تعديل إتعمل يوم 12 ديسمبر 2021 .. الطيارة F-35B كانت أول نسخة تخش الخدمة فعلياً و أول غارة جوية تنفذها كانت يوم 27 سبتمبر 2018 ضد عناصر من تنظيم طالبان في أفغانستان .. يوم 15 إبريل 2019 النسخة F-35A دخلت الخدمة في قاعدة الظفرة الجوية في قطر و يوم 27 إبريل 2019 نفذت أول غارة جوية ليها ضد هدف تابع لتنظيم داعش في العراق .. يوم 2 أغسطس 2021 النسخة F-35C دخلت الخدمة في القوات البحرية.
موضوعنا النهاردة اللي حنتكلم عنه هو المقاتلة F-35 اللي الأمريكان بيحبوا أوي إسمها الكامل F-35 Joint Strike Fighter بس خلينا عشان نسهل علي نفسنا نسميها F-35 علي طول .. إحنا لا حنكلمك عن تسليحها ولا عن إمكانياتها ولا عن إزاي المخابرات المصرية بقت عارفه إزاي تلقطها عشان تكيد أهل الشر زي ما فيه كتير من المصريين مقتنعين .. فكك من كل الكلام اللي ميأكلش عيش ده .. إحنا النهاردة حنتكلم عن خبر واحد بيقول إن قيادة القوات الجوية الأميريكية قالت إن إن شاء الله علي أخر شهر سبتمبر 2017 اللي هو عدي خلاص حيبقي عندها Fully Combat Capable F-35 .. اللي حنتكلم عنه النهاردة هو يعني إيه الكلام ده؟ .. يعني إيه يبقي عندك مقاتلة F-35 قادرة علي تنفيذ مهام قتالية؟ .. ده بس اللي حنتكلم عنه النهاردة من غير ما ندخلك في متاهات إنت مش حتعرف تخرج منها.
بص يا إبن الحلال .. إنت من حقك تتكلم عن F-35 زي ما إنت عايز .. تقول عليها أحسن مقاتلة إتعملت في تاريخ البشر أو تقول عليها مجرد كذبة بتضحك بيها أميركا علي العالم .. في الأخر اللي حيحدد إنت صح ولا غلط إني أشوف هل المقاتلة F-35 لما بإذن الله تدخل الخدمة و تنفذ مهام قتالية هل قدراتها هي هي نفس اللي قيادة القوات الجوية الأميريكية كانت عايزاها؟ .. فكر فيها كأنها موبايل .. إنت لما بتروح تشتري Smartphone بتقرأ الSpecifications بتاعته و اللي بتقولك إن الSmartphone ده صوته عالي و مش بيهنج و مبيسخنش و بطاريته حلوة بس إنت لما تيجي تستخدمه و تجربه بنفسك فالتجربة لوحدها هي اللي حتوريك هل فعلاً الشركة اللي صنعت Smartphone كان عندها حق و إنه فعلاً كده ولا كانوا بيضحكوا عليك و إنت دفعت فلوس علي الفاضي؟
عشان تبدأ تجاوب علي سؤال هل فعلاً القوات الجوية الأميريكية إستلمت مقاتلات F-35 من اللي بيتقال عليها Fully Combat Capable يعني تقدر تخش بيها حرب بكره الصبح أو لا خليني أسألك سؤال تاني: إنت عايز الحق ولا إبن عمه؟
خلينا نبدأ بالحق الأول .. يعني لو حنمشي زي الكتاب ما بيقول فإنت مهم تبقي فاهم إزاي أو إيه الإجراءات اللي لما تتعمل تطلع قيادة القوات الجوية الأميريكية و هي نافخة صدرها و تقول قدام العالم بكل ثقة إن عندنا F-35 و كمان Fully Combat Capable؟ .. مبدأياً لازم تكون عارف إن F-35 ليها 3 نسخ: F-35A و دي حتستلمها القوات الجوية .. و فيه عندك F-35B و دي حيستلمها سلاح مشاة البحرية US Marines .. و الثالثة هي F-35C و حتستلمها القوات البحرية .. المفروض إن فيه جهة إسمها مكتب مدير إدارة التقييم و الإختبارت الميدانية Office of Directional Testing & Evaluation إختصاراً بيسموها DOT&E .. علي الورق الإدارة دي بتتبع وزارة الدفاع بس علي الأرض دي إدارة مستقلة مفيش حد له سلطة عليها .. الإدارة دي هي اللي بتحط المعايير بتاعة الإختبارات اللي علي أساسها بتحدد أي سلاح جديد بينتج هل ينفع تدخله الخدمة بكره الصبح أو لا؟ و بالتالي هل تقدر تسميه Fully Combat Capable أو لا؟ .. لحد دلوقتي DOT&E مستلمتش ولا نسخة من النسخ الثلاثة عشان تختبرها .. و لحد دلوقتي طالما الF-35 مخدتش الإذن بتاع DOT&E فإنت أيا كان إنت مين متقدرش تقول علي الF-35 إنها Fully Combat Capable و بالتالي مينفعش تدخل الخدمة و تشارك في مهام قتالية.
