الإتفاق النووي الإيراني .. بين واقعية (أوباما) و غباء (ترامب).

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/x2xangktcltu

موضوعنا النهاردة اللي حنتكلم عنه هو الإتفاق النووي الإيراني اللي هو واحد من أكثر المواضيع السياسية اللي حصل فيها فتي و هبد في الفترة اللي فاتت .. الكلام اللي إتقال في الإعلام و كتير مننا عارفه إن الرئيس الاميريكي (دونالد ترامب Donald Trump) قرر إن أميركا حتنسحب من الإتفاق ده و غير كده محدش عارف حاجة وهي دي المشكلة اللي حنحاول نفهمهالك في المقالة دي عن طريق إننا نجاوب علي 3 أسئلة:

• يطلع إيه الإتفاق النووي الإيراني ده واللي بيتسمي بره Iran Deal؟
• وليه (ترامب) قرر إن أميركا مش حتكمل فيه؟
• وإيه اللي ممكن يحصل بعد كده؟

 بس في الأول خلينا نبدأ معاك إننا نشرحلك الموضوع ده من بره لجوه من غير ما ندخلك في تفاصيل كتير ممكن تشتتك و تخليك مش مجمع أوي اللي بيحصل .. خلينا نبدأ بملخص سريع لتاريخ العلاقات اللي زي الزفت بين أميركا و إيران .. سنة 1953 وكالة المخابرات المركزية الأميريكية دبرت عملية إنقلاب للإطاحة برئيس الوزراء الإيراني المحترم جداً (محمد مصدق) الله يرحمه واللي كان جاي بإنتخابات برلمانية حرة و جابت مكانه (محمد رضا بهلوي) اللي هو شاه إيران واللي كان حبيب الأمريكان لدرجة إنهم إدوله أسلحة بالهبل و كمان إدوله مفاعل نووي ودي حاجة مبتطلعش إلا للغاليين أوي علي قلب الأمريكان .. سنة 1979 حصلت الثورة الإسلامية اللي أطاحت بالشاه و من ساعتها و إيران هي جمهورية إسلامية بتحكمها المؤسسة الدينية الشيعية اللي مبتكرهش في حياتها قد أميركا .. ده  شرح مبسط لدرجة التفاهة ينفع لطلبة KG عشان تفهم ليه لما الأمريكان يسمعوا اسم إيران كل اللي بيفكروا فيه هو مكان الناس اللي فيه مربيه دقنها و بتحرق العلم الأمريكي وهم بيهتفوا الموت لأميركا؟

بس إيران مش كلها كده .. إيران مش كلها ناس بدقن بتسب و تلعن في سلسفين أميركا .. إيران فيها طبقة متوسطة كبيرة متعلمة و أراءها السياسية ليبرالية بشكل ممكن يصدمك انت شخصياً .. وحتي الرئيس الإيراني (حسن روحاني) يعتبر لو قست سياساته علي المعايير الإيرانية فالرجل ده معتدل و منفتح علي الغرب كتير عن اللي سبقوه يمكن أقربهم (محمود أحمدي نجاد) .. خليني أقربهالك بإن الفرق بين الرئيس الإيراني الحالي (حسن روحاني) وبين اللي قبله (محمود أحمدي نجاد) هو زي الفرق بين (محمود طاهر) رئيس الأهلي السابق اللي محدش كان بيسمع اسمه من هدوءه و بين (مرتضي منصور) .. بس يمكن الحاجة اللي خلت الإيرانيين و الأمريكان يقعدوا مع بعض من الأساس عشان يمضوا علي الإتفاق النووي ده مكنش برنامج إيران النووي قد ما كانت العقوبات الإقتصادية المفروضة علي إيران.

اللي حصل إن لما إتعرف في بداية الألفينات إن إيران بتطور برنامج نووي عسكري الغرب جاتله حاله ذعر و قرر يفرض عقوبات إقتصادية كلبشت الإقتصاد الإيراني لإنها تقريباً شملت كل حاجة في الإقتصاد من قطاع البترول للطيران للبنوك .. فاللي خلي الإيرانيين يقبلوا يقعدوا علي الطرابيزة و يمضوا علي الإتفاق هو إنهم كانوا عايزين يشيلوا شوية من العقوبات الإقتصادية دي و ده اللي حصل فعلاً .. أميركا و بريطانيا و فرنسا و ألمانيا و الإتحاد الأوروبي و روسيا و الصين كلهم قعدوا مع إيران و إتفقوا علي إن عقوبات محددة كانت مفروضة علي إيران حتتشال  .. أظن السؤال دلوقتي طب هو إيران قدمت إيه في المقابل؟

