تعديل إتكتب يوم 21 يناير 2022 .. (جوزيه مورينيو) فعلاً ساب مانشستر يونايتد في نص الموسم الثالث له معاهم زي ما توقعت في المقالة و جابوا مكانه (أولي جونار سولشاير) و اللي لسه مشوه هو كمان و جابوا (رالف راجنيك) .. (مورينيو) حالياً ماسك المدير الفني لفرقة روما .. (أليكسيس سانشيز) راح نادي إنترميلان .. طبعاً مش عايز أقولك إن من 2018 لحد 2021 نادي الزمالك إتفرمط لدرجة إن محدش من جماهيره فاكر إن كابتن (إيهاب جلال) كان ماسك الفرقة في يوم من الأيام.
موضوعنا النهاردة اللي حنتكلم عنه هو واحدة من أصعب الجوازات في عالم كرة القدم و هي الجوازة اللي بين نادي مانشستر يونايتد و المدير الفني بتاعهم (جوزيه مورينيو Jose Mourinho) .. العلاقة بين الإتنين اللي هي المفروض العلاقة بين إدارة نادي و بين مدير فني المفروض إنها تبقي زي العلاقة بين أي مدير شركة و موظف .. إحنا جايبينك تعمل شغل و مستنيين منك نتايج معينة .. والله لو حققتها فإحنا مبسوطين منك و حتكمل معانا و لو مححقتهاش حنمشيك .. المشكلة بتظهر لما العلاقة بين المدير الفني و إدارة النادي تبقي عاملة زي جواز الصالونات اللي هم إتنين متجوزين بس مبيحبوش بعض .. في مرحلة من المراحل الإتنين بيتخنقوا من بعض لدرجة إنهم بيفكروا جدياً في الطلاق .. العائق الوحيد ورا إنهم يكملوا في خطوة الطلاق بتكون إنهم مش لاقيين بديل .. الزوجة بتسأل نفسها طب لو إتطلقت حروح فين؟ و مين حيصرف عليا؟ و نفس الكلام بالنسبة للزوج .. الإتنين بيلاقوا إن البدايل تقريباً مش موجودة و بالتالي بيقرروا إنهم يكملوا في الجوازة اللي ملهاش لا طعم ولا لون ولا ريحة دي .. دي بالضبط هي العلاقة بين (جوزيه مورينيو) و إدارة نادي مانشستر يونايتد.
فكر فيها كده .. إدارة النادي بقالها سنين بتدور علي الشخص اللي يقدر إنه يكمل المشوار اللي بدأه السير (أليكس فيرجسون Alex Ferguson) بعد ما إعتزل .. طب لو (جوزيه مورينيو) مش هو الشخص ده مين يقدر؟ .. أصلهم جربوا كل الحلول و مفيش حل جاب نتيجة:
- جربوا يجيبوا حد من نفس العجينة بتاعة السير (أليكس فيرجسون) اللي هو (ديفيد مويس David Moyes) اللي هو مش بس أسكتلندي الجنسية زيه إنما كمان السير (أليكس فيرجسون) هو اللي إختاره بنفسه .. مدرب كان ماسك فرقة صغيرة اللي هي إيفرتون و بإمكاينات مادية محدودة أوي عمل منهم فرقة محترمة لعبت في بطولات أوروبية .. و يدوبك (ديفيد مويس) مكملش سنة في منصبه و إدارة النادي مشته.
- بعد كده جربوا يجيبوا حد من مدربين الدرجة الأولي اللي هو (لويس فان جال Louis van Gaal) يعني بتتكلم عن مدير فني إشتغل قبل كده كمدير فني لمنتخب هولندا و مسك أندية كبيرة زي أياكس امستردام الهولندي و برشلونة الإسباني و بايرن ميونيخ الألماني .. الCV بتاع (لويس فان جال) مليان بطولات و أسماء لاعبين علي أعلي مستوي دربهم و إشتغل معاهم و في الأخر لما مسك تدريب مانشستر يونايتد جاب حالة ملل و عقم للنادي لدرجة إنه يدوبك كسب بطولة كأس الإتحاد الإنجليزي FA Cup و مشوه.
