موضوعنا النهاردة اللي حنتكلم عنه هو (تشي تشي Tete) اللي لإنك متعرفوش خليني أقولك إن ده يبقي المدير الفني لمنتخب البرازيل .. لو أنا جيت سألتك عن أول حاجة بتيجي في دماغك لما بجيبلك سيرة منتخب البرازيل فياتري حتفكر في إيه؟ .. تفتكر دماغك حتروح ل(نايمار Neymar) ولا (جابرييل خيسوس Gabriel Jesus) ولا (كوتينو Coutinho) ولا مين؟ وعلي فكرة إنت عندك حق لإن فعلاً الجيل الحالي لمنتخب البرازيل تقيل أوي من حيث الأسامي .. بس لو أنا سألتك تعرف مين هو مدرب البرازيل تفتكر فيه كام واحد حيكون عارف؟ .. سبب السؤال لإن هو ده اللي إحنا حنركز عليه في كلامنا النهاردة .. إحنا مش حنتكلم عن لا عن (نايمار) ولا عن (جابرييل خيسوس) لإننا حنتكلم عن (أدينور ليوناردو باتشي Adenor Leonardo Bacchi) اللي البرازيلين بيسموه (تشي تشي) وده يبقي المدير الفني لمنتخب بلدهم.
صدقني لو قلتلك إن الرجل ده يعتبر من وجهة نظر البرازيليين أهم واحد في المنتخب .. ممكن البرازيل تلعب من غير (نايمار) وتكسب بس مجرد إن البرازيليين يفكروا في سيناريو إن (تشي تشي) يمشي دي بالنسبة ليهم كابوس .. سبب المكانة الكبيرة أوي للرجل ده في قلوب البرازيليين إن الرجل ده اللي عنده 59 سنة قدر يعيد هيبة منتخب البرازيل .. إنت ممكن متكونش تعرف مين هو (تشي تشي) أصلاً وبرده حقدر موقفك جداً لو قلتلي إنت مجنون إنت إزاي تقول كده لو قلتلك إن البرازيليين شايفينه واحد من أحسن المدربين علي مستوي العالم يمكن في نفس مستوي (بيب جوارديولا Pep Guardiola) و(جوزيه مورينيو Jose Mourinho) بس محدش سمع عنه أو يعرفه مش لسبب غير إنه مش أوروبي هو بس صادف إنه برازيلي الجنسية ومدربش قبل كده في أوروبا خالص.
(تشي تشي) بني أدم بسيط إتولد في منطقة إسمها كاسياس دو سول Caxias do Sul جنوب البرازيل .. هو بني أدم متواضع ومتدين جداً ومن أطيب الشخصيات اللي ممكن تتعامل معاها .. شخص تقدر تثق فيه والأهم إنك لو لاعب كرة قدم فهو شخص إنت تحب تلعب تحت إيده .. من أهم مميزاته إنه وفي جداً للاعيبة بتاعته .. بس يمكن عيبه إنه مش صارم ومبيحبش يبقي Tough علي اللاعبين بتوعه ويمكن دي أخطر حاجة حتواجه منتخب البرازيل في روسيا .. هو كان لاعب خط وسط مدافع بس الCareer بتاعته كانت إلي حد ما قصيرة بسبب الإصابة .. سنة 1990 كانت أول وظيفة تدريبية له كانت مع فريق برازيلي إسمه جواراني دي جاريبالدي Guarany de Garibaldi .. جري الشريط 11 سنة يعني في 2001 أخيراً جاتله فرصة كويسة لما درب فريق جريميو Gremio البرازيلي وخد بيهم كأس البرازيل .. بعد كده الCareer بتاعته كمدرب كانت إنه يمسك تدريب فرق بتنافس علي الهبوط ينقذهم ويخليهم يفضلوا في الدوري الممتاز بس قبل ما الموسم الجديد ما يبدأ إدارة النادي تمشيه.
موسم 2012-2013 ل(تشي تشي) مع نادي كورينثيانز Corinthians كان فعلاً غريب .. بعد ما خدوا الدوري الموسم اللي قبله لعبوا ل13 ماتش في الموسم ده إتعادلوا فيهم صفر-صفر .. متفهمش إيه اللي حصل بس الفرقة بطلت تجيب أهداف .. في نوفمبر 2013 إدارة النادي مشته .. المشكلة كانت واضحة للناس كلها .. اللاعيبة الأساسية في الفريق بدأت تدلع .. (تشي تشي) كان محتاج يبقي صارم وأي لاعب يتدلع مهما كان كان بيثق فيه ومهما كان مهم للفريق لازم يقعد علي الدكة .. بس (تشي تشي) شخص عاطفي مبيحبش يزعل حد وفضل صابر علي اللاعيبه بتاعته لحد ما هو اللي مشي .. الغريب إن المدير الفني اللي جه بعده (مانو مينزيس Mano Menezes) مشي تقريباً نص الفرقة عشان يخلص من مرض الدلع والإستهتار اللي إنتشر في الفريق.