بالصلاة علي النبي كده الإتفاق بيمنع الإيرانيين إنهم يخصبوا اليورانيوم للنسبة اللي بتسمح لتحوليه لسلاح نووي اللي هي فوق ال 3.67%  لمدة 15 سنة مع العلم إنك عشان تعمل قنبلة نووية فانت علي الأقل محتاج يورانيوم مخصب بنسبة تتعدي ال90%  .. كمان حيقللوا عدد أجهزة الطرد المركزي في المفاعلات النووي بتاعتهم من 19,000 ل5,060 بس .. الخلاصة إن الإتفاق ده بعد ما إتمضي خلي إيران بدل ما كانت محتاجه يدوبك كام شهر عشان تعمل قنبلة نووية فهي كده محتاجه علي الأقل خالص سنة لإنهم قبلوا إنهم يقللوا من كم اليورانيوم المخصب اللي عندهم بنسبة 98% .. بمعني إن الإتفاق ده خلي إيران عشان تعمل قنبلة نووية زي ما كده أقولك عايزك تسكر لما تشرب إزازة بيرة ستيلا نصها مية ونصها بيرة .. مش كده وبس .. الإتفاق كمان حاطط قواعد رقابية صارمة عشان يتأكدوا إن إيران مبتلعبش بديلها ولو حصل إن إيران غشت فتاني يوم العقوبات الإقتصادية حترجع تتطبق من أول و جديد.

رغم كل ده ففيه ناس كانت شايفه إن Iran Deal كانت مفيدة لإيران أكتر من الغرب .. عندك واحد زي رئيس الوزراء الإسرائيلي (بنيامين نتنياهو) قال عليها إنها غلطة لا تغتفر وحتي جوه أميركا اللوبي اليهودي كان بيعمل إعلانات بتشتم في الإتفاق واللي عملوه و حتي المتشددين الإسلاميين في إيران كانوا معترضين علي الإتفاق و شايفينه مجحف في حق إيران لدرجة إن لما وزير الخارجية الإيراني (جافاد ظريف) حضر جلسة إستماع في البرلمان فيه عضو في البرلمان من المقربين للمرشد الأعلي للثورة الإسلامية (أيه الله علي خامنئي) قاله لو داعش بكره جت دخلت بيوتنا حتكون انت السبب .. تخيل كده لو وزير الخارجية بتاعنا وقف في البرلمان و حد قاله لو داعش دخلت بيوتنا حتبقي انت السبب .. تخيلت؟.

 مبدأياً لازم تكون فاهم إن من أول يوم إستلم فيه (ترامب) الرئاسة وهو واخد موقف متشدد أوي من إيران .. معاك و أبصملك بالعشرة إن إيران سبب لمشاكل كتير في الشرق الأوسط يعني لولا دعمها للحوثيين لكانت اليمن إستقرت من زمان و لولا دعمها ل(بشار الأسد) مكنتش الحرب الأهلية السورية كملت السنين دي كلها ولولا دعمهم لحزب الله لكانت لبنان دولة علي الاقل عارفه تعيش مش خايفة من كابوس رجوع الحرب الأهلية تاني .. كل ده انا معاك فيه .. المشكلة إن المنطق بيقول لو انت ناوي تبقي واخد موقف متشدد من إيران وإن رأيك هو إن الإتفاق النووي اللي إتعمل ده مش في مصلحة أميركا وإنه محتاج يتراجع فده معناه إنك أساساً شايف إن الإتفاق النووي ده كان كويس بس محتاج يتعدل .. فكر فيها كده .. معني إن (ترامب) يقول الIran Deal دي محتاجة تتراجع هو إن الشغل اللي عملته إدارة (أوباما) إلي حد ما كويس بس محتاج يتظبط شوية وهي دي النقطة اللي عمر ما (ترامب) حيقولها لإنه بإختصار جاي عشان يعمل Control+Shift+Delete لكل حاجة عملتها إدارة (أوباما).

