موضوعنا اللي حنتكلم عنه النهاردة هو (زين الدين زيدان) .. سميه الشيخ (زيدان) أو سميه المحظوظ (زيدان) أو اللي أمه دعياله براحتك لإن مش ده اللي حنتكلم عنه النهاردة .. اللي حنتكلم عنه النهاردة هو الCareer بتاعة (زيدان) كمدرب و الأهم إننا نحاول نجاوب علي سؤال ناس كتير بتسأله اللي هو: يعني هو (زيدان) ده بيعمل إيه؟ .. ده من أغرب الأسئلة اللي ممكن تتسأل علي مدير فني لفريق كرة قدم بس والله العظيم فيه ناس لحد اللحظة دي مش مقتنعة إن (زيدان) مدرب كويس .. ناس كتير متعرفش إن (زيدان) الCV بتاعه مكتوب فيه إيه قبل ما يبقي المدير الفني لفريق ريال مدريد؟ .. ناس كتير متعرفش إنه كان المدير الفني لفريق ريال مدريد B و إنه كان فاشل معاهم لدرجة إن ناس كتير من جوه إدارة ريال مدريد نفسها شافوا إن قرار تعيينه كمدير فني للفريق الأول هو غلطة كبيرة لإن فعلياً هم شايفين إن (زيدان) مينفعش يبقي مدرب .. بس بص علي اللي عمله (زيدان) دلوقتي.
بعد 18 شهر من قرار تعيينه كمدير فني لريال مدريد واللي خليني أقولك إنها أصعب وظيفة في عالم كرة القدم ف(زيدان) دخل التاريخ بإنه أول مدير فني لأي نادي يقدر يحتفظ بلقب Champions League سنتين ورا بعض .. حقق أول لقب للدوري الإسباني لريال مدريد من سنة 2012 ده غير لقب كأس العالم للأندية .. اللي حنحاول نفهمه في المقالة هو إزاي فيه ناس متخيله إن (زيدان) مش مدرب كويس ولا بيفهم في التدريب في حين إن إسمه دخل التاريخ ضمن مجموعة من عمالقة التدريب زي (بوب بايزلي Bob Paisley) و (أريجو ساكي Arrigo Sacchi) و (برايان كلاو Brian Clough)؟ .. ليه لحد دلوقتي فيه ناس مقتنعه بإن اللي وصل له ريال مدريد ده سببه إن الفريق مبني علي لاعبين علي أعلي مستوي زي (كريستيانو رونالدو Cristiano Ronaldo) و (لوكا مودريتش Luka Mordic) و (توني كروس Toni Kroos) و (سيرجيو راموس Sergio Ramos) مش لإن (زيدان) بيفهم؟ .. لو قلتلك قولي أسماء أفضل 10 مديرين فنيين حاليين علي مستوي العالم فهل حتحط إسم (زيدان) فيهم؟ فيه شوية أسئلة المقالة دي حتحاول تجاوب عنهم:
- هل فعلاً (زيدان) كان فاشل أوي كده لما كان مدير فني لفريق ريال مدريد B؟
- إيه هي فلسفة (زيدان) في التدريب؟
- هل فعلاً الفريق إتحسن تحت إيده؟
- هل الدنيا حتبقي سهلة معاه في الموسم الجاي علي الأقل؟
بالنسبة للسؤال الأول ف(زيدان) لما كان مدير فني لفريق ريال مدريد B مكنش بيعرف يتكلم مع الصحفيين ودي كانت نقطة بتتاخد عليه ودي كانت أهم نقطة ضده لما إتناقش قرار تعيينه كمدير فني للفريق الأول .. دلوقتي انت لو مدير فني لفريق ريال مدريد فالإعلام بيكون مراقب كل تحركاتك .. التركيز الإعلامي عليك لوحده ممكن يدمرك نفسياً لو انت مش عارف إزاي تتعامل معاه .. المشكلة الأكبر إن دايماً (زيدان) كان بيتقارن ب(بيب جوارديولا Pep Guardiola) لإن (جوارديولا) قبل ما يتولي تدريب الفريق الأول لبرشلونة هو كمان كان المدير الفني لفريق برشلونة B وقدر إنه يفوز معاهم بلقب دوري الدرجة الثالثة الإسباني في حين إن فريق ريال مدريد B تحت (زيدان) واللي بيسموه كاستيلا Castilla كان بيكسب بالعافية .. الحق لازم يتقال إن (جوارديولا) كان معاه لاعبين أحسن .. انا بس عايز أفكرك إنه كان تحت إيده لاعبين زي (سيرجيو بوسكيتس Sergio Busquets) و (بيدرو Pedro) كانوا لسه ناشئين معاه والإتنين دول لوحدهم يقوموا فرقة درجة أولي.
