موضوعنا النهاردة اللي حنتكلم عنه هو النادي الإسماعيلي بتاع إسبانيا أو زي ما بنسميه نادي فالنسيا Valencia FC .. نادي فالنسيا هو فعلاً النادي الإسماعيلي بتاع إسبانيا .. هو بيقدم أحلي كرة قدم بره الإتنين الكبار اللي هم برشلونة وريال مدريد واللي بيعادلوا الأهلي والزمالك في مصر .. نادي فالنسيا زيه زي النادي الإسماعيلي يعتبر مصنع المواهب اللي عمال يصدر في لاعبين علي مستوي عالي أوي لأندية أوروبا كلها .. (ديفيد سيلفا David Silva) و(خوان ماتا Juan Mata) و(خوان بيرنات Juan Bernat) و(نيكولاس أوتاميندي Nicolas Otamendi) .. حتي علي مستوي النتائج .. لمدة سنتين كاملين نادي فالنسيا مكنش عارف يكسب 5 ماتشات ورا بعض .. ده حتي اللاعبين مكانوش بياكلوا كويس .. اه نسيت أقولك .. زيهم زي النادي الإسماعيلي كانوا بيغيروا مدربين زي ما إنت بتغير شراباتك كده.
نادي فالنسيا خلال 5 سنين بس غيروا المدير الفني بتاعهم 13 مرة .. يعني بتتكلم إنهم في المتوسط بيغيروا المدير الفني بتاعهم مرتين في الموسم .. الموسم اللي قبل اللي فات لوحده فيه 4 مدربين مسكوا فالنسيا .. مع بداية الموسم كان ماسكهم واحد إسمه (باكو أياستيران Pako Ayasteran) .. في نص الموسم مشوه وجابوا واحد إسمه (فورو Voro) وده كان من أبناء النادي وشغال محلل رياضي بس جابوه مدير فني مؤقت لحد ما يلاقوا مدرب .. حاجة كده زي شخصية (زكريا الدرديري) في فيلم الناظر .. بعد كده جابوا (سيزار برانديلي Cesare Prandelli) اللي كان ماسك تدريب منتخب إيطاليا ودي كانت فترة سودا في تاريخ النادي فمشوه ورجعوا تاني عينوا (فورو) .. مع بداية الموسم اللي فات كانوا جابوا واحد إسمه (نونو Nuno) ومشوه وجابوا (فورو) لتالت مرة خلال سنتين عشان يمسك الفريق مؤقتاً .. بعد كده جابوا (فيل نيفل Phil Neville) الباك الشمال السابق لنادي مانشستر يونايتد ومنتخب إنجلترا لو تفتكر بس فشل .. بعد كده قرروا يجربوا أخوه (جاري نيفل Gary Neville) اللي كان الباك اليمين لمانشستر يونايتد ومنتخب إنجلترا بس فشل برده هو كمان ومشوه.
بس يمكن الفرق إن مع بداية الموسم ده مش بس المدير الفني اللي إتغير إنما النادي كله اللي إتغير .. كل حاجة إتغيرت في فالنسيا الموسم ده .. رئيس النادي إتغير ودلوقتي بقي (أنيل مورثي Anil Morthy) وده رجل كان شغال في السلك الدبلوماسي .. المدير العام للنادي هو كمان إتغير وبقي (ماتيو أليماني Mateu Alemany) وده كان ماسك رئيس نادي ريال مايوركا .. كل حاجة إتغيرت في فالنسيا .. مجلس الإدارة إتغير والمجلس الجديد قال إنه مصمم يكمل بناء إستاد الميستايا الجديد اللي أساساً كان مشروع بناءه موقوف من 8 سنين .. كل حاجة إتغيرت في فالنسيا حتي الأكل اللي بيتقدم للاعبين .. زمان مكنش حد بيهتم أوي بالمطبخ اللي بيعمل الأكل للاعبين .. بره في إسبانيا وأوروبا كلها كل نادي له حاجة إسمها Training Ground أو معسكر التدريب .. ده مكان مقفول عشان اللاعبين تتمرن فيه وتنام فيه وتاكل فيه .. كل نادي بيسمي الTraining Ground ده إسم مختلف .. نادي فالنسيا بيسموه باتيرنا Paterna .. المهم إن زمان مكنش حد بيهتم إن اللاعبين بعد كل تمرين أو بعد كل ماتش يتجمعوا مع بعض في Paterna وياكلوا أكل صحي عامله شيفات محترفين في الأكل الصحي .. زمان كان كل لاعب بيروح بيته ومراته أو مامته تكون محضراله ما لذ وطاب من الأكل .. ما طبعاً الواد هفتان من التمرين والماتش ولازم ياكل ويتقوي .. بس دلوقتي كل ده إتغير.
