تشيلسي .. فن إنك إزاي تخزوق نفسك.

موضوعنا النهاردة اللي حنتكلم عنه هو نادي تشيلسي الإنجليزي .. ده نادي الموسم اللي فات قدر إنه يفوز بلقب الدوري الإنجليزي الممتاز اللي بيسموه بريمير ليج Premier League و علي فكرة هم كسبوا اللقب بأداء محترم و قوي و كل الناس الموسم اللي فات كانوا بيتخيلوا إيه اللي ممكن كان يحصل لو تشيلسي بالأداء ده كان بيلعب في بطولة دوري أبطال أوروبا Champions League .. ناس كتير شافت أداء تشيلسي الموسم اللي فات و سرحت بخيالها لو الفريق ده لعب ضد ريال مدريد مثلاً إيه اللي ممكن يحصل؟ و تخيلوا كده إزاي تشيلسي و هو بيعلم فرقة (زين الدين زيدان) الأدب .. مع بداية الموسم اللي إحنا فيه و ناس كتير سواء من اللي بتحب تشيلسي أو اللي مش بيطيقوه كانوا مستنيين يشوفوا الفريق حيبقي عامل إزاي .. بس أعتقد إن كتير مكنوش يتوقعوا اللي حصل ده.

أي نادي في الدنيا فيه مشاكل .. برشلونة فيه مشاكل .. أرسنال فيه مشاكل .. بس مشاكل عن مشاكل تفرق علي حسب حجم النادي .. يعني مثلاً نادي الزمالك دلوقتي في مصيبة مش في مشكلة .. بس الغريب في نادي تشيلسي إن صحيح مشاكله مش حرجة أوي بس تحسسك إن إما اللي بيديروا النادي (سوري في الكلمة) بهايم أو إنهم بيفهموا بس الحظ ضدهم و الدنيا مش ماشية معاهم بشكل غريب.

الإعلام مش سايب أي خناقة تحصل سواء في مجلس الإدارة أو جوه الجهاز الفني للفريق إلا و بيتكلم عنها .. فترة الإعداد مكنتش علي المستوي المطلوب .. عك مشفتوش في حياتي في بيع و شراء اللاعبين .. بس لو إنت من الناس اللي شايفه مشكلة نادي تشيلسي إن بيديره شوية بهايم فأكيد دي بهايم مختلفة عن أي بهايم شفتها في حياتك قبل كده لإن دول شوية بهايم قدروا إنهم يفوزوا بالPremier League الموسم اللي فات و صرفوا 135 مليون جنيه إسترليني علي شراء لاعبين الموسم ده و برده و بعد كل ده المدير الفني بتاعهم اللي هو (أنتونيو كونتي Antonio Conte) حاسس إن الإدارة طعنته في ظهره و الناس كلها شايفه إن تشكيلة تشيلسي دلوقتي أضعف من إنها تبقي ضمن الأربعة الأوائل مش بقولك إنها تحافظ علي اللقب .. رغم إن النادي السنة دي زي ماقلتلك صارف علي شراء اللاعبين الجديدة حوالي 135 مليون جنيه إسترليني .. شيء لا يصدقه عقل علي رأي الست (شويكار).

برده لو إنت من الناس اللي شايفه إن مشكلة تشيلسي إن بيديره شوية بهايم و أنا شخصياً شايف كده برده فأنا لازلت عند كلامي إن دي بهايم مميزة مش زي البهايم بتاعتنا اللي بتدير الأندية المصرية .. يعني إنت عندك مهاجم زي (دييجو كوستا Diego Costa) الموسم اللي فات جابلك 20 جون و فعلياً هو السبب رقم واحد إنك كسبت الPremier League فبدل ما إدارة النادي تقعده علي حجرها و تطبطب عليه و تقوله طلباتك إيه يا عمري تلاقيهم مش عارفين يتكلموا معاه و بيتكلموا مع المحامين بتوعه عشان ميرفعش عليهم قضية .. إزاي إدارة النادي أو خلينا نقول البهايم اللي بيديروا النادي سابوا مشكلة (دييجو كوستا) تفلت منهم لحد كل ده؟ إزاي جريدة الDaily Mail البريطانية تقدر إنها تعرف إنه قاعد في بيت عيلته في مدينة ليجارتو Lagarto البرازيلية و تعمل معاه Interview و مفيش حد من مجلس إدارة تشيلسي كلف خاطره يروح يقعد مع اللاعب يتكلم معاه و يشوف مشكلته إيه و يحلها؟