تاني .. (ترامب) لما قرر إنه يسحب أميركا من الIran Deal سببه إن الرجل ده جاي يدمر كل حاجة عملها (أوباما) سواء صح أو غلط .. كل قوانين حماية البيئة اللي عملها (أوباما) جه (ترامب) و لغاها .. قانون التأمين الصحي اللي إتسمي علي اسم (أوباما) اللي هو Obamacare نجي من الموت علي إيد (ترامب) بمعجزة إلهية .. (ترامب) معندوش مشكلة إنه يخلي علاقه أميركا بحلفاءها ألمانيا و فرنسا و بريطانيا تبقي زي الزفت وإنه يضعف موقف التيارات السياسية المعتدلة في إيران وكمان يدخل أميركا في مواجهة مفتوحة مع النظام الإيراني في مقابل إنه يتقال عليه جوه أميركا إنه الرجل اللي جه عشان يدمر سمعة (أوباما) .. رغبة (ترامب) اللي أحياناً بحس إنها مرض نفسي زي الوسواس القهري إنه يلغي كل حاجة عملها (أوباما) خلته مطالب يعمل إستراتيجية إنه بشكل ما يقدر يواجه إيران و كوريا الشمالية و كمان يتعامل مع الحرب التجارية مع الصين و أوروبا و المكسيك  لوحده من غير ما يكون له حلفاء يساعدوه .. بفكرك بس إن ده نفس الرجل اللي لحد دلوقتي مش عارف ينهي الخناقة اللي بينه و بين Stripper يعني رقاصة اللي خان مراته معاها و قال إيه عايزنا نصدق انه يقدر يحجم إيران .. ده رجل مش عارف يحل مشاكل بيته إزاي متوقع منه إنه يحل مشاكل البيت الأبيض؟

قول علي (أوباما) اللي انت عايزه بس الرجل ده وجهة نظره عن الشرق الأوسط إن المنطقة دي عمرها ما حينصلح حالها .. رأي (أوباما) إن دي منطقة ربنا إبتلاها بميكس غريب من المصايب ما بين التشدد الديني للتعصب القبلي للنفط للفساد للتغيرات المناخية لسوء الإدارة بتاعة الحكومات لحد ما وصل الحال إن حسب رأي (أوباما) إن الإصلاح من بره عمره ما حيحصل ولازم الإصلاح يجي من جوه .. بعد 8 سنين من حكمه (أوباما) وصل لإقتناع إن كل قادة الشرق الأوسط هم كلهم شوية حرامية في بعض سواء بقي حكام العرب أو إيران أو حتي إسرائيل .. ده إنعكس علي سياسات (أوباما) نفسها اللي هي تقدر تلخصها بالمثل بتاع الضرب في الميت حرام وده السبب اللي خلي (أوباما) يسعي عشان الإتفاق النووي الإيراني يتعمل .. هو كان مقتنع إنه مستحيل يجبر إيران إنها توقف برانامجها النووي و مستحيل يقدر يطيح بنظام الحكم هناك عشان كده قال بما إن الجراحة مش نافعة فخلينا نقضيها مسكنات.

الإتفاق النووي الإيراني في أبسط صورة هو إن إيران حتبطل تسعي تعمل قنبلة نووية في مقابل رفع شوية من العقوبات الإقتصادية المفروضة عليها علي أمل إن يمكن مع الوقت إيران تبطل سياساتها الخارجية اللي عامله مشاكل بس ده كان أمل جه يبقي كتر خيرهم مجاش يبقي مش مشكلة مكنش هو ده المطلوب أصلاً .. أيا كان رأيك في إيران و أميركا بس اللي انت محتاج تفهمه إن Iran Deal دي كانت معجزة دبلوماسية .. انت قدرت تقنع الإيرانيين إنهم لمده 15 سنة يبطلوا خالص أي محاولات لصنع القنبلة النووية وفعلاً الناس دي بقالهم أكتر من سنتين شغالين زي الكتاب ما بيقول وده اللي الوكالة الدولية للطاقة النووية نفسها بتقوله.

