موضوعنا النهاردة اللي حنتكلم عنه هو ييجيرتروبين Jegertroppen و دي كلمة نرويجية معناها قوات الصيد Hunter Troops و ده الإسم بتاع أول وحدة قوات خاصة نسائية في العالم .. أيوه زي ما قريت .. القوات المسلحة النرويجية عملت وحدة قوات خاصة بتخدم فيها بنات بس .. ناس كتير كانت متخيلة إن وزارة الدفاع الأميريكية كانت رائدة في الFeminism لما السنة اللي فاتت شالت الحظر اللي كان مفروض علي مشاركة الجنديات الأميريكيات في المهام القتالية رغم إن فعلياً بعد ما الحظر ده إتشال عدد محدود أوي من النساء اللي في القوات المسلحة الأميريكيه قدموا طلبات إنهم ينضموا لفرق قتالية .. يا عيني إحنا عشنا سنين متخيلين إن الأمريكان سابقين العالم كله بسنين ضوئية في حقوق المرأة بس محدش خد باله من اللي بتعمله النرويج.
في الثمانينات في الوقت اللي السمر في أميركا مكانوش عارفين ياخدوا حقوقهم كاملة كمواطنين كان البرلمان النرويجي بيوافق علي مشروع قانون بيتيح للنساء الإنضمام للقوات المسلحة صحيح مش كتير من النساء النرويجيات قدموا و صحيح إن القانون كان بيتيح لأي سيدة نرويجية الحق إنها تقدم علي إنها تنضم للقوات الخاصة بس مكنتش ولا واحدة بتنجح في إختبارات القبول بس مش دي القضية .. القضية إن مفيش حظر و لو عايزه تقدمي قدمي براحتك .. السنة اللي فاتت كانت النرويج أول دولة ضمن دول حلف شمال الأطلسي NATO اللي بتسمح للنساء بالإنضمام للوحدات القتالية في القوات المسلحة .. بس فكرة إنهم يعملوا قوات خاصة مكونة بس من النساء بدأت النرويج تدرسها و تسعي فيها بداية من سنة 2014 لإن زي ما بنقول الحاجة أم الإختراع فالنرويجيين لقوا نفسهم واقعين في مشكلة كبيرة و مكنش ليها حل غير إنهم يكونوا فرقة قوات خاصة نسائية.
دلوقتي القوات المسلحة النرويجية ضمن التحالف الدولي اللي بيحارب في أفغانستان و القوات النرويجية اللي في أفغانستان غالبيتها عناصر قوات خاصة .. هناك قيادة القوات الخاصة لقت إن تقاليد المجتمع الأفغاني بتحرم إن ضابط قوات خاصة نرويجي بيقوم بمهمة تمشيط في واحدة من القري إنه يستجوب أي سيدة أفغانية .. ده معناه إن عملية جمع المعلومات عن العدو فيها مشكلة كبيرة لإن المخابرات النرويجية فعلياً مبقاش بيجيلها معلومات إلا من الرجاله الأفغان لإن ببساطة هم مش عارفين يتكلموا مع السيدات الأفغانيات .. صاحب الفكرة دي يبقي إسمه (فرودي كريستوفرسون Frode Kristofferson) رتبته كولونيل و دي تعادل عميد و ده يبقي قائد القوات الخاصة النرويجية في أفغانستان .. الرجل ده لما بدأ يدرس الوضع إكتشف إن عنده مشكلة كبيرة.
دلوقتي قوات التحالف الدولي ليها دورين:
- تدريب عناصر الأمن الأفغانية و من ضمنهم عناصر نسائية و بالتالي هم محتاجين ضابطات و خبيرات أمن عشان يتولوا تدريب عناصر الأمن الأفغانيات.
- مهام قتالية لمحاربة الإرهاب و من ضمنها مثلاً عملية إقتحام لبيت فانت برده محتاج ضابطات قوات خاصة عشان يتكلموا مع النساء و الأطفال اللي في البيت لإن زي ما قلتلك العرف و التقاليد بيمنعوا فكرة إن ضابط رجل خصوصاً أجنبي يتكلم مع سيدة أفغانية.