بلاش .. يا شوية بهايم .. إيه اللي يخليكوا تبيعوا (نيمانيا ماتيتش Nemamja Matic)؟ .. دلوقتي ليه تخلقوا مشكلة مع (أنتونيو كونتي) و تبيعوا لاعب هو محتاجه قبل 3 أسابيع من بداية الدوري؟ أصل معني إنك تبيعه قبل بداية الموسم ب3 أسابيع إن اللاعب شارك مع الفريق في الماتشات الودية بتاعة فترة الإعداد؟ .. مش كده و بس .. لا إنت بايعه لنادي يعتبر منافس صريح لتشيلسي اللي هو مانشستر يونايتد في الوقت اللي (أنتونيو كونتي) أساساً بيشتكي إن تشكيلته ضعيفة و معندوش بدايل أو اللي بيسموه إن الفريق مفيهوش عمق Depth إن كل مركز مفيهوش إتنين مستواهم عالي أوي بينافسوا بعض علي مين يلعب أساسي.

فيه ناس عندها نظرية لطيفة أوي و لو النظرية دي صح ففعلاً هي اللي بتثبت إن اللي بيدير نادي تشيلسي هم شوية بهايم .. النظرية دي بتقول إن الإدارة وافقت علي بيع (نيمانيا ماتيتش) إنتقاماً أو خلينا نقول عشان تعلم (أنتونيو كونتي) الأدب .. دلوقتي سبب المشكلة بين  (دييجو كوستا) و بين النادي إن بعد ما الموسم اللي فات ما خلص كان اللاعب في معسكر منتخب إسبانيا لما جاتله رسالة علي موبايله من (أنتونيو كونتي) بيقوله فيها إنه مش حاطه في حساباته للموسم الجاي و حيبيعه .. طبعاً دي غلطة كبيرة من (أنتونيو كونتي) إنه إزاي يعمل كده و حتي لو إنت يا سيدي مش طايق (دييجو كوستا) فيه أسلوب تعامل محترم و محترف عن كده .. المشكلة إن اللي حصل ده خلي سعر (دييجو كوستا) يقل جامد في حالة إن تشيلسي حب يبيعه لإن ده لاعب مغضوب عليه و المدير الفني مش بيلعبه فأنا إيه اللي يخليني كنادي تاني لما أجي أشتريه أدفع فيه فلوس كتير في لاعب أساساً قاعد علي الدكة و معندوش لياقة المباريات .. و لإن إدارة تشيلسي زي ما قلنا شوية بهايم مش بتفكر إلا في الفلوس فهم قالوا إنهم يبيعوا ب(نيمانيا ماتيتش) ب40 مليون جنيه إسترليني اللي هو فرق السعر بتاع أي بيع محتمل ل(دييجو كوستا).

علي الناحية الثانية فيه ناس شايفه إن كل الكلام ده كدب و إفتراء و إن إدارة تشيلسي بيديرها ناس بتفهم أوي و مش بهايم و إنهم لما بيبيعوا لاعب فهم بيبيعوه عشان يحققوا أعلي ربح من غير ما يهزوا إستقرار الفريق .. طيب لنفترض إنك من الناس دي ممكن تفهمني حاجه:

لو كلامك صح .. ليه إدارة تشيلسي باعت (نيمانيا ماتيتش) رغم إن كلنا عارفين إن  (أنتونيو كونتي) مكنش موافق؟ .. اه معاك إنه مكنش شايف إنه حيبقي هو لاعب الإرتكاز الأساسي في الفريق خصوصاً بعد ما إشتروا (تيمو باكايوكو Tiemoue Bakayoko) من نادي موناكو بس برده (أنتونيو كونتي) كان شايف إن مع ضعط مباريات الPremier League و الChampions League فهو كان حيبدل ما بينهم عشان يريحهم و يبعد عن دماغه صداع الإصابات و الإرهاق .. بلاش .. يا سيدي حتي لو حتبيع (نيمانيا ماتيتش) تقوم بايعه لمنافسك المباشر مانشستر يونايتد؟