بعد ما إدارة كورينثيانز Corinthians مشته هو قرر ياخد سنة أجازة .. في السنة دي هو خد بعضه وسافر إسبانيا وإتصل ب(كارلو أنشيلوتي Carlo Ancelotti) اللي وقتها كان هو المدير الفني لريال مدريد وطلب منه إنه يبقي معاه ضمن الجهاز الفني يتعلم منه وفعلاً (تشي تشي) كان قاعد جنب (زين الدين زيدان) بيتعلم من (كارلو أنشيلوتي) وبفكرك إن دي السنة اللي ريال مدريد كسب بطولة Champions League للمرة العاشرة في تاريخهم.
عشان تستوعب حجم المعجزة اللي (تشي تشي) عملها مع منتخب البرازيل إنت محتاج تفتكر هو إستلم قيادة المنتخب في فترة سودا قد إيه .. فاكر كأس العالم 2014 اللي إتلعب في البرازيل؟ .. فاكر ماتش نص النهائي بين ألمانيا والبرازيل؟ .. فاكر الماتش ده خلص كام كام؟ .. بعد الهزيمة التاريخية 7-1 من الألمان قرر الإتحاد البرازيلي لكرة القدم إنه يمشي (لويس فيليبي سكولاري Luiz Felipe Scolari) ويجيب مكانه (دونجا Dunga) .. علي فكرة كان (تشي تشي) هو المرشح الأول إنه يمسك منتخب البرازيل بس متفهمش إيه اللي حصل .. يمكن لإن (دونجا) كان بيدرب منتخب البرازيل قبل كده فإتحاد الكرة شاف إنه خيار مناسب أكثر من (تشي تشي) اللي كان حيبقي أول مرة يمسك فيها المنتخب؟ .. الله أعلم.
في موسم 2015-2016 إدارة كورينثيانز Corinthians إتحايلت عليه إنه يرجع يمسك الفرقة تاني وفعلاً رجع وخد بيهم الدوري البرازيلي تاني وخلال السنة دي (دونجا) كان بيعك الدنيا مع المنتخب .. منتخب البرازيل بجلالة قدره خرج من الدور الأول من بطولة كوبا أميركا Copa America وفي المركز السادس في تصفيات أميركا الجنوبية المؤهلة لكأس العالم وكان تقريباً فيه شبه إجماع في البرازيل إن منتخبهم مش حيوصل كأس عالم اللي هو كأس العالم روسيا 2018 اللي جاي ده علي طول .. هنا قرر الإتحاد البرازيلي إن (دونجا) يمشي ويجيبوا الرجل اللي كان المفروض يجيبوه من سنة.
إنت عشان تبقي مدير فني كويس حاول تفكر في الوظيفة دي علي إنك زيك زي الميكانيكي .. الميكانيكي لازم قبل ما يحط إيده في العربية يكون فاهم كل حتة فيها ماشية إزاي؟ .. فاهم الموتور بيشتغل إزاي؟ وفاهم الفتيس بيشتغل إزاي؟ .. إنت كمان كمدير فني لازم تكون عارف كل لاعب في فريقك .. عارف إيه إمكانياته ويقدر يعمل إيه؟ وإزاي تضغط عليه عشان يطلع أحسن ما عنده؟ .. (تشي تشي) ميكانيكي شاطر قدر يحول منتخب البرازيل من عربية فيات 128 لعربية فيراري.
