لينك التسجيل الصوتي للمقالة علي ساوند كلاود:
https://on.soundcloud.com/aeqZa
موضوعنا النهاردة عن شعب غريب حبتين اسمهم الهان Huns .. عارف المغول؟ أكيد قريت عن قد إيه المغول دول قتلة و مجرمين و كفاية القصص اللي قريناها في كتب التاريخ عن المجازر اللي عملوها لما دخلوا بغداد .. أهو المغول دول ملايكة مقارنه بالهان .. الفترة اللي حنحكيها دلوقتي صعب تتفهم لإننا مبنتكلمش عنها كتير و هي الفترة بعد إنفصال الإمبراطورية الرومانية لنصين اللي هم الإمبراطورية الشرقية اللي عاصمتها القسطنطينية اللي إنت دلوقتي عارفها باسم إسطنبول و ديانتها كانت المسيحية و الإمبراطورية الغربية و دي عاصمتها كانت روما و فضلت علي الوثنية و معترفتش بالمسيحية كديانة .. في الفترة دي الرومان سواء شرقيين أو غربيين كانوا متخيلين إن خلاص يا جدعان جبرت كده الأرض مفيهاش إلا إحنا و الفرس و دول ناس عايشه في العراق و إيران و مفيش غيرنا في الدنيا .. فجأة طلعلهم الهان دول زي الخازوق محدش عارف هم جم منين و طاحوا في خلق الله ولا أجدعها ثور هايج في عنبر تسعة .. الحقيقة هي قصة طويلة شوية بس مذهلة أوي فخليني أحكيلك الموضوع من أوله.
مين هم الهان دول؟ و جم منين؟
الحقيقة مفيش حد عارف بالضبط هم جم منين؟ بس فيه نظريات كتير و يمكن أكتر نظرية عليها إجماع إن زمان أوي في منغوليا (اللي هي نفس البلد اللي جم منها المغول برده) كان عايش ناس اسمهم جيونجنو Xiongnu فضلوا زي الحيل اللي قارف الإمبراطورية الصينية و بينهم حروب كتير أوي لحد ما أخيراً الصينيين هزموهم و إضطروا إنهم يهربوا بره منغوليا كلها و الكلام ده كان في القرن الأول الميلادي يعني خلال ال100 سنة الأولي بعد ميلاد السيد المسيح (عليه السلام) .. بقايا الجيونجنو دول فيه منهم بدأوا يهاجروا للغرب جوه أسيا بإتجاه أوروبا و طول ما هم ماشيين عددهم عمال بيكبر سواء بقي هم بيتكاثروا أو إنهم بيجبروا القبائل اللي هم بيهزموها إنهم ينضموا ليهم.
حروبهم الطويلة مع الصين خلت الناس بتوع الجيونجنو دول بيعرفوا يحاربوا كويس و سمعتهم بدأت تسًمع في أسيا كلها علي إنهم عبارة عن جيش كامل من القوات الخاصة .. في الوقت ده بدأوا يتعرفوا باسم الهان و اللي الحقيقة محدش عارف الاسم ده جه منين .. فيه ناس بتقول إن الاسم ده مشتق من كلمة تركية قديمة معناها المتوحش .. فيه ناس شايفه إن الاسم جه من كلمة فارسية قديمة اسمها هونارا Hunara يعني المهاري و البني أدم الحريف أوي في شغله و الرأيين معناهم إن أكتر حاجة إتعرف بيها الهان هي إنهم بيعرفوا يحاربوا كويس .. فيه رأي ثالث بيقول إن الهان ده كان الاسم الأصلي لنهر في منغوليا اسمه أونجي و ده المكان اللي هم إتولدوا و جم منه .. سنين و سنين بتعدي و الهان دول بيمشوا قاطعين أسيا كلها بالعرض لحد ما وصلوا لعتبة باب أوروبا و ساعتها النكد بدأ.