اللي ماسك تدريب فالنسيا دلوقتي واحد إسمه (مارسيلينو جارسيا تورال Marcelino Garcia Toral) وده رجل لو حبيت توصفه أقدر أقولك عارف (مانويل جوزيه Manuel Jose) اللي كان المدير الفني بتاع الأهلي؟ .. فاكر قد إيه كان رجل صارم ومبيهزرش .. أهو (مانويل جوزيه) يعتبر النسخه الدايت من (مارسيلينو جارسيا تورال) .. هو زيه زي مدربين كتير مكنش لاعب مشهور ومميز .. بدأ حياته كمدرب لفريق صغير إسمه ليلتاد Lealtad وبعد كده مسك فريق تدريب فريق سبورتينج خيخون B اللي بيلعب في دوري الدرجة الثانية .. بعد كده إسمه سمّع في إسبانيا كلها لما مسك تدريب فريق محدش كان يعرف عنه حاجة إسمه ريكرياتيفو دي هلويفا Recreativo de Huelva وصعد بيهم للدوري الإسباني الممتاز من دوري الدرجة الثانية وأخد بيهم مركز ثامن في الدوري الإسباني الممتاز .. بعد كده مسك فريق ريال سرقسطة وصعد بيهم برده للدوري الممتاز بإمكانيات محدوده جداً .. رجع تاني يمارس هوايته المفضلة مع نادي فياريال وصعد بيهم من دوري الدرجة الثانية للدوري الممتاز ووصل بيهم لبطولة Champions League .. إذن إنت بتتكلم عن مدير فني بيعرف يعمل من الفسيخ شربات زي ما بنقول .. أقرب مدير فني علي الساحة شخصيته قريبة من (مارسيلينو جارسيا تورال) يمكن هو (دييجو سيميوني Diego Simeone) المدير الفني لأتليتيكو مدريد.
الرجل ده مهووس بحاجة إسمها وزن .. كل يوم قبل كل تمرين لازم اللاعبين يتقاس وزنهم عشان يعرف مين فيهم بيعك في أكله ومين مش ماشي علي النظام الغذائي اللي هو حاطه ليهم زي الكتاب ما بيقول .. متتخيلش إن اللي بيعمله (مارسيلينو جارسيا تورال) يعتبر تجاوز لحدود المنطق .. لا خالص .. (بيب جوارديولا Pep Guardiola) المدير الفني لمانشستر سيتي ماشي علي نفس الأسلوب .. لو شافك وزنك زايد مش حتلعب .. مش حتفرق إنت إبن مين في البلد ولا إنت سعرك كام في السوق .. اللاعبين بتوع فالنسيا بقوا بيخافوا أوي من عقاب (مارسيلينو جارسيا تورال) لدرجة إن فيه منهم قبل كل تمرينة بيقعدوا ساعة في الساونا أو بيجوعوا نفسهم عشان يخسوا شوية عشان قبل كل تمرين لما يقيسوا وزنهم ميكونوش زايدين جرام واحد عن الحد المسموح به.