- و دلوقتي جابوا (جوزيه مورينيو) المدير الفني اللي إدارة النادي شايفه إنها كانت المفروض تعينه من الأول خالص قبل حتي ما كانوا إختاروا (ديفيد مويس) .. منطقهم إنهم جابوا حد عارف هو بيعمل إيه و مبيهزرش و جاي يكسب .. إذا به في أول موسم له خد مركز سادس في الدوري و دلوقتي هو في المركز الثاني بس بعيد 15 نقطة عن المتصدر مانشستر سيتي و دي المشكلة .. زمان مانشستر سيتي لما كانت الناس بتقارنه بمانشستر يونايتد كانت زي المقارنة بين تاريخ نادي الزمالك و نادي الترسانة .. صحيح الناديين في وش بعض بس شتان الفرق بين تاريخ الناديين بس شوفهم دلوقتي مين أحسن من مين .. المشكلة التانية إن (جوزيه مورينيو) تقريباً متخانق مع كل مدربي الفرق الإنجليزية.
علي إيدك اليمين محدش فاهم هو (جوزيه مورينيو) عايز إيه؟ .. في شهر نوفمبر اللي فات خرج و قال إنه شايف إن المشروع اللي بتعمله إدارة نادي باريس سانجيرمان الفرنسي علي حد وصفه Special, Magic, Fantastic و ده خلي ناس كتير تتخيل إنه مش عاجبه الوضع في مانشستر يونايتد و بيفكر يمشي .. رجع من كام شهر قال إنه عايز يكمل في مانشستر يونايتد أكثر من ال3 سنين اللي موجودين في عقده .. اللي هو يخليك تسأل نفسك طب حضرتك عايز إيه؟ .. طب لو إنت فعلاً مخنوق من الوضع في مانشستر يونايتد و مش طايق الشغل معاهم إيه هي الخيارات التانية المتاحة ليك؟ .. فكر فيها كده:
- تفتكر حتروح لباريس سانجيرمان؟ .. صحيح هم نادي محترم و إدارته عارفه تمشيه بس تفتكر نادي بالحجم ده حيفكر فيك تيجي مدير فني و إنت اللي كنت معروف علي مستوي العالم بإنك أكثر مدير فني بتعرف تدافع و تقفل الماتش .. يا راجل ده إنت اللي إخترعت مصطلح نركن الأوتوبيس Park The Bus تقوم إدارة باريس سانجيرمان اللي هم صارفين 350 مليون جنيه إسترليني علي إتنين مهاجمين اللي هم (نايمار Neymar) و (كيلان إمبابي Kylian Mbabbe) يفكروا فيك إنت؟ ليه عشان تلعب ب(نايمار) باك يمين زي ما لعبت ب(صامويل إيتو Samuel Eto) باك يمين لما كنت بتدرب نادي إنترميلان موسم 2009-2010؟ .. صحيح إنت كسبت بطولة Champions League مع إنتر بس لو إنت ناوي تمسك باريس سانجيرمان و تخليهم يكسبوا البطولة بإنهم يلعبوا بطريقة دفاعية عقيمة فصدقني لو قلتلك إن إدارة النادي حتقولك يفتح الله.
- لو فكرت في الدوري الإيطالي فهو مفيهوش المنافسة بتاعة الدوري الإنجليزي و كمان الإهتمام الإعلامي مش متركز عليه .. لو فكر يروح إسبانيا فأي وظيفة غير مدير فني لريال مدريد حتعتبر إنه بيقلل من نفسه و طبعاً هو ميقدرش يرجع البرتغال لإنه فعلياً حقق كل حاجة مع نادي بورتو .. معندوش حل غير إنه يفكر في بايرن ميونيخ و هم مش عايزينه .. و لو فكر إنه يروح الصين أو روسيا فهم صحيح معاهم فلوس بس مجرد الخطوة دي كأن (جوزيه مورينيو) قرر يطلع معاش مبكر لإن مفيش حد بيتفرج لا علي الدوري الروسي ولا حد مهتم مين بينافس علي لقب الدوري الصيني.
- طب لو فكر إنه يدرب منتخب فهو لسه صغير علي الشغلانة دي و الأهم إن خلاص كأس العالم 2018 حيتلعب و لو فعلياً فكر إنه يدرب منتخب فهو ممكن يفكر في ده كمان 4 سنين لما كأس العالم 2022 في قطر يقرب.
ده اللي (جوزيه مورينيو) محتاج يفهمه إن مفيش بدايل متاحة دلوقتي غير مانشستر يونايتد .. حاجه تضحك لو إنت بتبص علي الموضوع من بره و حاجة تجيب إكتئاب لو إنت من عشاق نادي مانشستر يونايتد .. علي الورق هو و مانشستر يونايتد مناسبين جداً لبعض أو زي ما بيقولوا Match made in Heaven .. تقدر تقول إنهم إتخلقوا لبعض بس المشكلة إن جوازهم مكنش زي ما الناس كلها توقعت .. العلاقة بين (جوزيه مورينيو) و بين النادي بقت زي ما يكون جواز مفيهوش حب .. مجرد إتنين عايشين مع بعض و خلاص بس مفيش بينهم أي مشاعر.