علي الناحية الثانية (ترامب) و الفريق بتاعه عايزين لبن العصفور .. إذا كانت فلسفة (أوباما) هي خلينا نعمل اللي نقدر عليه و لا يكلف الله نفسا إلا وسعها فتلاقي إن فلسفة الباشاوات اللي ماسكين البيت الأبيض دلوقتي هي إن إحنا عايزين نمنع إيران إنها تطور قنبلة نووية و عايزينها توقف برنامج الصواريخ الباليستية بتاعها و كمان توقف كل محاولاتها لنشر نفوذها في الدول العربية السنية ومفيش مانع يعني لو إن النظام الإيراني يمشي و نجيب مكانه نظام تاني .. اللي هو ناس تحسهم عايشين في ميه البطيخ .. اللي يضحك إن الناس بتوع الإدارة الأميريكية اللي حول (ترامب) لما بيطلعوا في الإعلام يتكلموا عن أسباب ليه هم كارهين الإتفاق النووي ده تلاقيهم بيتكلموا في كذا نقطة كلهم غلط  وكلها كذب.. يعني مثلاً:

• تلاقي (ترامب) يطلع يقولك أصل الإتفاق بيقول إن الإيرانيين يقدروا يفتشوا علي نفسهم اللي هو كده زي ما تكون في لجنة إمتحان وتصحح لنفسك .. الحقيقة إن ده مش حقيقي .. الإيرانيين مش من حقهم يفتشوا علي نفسهم والطرف اللي من حقه يفتش في المفاعلات النووية الإيرانية و يمضي علي إن إيران ماشية زي الكتاب ما بيقول هي الوكالة الدولية للطاقة الذرية ودي مؤسسة دولية تابعة للأمم المتحدة والناس دي طلعت 10 تقارير كلهم بيقولوا إن إيران ماشية علي عجين ميلخبطوش.
• كذبة تانية برده بيقولها (ترامب) إن لو مثلاً الأمريكان شافوا حاجة مش عاجباهم في مفاعل نووي معين فهم بيقدموا طلب يدخلوا المفاعل و الإيرانيين قدامهم 24 يوم عشان يخلصوا الورق بتاع دخول فريق التفتيش و (ترامب) راسه و ألف سيف إن الإيرانيين كفاية أوي بالنسبة ليهم إنهم يمحوا أي أثر لصنع قنبلة نووية في 24 يوم .. اللي هو إزاي مثلاً أمحي كل أثر لنظائر اليورانيوم اللي فترة نص العمر بتاعتها بتعدي 700 مليون سنة في أقل من 24 يوم؟ .. الكلام ده مبيطلعش غير من بق واحد مش فاهم الألف من كوز الدرة في الهندسة النووية.
• كذبة ثالثة و اللي في رأيي دي أم الأكاذيب كلها وهي إن الأخ (ترامب) بيقول إن ممكن إيران تفضل تشتغل في السر لمدة 15 سنة زي ما النمل كده بيفضل يشتغل طول الصيف عشان يجمع أكل يكفيه طول الشتا بحيث إن لو ربنا إدانا و إداهم طولة العمر بعد 15 سنة يكونوا قدروا عملوا قنبلة نووية .. اللي هو انت عايز تقوله يا أهبل يا ابن الهابلة طب ما انت لو لغيت الإتفاق النووي ممكن إيران تشتغل علي القنبلة النووية بتاعتها بكره الصبح .. يعني بدل ما كنت ممكن تخلي إيران إحتمال يبقي عندها قنبلة كمان 15 سنة بقي ممكن إيران يبقي عندها قنبلة نووية بعد أقل من سنة .. متنساش إن زي ما قلتلك في الأول إيران وافقت إنها تتنازل عن أكثر من 90% من اليورانيوم المخصب بتاعها وده كان كفيل إنها تعمل علي الأقل 10 قنابل نووية .. دلوقتي إيران معندهاش يورانيوم كفاية.

نرجع و نقول كمان مرة .. قول علي الإيرانيين كل اللي انت عايزه .. قول عليهم شيعة أنجاس .. قول عليهم كفرة ولاد كلب .. أو قول عليهم أبطال واقفين في وش أميركا و إسرائيل .. أيا كان رأيك في الإيرانيين انا مش جاي هنا أقولك انت صح ولا غلط بس بلاش تغلط في حق نفسك و تقول إن تدخل إيران في شئون الدول العربية وإن فيه 4 عواصم عربية فعلياً تحت سيطرة إيران اللي هم بيروت و بغداد و صنعاء و دمشق كان بسبب إن الإيرانيين بقي معاهم فلوس بعد ما الإتفاق النووي الإيراني إتمضي و العقوبات الإقتصادية إتشالت زي ما الناس بتوع (ترامب) بيقولوا .. نجاح إيران في إنها توقع الدول العربية في بعض مش سببه قوه إيران قد ما سببه ضعف العرب.