لو إنت لاعب كرة قدم وجالك مدرب زي ده .. مدرب بيقولك إنت فيه نظام غذائي قاسي حتمشي عليه ولو ممشتش عليه ووزنك زاد مش حتلعب فكتير من اللاعبين حيقولوا لنفسهم إيه القرف ده هي ناقصه معاتيه .. ده حقيقي .. لاعب الكرة خصوصاً لو مهاري شوية مع الوقت بيتولد عنده إحساس إنه مبقاش محتاج حد يقوله يعمل إيه أو ياكل إزاي أو مياكلش إيه .. بس الفيصل في الأخر هو النتائج .. هل أداءك كلاعب كرة قدم إتحسن لما مشيت علي نظام المدرب الرخم ده أو لا .. قلب دفاع فالنسيا دلوقتي هو (جابرييل Gabriel) اللي يمكن تفتكره لو قلتلك إنه كان بيلعب في أرسنال .. المهم إن (جابرييل) لعب تحت إيد (مارسيلينو جارسيا تورال) زمان أيام ما كان لسه في نادي فياريال .. المهم إن أداء (جابرييل) إتطور جداً لدرجة إن أرسنال إشتراه ولما عرف (جابرييل) إن أرسنال حيشتريه أول حاجة عملها إنه رفع سماعة التليفون وكلم المدير الفني بتاعه يشكره .. لما إتعرف إن إدارة فالنسيا إتعاقدت مع (مارسيلينو جارسيا تورال) عشان يبقي المدير الفني الجديد بتاعهم قال (جابرييل) لزمايله إنهم في البداية حيقولوا عليه رخم وحيشتموه بس في الأخر حيشكروه وحيعرفوا قيمته لما يشوفوا قد إيه مستواهم بيتطور.
وده حصل فعلاً .. صانع ألعاب الفريق (داني باريخو Dani Parejo) قال إنه كان بيجوعهم وده كان بيخليه مبياكلش في البيت ومراته إتخانقت معاه كتير إن إزاي هو مياكلش الأكل اللي هي عاملاه .. مهما حاول يشرحلها هي مش فاهمه يعني إيه لاعب كرة قدم يخاف ياكل في البيت عشان ميزعلش مدربه .. اللي يضحك إن (داني باريخو) أول الموسم كان ناوي يمشي من فالنسيا .. حط نفسك مكانه .. إنت بتلعب في نادي مفيهوش فلوس .. نادي بيغير مدربينه زي ما بيغير هو بوكسراته .. نادي في أول الموسم مشي 16 لاعب .. دي مش غلطة مطبعية .. فيه 16 لاعب من فالنسيا إتباعوا مرة واحدة الموسم ده وفضل 5 لاعبين بس و إشتروا 7 لاعبين مرة واحدة .. ده لو كان أوكازيون مكانوش حيبيعوا العدد ده مرة واحدة .. بس لما (مارسيلينو جارسيا تورال) قعد معاه أقنعه إنه يقعد .. (داني باريخو) عرف إنه خد القرار الصح لما بدأ يتمرن تحت قيادة المدير الفني الجديد .. كل حاجة مختلفة .. إنت كلاعب بتفرح لما تلاقي المدير الفني بتاعك مزاكر كويس .. هو كان عارف كل لاعب إسمه إيه وإسم الدلع بتاعه إيه .. كل لاعب مركزه إيه وبيعرف يعمل إيه ومبيعرفش يعمل إيه .. عارف كل ماتش حيتلعب إزاي وإيه خطة اللعب والأهم إنه عارف إزاي يكسب .. مش مجرد حنلعب واللي ربنا يقدرنا عليه حنعمله.
مع الوقت فريق فالنسيا كله بدأ يشوف (مارسيلينو جارسيا تورال) زي ما (جابرييل) قالهم .. (داني باريخو) وصفه بإنه واحد من أحسن إتنين مدربين هو إشتغل تحت إيدهم مع (أرنستو فالفيردي Ernesto Valverde) المدير الفني لبرشلونة دلوقتي.
نقطة مهمة محتاجين نتكلم عنها هو الإنتقالات أو Transfers .. مين اللي إدارة فالنسيا حتبيعه ومين اللي حيشتروه وهل كل قرار بيع وشراء محتاجين موافقة (مارسيلينو جارسيا تورال) أو لا .. الجديد إن الإتفاق كان إن المدير الفني هو اللي له القرار الأول والأخير في مين يمشي ومين يقعد ومين يجي .. إنت ممكن تتخيل إن ده المفروض يبقي الطبيعي والمنطقي بس ده مش بيحصل علي طول .. اللي حصل إن (مارسيلينو جارسيا تورال) لما جه قرر إنه ينظف أوضة تغيير الملابس .. أي مدير فني جديد بيلاقي إن فيه شخصيات مينفعش هو يشتغل معاها و(مارسيلينو جارسيا تورال) قرر إنه مش محتاج 16 شخصية من دول .. منهم شخصيات تقدر تقول عليهم نجوم زي (إينزو بيريز Enzo Perez) و (ألفارو نيجريدو Alvaro Negredo) و(دييجو ألفيز Diego Alves).