علي الناحية الثانية بقي إدارة النادي مش عايزة صداع لإن الوضع اللي قدامهم إنهم معينيين مدير فني كل الكلام اللي بيتقال في الإعلام إنه مش عاجبه النظام و عايز يمشي و إن فيه ناس جوه مجلس الإدارة عايزاه يمشي خصوصاً إنه معملش ولا حاجة من الحاجات اللي المفروض يعملها عشان يرجع النادي لأمجاد السير (أليكس فيرجسون) .. دي إدارة نادي عارفه إن كل ما تيجي فترة إنتقالات سواء في يناير أو في الصيف فهم حيتعاملوا مع المدير الفني للفريق زي ما يكون زوجة كل شوية تدي لستة طلبات لجوزها و مش بتبطل زن ولا نكد إلا لما طلباتها تتحقق .. و في نفس الوقت هم عارفين إن فيه أسطورة حول (جوزيه مورينيو) هي إنه مبيكملش في أي نادي بعد 3 مواسم فهم حاسين إنهم داخلين علي الموسم الثالث اللي كل حاجة بتبوظ فيه و العلاقة بينهم و بين (جوزيه مورينيو) حتبوظ خالص و حتنتهي بالطلاق .. أخر مثال علي ده هو صفقة (أليكسيس سانشيز Alexis Sanchez) .. ده لاعب عنده 29 سنة يعني إلي حد ما كبير في السن و كان ممكن لو صبروا لحد الصيف كانوا إشتروه ببلاش بس بسبب زن (جوزيه مورينيو) فإدارة النادي وافقت إنها تدفع 180 مليون جنيه استرليني علي مدي 4 سنين كمرتب بس لللاعب ده غير إنهم حيدفعوا 35 مليون جنيه إسترليني لنادي أرسنال و حيدفعوا 10 مليون جنيه إسترليني لوكيل أعمال اللاعب .. مبالغ مستفزة و ملهاش أي معني إنك تدفعها في لاعب زي ما قلت كبير في السن و كنت لو صبرت شوية لحد الصيف الجاي كنت خدته ببلاش بس نقول إيه قدام زن و نكد حد زي (جوزيه مورينيو) اللي خلي إدارة النادي مستعدة تعمل أي حاجة عشان تريح دماغها منه.
لو جيت حطيت نفسك مكان أي حد في مجلس إدارة مانشستر يونايتد و سألت نفسك طب و إيه العمل؟ .. تفتكر لو قلت إنك لازم تمشي (جوزيه مورينيو) حتجيب مين مكانه؟ الحقيقة إن زي أي إتنين متجوزين لما بيوصلوا لمرحلة اللي أنا بسميها اللبس في الحيطة في جوازهم بيحتاجوا إنهم يتكلموا مع حد سواء دكتور نفسي أو خبير علاقات زوجية .. هنا (جوزيه مورينيو) محتاج حد يساعده .. فيه مين حول (جوزيه مورينيو) بيتكلم معاه و يفضفض معاه بدل ما كل شوية يطلع في مؤتمر صحفي يقعد ينكد علينا عيشتنا و يفضل يشتكي من كتر الماتشات اللي بتتلعب في الموسم و يشتكي من إزاي إدارة مانشستر سيتي بتصرف فلوس أكتر من إدارة مانشستر يونايتد أو إنه يفضل يخترع خناقات مع المديرين الفنيين للفرق التانية؟ .. إنت محتاج تسأل نفسك هو فيه حد بيتكلم مع (جوزيه مورينيو) و يبصله في عنيه و يقوله الحقيقة؟ و الحقيقة اللي المفروض (جوزيه مورينيو) يكون عارفها كويس هي دي:
حضرتك إتعينت مدير فني لنادي مانشستر يونايتد و مش من حقك تشتكي .. إحنا ممكن نقبل شكوي من الكابتن (أبوطالب العيسوي) المدير الفني لنادي الإسماعيلي .. ممكن نسمع شكوي من الكابتن (إيهاب جلال) المدير الفني لنادي الزمالك .. بس إنت مش من حقك تشتكي و مفيش حد حيسمع ولا حيهتم لشكواك لإن بمنتهي البساطة إنت شغال مع أقوي نادي في العالم و أغني نادي في العالم فلو إنت مش قد المسئولية سيبها .. الحقيقة إن (جوزيه مورينيو) رغم إنه هو المدير الفني للفريق إلا إنه محتاج حد يديره هو شخصياً لإن اللي أنا شايفه إن إدارة النادي سايباه يعمل اللي هو عايزه و مفيش حد بيتكلم معاه فهو حاسس إنه بيحارب العالم كله لوحده و عشان كده هو نكدي و يائس بالشكل ده.
