تعديل إتعمل يوم 19 نوفمبر 2022 .. (ستيفن جيرارد) أٌقيل من منصبه كمدير فني لأستون فيلا و جه مكانه (يوناي إيمري) من نادي فياريال الإسباني .. (محمود تريزيجه) بيلعب دلوقتي في نادي طرابزون سبور التركي.
لو إنت صاحب شغل إزاي تعين موظف جديد؟ .. إيه اللي بيخليك تبص لواحد مقدملك الCV بتاعه فتقول بااااااس هو ده اللي حلمت بيه؟ .. مؤهلاته؟ .. خبرته؟ .. إنه بيعرف يتكلم في الإنترفيو؟ .. سُمعته خصوصاً لو موظف كبير في السن؟ .. طلباته إنه مش عايز مرتب عالي؟ .. هل إنت كصاحب شغل عندك القدرة إنك تاخد المخاطرة وتعين شاب صغير معندوش خبرة أوي دلوقتي بس إنت شايف إنه حينقل شركتك لقدام كمان كام سنة؟ .. أنا ليه بسأل الأسئلة الوجودية دي؟ عشان في الكام يوم اللي فاتوا حصلت شوية تغييرات في المديرين الفنيين لأندية الدوري الإنجليزي زي ما يكونوا بيلعبوا مع بعض الكراسي الموسيقية .. مش عارف إنت سمعت الأخبار دي ولا لا بس نادي أستون فيلا اللي بيلعب فيه (محمود تريزيجيه) جاب (ستيفين جيرارد Steven Gerrard) .. نادي نيوكاسل جاب (إيدي هاو Eddie Howe) .. نادي توتنهام جاب (أنتونيو كونتي Antonio Conte) .. 3 قرارات تعيين من 3 إدارات مختلفة ب3 دروس مختلفة مش بس في كيفية إنك تدير نادي إنما في الإدارة بشكل عام وده اللي عايزين نتكلم عنه النهاردة.
درس رقم واحد .. لما تلاقي الموظف اللي إنت بتدور عليه روح قوله تعالي:
نادي أستون فيلا من الأندية اللي شافت إن الدنيا بتجري منها ولو كانوا سكتوا علي الحال المايل ده كان ممكن المركب تغرق .. هم صحيح نادي مش كبير بس في نفس الوقت هم أكبر من إنهم يلاقوا نفسهم علي بعد نقطتين من منطقة الهبوط لدوري المظاليم .. عشان كده تعيين (ستيفن جيرارد) مثالي بالنسبة ليهم لدرجة إني مش حبقي ببالغ لو قلت إنهم محتاجينه أكتر ما هو محتاجهم .. ليه أنا بقول كده؟ .. حط نفسك مكان (جيرارد) وإنت تفهم .. إنت ماسك راينجرز اللي هم تاني أهم فرقة في الدوري الأسكتنلدي .. صحيح إن الدوري الأسكتلندي مش أحسن حاجة في الدنيا بس هو برده زيه زي الدوري المصري في نقطة إنه دوري معاق ذهنياً لو قارنته بالدوري مش حقول الإنجليزي لكن بالدوري اليوناني مثلاً بس في نفس الوقت مشجعين الأهلي والزمالك شايفينه أهم حاجة في الدنيا .. فدلوقتي إنت ك(جيرارد) ماسك الزمالك بتاع أسكتلندا فإنت مش عواطلي يعني .. إنت بس محتاج الفرصة المناسبة .. محتاج الطموح المناسب .. محتاج الإدارة اللي مش تقولك إحنا بنفكر فيك تيجي إحنا عايزينك تيجي وده اللي عملته إدارة أستون فيلا.
خليني أبقي واضح برده إني مش بقول إن (جيرارد) حيبقي خليفة (بيب جوارديولا Pep Guardiola) في عالم التدريب بس بلاش تنكر إن تعيينه حيخلي أستون فيلا فجأة كده نادي سيكسي في عيون اللاعيبه اللي مش بس بتلعب في إنجلترا إنما في أوروبا كلها .. لو إنت لاعيب كورة دلوقتي في أوروبا فغالباً وإنت لسه ناشيء إنت كنت من المعجبين بيه وبالتالي فكرة إنك تلعب تحت إيده حتبقي فكرة لذيذة أوي وده درس تتعلمه في الإدارة من اللي عمله نادي أستون فيلا .. إنت ليك رؤية معينة لمستقبل شركتك فروح بنفسك للناس اللي إنت شايفها حتحققلك الرؤية دي قولهم أنا عايزكوا تيجوا تشتغلوا معايا وطلباتكوا حتبقي مجابة.