النقطة الثانية اللي كانت بتتاخد علي (زيدان) هي إنه مكنش عارف يطور من قدرات اللاعبين الناشئين اللي تحت إيده .. يمكن أشهر لاعب تحت إيده كان المراهق (مارتن أوديجارد Martin Odegaard) الدانمركي واللي معرفش يتعامل مع (زيدان) و إضطرت إدارة ريال مدريد إنها تعيره .. الموسم الوحيد اللي قضاه (زيدان) مع ريال مدريد B كان فاشل ومينفعش تقول عليه غير كده .. لا هو عرف يكسب لقب الدوري ولا حتي قدر يصعد بيهم للدرجة الأعلي .. لما إدارة ريال مدريد مشت (رافا بينيتيز Rafa Benitez) كان عندهم كذا خيار .. كان ممكن يرجعوا (جوزيه مورينيو Jose Mourinho) تاني لإنه كان ماشي من تدريب نادي تشيلسي لكنهم إختاروا (زيدان) ويمكن ده كان من أكثر القرارات حكمة اللي إدارة ريال مدريد تاخدها من سنين .. بس نجاحه مع الفريق الأول خلي ناس كتير تستغرب وتسأل نفسها إزاي ده حصل؟ أو خلينا نسأل السؤال الثاني: إيه هي فلسفة (زيدان) بالضبط؟
اللي عمله (زيدان) إنه نقل من نفس ورقة الإجابة بتاعة منتخب فرنسا اللي حقق بطولة كأس العالم سنة 1998 بإنك تبني فريق قايم علي الدفاع القوي و إن يكون عندك خط وسط علي أعلي مستوي .. لو قدرت تعمل كده فالأهداف حتيجي لوحدها .. فعلاً انت لو بصيت علي أداء ريال مدريد تحت قيادة (زيدان) مش حتلاقيهم بيلعبوا بأسلوب معين .. هم بس دفاعهم قوي و عندهم خط وسط عالمي وده بيخلي المهاجمين تجيب جوان كتير .. لا هم بيلعبوا بخطة معينة و لا ليهم إسلوب معين في اللعب .. (زيدان) فهم يعني إيه دفاع قوي من أيام ما كان بيلعب في نادي يوفينتوس الإيطالي وكان المدير الفني بتاعه وقتها (مارشيلو ليبي Marcelo Lippi) اللي بفكرك إنه حقق لقب كأس العالم مع منتخب إيطاليا في مونديال ألمانيا 2006 و علي فكرة كان زميل (زيدان) وقتها في فريق يوفينتوس (ديديه ديشامب Didier Deschamps) المدير الفني الحالي لمنتخب فرنسا.