من هنا جت فكرة ييجيرتروبين Jegertroppen .. إنك تعمل فرقة قوات خاصة نسائية بتقدر إنها تتكلم مع النساء الأفغانيات سواء في عمليات الإقتحام و الإعتقال أو مهام التدريب .. الأهم كمان إن وحدة ييجيرتروبين Jegertroppen معمولة تفصيل .. بمعني .. انت محتاج عناصر نسائية تخدم في أفغانستان فانت مقرر حاجات كتير بتساعدك في إنك تقبل مين و متقبلش مين .. ده معناه إن لما المجندة تخلص تدريبها اللي بياخد سنة كاملة بتطلع ضابطة قوات خاصة إتعملت تفصيل و بالمقاس اللي انت عايزه عشان تخدم في أفغانستان و ليها قدرات قتالية و عقلية زيها زي أي ضابط قوات خاصة رجل .. الأهم إنك مش لسه حتضيع وقت زيادة عشان تديها كورسات و برامج تدريب مخصوص لكيفية التعامل مع البيئة الأفغانية.
مقر قيادة و تدريب ييجيرتروبين Jegertroppen موجود في معسكر ترينينجموين Terningmoen Camp علي بعد حوالي 150 كيلومتر شمال العاصمة النرويجية أوسلو و برنامج التدريب هو هو اللي مستخدم لتدريب عناصر القوات الخاصة النرويجية من الرجال .. زي ما عندنا في مصر بتاخد فرقة صاعقة فكمان البنات اللي بتتقبل في ييجيرتروبين Jegertroppen بياخدوا حاجة شبهها بتستمر سنة كاملة .. عشان تتقبل أي بنت بتقدم علي إنها تنضم لييجيرتروبين مطلوب منها إنها تعدي إختبار إنها تشيل مخلة وزنها 30 كيلوجرام و تجري مسافة 10 كيلومتر في أقل من 52 دقيقة و علي فكرة انت لو رجل و قدمت للقوات الخاصة النرويجية بتعمل نفس الإختبار بالضبط بس الفرق إنك بتعمله في أقل من 49 دقيقة يعني يدوبك الفرق بينك و بين أي مجندة في ييجيرتروبين هو 3 دقايق بس .. في السنة دي بيتعلموا القفز بالبراشوت من الطيارات و بيتعلموا النجاة في البيئة الثلجية في القطب الشمالي و بيتعلموا النجاة في بيئة الغابات .. بس يمكن أصعب مرحلة بيسموها أسبوع جهنم Hell Week و في الأسبوع ده المجندات بيمشوا مسافات طويلة أوي لكذا يوم ورا بعض من غير نوم و بكميات أكل و مياه محدودة أوي .. التدريب ده معمول بالذات عشان يعلموا المجندات إزاي يتحملوا الضغط العصبي و النفسي اللي البشر عادة بينهاروا تحته.
فكرة ييجيرتروبين القوات المسلحة النرويجية طبقتها من سنة 2014 و بعد 3 سنين من تطبيقها بيعتبروها فكرة ناجحة جداً مع العلم إن في السنة الأولي اللي تم الإعلان فيها عن تأسيس الوحدة إتقدم ليها 300 بنت و ده خلاهم كل سنة بيعلوا سقف الطلبات عشان هم بيحتاجوا عدد محدد بس اللي بيقدموا كتير أوي.