درس رقم إثتين .. أوعي تتردد إنك تاخد القرار اللي إنت عارف إنه صح لمجرد إنك خايف:
خليني أبقي واضح معاك إن في الوقت اللي أستون فيلا كانوا بيفكروا في (جيرارد) فكمان إدارة نادي نيوكاسل هي كمان كانت بتفكر فيه بس هي المشكلة في الطريقة اللي هم كلموه بيها .. عارف لما تبقي بتكراش علي بنت زميلتك في الجامعة بس خايف تكلمها عشان متحرجكش قدام الناس فتقرر بدل ما تقولها أنا معجب بيكي تقولها ممكن أصور محاضراتك .. ده اللي إدارة نيوكاسل عملته لما جت تكلم (جيرارد) لما قالوله إحنا بنفكر نجيبك وعايزين نعمل معاك إنترفيو عشان نقرر نختار مين من المديرين الفنيين اللي بنفكر نجيبهم .. أرجع تاني وأقولك تخيل نفسك (جيرارد) وبتسمع البقين دول .. أنا مدير فني لفرقة راينجرز ثاني أتقل فرقة فيكي يا أسكتنلدا .. أرجع تاني وأقولك إن الدوري الأسكتنلندي مش أملة يعني بس في نفس الوقت أنا بطل الدوري الأسكتلندي وبلعب في بطولة الدوري الأوروبي Europa League اللي هو أساساً مستوي بعيد سنين ضوئية عن اللي عايشاه فرقة نيوكاسل دلوقتي .. لما تسمع إننا مجرد بنفكر فيك يا تري حتقول لنفسك إيه؟ .. تقديري الشخصي حتقولهم طب فكروا براحتكوا بقي أنا مش فاضي.
لما (جيرارد) راح منهم ملقوش بديل غير (إيدي هاو) وهي دي المشكلة .. أرجوك متفهمش كلامي إن (إيدي هاو) مدير فني وحش لإن مش ده اللي أنا بقوله .. اللي أنا بقوله إن الإهتمام الإعلامي وحماس الجماهير وحتي اللاعيبه لمدير فني سمعته وتاريخه زي (جيرارد) عمره ما حيكون بحجم العشرين بني أدم اللي بس حضروا المؤتمر الصحفي لتقديم (إيدي) كمدير فني لنادي نيوكاسل .. وهي دي مشكلة إدارة نيوكاسل الجديدة إنهم خايفين والخوف مشكلته إنه بيخليك قبل ما تاخد أي قرار بتبقي عايز تعرف هي الناس حتقول عليك إيه .. طب تعمل ده إزاي؟ .. بتلاقي نفسك بتتعمد تسرب أخبارك للإعلام وعينك بتبقي علي بوستات السوشيال ميديا عشان تشوف رد فعل الجماهير .. ده حصل إن بمجرد ما الإدارة الجديدة اللي وراها (محمد بن سلمان) إشترت النادي قالوا إن المدير الفني وقتها (ستيف بروس Steve Bruce) مش حيبقي في منصبه في أول ماتش يتلعب تحت الإدارة الجديدة .. مشجعي نيوكاسل علي السوشيال ميديا قالوا هيييييييييه .. شوية وسربوا خبر إنهم بيفكروا في (يوناي إيمري Unai Emery) المدير الفني الحالي لفياريال واللي كان ماسك أرسنال قبل كده واللي علي فكرة كان حيبقي إختيار موفق جداً بس لقوا الجماهير قالت ييييييييييه وبمجرد ما ده حصل إنهم سربوا خبر إنهم بيتكلموا مع (إيميري) فهو من نفسه قالهم أنا مش جاي .. فقالوا كويس إننا مختارناهوش وجت من عنده ما كده كده الجماهير مكنتش حتبقي راضية .. شوية وسربوا خبر إنهم بيتكلموا مع (جيرارد) .. الجماهير علي السوشيال ميديا كانت بتزقطط وبتغني لطويل العمر .. هوبا أستون فيلا خطفوه ومبقاش قدامهم غير (إيدي هاو).
تاني .. الرجل ده مدير فني محترم جداً واللي عمله في 4 سنين مع بورنوث مش سهل بس هي الفكرة في التوقيت .. لو كان تعيينه كمدير فني لنيوكاسل تم من سنة بس فاتت كانت الجماهير بقت بتغني من الفرحة بس بلاش ننكر إن شعبية وسمعة الرجل ده إتهزت بسبب إنه قعد سنة في بيته مش لاقي شغل .. عشان كده لما الإدارة طلعت بيان صحفي للإعلان عن تعيينه هم قالوا إن في الإنترفيو اللي عملوه معاه هو بهرهم برؤيته للمستقبل .. عارف إيه هي رؤيته؟ .. في المؤتمر الصحفي لتقديمه كمدير فني لنيوكاسل قال نصاً: “أنا متؤكد إننا مش حنهبط لدوري المظاليم بس أنا مقدرش أوعدكوا بأي حاجة”.. هي دي رؤية (هاو) اللي تلخصها بجملة علي قد لحافك مد رجليك.
