أنا عارف كويس إنك حتي لو إنت دحيح في عالم السينما والمسلسلات وإنك ضليع في الكاستينج والبلوت تويست من أول (ألفريد هيتشكوك) مروراً ب(ستانلي كوبريك) و(ستيفن سبيليرج) وحتي (كوينتين تارانتينو) فخليني أتحداك علي الخمسين جنيه اللي في جيبي إن اسم (تايلور شيريدان Taylor Sheridan) معداش عليك قبل كده .. لو إنت فعلاً دي أول مرة تسمع فيها اسم الرجل ده فخليني أرصلك بس 3 أعمال فنية هو عملها وحتبدأ تفهم قد إيه الرجل ده يستحق إننا نتكلم عنه شوية .. جاهز؟ .. هو اللي كتب فيلم Secario والجزء الثاني بتاعه Sicario: Day of the Soldado .. هو اللي كتب وأخرج فيلم Wind River .. هو الكاتب والمنتج لمسلسل Yellowstone اللي يمكن يعتبر أنجح مسلسل في تاريخ التليفيزيون .. بدأت تستوعب قد إيه الرجل ده مش واخد حقه في الإهتمام الإعلامي وإن أحنا غلطانين كناس بتحب السينما والتليفيزيون إننا منبقاش عارفين اسمه ومستنيين أي حاجة هو يعملها؟ .. النهاردة هي بداية إن الواقع ده يتغير بأننا نضرب غطس في حياة الرجل ده والأهم إننا نتعلم يمكن أهم حكمة من الكاريير بتاعته .. أعرف إنت شاطر في إيه وأعمله ومتقاوحش.
(تايلور شيريدان) تقدر تقول عليه إنه من صعايدة أميركا .. لسبب ما لا يعلمه إلا الله الناس اللي عايشة في النص التحتاني لأي بلد بيكونوا شبه بعض .. صعايدة مصر هم هم صعايدة أميركا هم هم صعايدة ألمانيا .. نفس الدماغ الناشفة .. نفس التمسك بالعادات والتقاليد .. والأهم نفس الرغبة في إثبات الذات .. هو صحيح أتولد في ولاية كالورينا الشمالية بس إتربي في ولاية تكساس اللي هي الولاية الحدودية بين أميركا والمكسيك اللي هي تقدر تقول أسوان بتاعة أميركا .. هو إتربي في مكان الناس كلها يا بتزرع يا بتربي مواشي يا بيركبوا حصنة .. باخنصار هو أتربي وسط الناس اللي إنت كنت بتشوفهم في أفلام الكاوبويز Cowboys أو رعاة البقر اللي في أميركا بيسموها أفلام الحياة الغربية Westerns علي أساس إن الفلاحين بتوع أميركا عايشين في غرب البلد .. يدوبك علي مسافة ساعة سواقة بالعربية من المكان اللي هو عايش فيه كانت فيه أكبر مزرعة مواشي في أميركا كلها اللي هي مزرعة الأربع ستات Four Sixes أو 6666 واللي كانت مسئولة عنها وبتديرها اغني عيلة فيكي يا تكساس .. لو تكساس هي المزاريطة ف(تايلور شيريدان) كان عايش في العالم بتاع الكبير أوي .. في الوقت اللي كان حلم أي حد في تكساس إنه يشتغل في مزرعة الأربع ستات هو كان حلمه إنه يشتريها وعشان يشتريها هو لازم يبقي معاه فلوس وعشان يبقي معاه فلوس لازم يبقي ممثل.
(تايلور شيريدان) بدأ حياته الفنية ككومبارس في مسلسلات مش أفلام حتي .. هو ممكن يكون عدي عليك في مشاهد طياري كده من مسلسل Veronica Mars ومسلسل Sons of Anarchy ولو إنت مش عارف اسامي المسلسلات دي فده يوريك قد إيه هو كان كومبارس مش عارف حتي يتحط اسمه في مسلسل تقليل مسمع مع الناس .. سنين وهو بيعافر ومش لاقي حد يعبره لحد ما في سنة 2011 إكتشف إنه ممكن يهكر اللعبة لو هو بطل مقاوحة .. أي ممثل في الدنيا عارف إن بداية شهرته إن حد يقعده في إجتماع مع المنتج بس (تايلور) معرفش يقعد في الإجتماع ده بصفته ممثل .. هو قعده بصفته كاتب سيناريوهات أو سيناريست لمسلسل هو كتبه اسمه عمدة كينجزتاون Mayor of Kingstown والكلام ده كان سنة 2011 .. مفيش منتج فيكي يا أميركا إلا وطلب يقعد معاه عشان يشتري منه حقوق إنتاج المسلسل وكل قعدة يقعدها مع أي منتج بتنتهي بنفس الطلب .. حنديك الفلوس بس إنت مش حتبقي المسئول عن المسلسل لإنك ببساطة الكاريير بتاعتك مش بتقول إنك تقدر أو عندة الخبرة الكافية إنك تتولي كتابة مسلسل ناجح .. بس (تايلور) كان واضح جداً مع نفسه .. يا المسلسل يبقي بتاعي يا بلاش حتي لو هو أضطر إنه يحط السناريو في الدرج لحد ما تجيله الفرصة إنه يثبت للناس كلها إنه صح.
