إيه اللي يخليك تقول علي نادي إنه ناجح؟ .. هل عدد البطولات اللي خدها؟ .. هل النادي معاه فلوس يشتري أي حد في السوق أو لا؟ .. هل عدد المشجعين بتوع النادي؟ .. كل دي معايير علي عيني و علي راسي بس لو فكرت فيها شوية نقول مثلاً في بلد زي مصر فالنادي الوحيد اللي قادر يحقق كل المعايير دي هو النادي الأهلي .. هل معني كده إن مفيش نادي ناجح فيكي يا مصر إلا النادي الأهلي؟ .. هل ده معقول؟ .. طب و أندية الغلابة نقيمها إزاي؟ .. عشان كده أنا النهاردة بقترح نتكلم عن معيار تاني نقيس بيه هل النادي اللي حنتكلم عنه ناجح ولا لا و هو إنك تسأل نفسك هو بالصلاة علي النبي النادي ده شغال في سوق عامل إزاي؟ و هل هو قادر يقف علي رجله ولا لا؟ زي ما إنت شايف ده معيار نقيس بيه أندية الغلابة .. الأندية اللي مش ماسكها خلايجة معاهم فلوس ولا رجال أعمال بتبعزق ملايين علي صفقات شرا لاعيبه .. و عايزك تبص معايا علي واحد من أكتر أندية الغلابة اللي أنا عايز أقف قدامها .. بروسيا دورتموند.
تجربة زعيم الغلابة في رأيي لازم تقف قدامها و تدرسها و تتعلم منها درسين مهمين أوي .. أول درس إنك تستغل الفرص اللي ربنا بيبعتهالك .. ثاني درس إنك تشغل مخك اللي ربنا برده إداهولك و يمكن مفيش موقف يوريك إزاي إدارة بروسيا دورتموند طبقت الدرسين دول أكتر من اللي حصل في صيف 2017 .. في الوقت ده لو تفتكر العالم صحي الصبح علي مفاجأة إن نادي باريس سانجيرمان إشتري (نايمار Neymar) .. نادي معاه فلوس ضحك علي نادي تاني معاه فلوس برده .. تقريباً دورتموند بصوا للي بيحصل و كانوا بيتفرجوا زينا و هم بياكلوا فشار و بيشربوا بيبسي لحد ما ربنا أراد و إدارة برشلونة في لحظة طيش حطت قدامهم 135.5 مليون جنيه إسترليني عشان يشتروا عيل ناشيء بيلعب في بروسيا دورتموند إسمه (عثمان ديمبيلي Ousmane Dembele) .. فرصة العمر و جت لحد زعيم الغلابة .. الدرس الثاني بقي إنك تشغل مخك.
واضح إن لو أنا نادي فتحت مخي و عرفت أجيب لاعيبه صغيرة في السن أربيها زي البط لحد ما عودها ينشف فعلي رأي (البهظ بيه) في فيلم الكيف حتصطاد زبونها ترقي نفسها و تبقي نمرة واحد .. في مايو 2019 مجلة فوربس Forbes الأميريكية قيمت فرقة بروسيا دورتموند بإن ثمنهم شاكب راكب يوصل 670 مليون جنيه إسترليني .. بفكرك بس إن ده الموسم اللي الفرقة جابت فيه (جايدن سانشو Jadon Sancho) و (إيرلينج هالاند Erling Haaland) و قبل ما حد يعرف هم مين دول .. بعدها بسنة في 2020 المجلة قيمت ثمن الفرقة بإنه عدي 800 مليون جنيه إسترليني .. بس سر الصنعة إن ميبقاش لاعيبتك كلها قماشة واحدة .. لازم تنوع:
- فيه لاعيبه صغيرة في السن بس خلاص عملت إسمها و بقي ليها زباينها زي ما قلتلك (سانشو) و (هالاند) .. بناء علي كلام موقع تقييم اللاعيبه Transfermarkt فالإثنين لو حبيت تبيعهم بكره الصبح سعرهم حيبدأ من 90 مليون جنيه إسترليني مستريح و قد كان.
