خليني أسالك سؤال أمهدلك به إحنا ناويين نكلمك في إيه النهاردة .. إيه هي أخر صفقة سوبر عملتها إدارة ريال مدريد؟ .. فكر و حاول ترجع بذاكرتك شوية .. حتلاقيها صفقة إنتقال (جيمس رودريجيز James Rodriguez) من نادي موناكو مقابل 85 مليون دولار و الصفقة دي كانت سنة 2014 و إحنا دلوقتي في 2017 يعني عدي 3 سنين علي أخر صفقة سوبر أو زي ما الإسبان بيسموها Galactico Signing .. عدي 3 سنين و نادي ريال مدريد يا إما مش بيشتري حد خالص و بيصعد لاعبين ناشئين من أكاديمية النادي زي اللي حصل الموسم اللي فات أو إنهم بيشتروا لاعبين إسبان صغيرين في السن زي ما بيحصل الموسم ده .. إنت فعلياً لو من عشاق نادي ريال مدريد عشان الصفقات السوبر اللي بيعملوها فأحب أقولك حاول تدور علي نادي تاني تشجعه و لو إنت بتشجع ريال مدريد لإنك بتحب النادي فعلاً فأحب أبشرك إن فترة الجلاكتيكو Galactio Era خلصت خلاص.
علي الناحية الثانية تلاقي إن نادي برشلونة بقي بيعمل العكس .. زمان و زمان دي اللي هي لحد الموسم قبل اللي فات بس كانت إدارة برشلونة معتمدة بشكل أساسي علي إنها تصعد لاعبين ناشئين من أكاديمية النادي اللي بيسموها لا ماسيا La Masia .. ده كان جزء من فلسفة هي إن برشلونة نادي بيلعب بطريقة لعب معينة مش أي حد بيعرف يلعب بيها و مش أي لاعب تشتريه من بره يقدر يلعب بيها .. الحل إنك تبدأ تربي لاعبين ناشئين علي نفس طريقة اللعب بحيث اللاعيبه دول لما يكبروا يبقوا متفصلين علي نفس طريقة لعب برشلونة.
الفلسفة دي البرشلونيين بيسموها صنع في كاتالونيا Made in Catalonia و كتالونيا ده اسم الإقليم اللي مدينة برشلونة بتقع فيه .. فكرة صنع في كتالونيا دي فيه ناس بتقول إن أول واحد بدأ يطبقها بجد كان (بيب جوارديولا Pep Guardiola) بس حتي (جوارديولا) مقدرش يعمل اللي عمله المدير الفني اللي جه وراه اللي هو (تيتو فيلانوفا Tito Vilanova) الله يرحمه اللي في ديسمبر 2012 لما برشلونة كان بيلعب ماتش في الدوري الإسباني ضد فريق ليفانتي و ده الماتش اللي كسبته فرقة برشلونة بنتيجة 4-0 و لأول مرة في تاريخ النادي لعب ب11 لاعب كلهم من خريجي أكاديمية لا ماسيا .. اللي حصل إن الباك اليمين (داني ألفيز Dani Alves) و ده لاعب برازيلي إشتراه نادي برشلونة من نادي إشبيلية إتصاب و إضطر (فيلانوفا) إنه يبدله و ينزل مكانه الباك اليمين الشاب (مارتن مونتويا Martin Montoya).
بص علي تشكيلة برشلونة اللي كملت ماتش ليفانتي ده .. في حراسة المرمي عندك (فيكتور فالديز Victor Valdes) و ده إسباني إتولد في إقليم كاتالونيا .. خط الدفاع كان (مونتويا) و (كارلوس بويول Carles Puyol) و (جيرارد بيكيه Gerard Pique) و (جوردي ألبا Jordi Alba) و الأربعة برده من مواليد إقليم كاتالونيا .. خط النص كان الرباعي (أندريس إنيستا Andres Iniesta) و (سيسك فابريجاس Cesc Fabregas) و (سيرجيو بوسكيتس Sergio Busquests) و (تشافي هيرنانديز Xavi Hernandez) و الأربعة برده من مواليد إقليم كاتالونيا .. خط الهجوم كان من (بيدرو Pedro) و (ليونيل ميسي Lionel Messi) .. دي الحاجة اللي كانت ناقصة ريال مدريد إنه في يوم من الأيام تشكيلته كلها تبقي من لاعبين من أبناء النادي .. من خريجي أكاديمية النادي .. كان دايماً أنصار برشلونة بيتريقوا علي ريال مدريد يقولوهم أنتوا كل ما تتزنقوا تشتروا لاعبين جاهزين بس إحنا بنربي لاعبين و الحقيقة اللي كانوا بيقولوا كده كان عندهم حق.
