زبادي خلاط في حياة الرجل.
يوم 17 فبراير 1982 هو كان راكب طيارة خاصة مع 3 صحابه رايحين يحضروا ماتش ودي .. الطيارة وقعت و كل اللي في الطيارة ماتوا إلا هو .. حادثة زي دي كفيلة إنها تدمر نفسية أي حد .. الإحساس بالذنب لوحده ممكن يدمرك لو إستسلمت له بس (أولي هوينيس) مش كده .. ده بني أدم زي ما قلتلك في الأول تنك مش بيهمه حد .. لما قام بالسلامة رجع تاني لمنصبه كمدير النادي و إستمر فيه 30 سنة .. سنة 2004 هو بقي ماسك حاجتين .. مدير النادي و ده منصبه الأساسي و جنبه بقي نائب رئيس مجلس الإدارة و ده معناه إن الJob Description بتاعه كان إنه ماسك مين اللاعيبه اللي تيجي النادي و مين اللاعيبه اللي تمشي .. هو اللي ماسك نشاط أكاديمية الناشئين .. هو اللي بيتكلم مع الرعاه بتوع النادي .. أي قعدة أو أي إجتماع يخص إستاد Allianz Arena هو اللي بيحضره .. تقدر تقول إنه كان (زكريا الدرديري) بتاع النادي .. يوم 27 نوفمبر 2009 هو كسب الإنتخابات بتاعة الجمعية العمومية للنادي بنسبة تصويت وصلت 99.3% .. في أول موسم له كرئيس اللي هو موسم 2010-2011 بايرن ميونيخ خدوا ثنائية الدوري و الكأس .. بداية من موسم 2012-2013 بايرن داس علي وش أندية ألمانيا و فضل يكسب الدوري 7 مواسم ورا بعض بس يمكن أهم سنة ل(أولي هوينيس) كرئيس للنادي كانت موسم 2012-2013 و ده الموسم اللي النادي حقق فيه الثلاثية .. الدوري و الكأس و دوري الأبطال .. مع بداية موسم 2013-2014 تسأل أي حد بيشجع بايرن ميونيخ عن هو شايف المستقبل إزاي حيقولك إحنا معانا رئيس نادي فشيخ و فرقة فشيخة و حنفشخ كل فرق أوروبا كلها بإذن الله .. فجأة الدنيا إتطربقت فوق دماغ (أولي هوينيس) من غير لا إحم ولا دستور.
في مارس 2014 صحيت ألمانيا علي خبر إن الباشمهندس متهم بإنه إتهرب من دفع 3.5 مليون يورو ضرائب فهو وقف في المحكمة و إعترف علي نفسه بإنه فعلياً إتهرب من دفع 28.5 مليون يورو .. إعترافه كان صدمة لألمانيا كلها و المحكمة حكمت عليه بالسجن 3 سنين و نص و طلع بعد ما قضي نص المدة في فبراير 2016 .. من بعدها محدش سمع عنه حاجة .. في نوفمبر 2016 اللي حوليه أقنعوه إنه يخش إنتخابات رئاسة النادي تاني و فعلاً دخلها و كسبها بس هو دخل الإنتخابات بوعد إنتخابي إنه مش حيرشح نفسه تاني للرئاسة و أديهم من ساعتها و محدش عارف ياخد منهم لقب الدوري.
يوم 15 نوفمبر 2019 (أولي هوينيس) حيكون خلص مدته كرئيس للنادي و هو قال من بدري إنه مش ناوي يرشح نفسه لفترة رئاسة تانية .. حيحل محله الرئيس السابق لشركة أديداس Adidas الألمانية (هيربيرت هاينر Herbert Hainer) .. 49 سنة قضاها في النادي كسب فيهم 27 بطولة دوري و خمس بطولات أوروبية .. (أولي هوينيس) كان بيمسك أي حاجة تنجح و تجيب فلوس .. أبوه كان جزار و لما هو كبر مسك شغل أبوه و كبره و بقي من أكبر تجار السدق و السوسيس في ألمانيا كلها .. و اه إسمه سدق مش سجق .. قول عليه اللي انت عايزه .. قول عليه بجح .. قول عليه شايف نفسه بس إنت متقدرش تنكر إنه بني أدم زي ما تتعلم منه إنك تحب شغلك و تشتغل بجد عشان تنجح و إنك متستسلمش مهما حصل فإنت برده تتعلم منه إزاي تبقي بني أدم مش غلاوي .. ناس كتير بتنسي إن لما أندية زي بروسيا دورتموند و كايزر سلاوتيرن و هانزاروستوك كانوا بيعانوا مادياً ف(أولي هوينيس) كان من الناس اللي إتبرعوا بفلوس من جيبهم عشان النادي يستمر .. نفس الكلام عمله مع نادي ألماني تاني إسمه ساينت باولي .. لما زميله في بايرن ميونيخ و المنتخب (جيرد مولر) ربنا إبتلاه بإدمان الكحول هو اللي ساعده و فضل جنبه لحد ما بطل و بقي مدير فني للمنتخب و هو اللي وصل ألمانيا لنهائي كأس العالم 2002 في كوريا واليابان لو تفتكر .. (أولي هوينيس) هو اللي وقف جنب (ديتمار هامان Dietmar Hamman) أسطورة بايرن ميونيخ و منتخب ألمانيا بعد ما ربنا إبتلاه برده بإدمان الخمرة و المراهنات.
غالباً فرقة بايرن ميونيخ حتسف التراب الموسم ده عشان ياخدوا بطولة الدوري أو يمكن دوري الأبطال عشان تبقي هدية وداع ل(أولي هوينيس) اللي بعد ما بقي عنده 67 سنة لسه حيكمل كعضو في المجلس الرقابي للنادي لحد سنة 2023 و بعد كده حيطلع معاش نهائي .. حيفضل الرجل ده علم من أعلام بايرن ميونيخ و الكرة الألمانية كلها .. بني أدم تنك بس جدع .. بني أدم لاغي الفلتر من مخه لبقه و ده بيخليه قليل الذوق في كتير من الأوقات .. بني أدم وقت الغلط بيحدف زلط .. بس بني أدم ناجح بيحب شغله و ناجح فيه.
المصادر:
- مقاله بعنوان The extraordinary life of Uli Hoeness: From sole survivor of private jet crash, sudden fall from grace for tax evasion, to staunch defense of his beloved club نشرت في جريده The Daily Mail وده لينك المقاله الاصليه:
https://www.dailymail.co.uk/sport/football/article-7549519/The-extraordinary-life-Uli-Hoeness-Bayern-Munich-president-all.html - مقاله بعنوان Uli Hoeness: The man who made Bayern Munich a global superpower نشرت في الموقع الرسمي للبونديزليجا وده لينك المقاله الاصليه:
https://www.bundesliga.com/en/bundesliga/news/uli-hoeness-the-man-who-made-bayern-munich-a-global-superpower-6640