الفرصة جتله سنة 2015 لما السيناريو بتاعه لفيلم Sicario كسر الدنيا والفيلم إترشح لأوسكار أحسن تصوير وأحسن مونتاج صوت وأحسن موسيقي تصويرية .. أيوه عارف إنه مترشحش لأوسكار أحسن سيناريو بس فيلمه اللي وراه Hell or High Water سنة 2016 اترشح لأوسكار أحسن سيناريو .. السنة اللي وراها 2017 كتب وأخرج فيلم Wind River من بطولة (جيريمي رينر) و(إليزابيث أولسن) واللي مش بس كسر الدنيا إنما خد جايزة السعفة الذهبية من مهرجان كان السينمائي الدولي .. السنة اللي وراها في يونيو 2018 اسم (تايلور شيريدان) بقي علي كل لسان لما المسلسل اللي هو كتبه وأنتجه Yellowstone إتذاع علي قناة باراماونت Paramount عشان يحقق نسب مشاهدة خزعبلية وصلت 5 مليون مشاهد للحلقة الواحدة .. نجاح مسلسل Yellowstone واللي بيحكي عن عيلة عندها أكبر مزرعة مواشي في ولاية مونتانا اللي هي برده في صعيد أميركا وكبير العيلة اسمه (جون داتون John Dutton) بيحاول يحمي اسمه ويحمي ثروة ولاده من الناس اللي طمعانة في فلوسة .. مش بتفكرك بحاجة القصة دي؟ .. مسلسل Yellowstone هو هو الترجمة التليفيزيونية لمزرعة الأربع ستات ودي الحكمة اللي أنا عايزك تتعلمها من حياة (تايلور شيريدان) لو إنت عايز تبقي سيناريست .. أكتب عن اللي إنت عارفه .. قصة عيلة (داتون) وسعت أوي من (تايلور) لدرجة إنه عملها مسلسل يحكي قصتها من الأول اسمه 1883 من بطولة (تيم ماجرو) اللي هو يعتبر من أنجح مغنيين أميركا وبتمثل معاه في المسلسل مراته في الحقيقة (فايث هيل) .. مش بس كده .. (تايلور) عمل مسلسل تاني بيكمل حكاية عيلة (داتون) اسمه 1923 من بطولة (هاريسون فورد) و(هيلين ميرين) .. بعد ما اسم (تايلور شيريدان) بقي علامة مسجلة طلع السيناريو بتاع مسلسله Mayor of Kingstown من الدرج عشان يتعمل وقام ببطولته (جيريمي رينر) وكمان هو اللي ماسك مسلسل Tulsa King اللي بيقوم ببطولته (سيلفستر ستالون) .. هو اللي ماسك مسلسل أكشن اسمه Special Ops: Lioness وكل المسلسلات والليلة دي كلها بتتعرض علي قناة باراماونت.
