كرة القدم الإسبانية .. معجزة الخلف خلاف.

يدوبك هي دقايق بعد ما سمعنا صفارة الحكم اللي أعلنت فوز إسبانيا ببطولة أمم أوروبا Euro2024 علي حساب إنجلترا وكانت السوشيال ميديا مليانة بوستات عن مدي عظمة وإبداع تخطيط الإتحاد الإسباني لكرة القدم اللي تجسد في إختيارهم للمدير الفني للمنتخب (لويس دي لافوينتي) عشان يقود المسيرة استكمالاً لجهوده اللي بذلها مع منتخبات إسبانيا للناشئين وإزاي التجربة الإسبانية اللي إتبنت علي دراسة وتخطيط هي هي التجربة المصرية اللي عشناها في قرار تعيين المعلم (حسن شحاته) ربنا يديله الصحة وإزاي (دي لافوينتي) يبقي (حسن شحاته) بتاع إسبانيا .. كلنا شفنا ده وسمعناه كويس .. الحقيقة إن أنا النهاردة مش جاي أقولك إن كلام الناس دي كلها غلط و إن أنا أبوالعريف الوحيد اللي فاهم الدنيا كويس .. أنا مش جاي أقولك إن إسبانيا رفعت كأس أمم أوروبا بالحظ أو إن قرار تعيين (دي لافوينتي) كان ببركة دعاء الوالدين .. لا خالص .. النهاردة أنا جاي أكلمك عن مشروع كرة القدم الإسبانية اللي زيه زي أي مشروع في الدنيا ماشي بالستر.

مبدأياً أنا عايزك تفتكر لو تقدر .. ده لو إنت يعني من الناس اللي شايفه إن اللي ماسكين الإتحاد الإسباني لكرة القدم دول ناس جامدين زحليقة وبيضربوا الودع ..  إن نفس منتخب إسبانيا اللي إنت فرحان بيه ده هو هو نفسه اللي في كأس العالم 2022 في قطر خرج من دور ال16 قصاد منتخب المغرب بضربات الجزاء الترجيحية .. ده نفسه هو هو منتخب إسبانيا اللي في كأس العالم 2018 في روسيا خرج برده من دور ال16 وبرده بضربات الجزاء الترجيحية قصاد روسيا .. ده هو هو برده منتخب إسبانيا اللي في كأس العالم 2014 في البرازيل قال للبطولة باي باي من دور المجموعات بعد ما كان داخل البطولة حامل اللقب والمرشح رقم واحد والناس كلها كانت مستنيه إنه يبقي المنتخب اللي يعمل اللي متعملش قبل كده ويجيب كأس العالم مرتين ورا بعض .. السؤال بقي .. هو فين التخطيط أنا لا أراه؟

عشان بس تبقي مستوعب الصورة .. إنت قصاد منتخب كان بطل أوروبا سنة 2008 .. كان بطل العالم سنة 2010 .. كان بطل أوروبا تاني سنة 2012 .. كان منتخب مش بتتقطع منه الكورة أصلاً عشان حد يعرف يكسبه .. فجأة بقيت قصاد منتخب عايش 9 سنين من الضياع .. ثم إذ فجأة برده بقيت قصاد منتخب معاه بطولة أمم أوروبا ومعاه ذهبية أولمبياد باريس .. السؤال اللي واكل دماغي دلوقتي هل ده حظ ولا معلمة؟

معضلة النجاح .. قيراط الحظ ضد فدان المفهومية:

هنا تيجي مشكلة المشاريع .. إنت بتبدأ المشروع زي ما (ويجز) بيقول محشي طاقة وعندك أمل .. الإسبان كانوا عايزين يخشوا كأس العالم 2022 يعلموا علي أمة سيدنا محمد كلها ويمكن عشان كده هم أختاروا الجهبز (لويس إنريكي) عشان يبقي هو المدير الفني المنتظر اللي يقدر يطلع منتخب إسبانيا من التعاسة اللي هو فيها وإذ فجأة المشروع يلبس في الحيط بسبب أخواتنا المغاربة .. الإتحاد الإسباني كان قدامه صداع بتاع يختاروا مين يشيل الليلة بعد فشل مونديال قطر والحقيقة إن الصداع مكنش عايز يروح بسبب زعيق الجماهير الإسبانية اللي هي كمان بصراحة متفهمش كانوا شاربين إيه عشان يقولوا للإتحاد الإسباني هم 3 مديرين فنيين تختارولكوا واحد منهم .. يا (يوناي إيمري) بتاع أستون فيلا .. يا (مايكل أرتيتا) بتاع إرسنال .. يا (بيب جوارديولا) بتاع مانشستر سيتي .. وقال يعني أي واحد من الثلاثة حيسيب المشروع اللي هو ماسكه في ناديه ويجي يمسك مشروع الغابره بتاع منتخب إسبانيا عشان الإسبان يصحوا علي خبر كان حيجبلهم جلطة وهو ترقية (دي لافوينتي) من مدير فني منتخب تحت 21 سنة عشان يبقي المدير الفني للمنتخب الأول والحقيقة إنت برده سهل تستوعب هو الإسبان كانوا حيتجلطوا ليه .. زي ما (ديكلان رايس) أرتكاز منتخب إنجلترا ونادي أرسنال قال في المؤتمر الصحفي قبل ماتش النهائي بتاع أمم أوروبا 2024 إنه مسمعش اسم (دي لا فوينتي) قبل ما البطولة تبدأ فبرده الإسبان نفسهم مكانوش عارفين يطلع مين الأخ ده؟

 علاقة (دي لافوينتي) مع مرحلة الفرقة الأولي سواء علي مستوي المنتخبات أو الأندية ضعيفة شوية .. يعني هو كلاعيب كورة مثلاً مثّل منتخب إسبانيا في كل المراحل العمرية للناشئين بس عمره ما لعب مع المنتخب الأول ده علي الرغم إنه كان بيلعب وقتها في الفريق الأول لفرقة أتليتيكو بلباو وقضي معاهم 8 سنين خد فيهم بطولتين دوري إسباني وبطولة كأس إسبانيا ورغم كده متاخدتش منتخب .. وهو بيختم مسيرته الكروية لعب في إشبيلية ولعب مع نادي تحت بير السلم في إسبانيا اسمه ألافيس .. بعد ما اعتزل بدأ يدرب وبدأ حياته في نادي للهواة يعني تقدر تقول إنه بدأها من تحت خالص في دوري الدرجة الخامسة الإسباني وبعد 3 سنين راح فرقة في دوري الدرجة الثالثة بس مشوه بعد أقل من سنة .. تقريباً فيه حد قاله إنت مينفعش تدرب فرق كبار إنت أخرك تدرب ناشئين وهو الحقيقة سمع بالنصيحة لإنه من سنة 2006 لحد سنة 2011 كان عايش حياته مع فرق الناشئين في أتليتكو بلباو لحد ما فيه حد لعب في دماغه عشان يقبل يمسك الفرقة الأولي بتاعة نادي ألافيس اللي هو كان بيلعب فيه وكانوا وقتها بيلعبوا في دوري الدرجة الثالثة بس بعد 11 ماتش مشوه .. سنتين قاعد في بيته مش لاقي شغل لحد ما جت سنة 2013 ..عارف التسع سنين من الضياع اللي منتخب إسبانيا الأول عاشها دول؟ .. أهو (دي لافوينتي) قضاهم كلهم مع منتخبات الشباب الإسبانية يعني خمس سنين مع منتخب تحت 19 سنة وأربع سنين مع منتخب تحت 21 سنة وكان المدير الفني للمنتخب الأوليمبي اللي هو منتخب تحت 23 سنة ودخل بيهم أولمبياد طوكيو 2020 .. اللي هو تقريباً رجع تاني للنصيحة اللي حد قالهاله إن كار تدريب الفرق الأولي ده مش كارك .. إنت حلو مع الناشئين .. خليك في الناشئين.