رئيس نادي ريال مدريد (فلورنتينو بيريز Florentino Perez) دي مش أول مرة يمسك فيها رئاسة النادي .. الرجل ده لما مسك رئاسة النادي في المرة الأولي مشي لاعبين كتير من أبناء النادي زي (روبيرتو سولدادو Roberto Soldado) و (خوان ماتا Juan Mata) و (ألفارو نيجريدو Alvaro Negredo) و (ألفارو أربيلوا Alvaro Arbeloa) .. كلهم إتباعوا و هم لسه ناشئين و كلهم بقوا نجوم أنديتهم و بقوا لاعبين دوليين مثلوا منتخب إسبانيا .. و مش اللاعبين الإسبان بس اللي مشوا .. الرجل ده مكنش مقتنع إن المدير الفني الإسباني (فيسينتي ديل بوسكي Vicente del Bosque) هو المدير الفني المناسب عشان يقود مرحله الجلاكتيكوس اللي (فلورنتينو بيريز) حيشتريهم .. انت متخيل إنه مكنش مقتنع بإن المدير الفني اللي بعد كده حيقود منتخب إسبانيا للقب كأس العالم و لقب أمم أوروبا ميصلحش إنه يبقي مدير فني لريال مدريد؟ .. لا و لما غيره جاب مكانه (كارلوس كيروش Carlos Quieroz) البرتغالي اللي حالياً بيدرب منتخب إيران.
(فلورنتينو بيريز) دمر كل ما هو إسباني في فترته الأولي كرئيس لريال مدريد .. مشي المهاجم الإسباني (فيرناندو موريينتيس Fernando Morientes) اللي جماهير ريال مدريد كانت بتموت فيه عشان يشتري المهاجم الإنجليزي (مايكل أوين Michael Owen) .. (فلورنتينو بيريز) أجبر كابتن الفريق (فيرناندو هييرو Fernando Hierro) إنه يبطل كرة قدم .. و لما تيجي تبص علي الصفقات اللي (فلورنتينو بيريز) جابها تلاقيه إشتري (روبينيو Robiniho) و الجناح (جوليان فوبيرت Julien Faubert) من نادي ويستهام و المهاجم الإيطالي (أنتونيو كاسانو Antonio Cassano) .. اللي هو يخليك تسأل نفسك هو انت دارس اللي انت بتعمله ده يا حج (بيريز)؟
اللي عمله (فلورنتينو بيريز) في فترته الأولي كرئيس لريال مدريد عكس 180 درجة اللي هو بيعمله دلوقتي لدرجة إن جماهير ريال مدريد مش مصدقه إن ده (فلورنتينو بيريز) اللي هم عارفينه .. سنة 2009 لما مسك النادي أول صفقتين عملهم إنه إشتري (تشافي ألونسو Xabi Alonso) و (أربيلوا) من نادي ليفربول و من ساعتها و هو عمال يشتري في لاعبين إسبان:
- رجع (داني كارباخال Dani Cavajal) من فترة إعارته في نادي باير ليفركوزن الألماني.
- بدل ما يشتري مدافع ثالث قام مصعد قلب الدفاع الناشيء (ناتشو فيرنانديز Nacho Fernandez) و اللي أثبت نفسه كقلب دفاع يقدر المدير الفني (زين الدين زيدان) إنه يعتمد عليه جنب قلب الدفاع الإسباني برده (سيرجيو راموس Sergio Ramos).
- بالنسبة للهجوم صعدوا (ماركو أسونسيو Marco Asensio) و (لوكاس فاسكيز Lucas Vazquez) و رجعوا (ألفارو موراتا Alvaro Morata) من يوفينتوس عشان الثلاثي ده يشيل هجوم ريال مدريد لما الثلاثي الهجومي الأساسي (كريستيانو رونالدو Cristiano Ronaldo) و (جاريث بايل Gareth Bale) و (كريم بنزيمه) ميلعبوش .. صحيح هم باعوا (موراتا) تاني بس مش دي القضية.
في فترة الإنتقالات الحالية ناس كتير توقعت إن ريال مدريد يصرف ببذخ علي أسامي سوبر ستار إلا إن زي مايكون (فلورنتينو بيريز) إتعدي بفيروس يلا نشتري إسبان تاني .. بص علي الأسامي اللي النادي إشتراها لحد دلوقتي:
- المدافع (خيسوس فاليخو Jesus Vallejo) كان معار لنادي إينتراخت فرانكفورت الألماني و رجعوه.
- لاعب الوسط (ماركوس لورينتي Marcos Llorente) رجعوه برده من فترة إعارته لنادي ألافيس الإسباني.
- معاهم برده (بورخا مايورال Borja Mayoral) كان معار هو كمان لنادي ولفسبيرج الألماني و رجعوه من فترة إعارته.
- اللاعب الوحيد اللي إشتروه بفلوس كان لاعب الوسط (داني سيبالوس Dani Ceballos) من نادي ريال بيتيس.