نقطة كمان لازم إنت تكون فاهمها و هي إن في العصر اللي إحنا فيه ده أوعي تفتكر إن في كرة القدم الفلوس هي كل حاجة .. ده حقيقي حتي و إن كان كلامي من بره غريب .. بص علي نادي زي مانشستر يونايتد .. ده نادي غني ميزانيته تقدر تقارنها بميزانية دول و رغم كده لو حبوا يشتروا أي لاعب فالدنيا فالصفقة مش بتمشي معاهم زي السكينة في الحلاوة لإن زي ما إنت معاك فلوس ففيه أندية تانية معاها فلوس تقدر تدفع زيك و أكتر منك .. و زي ما إنت ليك مصلحتك ففيه كمان وكلاء لاعبين ليهم مصالحهم .. و أحب أرجعك تاني لصفقة (أليكسيس سانشيز) .. جماهير مانشستر يونايتد كل ما تحصل مشكلة يحملوا المسئولية علي (إيد وودوارد Ed Woodward) المدير التنفيذي للنادي و ده اللي قبل ما يشتروا أي لاعب لازم هو اللي يمضي .. اللي الناس محتاجه تفهمه إننا عايشين في عصر مختلف .. زمان اللي هو سنة 2003 مثلاً مكنش فيه أندية كتير في العالم معاها فلوس .. كان يدوبك فيه مانشستر يونايتد و ريال مدريد و برشلونة و بايرن ميونيخ هم اللي كان معاهم فلوس يشتروا أي حد .. دلوقتي الوضع إختلف .. دلوقتي عندك تشيلسي و مانشستر سيتي و باريس سانجيرمان .. فإنت دلوقتي في عصر الفلوس فعلاً مش كل حاجة .. أنا لو لاعب كويس ممكن يجيلي عروض كتير من أندية كتير معاها فلوس فالسؤال هو أنا كلاعب حختار أروح لأي نادي من الأندية الكتير اللي معاها فلوس؟
دلوقتي إنت مش معني إنك نادي معاه فلوس إنك تقدر تشتري أي حد .. فيه حاجات تانية كتير بتخش في الحسبة زي مثلاً هو مين المدير الفني بتاع الفرقة؟ هل هو زي (بيب جوارديولا Pep Guardiola) حيطور من أدائي كلاعب؟ ولا هو زي (جوزيه مورينيو) مدرب بيحب اللي يسمع الكلام و بيحب يسمع منك حاضر و نعم؟ .. و دي النقطة اللي إحنا بنتكلم عنها .. صحيح (جوزيه مورينيو) الCV بتاعه مليان بطولات لدرجة تسمحله إنه يقول رأيه في أي حاجة في الدنيا و إحنا لازم نسمع بس في نفس الوقت مين في إدارة مانشستر يونايتد بيتكلم و يتناقش معاه؟ مين بيقدر يبصله في عنيه و يقوله بص يا إبن الحلال إحنا شاريين (بول بوجبا Paul Pogba) و (روميلو لوكاكو Romelu Lukaku) بملايين فإحنا ملناش عين نقول إن مانشستر سيتي بيفسد كرة القدم بالملايين اللي بيصرفها علي شراء اللاعيبة لإنهم نادي معاهم فلوس زيينا بالضبط؟ هل فيه حد في مجلس إدارة النادي بيقدر كل ما (جوزيه مورينيو) يطلع يشتكي من أي حاجة إنه يقوله إحنا خليناك تصرف أكثر من 300 مليون جنيه إسترليني علي الصفقات فإحنا من حقنا في أخر الموسم نتوقع منك إنك تبني فريق يقدر ينافس علي الدوري .. و دي النقطة .. أنا لو لاعب كويس زي مثلاً (أنتوان جريزمان Antoine Griezmann) إيه اللي يخليني أفكر إني أروح مانشستر يونايتد عشان يدربني رجل كل شوية يطلع في الإعلام يشتكي و يندب حظه و عايش دور الضحية و معيش النادي كله في حاله نكد؟
المصدر:
مقالة بعنوان If Jose Mourinho isn’t the answer for Manchester United , then who is? نشرت في جريدة The Daily Mail البريطانية و ده لينك المقالة الأصلية:
http://www.dailymail.co.uk/sport/football/article-5236767/If-Mourinho-isnt-answer-Man-United-is.html