سنة 376 ميلادي بدأ الأوروبيين يفوقوا علي إن فيه حد اسمه الهان لما لقوا جيش رهيب بيعبر نهر الفولجا و ده نهر في روسيا بتقع عليه مدينه فولجاجراد أو ستالينجراد للناس اللي قرت شوية في الحرب العالمية الثانية .. المهم إن المنطقة دي في روسيا كان بيحكمها شعب اسمه السكوثيون Sythians و بتتنطق سيثيانز بالإنجليزي .. الحقيقة إن الهان كانوا بيكنسوا المنطقة من السكوثيون زي ما إنت بتكنس التراب كده من علي الأرض لحد ما عبروا نهر الدون .. الزحف أو خليني أقول الإكتساح اللي عمله الهان للمنطقة خلق موجة هجرة جماعية للاجئين اللي راحوا لحدود الإمبراطورية الرومانية الشرقية .. عدد اللاجئين كان ضخم لدرجة إن الفترة دي من التاريخ إتعرفت باسم فترة الهجرة Migration Period زي كده أزمة اللاجئين السوريين اللي سابوا بلدهم و راحوا تركيا و الأردن و لبنان بسبب الحرب الأهلية .. طبعاً فيه منهم جه مصر بس إحنا مش بنحب و لا عايزين نسميهم لاجئين و الناس دي علي راسنا من فوق .. المهم .. في الأول الرومان إستقبلوا المهاجرين و رحبوا بيهم و حموهم و اللي كان بيحكم الإمبراطورية الرومانية الشرقية وقتها واحد اسمه (فالينز Valens) .. بس مع الوقت الأعداد الضخمة من اللاجئين بدأت تشكل عبء علي الإقتصاد و بدأت المساعدات الغذائية اللي بتجيلهم من الإمبراطورية تقل لحد ما اللاجئين دول تمردوا ضد الرومان.
هل الهان دول كانوا محاربين جامدين أوي؟ طب ما الرومان كمان كانوا محاربين جامدين؟
الحقيقة إن الفكرة مش في العدد قد ما الفكرة في إنت إزاي بتستخدم العدد؟ .. الجيوش الرومانية طول عمرها جيوش كبيرة في عددها و مدربة بشكل كويس و تسليحها كمان محترم بس فيه مشكلة .. الفكر العسكري الروماني إن الجيش التقليدي عادة بيكون أغلبه مشاة بيتحركوا في مجموعات و بيحميهم رماه و معاهم سلاح فرسان بس مش كبير أوي .. عشان تفهم أنا قصدي إيه أنصحك تتفرج علي المشهد الإفتتاحي من فيلم Gladiator عشان تفهم دماغ الرومان في الحروب بتبقي إزاي؟ .. هم كانوا معتمدين علي سلاح مشاة قوي جداً في تسليحه و تدريبه و معاهم سلاح رماة متطور مش بس معاه سهام إنما كمان معاهم منجنيق بحيث يضربك قبل ما إنت توصله و إعتماد الرومان علي الفرسان كان لحسم المعركة لصالحهم مش أكتر .. الهان كانوا العكس .. الهان زيهم زي أحفادهم المغول كانوا معتمدين بشكل أساسي علي الفرسان بحيث طريقتهم هي الكر و الفر .. كانوا لما بيمشوا بيمشوا في طابور طويل من الفرسان و وراهم الحصنة الإحتياطي لإن كل فارس المفروض بيبقي له ما بين 4 أو 5 حصنة إحتياطي زي بالضبط ما في تقسيمة القوات الجوية لأي دولة كل طيار بيبقي له ما بين 3 أو 4 طيارات فكان ده بيدي إنطباع للجيوش المعادية إن الهان دول كتير أوفر مع إن الحقيقة ممكن متكونش كده أوي.