حتقولي ما هي حصلت قبل كده .. حقولك أمين .. صح حصلت قبل كده لما تشيلسي باع (خوان ماتا Juan Mata) لمانشستر يونايتد بس الفرق إن (جوزيه مورينيو Jose Mourinho) اللي كان وقتها المدير الفني لتشيلسي قال قدام الناس كلها إن قرار البيع كان قرار إدارة النادي مكنش قراره هو بس رغم كده هو معترضش و مطلعش يشتكي في الإعلام .. الفرق إن كلنا عارفين إن (أنتونيو كونتي) مش عاجبه القرار .. و ده بيخلينا قدام سؤال مهم و ياريت لو إنت من مشجعي تشيلسي تحاول تلاقيلي إجابة: هو مين اللي بيحدد صفقات البيع و الشراء في النادي الغريب ده؟

مين اللي بيوافق علي الإعارات الكتير بشكل مش منطقي للاعبين الشباب اللي عمالين يتخرجوا من أكاديمية النادي؟ .. أكاديمية نادي تشيلسي بتخرج لاعبين أكتر ما كليات حقوق بتخرج محامين و كلهم بيطلعوا إعارات لأندية تانية .. مين اللي قال إنهم يشتروا (ألفارو موراتا Alvaro Morata)؟ و هل هم كانوا حاطين عنيهم عليه من الأول عشان يلعب جنب (دييجو كوستا) ولا هم إشتروه كبديل ليه؟

كل ده بيحطنا قدام واقع إن عشان إدارة تشيلسي بيديرها شوية بهايم فحتلاقي إن أداءهم مش مستقر .. موسم يكسبوا الPremier League الموسم اللي وراه ينافسوا علي البقاء .. موسم يكسبوا الChampions League .. الموسم اللي وراه يمشوا المدير الفني و يبعدوا خالص عن أوائل الترتيب .. كل ده سببه إن دي إدارة مش بهايم زي ما إنت متخيل قد ما هي إدارة كل اللي يهمها الفلوس .. دي إدارة عندها أكاديمية ناشئين محترمة أوي بس مش بتتعامل مع خريجيها بنفس طريقة تعامل برشلونة مع أكاديمية لاماسيا La Masia إنها تعتبر مصنع تفريخ للاعبين يلعبوا في الفريق الأول إنما عمالين يبيعوا و يطلعوا إعارة للاعبين اللي بيتخرجوا عشان يجيبوا فلوس .. بمجرد ما يبقي عندهم لاعب كويس فيه نادي ممكن يشتريه بسعر حلو يقوموا بايعين علي طول .. دي إدارة مبيفرقش معاها غالي ولا حبيب .. ممكن يغيروا المدير الفنيين كل سنة ولا يفرق معاهم .. المهم إن ميزانية النادي تفضل تجيب فلوس.

علي فكرة أوعي تفتكر إن (أنتونيو كونتي) مكنش عارف كده كويس .. قبل ما الموسم ده ما يخلص هو عدل عقده مع النادي .. ناس كتير تخيلت إنه جدد عقده .. لا هو مجددوش .. هو عدله عشان يزودوا مرتبه بس فضل عقده مرتبط بنفس عدد السنين .. ده رجل شاف حتي قبل ما الموسم ما يبدأ إن حيبقي فيه مشاكل كتير بس مرضاش إنه يمشي بدري و يضيع كل الشغل اللي عمله الموسم اللي فات فقرر إنه يكمل بس يضمن حقه المادي .. رأيي إن لا إدارة تشيلسي و لا (أنتونيو كونتي) بهايم .. دي ناس بتفهم أوي بس إحنا اللي مكناش فاهمين هم بيفكروا إزاي.

المصدر:
مقالة بعنوان Chelsea bosses rarely get to leave as winners in Roman Abrahimovic era نشرت في جريدة The Daily Mail البريطانيه و كتبها رئيس القسم الرياضي في الجرنان (مارتن صامويل Martin Samuel) و ده لينك المقالة الأصلية:
http://www.dailymail.co.uk/sport/football/article-4787222/Chelsea-bosses-rarely-leave-winners-Roman-Abramovich.html