أياكس أمستردام .. لما (كرويف) قال أياكس مش عاجبني يا رجاله أياكس.

لو إنت أهلاوي مش عاجبك حال النادي و شايف إن (محمود الخطيب) بوظ النادي فتعالي جنبي عايزك في كلمتين .. لو شايف إن (تركي أل شيخ) و مشروعه بتاع نادي بيراميدز ده مشروع ناجح و بقي عندك إقتناع إن مستقبل الكورة في مصر هو الفلوس الكتير فأنا برده عايزك تيجي جنبي هنا .. طبعاً كلكوا عارفين إن فيه نادي إسمه أياكس أمستردام بيلعب في الدوري الهولندي و يمكن إحنا كمصريين بدأنا نسمع عن النادي ده لما (أحمد حسام ميدو) كان بيلعب فيه بس مش دي قصتي .. قصتي إن الفرقة دي وصلت موسم 2019-2020 لنص نهائي بطولة دوري أبطال أوروبا .. قصتي إنك لو حتقارن إمكانيات نادي زي أياكس بأنديه زي يوفينتوس و ريال مدريد اللي أياكس طلعهم من البطولة فإنت كأنك بالضبط بتقول لفرقة زي أسمنت أسيوط أنا عايزك تكسبي بطولة أفريقيا .. صدقني لو قلتلك إن النجاح اللي وصله أياكس ده مش صدفة .. مش مجرد إن الزهر لعب معاهم فوصلوا .. ورا النجاح ده تعب و مجهود و تخطيط إنت لا تتخيله و يمكن عشان إحنا في مصر منعرفش حاجة عن التخطيط و الإدارة فإحنا دايماً عقلنا بيودينا إن أكيد اللي حصل ده صدفة بس ده مش حقيقي .. عشان تفهم إزاي معجزة أياكس دي حصلت فإنت محتاج ترجع بالزمن ليوم من أيام شهر ديسمبر 2010.

في اليوم ده أسطورة نادي أياكس و برشلونة و هولندا و العبقري اللي لا جه ولا حيجي زيه (يوهان كرويف Johan Cruyff) الله يرحمه بعت رسالة لكتير أوي من اللي شغالين في نادي أياكس و أساطير النادي اللي لعبوا فيه إنه عازمهم كلهم عنده في البيت في أمستردام عشان يتناقشوا في حل لمشكلة النادي اللي في رأي (كرويف) مبقاش أياكس بتاع زمان .. هو كان من الناس المقتنعة بإن الفلوس مبتكسبش بطولات .. الحل مش إن النادي يتباع لأمير خليجي ولا لرجل أعمال صيني .. حل مشكلة أياكس إن رجاله النادي تقعد مع بعض.

تخيل كده عزومة غدا قاعد فيها (فرانك رايكارد Frank Rijkaard) و (ماركو فان باستن Marco van Basten) و (دينيس بيركامب Dennis Bergkamp) .. من الناس اللي إتعزمت علي الغداء في اليوم ده إتنين مدربين لفرق الناشئين في النادي واحد إسمه (روبين يونجكيند Ruben Jongkind) و الثاني إسمه (فيم يونك Wim Jonk) محدش كان عارف هم مين أصلاً و بإعترافهم شخصياً لما دخلوا بيت (كرويف) و شافوا الأساطير دول كلهم كل واحد فيهم قال لنفسه إحنا إيه اللي جابنا هنا؟ .. طبعاً الناس كلها إتكلمت و قالت رأيها بس مفيش حد قال حلول .. الكل كان عارف المشكلة فين بس محدش عارف الحل .. فجأة الإتنين دول قاموا .. (روبين يونجكيند) و (فيم يونك) زي ما تقول كده لما عرفوا إنهم معزومين في بيت (كرويف) فقعدوا مع بعض قبلها بكام يوم حضروا ورقة فيها شوية نقط في رأيهم تعتبر حل لمشكلة النادي فكانوا مخططين إنهم يعرضوها عليه من قبل ما حتي يعرفوا هي العزومة دي ليه و مين حيحضرها .. تقدر تقول إنهم ناس قلبهم علي النادي و كانوا عايزين يعرضوا أفكارهم علي (كرويف) يمكن يوصل صوتهم للناس الكبيرة.