طريقة شغل (تايلور شيريدان) واللي مخليه ناس كتير متضايقة منه هي إنه (أحمد مكي) في نفسه .. هو اللي بيكتب وبيخرج وبينتج ومش بعيد يمثل ويختار الممثلين .. صحيح وخدامك أنا والعربية إن طريقة Micromanagement دي بتقتصر بس علي الحلقة الأولي من المسلسل اللي الأمريكان بيحبوا يسموها البايلوت Pilot وبعد كده هو بيشيل إيده من المشروع وبيسيب المنتج المنفذ اللي الأمريكان بيحبوا يسموه Showrunner هو اللي يدير الليلة .. صحيح تحت رقابة ورعاية (تايلور شيريدان) بس علي الأقل بيكون فيه حد تاني هو اللي بيروح الموقع كل يوم يدير الليلة .. المشكلة في حاجة .. طريقة كتابة المسلسل بتختلف عن طريقة كتابة الفيلم وخليني أديلك مثال بسيط .. مسلسل الضوء الشارد يعتبر من العلامات الفارقة في تاريخ التليفيزون المصري .. أداء (ممدوح عبدالعليم) الله يرحمه كان أسطوري في المسلسل .. الموسيقي التصويرية بتاعته (ياسر عبدالرحمن) أبدع فيها .. بس أتحداك إنك تقدر تفتكر تفاصيل الخناقة بين شخصيات المسلسل .. إنت عارف إن (يوسف شعبان) الله يرحمه كان الشرير بتاع المسلسل بس ممكن متفتكرش هو بالضبط كانت إيه مشكلته مع شخصية (رفيع بيه) اللي جسدها (ممدوح عبدالعليم) .. ده قصاد فيلم زي (بطل من ورق) من بطولة برده (ممدوح عبدالعليم) بس لسبب غريب إنت فاكر إن الشرير كان (أحمد بدير) الله يرحمه وفاكر كويس إفيه مبيعرفش يوجفها مبيعرفش يوجفها .. السبب إن في المسلسلات السيناريست بيبقي في دماغة الحبكة الدرامية المعقدة بين الشخصيات الكتير اللي في المسلسل .. في الفيلم السيناريست بيركز علي القصة اللي دايما بتكون علاقة بسيطة بين بطل وشرير .. مشكلة (تايلور شيريدان) إنه بيحب يكتب مسلسلاته كأنها أفلام مش مبنية علي حبكة درامية معقدة قد ما بتبقي مبنية علي قصص قصيرة بس كتير .. قصص أحداثها كتير بس تفاصيلها قليلة.
مشكلة تانية في طريقة شغل (تايلور شيريدان) إنه مش فارق معاه مين يزعل .. اللي مش عاجبه يتفلق .. مسلسلاته بيعرض فيها الحقيقة اللي هو شايفها واللي باختصار بتقول إن السكان الأصلين لأميركا أو الهنود الحمر زي ما إحنا في مصر عارفينهم إتحط عليهم جامد .. مفيش حد معاه فلوس يكون طيب .. وإن الثقافة الغربية دي مبتأكلش عيش .. زي ما إنت شايف دي مش أراء حد عايز ياكل عيش في هوليوود .. مشكلة تالتة وهي إنه بيحلب شركة الإنتاج اللي هو بيشتغل معاها .. خد مثلاً مسلسل Yellowstone .. المسلسل ده بيتصور في مزرعة الأربع ستات اللي (تايلور) اشتراها سنة 2016 بحيث اتفاقه مع شركة باراماونت اللي بتنتج المسلسل وبتذيعه الأتي:
- عشان المسلسل يتصور في المزرعة بتاعته فالشركة بتدفعله 500 ألف دولار في الأسبوع كعقد ايجار شامل تدريب الممثلين علي فنون ركوب الخيل في مدرسة تعليم ركوب الخيل بتاعته اللي اسمها معسكر رعاة البقر Cowboy Camp.
- أي مشهد يتطلب تصوير مواشي فالشركة بتدفعله 25 دولار علي راس الماشية الواحدة وده غير ال500 ألف دولار بتوع التصوير في المزرعة خلي بالك.
- أي راعي بقر أو راكب خيل محترف شغال في المزرعة الأربع ستات يتطلب منه إنه يعمل مشهد ككومبارس في المسلسل بياخد في المشهد 3000 دولار .. باختصار لو المشهد اللي في السيناريو بتاع (تايلور شيريدان) احتاج لبن العصفور فشركة باراماونت ملزمة تجيبه .. حط المصاريف دي كلها جنب بعضها تكتشف إن المسلسلات اللي هو بيعملها لصالح شركة باراماونت واقفه عليهم في السنة بحوالي 500 مليون دولار بيدفعوهم والجزمة القديمة في بقهم.
المصادر:
- مقالة بعنوان Inside ‘Yellowstone’ mastermind Taylor Sheridan’s rise-and Kevin Costner feud نشرت في جريدة New York Post وده لينك المقالة الأصلية:
https://nypost.com/2024/11/08/entertainment/inside-yellowstone-mastermind-taylor-sheridans-rise-kevin-costner-feud/ - مقالة بعنوان The ‘Yellowstone’ Empire: How Taylor Sheridan struck TV gold by reinventing the western نشرت في مجلة Variety وده لينك المقالة الأصلية:
https://variety.com/2022/tv/awards/yellowstone-taylor-sheridan-western-1235235606/