(تشي تشي) إتعين مدير فني للمنتخب في يونيو 2016 يعني يدوبك بقاله في منصبه سنة وكام شهر .. شهر مارس 2017 يعني بعد أقل من سنة من تعيينه وبعد ما كان منتخب البرازيل سادس أميركا الجنوبية وتقريباً مش حيصعد كأس العالم إذا بيهم متفهمش هو عمل فيهم إيه بس خلي منتخب البرازيل هو أول منتخب علي مستوي العالم يتأهل لكأس العالم .. مش كده وبس .. ده منتخب بيكسب وبيحقق نتايج وهو بيلعب كرة قدم حلوة تستمتع وإنت بتتفرج عليها .. محدش قال إنك لما تتفرج علي منتخب البرازيل دلوقتي حتحس كإنك بتتفرج علي فريق برشلونة أيام ما كان بيدربه (بيب جوارديولا) .. لا هم فرقة حلوة أوي مش حتمل وإنت بتتفرج عليها بس بتلعب كرة قدم عملية شوية .. الحقيقة إن سجله مع المنتخب لحد دلوقتي زي الفل .. البرازيل تحت قيادته لعبت 17 ماتش كسبت منهم 13 ماتش وإتعادلت 3 ماتشات وخسرت ماتش واحد وكان ماتش ودي ضد منتخب الأرجنتين .. خلال ال17 ماتش دول منتخب البرازيل جاب 38 هدف ودخل فيهم 5 أهداف بس .. فريق فعلاً مرعب وأرقامه لوحدها تخوف.
الغريب إن (تشي تشي) مخترعش حاجة .. إنت لو بصيت علي التشكيلة بتاعته والتشكيلة بتاعة (دونجا) حتلاقيها تقريباً هي نفس اللاعيبه بس يمكن إن التشكيله دلوقتي بقت موزونة أكثر .. الهجوم بتاع منتخب البرازيل فعلاً يخوف .. خط النص إلي حد كبير موزون ومعتمد علي الثلاثي (كازميرو Casemiro) و(ريناتو أوجوستو Renato Augosto) و(باولينيو Paulinho) .. الدفاع هو اللي فيه إتنين باكات علي أعلي مستوي اللي هم (داني ألفيش Dani Alves) و(مارسيلو Marcelo) .. المشكلة اللي فعلاً ممكن تواجه منتخب البرازيل في كأس العالم الجاي هو إن (تشي تشي) تقريباً معتمد علي تشكيلة مبتتغيرش وده ممكن يعرضهم لموقف إن لو الدنيا زنقت أو إتحطوا في مصيبة فجأة إن مثلاً حد إتصاب أو إتوقف أو حتي إن فريق يكون قاري منتخب البرازيل كويس فلعب علي نقط قوته فممكن ساعتها الفريق ميقدرش يتصرف .. خصوصاً إن منتخبات أوروبا اللي حتلعب ضد البرازيل في كأس العالم تختلف كتير عن منتخبات أميركا الجنوبية .. إفرض مثلاً البرازيل لعبت إسبانيا .. خط نص إسبانيا قوي وسريع وحيتعب خط نص البرازيل .. صحيح الثلاثي (كازميرو) و(ريناتو أوجوستو) و(باولينيو) من أحسن لاعبي الإرتكاز في العالم بس خلينا نتفق إنهم مش سراع أوي ومش مهاريين أوي.
خلاصة الكلام .. لو لا قدر الله منتخب مصر واجه منتخب البرازيل في كأس العالم فلازم نعمل حساب أوي ل(تشي تشي) .. ده مدرب بيعرف يطلع أحسن ما عند اللاعبين اللي تحت إيده .. هو مش مدرب تكتيكي علي مستوي عالي زي (بيب جوارديولا) اللي هو بتغيير ممكن يقلب نتيجه الماتش .. هو مدرب تكتيكياً علي قده أوي بس إدارياً ناجح جداً .. هو خلق تشكيلة من اللاعبين النجوم في أنديتهم بس في نفس الوقت مستعدين ياكلوا النجيلة عشان خاطره .. ده من المديرين الفنيين للمنتخبات اللي إنت كلاعب مبتشوفوش إلا كل فين وفين .. لا خالص .. ده متابع كل لاعب برازيلي في ناديه وكل يوم بيبعتلهم فيديوهات علي What’s App عشان يتناقش معاهم .. ده رجل مش مأنتخ في البيت بياخد فلوس وخلاص .. ده كل يوم بيروح مكتبه في الإتحاد البرازيلي لكرة القدم بيشتغل 10 ساعات يومياً عشان يحلل كل لاعب في تشكيلته بيلعب إزاي في ناديه علي مدار الموسم ومين مستواه بيقع ومين مستواه بيتقدم .. لو لعبنا ضد البرازيل ياريت نقرأ ونركز شوية علي المدير الفني بتاعهم مش علي يا تري (حجازي) حيوقف (نيمار) إزاي.
المصدر:
- مقالة بعنوان Patient Tete has brought swagger and pragmatism back to Brazil نشرت في جريدة The Guardian البريطانية وده لينك المقالة الأصلية:
https://www.theguardian.com/football/2017/nov/13/tite-brazil-world-cup-england-friendly-wembley