أسطورة نادي أياكس أمستردام (يوهان كرويف Johan Cruyff) علي اليمين وجنبه أسطورة النادي برده و حبيب قلبي شخصياً (دينيس بيركامب Dennis Bergkamp) و الصوره دي ألتقطت سنة 2010.

(كرويف) مسك الورقة و إتريق إنه مش لابس نظارة القراية بتاعته بس واضح إن الكلام زي الفل .. الحقيقة إن فعلاً الكلام كان زي الفل .. خطة (روبين يونجكيند) و (فيم يونك) كانت أتفه و أبسط مما تتخيل و إتبنت علي 4 نقط بس:

إحنا أياكس يعني لازم نلعب كرة قدم سيكسي الناس تحب تتفرج عليها .. إحنا مش بلدية المحلة ولا المصري عشان ندافع و نركن الأوتوبيس.
لو القايمة بتاعة الفرقة الأولي فيها 32 إسم فلازم 50% منهم علي الأقل يبقوا من ولاد النادي اللي إتربوا في الأكاديمية بتاعته .. مش كده و بس .. التشكيلة الأساسية للنادي من أصل 11 لاعيب في الملعب لازم 9 منهم يبقوا من ولاد النادي اللي إتربوا في الأكاديمية بتاعته.
إحنا فلوسنا علي قدها فإحنا مش حنشتري لاعيب و ليكن مثلاً قلب دفاع إلا لما يكون اللاعيب اللي حنشتريه أحسن من كل قلوب الدفاع اللي موجودين في الأكاديمية بتاعتنا.
مفيش حاجة إسمها كبير و صغير .. لو مدرب فرقة تحت 14 سنة عنده رأي في أداء الفرقة الأولي فالمدير الفني للفرقة الأولي مٌجبر إنه يقعد يسمع و يتناقش معاه في الرأي ده.

الخطة دي إتقدمت لإدارة النادي في بداية 2011 و إتوافق عليها من الجمعية العمومية في يونيو 2011 .. بمجرد ما إتوافق عليها الشغل بدأ .. بسم الله الرحمن الرحيم كده (فيم يونك) إتعين مدير لأكاديمية النادي و (روبين يونجكيند) بقي مسئول عن تطوير مستوي اللاعيبه في النادي كله .. تاني حاجة جابوا الشيف بتاع مطبخ الفرقة الأوليمبية الهولندية و عينوه عندهم يمسك مطبخ النادي و بقي هو المسئول عن أكل كل لاعيبه النادي .. فيه كتير من اللاعيبه الناشئين لسه بيدرسوا في مدارس فإتعملت مدرسة جوه النادي بحيث إن إنت كطالب تصحي الصبح تروح المدرسة في النادي تطلع من المدرسة علي الملعب تتدرب و تروح بيتك أخر اليوم .. فيه مستشفي إتبنت جوه النادي .. بإختصار شديد أياكس أمستردام بدأ يتعمله عمرة بحيث يبقي نادي ينفع يتقال عليه نادي يقدر ينافس علي بطولة Champions League.

(فيم يونك Wim Jonk) اللي علي اليمين بقي رئيس أكاديمية النادي و (روبين يونجكيند Ruben Jongkind) اللي علي الشمال بقي مسئول عن تطوير أداء اللاعيبه.