(زيدان) ممكن ميكونش له فلسفة معينة في كرة القدم بس تقدر تقول إنه بني أدم عنده مباديء و أول و أهم المباديء دي هي الولاء لصحابه .. لما إتعين (زيدان) مدير فني للفريق الأول إتعرض عليه إنه يختار أي إسم عشان يبقي المساعد بتاعه .. كان ممكن يختار (جوتي Gutti) أو (راؤول جونزاليس Raul Gonzales) أو حتي (روبيرتو كارلوس Roberto Carlos) .. بس هو رفض و أصر إن (ديفيد بيتوني David Bettoni) المساعد بتاعه لما كان مدير فني لفريق ريال مدريد B هو اللي يكمل معاه .. الإتنين دول يعرفوا بعض من أيام ما كان عندهم 16 سنة لما كانوا لسه ناشئين في أكاديمية نادي نانس الفرنسي .. الإتنين كانوا عايشين في شقة واحدة و فضلوا صحاب رغم إن الCareer بتاعتهم إختلفت خالص عن بعض .. (ديفيد بيتوني) كان مدافع أخره إنه لعب في أندية الدرجة الثانية و الثالثة الفرنسية و إعتزل سنة 2004 قبل سنتين من لما (زيدان) كان بيقود منتخب فرنسا لنهائي كأس العالم 2006 .. رغم كده صداقتهم كملت و (زيدان) إختاره مساعد له لما عينوه مدير فني لفريق ريال مدريد B رغم إعتراض ناس كتير في إدارة ريال مدريد لإن (ديفيد بيتوني) معهوش شهادة تدريب معتمدة من FIFA عشان يتقال عليه رسمياً إنه مساعد المدير الفني.
ده حيخلينا نروح للسؤال الثالث: هل فعلاً الفريق إتحسن تحت إيده؟ .. أي حد بيتابع أداء ريال مدريد الموسم ده بالذات حينبهر بالأداء البدني للفريق ويمكن السر ورا تحسن الأداء البدني للفريق إن أول ما (زيدان) إستلم الفريق من أول فترة الإعداد أصر إنه يجيب مدرب الأحمال الإيطالي (أنتونيو بينتوس Antonio Pintus) واللي كان وقتها شغال مدرب أحمال في نادي ليون الفرنسي .. الرجل ده إتشهر أوي لما كان شغال مع نادي موناكو الفرنسي سنة 2003 وفي السنة دي الفريق وصل لنهائي بطولة Champions League .. لما (ديديه ديشامب) إتعين مدير فني لمنتخب فرنسا جابه عشان يبقي مدرب أحمال الفريق لإنه كان يعرفه من أيام ما كان لاعب في نادي يوفينتوس و أيام ما كان بيلعب في تشيلسي .. بصمة (أنتونيو بينتوس) علي الفريق باينه وتبقي أعمي لو مشفتهاش .. اللاعبين كلهم لياقتهم البدنية بسم الله ما شاء الله عالية أوي خصوصاً إننا في أخر الموسم و أخص بالذكر (كريستيانو رونالدو).
مينفعش نتكلم عن (زيدان) أو ريال مدريد عموماً من غير ما نجيب سيرة (رونالدو) .. بص علي أخر 8 ماتشات لريال مدريد في الدوري الإسباني تلاحظ حاجه غريبة أوي .. (زيدان) ريح (رونالدو) في 5 من الماتشات ال8 ودي كانت أغلبها ضد فرق ضعيفة في الدوري بحيث إنه كان عايز يريحه للماتشات المهمة سواء في الدوري أو الChampions League .. ده معناه إن الماتشات اللي كان ممكن (رونالدو) يجيب فيها جوان كتير عشان ينافس علي لقب الهداف مش بس في الدوري الإسباني إنما في أوروبا كلها مبقاش بيلعبها .. (زيدان) فعلياً خلي (رونالدو) يضحي بجائزة الحذاء الذهبي Golden Boot اللي بتعطي لأكثر لاعب سجل أهداف خلال الموسم عشان يبقي Fresh للماتشات المهمة .. من الإحصائيات الغريبة أوي إن (رونالدو) ملعبش الموسم ده 14 ماتش إختار (زيدان) إنه يقعده علي الدكة عشان يريحه وده أعلي رقم لماتشات ميلعبهاش (رونالدو) من ساعة ما إنتقل لريال مدريد سنة 2009.