انا أقدر أفهم إن القوات المسلحة في أي دولة في العالم لإنها مؤسسات بناها الرجال فعندهم مشكلة إنهم يقبلوا فكرة إن المرأه تقدر تقوم بنفس الدور اللي هم إحتكروه لنفسهم من الاف السنين .. عندك مثلاً القوات الخاصة الأميريكية بناء علي تقرير نشرته مؤسسة RAND المحترمة جداً سنة 2014 ف85% من أعضاء القوات الخاصة الأميريكية كانوا ضد فكرة إنهم يشتغلوا مع بنات في مهام قتالية و 71% منهم كانوا أساساً شايفين إن البنات مينفعش ينضموا للقوات الخاصة من أساسه .. بفكرك إن سنة 2014 كانت السنة اللي النرويج بدأت تطبق فكرة ييجيرتروبين .. الحقيقة إنك لما تيجي تتكلم مع المعارضين لإنضمام البنات للقوات الخاصة حتلاقي إن عندهم نقاط ينفع تتناقش معاهم فيها و رفضهم للفكرة مش جاي بس من عنصريتهم ضد المرأة .. انت تقدر تقول إن ليهم 3 نقاط أساسية بانيين عليها رأيهم بإن البنات مينفعش ينضموا للقوات الخاصة:
- مبدأياً كده القوات الخاصة تعتبر صفوة الصفوة و فيه كتير من الرجال مبيتقبلوش فيها بسبب إن معايير الإنضمام عالية أوي .. طبعاً المعايير العالية أوي دي إتصممت بحيث تقبل رجال بمواصفات معينة و مفيش بنت إلا نادر أوي اللي حتوصل للمواصفات دي .. ده معناه إن المعايير اللي انت ناوي تقبل بيها المتقدمين للإنضمام للقوات الخاصة حتبدأ تقل عشان تسمح بضم البنات و دي في حد ذاتها مشكلة.
- مشكلة تانية إسمها PMS أو Pre-Menstrual Syndrome اللي هو إن أي رجل متجوز عضو في فريق قوات خاصة مراته حتفضل تزن عليه و تنكد عليه عيشته لإنها دايماً حتفضل شاكه فيه إنه بيخونها مع واحدة من زميلاته لإن خلينا نكون واضحين مع بعض فريق القوات الخاصة لو بقي بيضم رجاله و بنات فهم حيفضلوا عايشين نايمين واكلين شاربين مع بعض .. يبان مبرر أهبل بس أي رجل متجوز حيفهم ده أوي.
- إذا كنت المشكلتين الأولانيين مشاكل ثانوية ملهاش علاقة إلا بإن الرجاله بيفكروا بنصهم التحتاني و انا قابل كده فالمشكلة الثالثة إن عمر ما عضوة فريق القوات الخاصة قدراتها الجسدية حتبقي زي الرجل .. يعني مثلاً لو زميلها أصيب برصاصة ففعلياً هي مش حتقدر تشيل زميلها من ميدان المعركة و تجري بيه لمكان أمن عشان يتعالج .. و هنا انت محتاج تقبل فكرة إن لو حصل و تم قبول البنات مثلاً في القوات الخاصة المصرية فانت لازم تكون فاهم إن فيه مهام معينة هي مش حتعرف تعملها .. زي ما فيه مهام تانية انت كرجل مش حتعرف تعملها و مش بتكلم عن قدرتها إنها تتكلم مع النساء في بيئة مقفولة علي نفسها زي سيناء .. هل تعلم إن في كل إختبارات التصويب البنات قدرتها في التنشين أعلي بكتير من الرجال؟ .. ده حقيقي علي فكرة البنات بتضرب نار أحسن بكتير من الرجال.
المصادر:
- مقالة بعنوان Inside the World’s First All-Female Special Forces Unit: Norway’s Jegertroppen نشرت في Website بتاع وكالة NBC News الإخبارية الأميريكية و ده لينك المقالة الأصلية:
https://www.nbcnews.com/news/world/inside-world-s-first-all-female-special-forces-unit-norway-n746041
- مقالة بعنوان Meet the Hunter Troop: Norway’s tough-as-nails female soldiers نشرت في Website بتاع هيئة الإذاعة البريطانية BBC و ده لينك المقالة الأصلية:
http://www.bbc.com/news/world-europe-39434655