- لاعيبه لسه ناشئة بس العين عليها و ممكن في أي لحظة تلاقي موهبتهم إنفجرت و غرقت الدنيا فلوس زي الجناح الأمريكاني (جيوفاني رينا Giovanni Reyna) و المهاجم الكاميروني (يوسوفا موكوكو Youssoufa Moukoko) اللي برده سعرهم في السوق ممكن يبدأ من 75 مليون لحد 160 مليون جنيه إسترليني .. علي فكرة (يوسوفا) هو أصغر لاعيب يجيب جون في تاريخ الدوري الألماني لما سجل في مرمي فرقة يونيون برلين و هو كان عنده 16 سنة و 28 يوم .. تقدر كمان تحط معاهم لاعيب خط النص الإنجليزي (جود بيلينجهام Jude Bellingham) اللي لسه عنده 19 سنة.
- اللاعيبة اللي سنها بين 21 و 25 سنة و اللي يا إما وصلوا لقمة مستواهم أو لسه قدامهم شوية و يتحسنوا أكتر زي مثلاً الجناح (جوليان براند Julian Brandt) اللي دلوقتي عنده 26 سنة و إدارة بروسيا إشترته من نادي باير ليفركوزن بعشرين مليون جنيه إسترليني .. ملاحظ إنه رقم قليل؟ .. برده فيه عندك لاعيب خط الوسط (محمود دحود) اللي صحيح أصله سوري بس بيلعب في منتخب ألمانيا و لسه عنده 26 سنة.
أبقي بضحك عليك لو قلتلك إن إدارة بروسيا دورتموند هم اللي بس جهابزة و بيفهموا و دماغهم جامدة زحليقة .. فيه إندية كتير مش بس في ألمانيا إنما في أوروبا كلها بتحاول تقلد النموذج بتاع زعيم الغلابة .. فرقة زي أر بي لايبزج اللي الحقيقة هم مش نادي واحد دول 3 أندية في بعض واحد في ألمانيا و الثاني في النمسا و الثالث في أميركا و كلهم تحت سيطرة شركة مشروبات الطاقة ريد بول و كلهم ماشيين في نفس السكة .. فرقة إشبيلية في إسبانيا .. فرقة روما في إيطاليا بس السبب ورا نجاح زعيم الغلابة إنهم وصلوا لسر الطبخة .. الخبرة.
خد عندك مثلاً اللي ماسك نشاط الكرة في النادي (مايكل زورك Michael Zorc) و ده رجل تقريباً بقاله أكتر من 40 سنة شغال في النادي .. تحت منه مدير نشاط الناشئين (لارس ريكين Lars Ricken) ده كان لاعيب سابق في النادي و دلوقتي شغال معاهم .. لو جيت تجمع عدد سنين الخبرة اللي عند الناس اللي ماسكة قطاع الناشئين في النادي حتلاقي نفسك قدام أكتر من 100 سنة خبرة مجمعة .. الخبرة دي بتخليهم زي ما بايرن ميونيخ خد منهم (ماريو جوتزه Mario Gotze) و (روبيرت ليفوندفسكي Robert Lewandowsky) و زي ما مانشستر يونايتد خد منهم (شينجي كاجاوا Shinji Kagawa) و زي ما أرسنال خد منهم (بيير إيميريك أوباميانج Pierre-Emerick Aubameyang) و زي ما برشلونة خد منهم (عثمان ديبميلي) و زي ما تشيلسي خد منهم (كريستيان بوليسيك Christian Pulisic) فهم باعوا كل اللاعيبه دي و كلوا من وراهم الشهد و طلعوا لاعيبه صغيرين في السن مستواهم ميفرقش كتير عن مستوي اللاعيبه اللي إتباعت .. النجاح ده سببه الخبرة .. الشعر اللي شاب ده مش بالساهل.