أول ماتش ل(زيدان) كمدير فني لريال مدريد كان في يناير 2016 ضد ديبورتيفو لا كورونيا في الدوري الإسباني و كسب الماتش ده 5-0 ومن ساعتها والفريق بيتحسن .. (زيدان) خد الفريق نفضه و غسله غسلة حلوة لحد ما وصل لمستواه الحالي و مهم أفكرك إن ده نفس الفريق اللي مكنش عارف يكسب ولا ماتش تحت قيادة (رافا بينيتيز Rafa Benitez) .. وكل ده من غير ما يصرف ولا مليم علي صفقات جديدة ودي حاجه تقريباً مبتحصلش في ريال مدريد .. نقطة صرف الفلوس دي لازم نركز عليها شوية خصوصاً لو شفنا مثلاً اللي بيعمله (مورينيو) و (جوارديولا) في ناديي مانشستر لإن الإتنين صارفين لحد دلوقتي فوق ال150 مليون جنيه إسترليني و محققوش حاجه من اللي حققها (زيدان).
نيجي بقي للسؤال الأخير اللي هو هل الدنيا حتمشي معاه الموسم الجاي؟ .. الفكرة كلها إن (زيدان) لو حقق لقب Champions League فانت بتتكلم إنه حقق الثنائية الموسم ده وده حيخليه عشان يقول إنه تفوق علي نفسه الموسم الجاي يحقق الثلاثية إنه يفوز بالدوري و الكأس و الChampions League .. المشكلة مش بس في ده .. الموسم ده كان أول مرة (زيدان) ياخد الفريق من فترة الإعداد لحد أخر الموسم بس اللي سهل عليه الأمور شوية إن ريال مدريد ماشتراش حد في الصيف ودي كانت مرة نادرة أوي إنها تحصل ومعتقدش حتتكرر تاني .. إفرض معايا جدلاً إن ريال مدريد قدر إنه يشتري حارس المرمي (ديفيد دي خيا David de Gea) من مانشستر يونايتد .. دلوقتي (زيدان) أساساً معجب جداً بالحارس بتاعه (كيلور نافاس Keylor Navas) بس طبيعي إن (فلورينتينو بيريز Florentino Perez) رئيس النادي مش حيبقي مبسوط إن (زيدان) يقعد (دي خيا) إحتياطي فالصفقة دي لوحدها إحتمال كبير تبقي صداع في راس (زيدان) .. إفرض معايا إن الإتحاد الفرنسي لكرة القدم عرض عليه إنه يبقي هو المدير الفني للمنتخب بعد (ديديه ديشامب)؟ .. هل تفتكر إن لو (زيدان) إتخانق مع (فلورينتينو بيريز) مش إحتمال كبير يقوله انا ماشي و أدي إستقالتي أهي و يقبل العرض بتاع تدريب منتخب فرنسا؟
ميزة (زيدان) إنه مبيحبش يزعل حد منه و يمكن ده الفرق الجوهري بينه وبين (رافا بينيتيز) اللي كان مدير فني لريال مدريد قبله إنه كان دايماً علي الأقل متخانق مع إتنين أو تلاثة لاعبين .. ميزة (زيدان) إنه بيحسس كل أفراد الفريق حتي الإحتياطيين منهم إنهم مهمين أوي للفريق .. حتي (جيمس رودريجيز James Rodriguez) اللي تقريباً مفيش حد معرفش إشاعة إنه ماشي من ريال مدريد و حيروح مانشستر يونايتد حاسس إنه عايز يكمل بس عشان يلعب مع (زيدان) .. (زيدان) لما إتعين مدير فني لريال مدريد ناس كتير شبهته ب(فيسنتي ديل بوسكي Vincente Del Bosque) وفي حالة إنك متعرفش ده مين فده كان المدير الفني لريال مدريد لما (زيدان) إنتقلهم كلاعب وهو نفس المدير الفني اللي كان ماسك منتخب إسبانيا لما كسبوا كأس العالم 2010 و كأس أمم أوروبا 2012 .. (ديل بوسكي) شبه (زيدان) في هدوءه في الماتشات وصحيح هو مش Cute زي (زيدان) و إنه شبه الممثل (حسن حسني) الله يرحمه بس أهم ميزة فيه إنه كان بيعرف يخلي كل اللاعبين اللي تحت إيده مبسوطين ومكنش لا عصبي ولا بيزعق كتير ويمكن (زيدان) إتعلم ده منه.