لما الهان بيهجموا عليك إنت بتلاقي ناس راكبه حصنة و صحيح معاهم سيوف بس سلاحهم الأساسي هو قوس بيرمي سهام .. الميزة إن القوس بتاعم كان قصير و معمول بCurve بحيث إنه كان سهل الإستخدام أوي حتي و إنت راكب حصان و بتجري و كمان إن السهم راسه كانت حادة و مشطوفه ب3 شطفات بتخليه و هو طاير بيلف حول نفسه زي بالضبط ما طلقة البندقية بتلف حول نفسها و هي طايرة و ده بيديها طاقة حركة عالية بتخليها تقدر تخترق الدروع بتاعة العساكر الرومان .. تكتيك الهان إنهم لما يهجموا يرموا عليك سهامهم و يرجعوا تاني كذا مرة لحد ما عدد الجيش بتاعك يقل جامد و ساعتها يشنوا هجموهم بالسيوف .. التكتيك ده كان جديد علي الرومان و مشافهوش قبل كده و مكانوش لاقيين حل له.
الهان كانوا متوحشين لدرجة إن الناس اللي عايشين في الإمبراطورية الرومانية و اللي بس بفكرك إنهم مسيحيين تخيلوا إن أكيد دول يبقوا (يأجوج) و (مأجوج) و إن أكيد (المهدي المنتظر) حيجي عشان يهزمهم و القيامة تقوم .. أيامها إتقال برده إن (الإسكندر الأكبر) لما راح أسيا قابل الهان دول و خاف منهم لدرجة إنه بني سور يحمينا منهم و كتب علي السور ده إنه لو إتهد فالقيامة حتقوم .. اللي ساعد أكتر علي إن الرأي ده ينتشر و ناس كتير تؤمن به هو شكل الهان نفسهم .. غير إنهم أسيويين و ملامحهم الأسيوية دي كانت غريبة علي الرومان إنما كمان الهان كان من ضمن طقوسهم حاجة اسمها Head-Binding أو Artificial Cranial Deformation و ده بمنتهي البساطة إنك بتجيب الطفل الرضيع في أول شهر تحط راسه بين لوحين خشب و تفضل تضغط عليهم لحد ما شكل جمجمة الرأس بيبدأ يتغير و يبقي طويل شوية من ورا زي ما صور الجماجم بتاعة جثث الهان بتوريك.
ده كان بيؤثر علي قدرتهم علي النطق فكانت لغتهم غريبة أوي و مش مفهومة لناس كتير .. حط كل ده جنب بعضه .. ناس شكلها غريب و بتتكلم بشكل غريب و دمويين بشكل غريب فالسمعة بتاعتهم إن دي مخلوقات ربنا باعتها عشان يخلص من البشر و القيامة تقوم .. نقطة تانية ساهمت جامد في توسع الهان بالسرعة دي هي عددهم اللي مكنش بيخلص و اللي مش كله كان من الهان نفسهم .. الناس دول مكنش عندهم مشكلة أي حد ينضم ليهم و يحارب معاهم .. إنت ممكن تكون عايش جوه الدولة الرومانية بس مش لاقي شغل و فقير و مش لاقي تاكل فتقرر إنك تنضم ليهم و حيقولوك ماشي أهلا و سهلاً بيك في شلتنا.
زي ما قلتلك إن بداية إن الأوروبيين يفوقوا علي إن فيه حاجة إسمها الهان كانت سنة 376 ميلادي .. لما جت سنة 395 يعني بتتكلم خلال أقل من 19 سنة كان الهان وصلوا جوه البلقان يعني دول كرواتيا و صربيا دلوقتي يعني قربوا أوي من إسطنبول أو القسطنطينية عاصمة الإمبراطورية الرومانية الشرقية و لإن الرومان كانوا أضعف من إنهم يواجههوا الهان فعرضوا عليهم يدفعولهم جزية عبارة عن شحنة ذهب سنوياً .. بس لإن الإتفاق كان صعب حبتين فيدوبك كام سنة و الرومان مبقاش عندهم ذهب يكفي إنهم يدفعوه للهان.. الهان زي ما مغنيين الRap بيقولوا Bitch I want my money و لما الرومان قالولهم منين يا حسرة رجعت تاني الحرب تولع.