اللي عمله (مارسيلينو جارسيا تورال) إنه عمل تشكيلة من اللاعبين اللي يقدر هو يسيطر عليهم ويديرهم والخطوة اللي وراها إنه يبدأ يمرنهم علي أسلوب اللعب اللي هو عايزه .. الطاعة حاجة مهمة في العلاقة بين المدير الفني واللاعب .. الأهم إن تحت إيده لاعبين عايزين يثبتوا لنفسهم حاجة .. مهاجم زي (سيمون زازا Simone Zaza) إتكرش من نادي ويستهام يونايتد الإنجليزي وقالوله إنت حمار ملكش في كرة القدم فهو كان محتاج يثبتلهم العكس .. مهاجم تاني زي (جونكالو جويديز Goncalo Guedes) لسه عنده 20 سنة وبيلعب في نادي باريس سانجيرمان اللي إذا بيهم بدل ما يدوله فرصته راحوا صرفوا ملايين عشان يشتروا (كيلان إمبابي Kylian Mbappe) ومشوه فهو كان محتاج يثبتلهم إنه أحسن منه .. لاعب إرتكاز زي (جيوفري كوندوجبيا Geoffrey Kondogbia) الدنيا ممشتش معاه أوي في نادي إنترميلان الإيطالي فبرده كان عايز يبص في المراية يشوف إنه راضي عن البني أدم اللي هو شايفه .. مهاجم كمان زي (رودريجو Rodrigo) عمره ما جاب أكثر من 5 أهداف في الموسم وكان محتاج يثبت نفسه .. حارس مرمي زي (نيتو Neto) اللي الناس كلها عارفه إنه كويس بس عمره ما كان حيلعب علي حساب (جيانلويجي بوفون Gianluigi Buffon) في يوفينتوس .. بلاش .. (داني باريخو) اللي الإعلام إتهمه إنه لاعب كسلان ومش بيحارب عشان الفريق بس مفيش حد إداله فرصة إنه يدافع عن نفسه أو يثبت نفسه.
بإختصار (مارسيلينو جارسيا تورال) بقي تحت إيده لاعبين جعانين كرة قدم ومحتاجين يثبتوا نفسهم وكل اللي هو كان محتاجه إنه يساعدهم يتألقوا .. وأول حاجة عملها إنه ركز أوي علي لياقتهم البدنية .. إنت ممكن تبقي حريف كرة قدم .. ممكن بتكون بتعرف ترقص أي مدافع أو إتنين او حتي تلاتة .. بس عمرك ما حتبقي لاعب كرة قدم محترف من غير ما تكون لياقتك البدنية في أعلي مستوياتها .. وهنا يجي دور (إسماعيل فيرنانديز Ismael Fernandez) مدرب الأحمال اللي بيشتغل مع (مارسيلينو جارسيا تورال) .. اللي يقول عليه مدرب الأحمال يمشي علي أطخن طخين في الفرقة .. هو اللي بيحدد إيه هي المراكز اللي محتاجه إيه .. لو إنت لاعب خط نص فإنت حتجري لما تقول يا بس لحد ما طول التسعين دقيقة عمرك ما حتحس إنك تعبان .. لو إنت جناح فخليك عارف إن (إسماعيل فيرنانديز) حيفضل وراك يجريك سبرينتات في التمرين لحد ما تبقي مؤهل تخش الأوليمبياد .. كل حاجة بيتعملها إختبارات .. كل حاجة متراقبه بالأرقام ولو إنت كلاعب ملتزمتش حتتعاقب مادياً ومش حتلعب .. حط كل ده مع بعضه في الخلاط .. جوع اللاعبين مع مدرب شاطر مع مدرب أحمال بيفهم .. يطلعلك في الأخر مشروب النجاح لأي فريق كرة قدم.