انا شخصياً خايف من الخناقة اللي حتحصل بينه وبين رئيس النادي (فلورينتينو بيريز) علي مين حيمشي ومين حيجي ريال مدريد الموسم الجاي .. ساعتها الخناقة حتكون بين أقوي شخصية في النادي ضد أنجح شخصية في تاريخ النادي .. (زيدان) فوزه ببطولة Champions League للمرة ال12 في تاريخ النادي خلاه أول مدير فني لريال مدريد يقدر يحقق ثنائية الدوري الإسباني و بطولة أوروبية في موسم واحد من سنة 1958 و أول مدير فني في التاريخ يحقق بطولة Champions League موسمين متتالين .. انت بتتكلم عن مدير فني معدله إنه بيجيب بطولة كل 100 يوم .. الرجل ده في الدوري الإسباني علي مدار موسمين قدر إنه يلعب 58 ماتش بتتكلم إنه لو كسب كل ماتش فيهم فهو المفروض يجمع 174 نقطة بس هو قدر يجمع 146 يعني نسبة نجاحه في الدوري 84% .. بس تخيل لو لا قدر الله الدنيا ممشتش معاه أوي الموسم الجاي .. لو حصل و إتخانق مع رئيس النادي ساعتها لازم (بيريز) يفتكر كويس أوي عشان ميتكررش اللي حصل مع (ديل بوسكي) .. وخلينا نقول زي الفنانة (هدي سلطان) الله يرحمها و إن كنت ناسي أفكرك .. سنة 2003 قررت إدارة ريال مدريد إنها تمشي (ديل بوسكي) بعد ما فشل إنه يحافظ علي لقب Champions League بس لما مشوه دخل النادي مرحلة سودا في تاريخه لمدة 4 سنوات مخدوش ولا بطولة وكان أخرهم في الChampions League إنهم يخرجوا من دور ال16 .. سامعني يا (بيريز)؟
انت ممكن تكون فعلاً لسه مقتنع إن (زيدان) مبيفهمش في التدريب .. انت ممكن تكون شايف إن (مورينيو) أو (جوارديولا) مدربين أحسن منه … لا (زيدان) عنده كاريزما (يورجين كلوب Jurgen Klopp) ولا عنده عاطفة (أنتونيو كونتي Antonio Conte) ولا حتي الCV بتاعه مليان بطولات زي (ماكس أليجيري Max Allegri) المدير الفني ليوفينتوس اللي خسر قدامه نهائي Champions League .. بس لو حبيت أجاوبلك علي السؤال بتاعك اللي هو يعني (زيدان) ده بيعمل إيه؟ .. الإجابة ببساطة إنه بيكسب.
المصادر:
- مقالة بعنوان Zinedine Zidane is on the brink of becoming the first manager to retain the Champions League .. so where did it all go right for the Real Madrid boss? نشرت في جريدة The Daily Mail البريطانية وده لينك المقالة الأصلية:
http://www.dailymail.co.uk/sport/football/article-4556882/Where-did-right-Zinedine-Zidane.html - مقالة بعنوان Zinedine Zidane Retaining The Champions League with Real Madrid will See Him Match up To Brian Clough and Bob Paisley نشرت في جريدة The Daily Mail البريطانية وده لينك المقالة الأصلية:
http://www.dailymail.co.uk/sport/football/article-4566530/Zinedine-Zidane-doesn-t-credit-deserves.html