في موسم 2017-2018 لو ربنا أراد و (إيسكو) جدد عقده مع النادي فال23 لاعب المتسجلين في قائمة ريال مدريد حيبقي فيهم 11 لاعب إسباني يعني حوالي 48% من أعضاء الفريق و دي حاجة محصلتش كتير في تاريخ النادي الملكي .. انت ممكن جداً خلال الموسم الجاي تلاقي ريال مدريد بيلعب بالتشكيلة دي: في حراسة المرمي (كيكو كاسيلا Kiko Casilla) .. في خط الدفاع (كارباخال) و (فاليخو) و (راموس) و (ناتشو) .. خط الوسط يبقي (سيبالوس) و (إيسكو) و (لورينتي) .. و الهجوم يبقي مكون من (أسونسيو) و (فاسكيز) و (رونالدو) .. يعني ممكن (زيدان) يلعب ب(رونالدو) و وراه 10 لاعبين إسبان .. (رونالدو) فعلياً كمان دلوقتي بقي حالة خاصة في ريال مدريد لسببين:
- السبب الأول إنه أخر الجلاكتيكوس اللي إشتراهم (فلورنتينو بيريز).
- هو أخر اللاعبين اللي محسوبين علي وكيل اللاعبين (خورخي مينديز Jorje Mendes) اللي يعتبر من أشهر وكلاء اللاعبين في العالم اللي بيلعبوا في ريال مدريد .. الرجل ده الClients أو زباينه في ريال مدريد كانوا (بيبي Pepe) و (فابيو كوينتراو Fabio Coentrao) و (جيمس رودريجيز) و الثلاثة مشوا الصيف ده.
شفت اللي قلناه علي ريال مدريد .. إعكسه خالص علي برشلونة في موسم 2017-2018 .. دلوقتي المدير الفني الجديد لبرشلونة (إيرنيستو فالفيردي Enresto Valverde) و لو حب بكره الصبح يعمل تشكيلة لبرشلونة تلاعب ريال مدريد حيلاقي نفسه مضطر يحط تشكيلة من لاعبين أغلبها أجانب مش من خريجي أكاديمية النادي .. تعالي نشوف التشكيلة سوا عشان تتأكد:
- في حراسة المرمي معندوش غير الألماني (مارك أندري تير شتيجن Marc Andre ter Stegen).
- في خط الدفاع عنده البرتغالي (نيلسون سيميدو Nelson Semedo) اللي إشتروه من نادي بنفيكا البرتغالي و الفرنسيين (لوكاس ديجني Lucas Digne) و (سامويل أوميتيتي Samuel Umtiti) و البرازيلي (مارلون سانتوس Marlon Santos).
- في خط الوسط عنده الكرواتي (إيفان راكيتيتش Ivan Rakitic) و البرتغالي (أندري جوميز Andre Gomes) و التركي (أردا توران) وبسم الله ما شاء الله هو أساساً مش مقتنع بأي واحد فيهم يمكن بإستثناء (إيفان راكيتيتش).
- أما في الهجوم مفيش غير الأوروجواياني (لويس سواريز Luis Suarez) .. يعني مفيش في الفرقة دي كلها غير (ميسي) بس هو اللي خريج La Masia.
عشاق برشلونة بقوا بيبصوا علي ريال مدريد و يقولوا لنفسهم إحنا إزاي بقينا مكانهم و هم بقوا مكانا؟ .. إزاي بعد ما كنا بنلف الأرض عشان نجيب أحسن المواهب الشابة يحصل اللي حصل سنة 2014 لما إدارة النادي رفضت تدفع 4 مليون جنيه إسترليني عشان يشتروا (أسونسيو) من نادي ريال مايوركا بس ريال مدريد مترردوش لحظة إنهم يدفعوا فيه المبلغ ده و بص عليهم دلوقتي .. اللي حازز في نفسية جماهير برشلونة إن مش بس الموسم اللي فات ريال مدريد حقق ثنائية الدوري و الChampions League إنما اللي مزعلهم أكثر إن ريال مدريد حقق الإنجاز ده بنفس الإسلوب بتاع برشلونة زمان .. الموسم الجاي علي فكرة متتوقعش إنه يختلف كتير عن الموسم اللي فات .. برشلونة مصعدوش حد من أكاديمية الناشئين إلا صانع اللعب (كارلوس ألينا Carles Alena) في حين إن ريال مدريد جابوا 4 لاعبين إسبان شباب .
المصدر:
- مقالة بعنوان Real Madrid could field 10 homegrown players behind Cristiano Ronaldo after ‘Made in Spain’ transfer policy, now Barcelona can only look on enviously نشرت في جريدة The Daily Mail البريطانية وده لينك المقالة الأصلية:
http://www.dailymail.co.uk/sport/football/article-4719176/Barcelona-look-enviously-Real-Madrid-homegrown-pool.html