طبعاً لو إنت واحد بتشجع بايرن ميونيخ فإنت بتفرك دلوقتي مستنيني أجيب سيرة إن زعيم الغلابة أخره المركز الثاني و مش حيشيل بطولة .. و غالباً إنت مستني ترمي في وشي التصريح التاريخي بتاع (أولي هوينس Uli Hoenis) رئيس بايرن ميونيخ بإن مشكلة بروسيا دورتموند هي إنهم معندهمش فكرة إن إحنا لازم نكسب بطولة و الفكرة دي هي اللي بتخلي الفرق الكبيرة عادة عندها الحاجة اللي الأهلاوية بيسموها روح الفانلة الحمرا .. الغيار الزيادة في الفتيس اللي بيخليك تقفل العداد و إنت طاير علي الصحراوي .. الحقيقة أنا لا أملك غير إني أقولك إنت عندك حق بس في رأيي الشخصي إن مشكلة بروسيا دورتموند مش إنهم معندهمش روح الفانلة الصفرا .. المشكلة إنهم مبيعرفوش ينقوا المدربين اللي يمسكوا الفرقة .. و لو لقوا مدير فني كويس بيطلعوا عينه و بيكفروه في عيشته لحد ما يمشي .. هم بيعرفوا ينقوا لاعيبة صغيرة كويس بس كواحيل في إنهم يجيبوا مديرين فنيين كويسين .. و لو جابوهم بيطفشوهم.
أخر بطولة كسبتها الفرقة كانت كأس ألمانيا موسم 2020-2021 بقيادة المدير الفني الحالي (إيدن تيرزيتش Eden Terzic) و اللي علي فكرة كان وقتها كان ماسك الفرقة بصفته مدير فني مؤقت بس لقوه جاب بطولة قاموا خلوه مكمل و الحقيقة إن القصة ورا تعيين (تيرزيدتش) تهلك من الضحك و توريك قد إيه إدارة بروسيا دورتموند مبتعرفش تختار مديرين فنيين .. البطولة اللي قبلها اللي النادي يكسبها برده كانت برده كاس ألمانيا موسم 2016-2017 وقت ما كان ماسكهم طيب الذكر (توماس توخيل Thomas Tuchel) .. تفتكر يخلوه؟ .. يبقي متعرفش إدارة بروسيا دورتموند كويس .. الباشوات مشوه و جابوا مكانه الكارثة اللي إسمها (بيتر بوش Peter Bosz) .. مشوه و جابوا المصيبة (لوشيان فافري Lucien Favre) اللي ضيع من إيده بطولتين دوري كان ممكن بسهولة الفرقة تكسبهم .. مشوه و عينوا مكانه مدير فني مؤقت بس العين كلها كانت علي (ماركو روزا Marco Rose) اللي مسك الفرقة في موسم 2020-2021 .. معلومة خفيفة علي الماشي بخصوص الرجل ده .. عارف (كارتيرون)؟ .. أهو ده (كارتيرون) بتاع ألمانيا .. الرجل ده كان ماسك فرقة بروسيا مونشنجلادباغ اللي نطق إسمها صح يعتبر في رأيي ختم النسر إنك خلاص بقيت بتفهم في الكورة و كمان تعتبر الغريم بتاع بروسيا دورتموند و عمل معاهم شغل زي الفل خلي بروسيا دورتموند يخطفوه .. تفتكر يكمل؟ .. مشوه في نص الموسم و جابوا (تيرزيدتش).