الخلاصة .. إنت قصاد بني أدم معاشش في حياته كمدير فني لفرقة أولي غير يدوبك 11 ماتش وكانت مع فرقة بتلعب في دوري الدرجة الثالثة يعني حتي مش دوري المظاليم .. من الأخر الشارع الإسباني كان شايف إن أنتوا و أنتوا دي راجعة علي (لويس روبياليس) رئيس الإتحاد الإسباني لكرة القدم ورجالته جايبين موظف يمسك المنتخب بدليل إن (روبياليس) عمله عقد أخره أمم أوروبا 2024 ودي كانت المشكلة .. خسارته من استكلندا في ثاني ماتش ليه ضمن ماتشات تصفيات أمم أوروبا اللي هو في الأخر خدها دي خلي الشارع يغلي .. رفضه إنه يضم (سيرجيو راموس) للمنتخب خلي مش بس جمهور ريال مدريد يقلب عليه ده جمهور إشبيلية كمان مبقاش طايقه .. الناس كلها بقت بتقول عليه موظف مش فاهم كورة وجاي يسترزق من الشغلانة ويمشي .. هوبا لقيناه كسب بطولة الأمم الأوروبية UEFA Nations League اللي هي البطولة الودية اللي الإتحاد الأوروبي لكرة القدم افتكسها جديد دي .. الناس وقتها قالت وإيه يعني دي بطولة ودية وحتي اللي خلي منتخب إسبانيا يتأهل إنه يلعب فيها أصلاً كان (لويس إنريكي) .. حرفياً محدش كان طايق البني أدم غير أمه ومراته وعياله.

إسبانيا دخلت بطولة أمم أوروبا 2024 زي أوفا كده محدش عاملها حساب .. محدش كان مستني من الإسبان حاجة وكله كان مستني إن قرار إقالة (دي لافوينتي) يتمضي قبل حتي ما ماتش الفاينال يتلعب .. دي مش ملامح خطة .. ده مش منظر منظومة ماشية زي القطر اللي مبيقفش في محطات .. بس في نفس الوقت ده مشروع .. المشروع إنك تقول لنفسك أنا عايز في يوم من الأيام أوصل لحاجة معينة فتبدأ تشتغل .. إنما توصل إمتي وإزاي دي بقي حاجة في إيد ربنا .. عشان كده (دي لافوينتي) كان دايما يقول قبل البطولة إن منتخب إسبانيا ده إتعمل للمستقبل لإنه كان عارف إن فيه مشروع إن مجد إسبانيا يرجع تاني وفيه ناس بتشتغل علي المشروع ده بس ده مش معناه إطلاقاً إنه هو اللي حيجيب المشروع في شوال .. اللي يستحق إنك تقف قدامه الحقيقة هو مدي النجاح اللي حققه الرجل ده مع منتخب بلده واللي عشان تفهمه حاول تستوعب اللي حقوله .. إنت قصاد منتخب كسب بطولة وهو اكتر فريق جاب جوان .. أعلي فريق خلق فرص علي المرمي اللي هم دلوقتي بقوا بيسموها اسم الدلع X-G اللي هي Expected Goals أو الجوان المتوقعة .. الفريق متحسبلوش ضربات جزاء .. أكتر فريق بينقل الكورة لقدام .. والأهم إن 6 لاعيبة من الفرقة دي كانوا ضمن التشكيل المثالي للبطولة .. وده اللي أنا عايزك تفهمه كويس أوي .. نجاح (دي لافوينتي) مكنش نجاح المنظومة .. نجاح (دي لافوينتي) هو نجاح (دي لافوينتي).

ليه (دي لافوينتي) ده رجل صح الصح؟

مشكلة الكرة الإسبانية الأزلية في حاجتين .. حاجة منهم حيبقي سهل عليك تفهمها لإنك بتشوفها في مصر كتير وهي التعصب الأعمي بين جماهير قطبي الكرة الإسبانية ريال مدريد وبرشلونة ودي حاجة إنت عايش في وضع شبهها بين الأهلي والزمالك .. الحاجة الثانية اللي حتخليك تهرش في شعرك عشان تفهمها وغالباً مش حتقدر تستوعبها أوي وهي السياسة .. شوف يا ضنايا رغم كل المشاكل بتاعة بلدك إلا إنها تظل ربنا حاميها من فكرة النزعات الاستقلالية للأقاليم بتاعتها .. تخيل كده تبقي عايش في بلد الاسكندرانية عايزين يستقلوا عن البلد .. هو ده حقيقي فعلاً إحنا بنحلم ده يحصل بس مش دي القضية .. تخيل مثلاً في معسكر للمنتخب وانضم للمنتخب كذا لاعيب اسكندراني وفي وسط الاكل أو التمرين حد من محافظة تانية اتريق علي الاسكندرانية وعلي إنهم عايزين يبقوا دولة مستقلة .. هوبا قامت خناقة .. هوبا اللاعيبة مسكت في بعض .. هل ده جو يخلي المنتخب يعرف يكسب دورة رمضانية حتي؟ .. أنا فاكر كويس قبل كاس العالم 2006 منتخب صربيا كان دايس علي وش منتخبات مجموعته في التصفيات والناس كلها كانت مرعوبة منه ومستنيين منه نتايج كبيرة .. قبل ماتش الافتتاح بكام يوم تم اعلان استقلال دولة الجبل الأسود اللي فيه ناس بتقول عليها مونتينيجرو اللي كان فيه لاعيبه منها ضمن سكواد منتخب صربيا .. القرار ده كان كفيل إنه يكسر الروح المعنوية للمنتخب اللي الناس كلها كانت مستنيه منه حاجة كبيرة وطلع حصالة مجموعته في دور المجموعات.