طريقة اللعب المفضلة ل (مارسيلينو جارسيا تورال) هي 4-4-2 .. ده معناه إنه عايز الفريق بتاعه بيجري كتير وبيجري بسرعة .. هو دايماً عايز الكرة معاه ولو إتقطعت فهو عايز يرجعها بسرعة .. بس مش معني كده إن الإستحواز هو أهم حاجة عنده .. فلسفته إن الفريق اللي نسبة استحوازه 80% بس شاط 3 تصويبات علي المرمي بس طول التسعين الدقيقة ده فريق ممل ويخليك تنام وإنت بتتفرج عليه .. فلسفته في اللعب إنه عايز يعمل فريق زي السوستة Coil .. لما بيدافعوا كأنك بتضغط علي السوسته .. المساحات مقفولة .. المدافعين قريبين من بعض .. بس لما بيهاجموا كأنك سبت السوستة تتمط .. فجأة بتلاقي من 4 ل 6 لاعبين بيجروا لقدام بيبدأوا هجمة مرتدة عادة بتنتهي بهدف .. عشان توصل لده فإنت لازم تمرن لاعبيتك علي كل حاجة لحد ما يحفظوا .. بتمرنهم إزاي يدافعوا وإزاي يجروا .. بيتمرنوا لدرجة إن لو ربطت إيشاربات علي عنيهم ومبقوش شايفين بردوا حيجروا في المكان الصح في التوقيت الصح.
الحقيقة إن كل الأرقام بتقول إن (مارسيلينو جارسيا تورال) ماشي زي الفل .. فاكر (سيمون زازا) اللي قلتله إتكرش من نادي ويستهام؟ .. خد جائزة أحسن لاعب في الدوري الإسباني خلال شهر سبتمبر ولحد دلوقتي جايب 8 أهداف وده مخليه تاني هدافي الدوري الإسباني بعد (ليونيل ميسي Lionel Messi) .. (رودريجو) اللي بفكرك مكنش بيجيب أكثر من 5 أهداف في الموسم هو لحد دلوقتي بعد 9 مباريات بس في الموسم جاب 5 أهداف .. (جيوفري كوندوجبيا) بقي من أعمدة الفريق في خط الوسط وعلي فكرة نادي فالنسيا له الحق إنه يشتريه من إنترميلان مقابل 25 مليون يورو والحقيقة يبقوا أغبياء لو معملوش كده .. (داني باريخو) لقي نفسه تاني كصانع ألعاب .. حتي اللاعبين الصغيرين في السن مستواهم بيتحسن يوم عن يوم .. (خوزيه لويس جايا Jose Luis Gaya) الباك الشمال مع إنه لسه عنده 22 سنة إلا إنه بقي هو الباك الشمال الأساسي في الفريق .. (كارلوس سولر Carlos Soler) برده لاعب خط وسط عنده 20 سنة مستواه عالي أوي الموسم ده لدرجة إن مانشستر يونايتد وأرسنال بيفكروا يشتروه .. بس لو إنت بتابع ماتشات فالنسيا أو حتي بعد المقالة دي قررت تتفرج علي ماتشاتهم إبقي تابع (جونكالو جويديز) .. الواد ده فعلاً فاكهة الفريق .. هو لحد دلوقتي جاب 3 أهداف وعمل 5 تمريرات حاسمة واللي جريدة AS الإسبانية إدته الجايزة الذهبية الموسم ده وعلي فكرة دي حاجة نادرة جداً إن لاعب مش بيلعب في ريال مدريد أو برشلونة ياخد الجايزة دي.
أداء فالنسيا الموسم ده لازم تنحني قدامه .. الفريق ده لعب 9 مباريات في الدوري الإسباني لحد دلوقتي .. جاب فيهم 25 هدف وهم تاني أقوي هجوم بعد برشلونة .. هم حالياً تاني الدوري الإسباني بدون أي هزيمة رغم إنهم لعبوا ضد فرق تقيلة أوي زي أتليتكو مدريد وأتليتكو بلباو وريال مدريد وإشبيلية .. ده فريق لعب ضد 6 أندية من ال8 الكبار في إسبانيا ومتغلبش من ولا فريق .. ده خلي واحد زي حارس مرمي فالنسيا الأسطوري (سانتي كانيزاريس Santi Canizares) يقول إنه مش مصدق اللي بيحصل الموسم ده .. صدقني يا كابتن ولا إحنا كمان مصدقين.
المصدر:
- مقالة بعنوان Marcelino’s starvation treatment steering Valencia out of their lean years نشرت في جريدة The Guardian البريطانية وده لينك المقالة الأصلية:
https://www.theguardian.com/football/blog/2017/oct/23/marcelino-valencia-la-liga-spanish-football-sid-lowe