التغيير كان في أساسات النادي .. فرق الناشئين مبقاش يتقيم نجاحها علي أساس خدتوا كام بطولة جمهورية لسنكوا قد ما بقي بيتقاس نجاحهم بالإجابة علي سؤال أنتوا طلعتوا كام لاعيب ينفع يلعب في الفرقة الأولي؟ .. إنت بتسمع عن فرقة زي الزمالك كده كل موسم يغيروا مدير فني و مطلوب من الفرقة إنها تسحر و بقدرة قادر تفهم المدير الفني الجديد و تطبق فكره و تكسب بطولات .. طبيعي إن الأندية الكبيرة لو مشيت علي الأسلوب ده إنها متعتمدش نهائي علي الناشئين لإن اللاعيب الناشيء محتاج وقت و محتاج مدير فني قاعدله مش كل شوية يشوف واحد جديد .. سياسة النادي كانت إن في مراحل الناشئين تولع البطولات مش عايزينها بس عايزين نربي لاعيبه ليها مستقبل جامد زحليقة .. لإن الأفكار الغريبة علينا دي عشان تتفهم محتاجه أمثلة تتشرح عليها فخد مثال حي زي (ماتياس دي ليجت Matthijs De Ligt) قلب دفاع الفرقة و كابتنها و اللي فيه كلام علي إن برشلونة عايزه و مستعد يدفع فيه 69 مليون جنيه إسترليني بس في الأخر راح يوفينتوس و دلوقتي بيلعب في بايرن ميونيخ.

ده لاعيب كان عنده وقتها 19 سنة .. ده رقم واحد .. كابتن واحدة من أعرق فرق هولندا .. يعني تخيل كده إن كابتن فرقة الأهلي عنده 19 سنة و كلمته بتمشي علي أطخن طخين في الفرقة .. ده لاعيب جسدياً نمي بشكل كامل و هو عنده 14 سنة و إنت شخصياً إتفرج علي ماتشاته دلوقتي حتلاقيه بسم الله ما شاء الله حيطة واقفه .. إنت لو مكان مدرب فرقة 15 سنة حتفرح به أوي و حتلعبه كل الماتشات بس ده محصلش .. إدارة النادي شافت فيه مستقبل الفرقة الأولي فرقوه يلعب مع فرقة تحت 17 سنة مع إنه لسه عنده 14 سنة بس مش مشكلة .. مش لازم يلعب كل الماتشات بس حيلعب قدام ناس دماغها أكبر و حياخد خبرة حلوة أوي و هو لسه سنه صغير .. حتقولي طب و فرقة تحت 15 سنة ليه تخليها تخسره؟ .. حترد عليك إدارة النادي ما تتحرق بجاز فرقة تحت 15 سنة إحنا يهمنا مستقبل الفرقة الأولي .. و مش بس إنهم خلوه يلعب في سن أكبر من سنه .. هم عارفين إنه قلب دفاع و حيبقي قلب دفاع بس محتاج يتعلم يجري بسرعة و يقرأ الملعب أحسن عشان كده خلوه في ماتشات كتير يلعب خط نص عشان يتعلم يجري صح و يقرأ الملعب صح .. بيشوفوا عيوبه إيه و يحلوها معاه .. قيس ده علي كل لاعيب في أكاديمية النادي.

(ماتياس دي ليجت Matthijs De Ligt) كانوا عارفين إنه في يوم من الأيام حيبقي كابتن الفرقة الأولي من ولسه هو عنده 14 سنة.

مثال تاني هو صانع الألعاب (دوني فان دي بييك Donny van de Beek) اللي (دينيس بيركامب) شخصياً قال عليه إنه حيبقي صانع ألعاب محترم و هو لسه عنده 10 سنين بس دلوقتي مدفون يا عيني في مانشستر يونايتد .. المشكلة إنه كان بيباصي الكرة كتير أوي لورا فإتحطله برنامج مخصوص إنهم يعالجوا المشكلة دي .. إنت لا تتخيل هم ممكن يعملوا معاك إيه عشان يحلولك أي مشكلة في أداءك .. جابوله ناس من كرة القدم الأميريكية عشان يعلموه إزاي صانع الألعاب في اللعبة دي بيقرأ الملعب كله و إزاي برقبته يلف عشان يكشف الملعب .. جابوله ناس من بتوع رياضة القفز بالزانة و دي لعبة أوليمبية عشان يتعلم إزاي يقطع الملعب كله في سبرينات .. إشتغلوا عليه لحد ما بقي عنده 16 سنة بس بيلعب أساسي في فرقة تحت 19 سنة.

(دوني فان دي بييك Donny van de Beek) شافه (دينيس بيركامب Dennis Bergkamp) و قال عليه صانع ألعاب محترم وهو لسه عنده 10 سنين.