الحقيقة أنا كل سنة أقول إني مستني الموسم الجاي عشان أتفرج علي بروسيا دورتموند .. و في كل مرة أستني اللاعيه اللي أنا شفتها الموسم اللي قبله تبدّع بس بكتشف إنهم مشيو .. إدارة بروسيا دورتموند حلفت بأيمانات المسلمين مش حيبيعوا (سانشو) لمانشستر يونايتد و أهو إتباع .. سابوا أبو (هالاند) و وكيل أعماله (مينو رايولا Mino Riola) ياخدوا أوروبا كعب داير يدوروا علي مشتري للواد لحد ما راح السيتي .. حتي الناس اللي قالت إن مشيان (هانسي فليك Hansi Fleck) من بايرن ميونيخ و تعيين (جوليان ناجلزمان Julian Nagglesman) اللي كان خطفوه من فرقة لايبزج تقريياً بنفس الطريقة اللي بروسيا دورتموند خطفوا بيها (ماركو روزا) من بروسيا مونشنجلادباخ طلع كلامها غلط .. إنت دلوقتي قدام وضع إن بسبب التخبط اللي فيه إدارة بايرن ميونيخ اللي لما حست بالخطر مشت (ناجلزمان) و جابوا (توخيل) و برده إحنا مستنيين نصحي علي خبر إن البونديزليجا بقي من نصيب زعيم الغلابة.
بروسيا دورتموند 2023 هو هو بروسيا دورتموند اللي معندوش مشكلة يبيع لأول مشتري أت .. الناس دي فرطت في (ليفاندوفسكي) و (جوتزه) و حتي (ماتس هوملز) اللي مش حقولك سابوهم لفرقة أوروبية معاها فلوس دول سابوهم يمشوا يروحوا بايرن ميونيخ و الوضع زي ما هو دلوقتي .. (هالاند) إتباع .. (سانشو) إتقال مش للبيع و أديه إتباع .. و في نفس الوقت محدش ضامن إن (توخيل) حينجح مع بايرن .. معلش يعني الناس دي مسكهم (يورجين كلينسمان Jurgen Klinemann) اللي مسك منتخب ألمانيا و دخل بيهم كاس عالم 2006 بفرقة ناشئين وقتها و وصل ثالث عالم ورغم كده رموه بره النادي عشان محققش المطلوب منه .. (كارلو أنشيلوتي Carlo Ancelotti) مشوه .. (بيب جوارديولا Pep Guardiola) مشوه .. الألمان بيسموه بايرن ميونيخ إف سي هوليوود لسبب و هو إن ده نادي لو إنت مش لحمك مر حتتاكل .. حتي إسال (فليك) .. الناس كلها عارفه إن (فليك) مشي عشان متخانق مع (حسن صالح حميديتش) مدير نشاط الكورة .. المنطق إن (فليك) أهم للنادي من (حسن) .. لو الإتنين شدوا مع بعض (حسن) اللي يمشي مش (فليك) .. ليه؟ .. عشان (فليك) جابلك الثلاثية.
علي فكرة سهل تفهم هو ليه (ناجلزمان) إتطرد من إف سي هولييود .. لو بصيت علي الCareer بتاعة (ناجلزمان) فهو عمره ما إشتغل في مكان كان هو أقل منه .. لما كان في هوفينهايم ألمانيا كانها كانت عارفه الفرقة دي عشان دي الفرقة اللي بيدربها (جوليان ناجلزمان) .. و هو في لايبزج فعلياً هو كان أهم شخصية في النادي .. في البايرن هو راح مكان فيه لاعيبة في الفرقة كلامها بيتسمع أكتر منه .. في تقديري الشخصي (ناجلزمان) هو الجزء الثاني من فيلم (كلينسمان) مع بايرن ميونيخ ..السؤال .. هل دي حتكون فرصة بروسيا دورتموند إنه يبقي بحق و حقيقي زعيم الغلابة؟
المصدر:
مقالة بعنوان Inside the Yellow Machine: The Borussia Dortmund model is a ‘Utopia’ for Young Players and Starlets Now Approach Agents to Plead for a Move نشرت في جريدة The Daily Mail البريطانية و ده لينك المقالة الأصلية:
https://www.dailymail.co.uk/sport/football/article-9039759/The-Borussia-Dortmund-utopia-Stars-beg-Sancho.html