لكن إبن عمه بقي اللي حيحصل هو الأتي .. في سبتمبر 2016 يعني من أكثر من سنة القوات الجوية قالت إنها بداية من أكتوبر 2017 اللي هو يعتبر بداية السنة المالية بتاعة 2018 حتستلم Model من المقاتلة F-35 و الModel ده قادر يشيل كل تسليح المواجهات جو-جو و جو-أرض اللي إن شاء الله حتتركب علي الF-35 و من ضمن التسليح ده المدفع الرشاش عيار 25 مليمتر اللي يعتبر ضروري و مينفعش المقاتلة تطير من غيره .. علشان ده يحصل فالModel ده حيتركب فيها Updated Operating System حيتقال عليه مؤقتاً Block 3F الكلام ده أكدته مجلة Aviation Week في تحقيق صحفي إنتشر يوم 25 اغسطس .. أميركا دولة نظامها إن جيشها بيمسكه مدنيين يعني وزير الدفاع منصب مدني و بيتقال عليه سكرتير الدفاع و نفس الكلام بينطبق علي الأفرع الرئيسية للقوات المسلحة عشان كده سلاح الجو عندهم مش بيمسكه جنرال إنما بيمسكه شخص مدني بيتقال عليه سكرتير سلاح الجو .. المهم إن سكرتيرة سلاح الجو الأميريكي (هيذر ويلسون Heather Wilson) قالت لصحفيين في مؤتمر صحفي إن الخطوة دي مش حتقلق حد و بلاش حد يعتبرها إنها سلق بيض عشان يسرعوا دخول المقاتلة F-35 في الخدمة .. الفكرة إنهم لحد دلوقتي إختبروا قدرة المقاتلة F-35 إنها تفضل تطير 100,000 ساعة طيران و لو كان تصميمها فيه مشكلة لكانت المشاكل بدأت تظهر بس لحد دلوقتي ربنا ساترها معاهم.
المفروض إن فيه سرب مقاتل إسمه السرب 34 مقره قاعدة هيل الجوية Hill Air Force Base في ولاية يوتاه Utah الأميريكية هم أول ناس حيستلموا الModel بتاع مقاتلات F-35 اللي فيها Block 3F .. بعد كده فيه 3 أسراب تدريب هم ال61 و 62 و 63 مقرهم قاعدة لوك الجوية Luke Air Force Base في ولاية أريزونا Arizona هم ثاني ناس حيستلموا الModel ده .. بس اللي الناس شايفاه إن قيادة القوات الجوية بتلف علي القواعد و الإجراءات الرسمية .. قلنا إن مينفعش أي سلاح مهما كان هو إيه إياكش حتي مسدس أو بندقية ألية يدخل الخدمة و يستخدم في المعارك إلا لما ياخد موافقة بإنه بقي Fully Combat Capable و بياخد الختم ده من إدارة DOT&E .. اللي حصل إن القوات الجوية الأميريكية عطت للمقاتلة F-35 لقب Initial Operational Capability يعني ليها قدرة قتالية مبدأية اللي هو شبه في نطقه من لقب Fully Combat Capable بس مش هو نفس اللقب .. ده مخلي ناس كتير تسأل نفسها هو فيه إيه؟
فيه وجهتين نظر في الموضوع ده:
زمان و زمان ده اللي هو سنة 2015 كان فيه إجماع بين الناس اللي شغالة علي مشروع الF-35 إن الOS Software بتاعها معقد أوي و بالتالي بلاش نعقد الأمور أكثر و نخليها بتشيل تسليح مبالغ فيه .. فعلاً الList بتاعة الأسلحة اللي الF-35 كانت المفروض تشيلها محدودة فعلاً وكانت كالأتي:
- صواريخ AIM-9X و صواريخ AIM-120C و الإتنين صواريخ جو-جو.
- قنابل GBU-12/B الموجهة بالليزر حمولة 1500 كيلوجرام.
- قنابل GBU-31/B الموجهة بالGPS حمولة 3500 كيلوجرام و دي قنابل بيتقال عليها Joint Direct Attack Munition أو JDAM.
- قنابل GBU-39/B و دي قنابل بيتقال عليها Small Diameter Bombs أو SDB.
- ده مع المدفع الرشاش GAU-22/A عيار 25 مليمتر.
متفهمش مين العبقري اللي فتي إن فوق التسليح ده كله يزودوا كمان:
- قنابل GBU-31/B لكن مش بس حمولة 3500 كيلوجرام إنما كمان حيزودوا قنابل حمولة 1500 كيلوجرام و 2500 كيلوجرام.
- قنابل GBU-49/B و دي نفس النوع بتاعة قنابل GBU-12/B بس أقوي.
كل التسليح ده بيعطل و بيعقد كل حاجة .. عشان المقاتلة F-35 يتقال عليها Stealth يعني ليها القدرة علي التخفي من الرادار فإنت لازم تحط القنابل و الصواريخ دي جوه جسم المقاتلة مش إنك تركبها خارجياً علي الجناح .. فلو إنت ناوي إن المقاتلة تشيل كل التسليح ده فإنت ساعتها مينفعش تقول إنها Stealth .. نقطة تانية إن الOS Software اللي كانت المفروض المقاتلات تشتغل عليه إسمه Block 4 كان معمول و متصمم علي إنه يشيل الأسلحة اللي كانت موجودة علي الList القديمة قبل ما يزودوا كم القنابل الزيادة ده كله .. هل معني كده إن الOS Software اللي إسمه Block 3F حيحل محل Block 4؟ و خلي بالك إني قلت إن الله أعلم هل Block 3F ده حيشتغل أصلاً أو لا .. و لو مشتغلش هل قيادة القوات الجوية حتسحب لقب Initial Operational Capabilities من علي مقاتلات F-35 بتاعتها ولا حتسيبه؟ ولو سابته حتسيبه بحجة إيه؟
المصدر:
مقالة بعنوان Let’s Talk About The USAF’s Claim of ‘Fully Combat Capable’ F-35s نشرت في Website إسمه The Drive و ده لينك المقالة الأصلية:
http://www.thedrive.com/the-war-zone/14103/lets-talk-about-the-usafs-plan-for-fully-combat-capable-f-35s