يا راجل ده النادي كان مستعد يرفع قضية علي رئيس إتحاد الكورة الهولندي .. تدري ليش؟ .. كان عندهم إتنين لاعيبه ناشئين تحت سن 17 سنة بس بسبب السياسة الجديدة اللي شرحتهالك فكان النادي بيلعبهم في فرقة تحت 19 سنة بدري .. لما جه إتحاد الكورة يضم الإتنين دول لمنتخب هولندا تحت 17 سنة النادي رفض و أصر إن الإتنين لاعيبه يتاخدوا في منتخب تحت 19 سنة يا إما مش حيروحوا المنتخب خالص .. بس بلاش تتخيل إن الدنيا مشيت زي السكينة في الجاتوه .. في البدايات خالص زي ما بيحصل في أي عملية إصلاحات واسعة أوي بالشكل ده كانت فيه مشاكل كتير و ناس جوه مجلس الإدارة مكنتش مقتنعة باللي بيعمله (كرويف) .. سنة 2013 حصلت خناقة كبيرة أوي جوه النادي لما مجلس الإدارة كان عايز يحيب (لويس فان خال Louis van Gaal) يبقي المدير التنفيذي للنادي و (كرويف) و قفلهم و رفع عليهم قضية و كسبها .. و فضل يحارب لحد ما جاب (إيدوين فان دير سار Edwin van der sar) يمسك المنصب و هو اللي سعي عشان (مارك أوفرمارس Marc Overmars) يبقي المدير الرياضي .. بس إذا كان (كرويف) كسب جولة فأعداءه جوه النادي كانوا لسه مستسلموش.

في 2015 مجلس الإدارة حاول يمشي (فيم يونك) بس برده (كرويف) وقفلهم .. في أكتوبر 2015 إتعرف إن (كرويف) مصاب بالسرطان و لما ده حصل مجلس الإدارة طلع قرار بطرده بره النادي .. صدقني ده اللي حصل فعلاً .. (كرويف) كان مستني من رجالته اللي هو حارب عشانهم زي (إيدوين فان دير سار) و (مارك أوفرمارس) إنهم يقدموا إستقالتهم تضامناً معاه بس ده محصلش و هو يا عيني إتجرح أوي من موقفهم ده و مكملش كتير و كان مات بعدها بكام شهر و دلوقتي كل اللي باعوه واللي كانوا واقفين ضده بيحصدوا المحصول اللي هو زرعه بنفسه و ربنا مأرادش إنه يشوفه بنفسه مع إنه كان متوقع إنه يحصل .. (كرويف) خلي النادي يعلق بوسترات في كل حتة في الأكاديمية مكتوب عليها We make Champions League winners يعني إحنا بنطلع لاعيبه بتكسب بطولة دوري الأبطال مع إن تلاميذه و رجالته محدش فيهم كان شايف إن ده ممكن يحصل.

(كرويف Cruyff) علي اليمين وفي النص (فان دير سار van der saar) و علي الشمال (مارك أوفرمارس Marc Overmars).

نجاح أي حد بيخلي له أعداء و ناس غيرانه منه .. أنا شخصياً شايف إن (كرويف) هو بلا منازع أنجح شخصية في تاريخ كرة القدم لحد دلوقتي .. كان ناجح كلاعيب مع أياكس .. كان أسطوري مع برشلونة و ختم حياته كلاعيب مع فينورد .. في الثمانينات كان مدير رياضي في أياكس .. حتي تلاميذه ناجحين .. (فرانك رايكارد) و (بيب جوارديولا Pep Guardiola) .. طبيعي إن ناس كتير تكره إن شخص واحد يبقي عنده النجاح و النفوذ ده كله.

المصدر:
مقالة بعنوان Inside Ajax: How Tottenham’s Champions League opponents were built in legend Johan Cruyff’s image .. نشرت في جريدة The Daily Mail البريطانية و ده لينك المقالة الأصلية:
https://www.dailymail.co.uk/sport/football/article-6971601/Inside-Ajax-Tottenhams-Champions-League-opponents-built-legend-John-Cruyffs-image.html