تخيل كده معايا إن إدارة نيوكاسل كانت خدت حبوب الشجاعة وكانت عينت (جيرارد) فعلاً .. تخيل نادي معاه فلوس زي نيوكاسل ومعاهم مدير فني أي لاعيب كورة بيحلم إنه يلعب تحت إيده .. تخيل ساعتها إدارة نيوكاسل تروح للاعيب أرتكاز زي (كالفين فيليبس Kalvin Phillips) بتاع ليدز يونايتد أو (ديكلان رايس Declan Rice) بتاع ويستهام ويقولولهم إن إحنا عارفين إن جايلكوا Offers من أندية كتير معاها فلوس بس إحنا كمان معانا فلوس ومعانا المدير الفني اللي يقدر يخليكوا زي (يايا توريه Yaya Toure) و (ديفيد سيلفا David Silva) لمانشستر سيتي .. لو إنت يا (ديكلان رايس) نفسك تبقي أحسن لاعيب خط وسط في العالم فتعالي عندنا وإتمرن تحت إيد اللي كان أحسن لاعيب خط وسط في العالم .. تخيل الفرصة اللي راحت من إيد نيوكاسل بسبب التردد وده يمكن تاني درس واللي مرتبط بالدرس الأولاني .. لو فيه موظف إنت شايف إنه هو ده اللي إنت بتدور عليه متتردش تجيبه وترضي بالإستبن علي أساس إنه أرخص .. إنت مش متخيل إنك بالقرار ده ضيعت علي نفسك مكاسب قد إيه.
درس رقم ثلاثة .. مش عيب تعين حد سمعته صعبة عشان إنت شايف إنه عايز يثبت لنفسه حاجة:
(دانييل ليفي Daniel Levy) مدير نادي توتنهام مش ألطف شخصية في الدنيا .. لو تسألني يعني لو قدامي الفرصة إني أقعد أتكلم معاه علي الغدا فغالباً حقولك لا يا عم الله الغني .. بس شوف قول اللي إنت عايز تقوله علي الرجل ده بس هو بيعرف ياخد قرار .. صح غلط بقي حنبقي نتكلم في ده بعدين بس هو مش بيخاف من فكرة إنه محتاج ياخد قرار .. فيه ناس بتترعب بس هو لا .. لما (دانييل ليفي) راح يقعد مع (أنتونيو كونتي) يقوله تعالي إمسك الفرقة هو كان عارف هو رايح يتكلم مع مين .. هو مراحش قاله إحنا بنفكر فيك مع ناس تانية بس لسه مخدناش قرار .. لا هو قاله أنا عايزك تيجي بس هنا بيجي مش حقول الخازوق بس خلينا نسميها الرهان المشترك ودي حالة نادراً ما بتحصل بس لما ربك بيريد و تتحقق بتبقي حالة تستحق إنك تقف قدامها و تتعلم منها .. تعيين (كونتي) كمدير فني لتوتنهام تتعلم منه الدرس بتاع إزاي تبقي مدير تبقي عارف إن الموظف اللي إنت رايح تعينه سمعته إنه شخصية صعبة ودايماً بيتعارك مع مديرينه ودايماً بيسيب شغله بخناقة بس مبيروحش مكان إلا وينجح فيه .. سواء بتتكلم عن يوفينتوس أو تشيلسي أو إنترميلان .. الثلاثة سابهم بعركة والثلاثة حقق معاهم الدوري .. دي المعلومات اللي إنت عارفها عن الموظف اللي إنت رايح تعينه بس في نفس الوقت إنت عارف إن هو عارف إن مش أي حد حيرضي يعينه بدماغه دي .. الناس كلها عارفه إنه شاطر بس صعب في التعامل فصحاب الشغل بيقولوا لنفسهم مش ناقصة وجع دماغ .. إنت عارف من جواك إن الموظف ده عايز يشتغل والأهم إنه بيراهن علي نفسه .. بيراهن إنه يقدر ينجح في ظروف صعبة مش لشيء غير إنه يقول لكل اللي شككوا فيه أنا النامبر وان.