بسبب إن الهان نفسهم عبارة عن قبائل و عائلات كتير شوية من غير ما يبقي ليهم كبير يتلموا حوله فإلي حد ما صراعهم مع الرومان مكنش بيخلص .. هم كتير بس مش منظمين .. تقدر تقول شغالين بمبدأ الفوضي الخلاقة أو زي ما الجوكر في فيلم The Dark Knight قال I Just Do Things يعني إحنا ناس جايين نشوف الدنيا بتولع بس لحد ما جت سنة 434 ميلادي .. في السنة دي إتنين أخوات (أتيلا Attila) و (بليدا Bleda) وحدوا القبائل دي كلها و بدأوا يجهزوا نفسهم لهجوم كاسح علي الإمبراطورية الرومانية الشرقية و بعدها متفهمش مين همس في ودنهم إن فيه ناس معاها فلوس كتير زي الرز اسمهم الفرس .. الطمع خلي الهان يفكروا طب ليه لا نحط الإمبراطورية الرومانية الفقيرة اللي معادش حيلتها اللضي دول علي جنب و نروح نسترزق شوية من الفرس .. بس للأسف إتعرضوا لهزيمة صعبة شوية في أرمينيا من الفرس اللي كانوا وقتها بيحكمهم الدولة الساسانية .. بعد الهزيمة زي ما تقول كده اللي ميقدرش علي الحمار يتشطر علي البردعة و رجعوا تاني يفتروا علي الإمبراطوريتين الرومانيتين الشرقية و الغربية .. سنة 445 إتقتل (بليدا) في مؤامرة عملها أخوه عشان يبقي (أتيلا) هو الزعيم الأوحد للهان.
مهم تكون فاهم إن (أتيلا) كان مجنون حبتين .. سنة 450 بعت رسالة لإمبراطور الإمبراطورية الرومانية الغربية (فالينتيان الثالث Valentinian III) قاله إنت تجوزني أختك و عشان لأنا تنك و مفيش مني إتنين في الدنيا حتدفعلي مهر عشان أقبل أتجوزها و المهر ده إنك تديني حتة من أرضك .. طبعاً لما الإمبراطور رفض و ده كان طبيعي إذا ب(أتيلا) سنة 451 يشن هجوم واسع علي الإمبراطورية لحد ما وصل للحتة اللي هي دلوقتي فرنسا .. هناك حصلت معركة من أشهر معارك التاريخ اسمها معركة سهول كاتالونيا Battle of the Catalaunian Plains ضد تحالف من الجيش الروماني بقيادة جنرال اسمه (فلافيوس أيتوس Flavius Aetius) مع ملك من ملوك القبائل اللي بتعيش في المنطقة اسمه (ثيودريك الأول Theodoric I) .. الحقيقة إن المعركة دي من المعارك اللي فعلياً محدش عارف مين اللي كسبها بس مش مهم .. المهم إن بعد المعركة دي (أتيلا) قرر إنه مش حيهوب ناحية الإمبراطورية الرومانية الغربية تاني.