نرجع تاني لمنتخب إسبانيا .. حتي لما كان منتخب إسبانيا بينيم مش بس أوروبا إنما العالم كله من المغرب في الفترة من 2008 لحد 2012 فده مكنش يمنع إن بسبب الحاجتين اللي قلتلك عليهم اللي هم النفسنة بين الريال والبارسا ومعاهم رغبة إقليم كاتالونيا اللي مدينة برشلونة هي عاصمته إنه يستقل عن إسبانيا مخليه العلاقة بين لاعيبة الناديين جوه المنتخب مش حقول زي الزفت بس علي الأقل مهماش حبايب .. هي علاقة بروفيشنال فشخ .. أكتر من كده متطلبش .. يمكن أكتر حاجة عبرت عن ده هو تصريح (جيرارد بيكيه) قلب دفاع المنتخب وبرشلونة اللي مرة قال إحنا مش بنلعب في المنتخب عشان إحنا وطنيين لا سمح الله ولا إننا حنموت عشان خاطر علم بلدنا .. إحنا لاعيبة محترفة بتاخد فلوس عشان تلعب كورة فبنعمل اللي علينا مش أكتر ولا أقل .. جدير بالذكر إن (بيكيه) في حالة إنك بتشجع ريال مدريد وكنت بتتريق عليه في سرك هو اللاعيب رقم 12 في قائمة الأكثر تمثيلاً لمنتخب إسبانيا وتاني أكثر لاعيب في تاريخ الكرة الإسبانية ياخد بطولات برصيد 36 بطولة .. السؤال دلوقتي .. لما يكون عندك منتخب مشحون بالشكل ده إزاي تخليه يربط في بعضه من غير ما اللاعيبة تبقي مش طايقة بعض؟

الحقيقة إن فيه عندك طريقتين ملهمش ثالث عشان ده يحصل ولازم تبقي الست والدتك داعيالك إن الطريقتين يتحققوا في وقت واحد سوا مع بعض:

• أول طريقة إن اللاعيبة نفسها تبقي علي درجة كافية من الوعي إنهم يحطوا كل خلافاتهم سواء بين أنديتهم أو حتي توجهاتهم السياسية علي جنب ويقرروا يلعبوا سوا كفرقة واحدة .. وعشان ده يحصل إن بتبقي محتاج ربنا يكرمك بشوية شخصيات لوز العنب وده اللي كان متحقق في جيل 2008-2012 .. إنت كان عندك القديس (إيكار كاسياس) .. كان عندك صخرة قلب الدفاع (بويول) .. كان عندك (تشافي) .. كان عندك (تشابي ألونسو) .. فيه إتنين منهم بقوا مديرين فنيين وده يوريك إنك بتتكلم عن شخصيات ليها تقلها.
• ثاني طريقة إن يبقي عندك مدير فني صارم وبيعرف يحتوي اللاعيبة وده اللي كان متجسد في (حسن حسني) الكرة الإسبانية (فيسينتي ديل بوسكي) وقبل منه معلم الكرة الإسبانية (لويس أراجونيس).