بس متفتكرش إن صاحب الشغل عبيط ومش فاهم .. عشان كده هو قاله أنا حعينك بعقد 18 شهر بس وبعد كده نشوف .. سنة ونص هي كل اللي أقدر أقدمهولك .. أنا حديك فرصة إنك تثبت نفسك قدام الناس في مقابل إنك تشتغل بالإمكانيات اللي تحت إيدك دلوقتي ومتطلبش غيرها لإن مفيش غيرها وده راجع لحقيقة إن توتنهام واحد من أنتن الأندية اللي بتلعب في الدوري الإنجليزي ضمن ما يسمي بالستة الكبار Top Six .. في العشر سنين اللي فاتوا عارف توتنهام صرفوا قد إيه علي شراء اللاعيبه؟ 233.3 مليون يورو .. شايفهم كتير؟ .. عايزك تعرف إن في نفس الفترة ليفربول صرف 342.9 مليون يورو .. تشيلسي صرف 430.1 مليون يورو .. أرسنال اللي بنقول عليهم البخلاء بتوع لندن صرفوا في 10 سنين بس 619.3 مليون يورو .. طبعاً مش حكلمك عن قطبي مانشستر اللي كل واحد فيهم كاسر حاجز المليار يورو .. بس خلي بالك دي مش الصورة الكاملة .. لو حابب تبص علي الصورة الكاملة فإنت لازم تحط في حسابك إنهم صارفين فوق المليار يورو عشان الإستاد الجديد بتاعهم واللي يدوبك لسه بيفتتحوه العالم إتداس علي وشه بجائحة كورونا اللي خلت الإستاد يتقفل لمدة سنة وهم مكانوش لسه سددوا فلوسه.
أرجع تاني وأقولك إن (دانييل ليفي) مش عبيط ودي النقطة اللي لو إنت صاحب شغل لازم تتعلمها منه كويس أوي وهو فن التعيينات الصح .. الرجل ده عارف إن دي مش أول مرة (كونتي) يراهن بسمعته بالشكل ده وخليني أرجعك بالزمن لسنة 2014 لما بعد ما قضي 3 سنين في يوفينتوس خد فيهم الدوري 3 سنين ورا بعض خد بعضه ورمي إستقالته في وش الإدارة .. كانت خناقة لرب السما وقتها ولما الصحفيين سألوه سبت يوفينتوس ليه قالهم عشان معفنين .. هو مقالش كده نصاً هو وصف الوضع هناك بإن يتقالك خد مراتك خرجها في عشوة حلوة في فندق خمس نجوم الMinimum Charge فيه 100 يورو وإنت علي الله حكايتك معاكش في جيبك غير 10 يورو بس .. وقتها (كونتي) لما قرر يمسك منتخب إيطاليا كان المنتخب عبارة عن شوية كواحيل ميسوووش في سوق اللاعيبه جنيه ومش حضيع وقتي و وقتك وأقولك شوية من أسامي اللاعيبه اللي كانت في المنتخب وقتها لإن صدقني كده كده مش حتفتكرهم بس سبحان الله هو وصل بيهم يورو 2016 من غير أي هزيمة في التصفيات .. كانوا أول مجموعتهم واللي كان فيها بلجيكا وأيرلندا والسويد .. في دور ال16 طلعوا إسبانيا حاملة اللقب .. في دور ال8 خرجوا من ألمانيا بضربات الترجيح.
اللي أنا عايز أوصله ليك إن كتير من المديرين وأصحاب الشغل بيسترخصوا في التعيينات .. يبقي قدامه حد مقدم CV وفشيخ وبيفهم وشاطر بس عشان طالب مرتب عالي يقولك لا يا عم ده أنا أفكه بثلاثة .. مشكلة الفكر ده إنه مش بينقلك لقدام .. بيخليك محلك سر .. أبقي بهبد لو توقعت ال3 مديرين فنيين اللي إتكلمنا عنهم حيقدروا يعملوا إيه من هنا لحد أخر السيزون لإن كل واحد فيهم بيواجه تحدي مختلف .. اللي نقدر نعمله إننا نتفرج علي ماتشات الدوري الإنجليزي ونتبسط .. نلعب فانتازي ويتحرق دمنا .. نتفرج علي القرارات اللي بتتعمل ونتعلم منها.
المصادر:
- مقالة بعنوان Steven Gerrard is perfect for Aston Villa, he given them more clout and he can be a game-changer. Newcastle missed a trick, he could have been theirs had they been bold نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-10192591/Steven-Gerrard-Aston-Villa-perfect-fit-Newcastle-blew-chance-appointing-him.html - مقالة بعنوان At Tottenham, Antonio Conte is betting on himself, and that’s not a bad thing نشرت علي موقع وكالة ESPN وده لينك المقالة الأصلية:
https://www.espn.co.uk/football/blog-marcottis-musings/story/4512576/at-tottenhamantonio-conte-is-betting-on-himself-and-thats-not-a-bad-thing