سنة 453 و في ليلة جوازه من أميرة جيرمانية يعني القبائل اللي كانت عايشه زمان في ألمانيا دلوقتي اسمها (إلديكو Ildico) متفهمش إيه اللي حصل في أوضة النوم بس (أتيلا) جاله نزيف حاد في مناخيره و محدش عرف يلحقه و في الأخر مات من الإختناق .. لما رجالته دخلوا عليه و لقوه ميت إتصدموا لدرجة إنهم طلعوا خناجرهم و عوروا نفسهم في وشهم حزناً عليه أو لإن الرجاله متعيطش فأسد يلا في إيه إحنا نعور نفسينا ..المهم إن بعد موت (أتيلا) عياله الثلاثة إتخانقوا مع بعض علي مين يحكم و الحرب الأهلية دي كانت بداية النهاية للهان اللي ضعفوا أوي بسببها لدرجة إنهم إنهزموا في أهم معركة في تاريخهم اللي معركة نيداو Battle of Nedao اللي حصلت في المجر دلوقتي و كانت سنة 454 .. تقريباً كل اللي كان شايل من الهان إتحالفوا مع بعض ضدهم و بعد المعركة دي الهان إتفرقوا و إنتشروا في الأرض زي ما تقول كده اللي حصل لليهود و إختفوا و محدش سمع عنهم حاجة تاني من ساعتها.
الهان سابوا بصمتهم في أوروبا زي ما المغول سابوا بصمتهم في تاريخنا و تراثنا .. الهان إتقال عليهم أساطير و حكايات كتير أوي زي مثلاً الإسطورة بتاعة إن بابا الفاتيكان (ليو الأول Leo I) حمي روما من الهان لما قال إيه راح قابلهم و معاه روحي القديسين (بولس Paul) و (بطرس Peter) و خوفهم من دخول روما .. حكاية تانية هي قصة القديسة (أوروسلا Ursula) اللي أستشهدت بعد ما الهان دخلوا مدينة كولون الألمانية و إتقتلت هي و 11,000 بنت عذراء رفضوا إنهم يدوا جسمهم للهان .. حتي في الأدب الأوروبي حتلاقي قصص كتير أوي للحروب الطويلة بين الهان و الأوروبيين زي مثلاً قصيدة معركة القوط و الهان The Battle of the Goths and Huns و قصايد كتير أوي حتي بتحكي قصص الفايكينج و حروبهم مع الهان.
الحقيقة إن الهان دول فعلاً تجسيد للأية الكريمة يعز من يشاء و يذل من يشاء .. الناس دول طلعوا فجأة و بقوا قوة عسكرية عماله تطيح في خلق الله و إختفوا فجأة زي ما تكب شوية مياه علي الأرض و تلاقيهم إتبخروا .. لا ليهم حضارة ولا ليهم لغة ولا ليهم أي حاجة خالص تخلد ذكراهم غير إن خلق الله كلهم شتموهم .. أنا عارف إن فيه ناس كتير مش بتحب الفلسفة بس حاول تفكر شوية في اللي حصل للهان من وجهة نظر مختلفة حبتين .. دول ناس فعلياً كانوا بيجروا جري الوحوش عشان يبقي عندهم فلوس .. مكنش عندهم رحمة ولا شفقة بحد .. جمع المال كانت أهم حاجة عندهم و ده خلاهم يوصولوا إنهم يبقوا قوة عسكرية تخوف أي حد في العالم بس بعدين؟ هل حد دلوقتي بعد سنين من نهايتهم بيفتكرهم بالخير؟ هم كانوا أقوي و أغني يمكن من الفراعنة بس هل سابوا بصمتهم في التاريخ زي الفراعنة؟ .. يمكن عشان كده نصيحتي ليك بلاش يبقي شغلك الشاغل إن يبقي عندك فلوس لإنك حتلاقي نفسك عشان يبقي عندك فلوس بسرعة إنك تظلم ناس و تؤذي ناس و في الأخر حتموت و فلوسك حتروح و مش حيفضل غير سمعتك اللي زي الزفت .. و لو مش مصدقني أدي درس الهان قدامك يمكن تتعلم منه حاجة.
المصدر:
مقالة بعنوان The Huns- 10 Fascinating Facts About the Ancient World’s Baddest Barbarians .. نشرت في موقع Military History Now و ده لينك المقالة الأصلية:
https://militaryhistorynow.com/2018/12/20/the-huns-10-fascinating-facts-about-the-ancient-worlds-baddest-barbarians/