لما جيل 2008-2012 بدأ يبطل كورة واحد ورا الثاني واحد من العمودين اللي كانوا شايلين منتخب إسبانيا وقع وبالتالي المنتخب كله إنهار علي جدور رقبته .. وهنا يجي دور (دي لا فوينتي) .. الرجل ده كان شايف  شخصيته ينفع تحطها في نفس الفئة بتاعة معلمين كبار زي (ديل بوسكي) و(أراجونيس) فكده فاضله إنه يبدأ يبني تشكيلة منتخب قائمة علي شوية لاعيبة شخصياتهم قوية .. لاعيبة مش بتوع مشاكل .. لاعيبة مش بتجري ورا الكاميرا والمايكروفون .. بمعني أخر لاعيبة جايه تاكل عيش وتشوف شغلها بما يرضي الله من غير شوشرة وده خلاه ياخد قراره اللي قوم عليه جمهور مش بس ريال مدريد إنما إشبيلية كمان وده النادي اللي هو شخصياً اشتغل فيه قبل كده باستبعاد (سيرجيو راموس) .. في الأول أنا كنت مستغرب قرار (دي لا فوينتي) وشفته إنه كان عامل فيها (جوزيه مورينيو) في نفسه أوي .. من القصص اللي بتتحكي عن (مورينيو) إنه كل ما يمسك نادي ينقيله لاعيب تقيل ويقرر ينكد عليه عيشته لحد يا إما يمشيه من النادي أو يبطله كورة خالص اللي هي نفس فكرة إنه بيدبح القطة للفرقة كلها .. منكرش أنا شفتها كده .. شوية ولقيت خبر إن (دي لا فوينتي) استبعد كمان (داني سيبايوس) من المنتخب وده القرار اللي أنا وقفت قدامه شوية رغم إن حتي جماهير ريال مدريد ممكن منهم لما قروا اسم (داني سيبايوس) مستوعبوش من أول مرة إنه لاعيب في فرقتهم.

(داني سيبايوس) من اللاعيبة اللي محدش حيفتكرها .. لعب في ريال مدريد محدش حس بيه .. راح أرسنال ولا حد عرف .. رجع تاني ريال مدريد مدفي كرسيه علي الدكة من غير لا حس ولا خبر .. الوحيد اللي كان شايف (سيبايوس) لاعيب كويس غير أبوه وأمه كان (دي لا فوينتي) .. هو لعب معاه في كل المراحل العمرية للناشئين في منتخب إسبانيا وحتي لما (دي لافوينتي) مسك المنتخب الأوليمبي الإسباني في أولمبياد طوكيو خده ضمن الثلاث لاعيبه فوق السن .. لما (دي لا فوينتي) استدعاه للمنتخب لما اتعين مدير فني قامت بينه وبين جناح منتخب إسبانيا وفرقة برشلونة (جافي) خناقة علي حكاية استقلال إقليم كاتالونيا وباين كده إن الخناقة بدأها (سيبايوس) عشان يطلع فرمان من (دي لا فوينتي) باستبعاده نهائياً من المنتخب .. وهي دي الرسالة اللي الرجل ده بعتها للفرقة كلها .. إحنا جايين نلعب كورة .. مفيش مجال للسياسة .. مفيش مجال للمشاكل .. إحنا جايين ناكل عيش وده اللي شفناه في سلسلة من القرارات اللي خلت متابعي الكورة مستغربين وخلت الإسبان وأخص بالذكر الحقيقة جماهير ريال مدريد بالذات حتشق هدومها من الرجل ده:

• أول قرار رفع ضغط المدريستا كان اختيار (ألفارو موراتا) كابتن للفرقة باعتباره تجسيد للاعب كرة القدم اللي جاي ياكل عيش من سكات ومن غير مشاكل .. (موراتا) معاك إنه أكتر لاعيب ممكن يضيع فرص سهلة .. أكتر لاعيب شفته بيقع في مصيدة التسلسل بعد (فيليبو إنزاجي) الله يمسيه بالخير .. بس ده ميمنعش إنه مناسب جداً لدماغ (دي لافوينتي).
• ثاني قرار وده اللي كان وراه (موراتا) شخصياً إنه هو اللي اتكلم مع الإتحاد الإسباني لكرة القدم عشان يتفاوض علي رفع مرتبات ومكافات الجهاز الفني للمنتخب حتي لو ده كان معناه إن مرتبات اللاعيبة نفسهم متزدش في مقابل إن الجهاز الفني يحس إنه متقدر.
• ثالث قرار ويمكن أشجع قرار هو اختياراته لقائمة المنتخب .. الأولوية للاعيبة اللي مش جايه تعمل مشاكل .. لاعيبة زي (أيوزي بيريز) وزي (خوسيلو) انضموا عشان يقعدوا دكة وهم عارفين إنهم حيقعدوا دكة بس كان علي قلبهم زي العسل .. من اليوم الأول وهو قايل إن حارس المرمي بتاعي هو (يوناي سيمون) حارس مرمي أتليتكو بلباو اللي جوه إقليم الباسك وزيه زي كاتالونيا هو منطقة عايزة تستقل عن التاج الإسباني .. الناس سألته بعد ما استبعدت (راموس) وقعدت (ناتشو) دكة حتجيب مين في قلب الدفاع؟ قالهم حجيب إتنين لاعيبة برده من خريجي أكاديمية أتليتكو بلباو ومش بس كده .. لاعيبة اتولدت واتربت في فرنسا مش في أسبانيا أصلاً اللي هم (روبين لي نورماند) و(إيميريك لابورت) .. فرنساويين فرنساويين مش مهم المهم ميكونوش بتوع مشاكل .. خط هجومه قائم علي الجناحين (نيكو وليامز) اللي هو برده طالع من أكاديمية أتليتيكو مدريد ومعاه المراهق (لامين يامال).

(دي لا فوينتي) بيشتغل مع اللاعيبه اللي هو عارفها كويس .. إنت ممكن متكونش كنت تسمع اسمه قبل كده ووحياتك صدقني ولا حتي الإسبان نفسهم بس اللاعيبه كانت عارفاه .. (رودري) و(يوناي سيمون) و(مكيل مورينيو) اللي راح أرسنال ده خدوا معاه بطولة أمم أوروبا تحت 19 سنة سنة 2015 .. (فابيان رويز) و(داني أولمو) و(ميكيل أويازابال) اللي جاب جون الفوز في نهائي أمم أوروبا 2024 كسبوا معاه بطولة أمم أوروبا تحت 21 سنة 2019 .. (مارك كوكوريا) اللي هرانا بصوته النشاز و(مارتن زوباميندي) و(بيدري) خدوا معاه الميدالية الفضية في أولمبياد طوكيو.

خلينا نتفق أنا وإنت إننا لو قارنا لاعيب بلاعيب ما بين تشكيلة منتخب إسبانيا اللي كسبت بطولة أمم أوروبا 2024 وبين الجيل بتاع 2008-2012 فغالباً أنا وإنت والناس كلها مش حنلاقي لاعيب في الجيل بتاع دلوقتي ينفع يحط نفسه أساسي في تشكيلة منتخب إسبانيا اللي رفعت كأس العالم 2010 .. يعني خليني أقولك إن حتي (رودري) اللي أنا شخصياً شايفه أحسن لاعب إرتكاز في العالم دلوقتي هو مش زي (سيرجيو بوسكيتس) اللي في رأيي هو أحسن لاعيب إرتكاز في التاريخ .. عشان كده لما يبقي عندك لاعيبه اه صحيح كويسة بس إحنا مش بنتكلم عن حاجة زي (تشافي) و(أنييستا) و(ديفيد سيلفا) فطبيعي إنك لو مدير فني بتفهم فإنت حتقول لنفسك يمكن طريقة لعب منتخب إسبانيا بتاعة زمان اللي هو أحنا شبطانين في الكورة زي العيل الصغير اللي بيعيط عشان خاطر مامته تجيبله لعبة مش حتبقي نافعة خلاص .. التوجه اللي الرجل ده عمله إنه لعب باللاعيبه اللي هو مستريح معاها وبطريقة لعب مباشرة جداً وده اللي حيرجعنا تاني لنقطة المشروع .. حط قدامك الحقايق دي جنب بعضها .. إسبانيا هي أكتر بلد في العالم عندها عدد مدربين كرة قدم بالنسبة لعدد السكان .. عندها أحسن أكاديميات ناشئين تبع الأندية الكبيرة .. أكتر بلد بتعرف تكسب بطولات علي مستوي مراحل الناشئين وده اللي بيخلي إسبانيا حقاً وصدقأ هي معجزة الخلف خلاف لإن مشروع الكرة الإسبانية قائم أولاً وأخيراً علي التعيينات .. هل إنت بتجيب الشخص الصح عشان يدير المنظومة دي ولا لا .. وياعالم .. يا صابت يا خابت.