ده حيخلينا نروح للسؤال الثالث و يمكن أهم سؤال فيهم اللي هو إيه اللي حيحصل بعد كده؟

الحقيقة إن (ترامب) زاول نفسه بشكل غريب اللي هو خلي الناس كلها بتسأل هو انت ناوي تطلع نفسك من المشكلة دي إزاي؟ .. هو حط نفسه في مواجهة مباشرة مع إيران بس هل هو متخيل إنه ممكن يستخدم القوات المسلحة الأميريكية ضد إيران؟ بالتأكيد لا .. هل هو متوقع إن حلفاءه الأوروبيين حيقفوا معاه في أي حاجة ضد إيران؟ بالتأكيد برده لا .. فأظن كلنا دلوقتي بنسأل طب هو حضرتك إنسحبت من الإتفاق النووي ده ليه؟ وإيه اللي انت إستفدته؟

صدقني لو قلتلك إن فعلياً (ترامب) مش عارف إجابة السؤال ده .. الرجل ده بيفكرني بمشهد في فيلم The Dark Knight لما الجوكر بيقول ل(هارفي دينت Harvey Dent) في مشهد المستشفي .. Do you see me as a guy with a Plan? I just do things .. وده ملخص السياسة الخارجية بتاعة (ترامب) وهو إنه رجل بمنتهي البساطة Just does things .. حتي لو إفترضنا جدلاً يعني إن بقدرة قادر النظام الإيراني إنهار و قامت ثورة شعبية ضد (أيه الله علي خامنئي) .. هو ده مش حيحصل بس لنفترض إنه حصل .. ممكن حد يهبدلي هبدة كده و يقولي مين اللي حيحكم بدالهم؟ .. اللي إتعلمناه من ثورات الربيع العربي إن لما ديكتاتور بيمشي مبيجيش وراه نظام ديموقراطي إنما بيجي وراه ديكتاتور تاني بس لابس بدلة عسكرية .. هل ده اللي إحنا عايزينه يحصل في إيران؟ .. هل المنطقة مستحملة إن إيران تبقي سوريا الجديدة؟

الIran Deal مكنتش بين أميركا و إيران بس لإن فيه 6 كيانات تانية اللي هم بريطانيا و ألمانيا و فرنسا و الإتحاد الأوروبي و روسيا و الصين و كلهم مش ناويين ينسحبوا من الإتفاق ولا يغيروا أي كلمة فيه .. المنطق بتاعهم لو انت مضايق من بنود الIran Deal هات حاجة تانية تحل محلها بس مينفعش تقول انا مش عاجاباني الIran Deal وانت معندكش بديل .. المشكلة الأكبر إن (ترامب) محاوط نفسه بشوية متخلفين عقلياً زي مثلاً وزير خارجيته اللي كان مدير CIA (مايك بومبيو Mike Pompeo) اللي في 2017 طلع قال إنه عارف إن إيران بتغش بس هو مش عارف إزاي وده كلام أهبل مينفعش يطلع من حد كان ماسك أكبر جهاز مخابرات في العالم .. ده بالضبط زي لما تكون متجوز و مراتك تقولك انا حلمت بيك وانت بتخوني قولي بقي هي مين اللي بتخوني معاها دي في الحلم .. واحد تاني زي (جون بولتون John Bolton) مستشار الأمن القومي بتاعه .. صحيح (جون بولتون) قدم إستقالته بس ده واحد كان من أكثر الناس اللي بتنتقد Iran Deal اللي وصل به كرهه ليها إنه شبهها بإنك زي ما تحط روج علي شافيف خنزير و اللي في 2017 برده قبل ما يتعين كمستشار للأمن القومي (بولتون) شخصياً حضر مؤتمر للمعارضة الإيرانية في باريس و قال كلمة ختمها إن علي أخر السنة الجاية اللي هي 2018 حتكون أميركا دخلت في حرب مع إيران و وقعت النظام الإيراني.

مشكلة إنسحاب أميركا من الإتفاق النووي هو مش بس إنه حيخلي الطبقة الوسطي الإيرانية تبدأ هي كمان تكره أميركا .. سيبك من ده .. إنسحاب أميركا حيهز مصداقيتها قدام العالم .. إيه اللي يخلي كوريا الشمالية تتكلم مع الأمريكان من الأساس وهم لسه مقطعين الإتفاق اللي عملوه مع الإيرانيين من 3 سنين؟ ..  فكرة إن الإتفاق النووي الإيراني يقع دي لوحدها كفيلة إن إيران ترجع تاني تطور من مشروعها النووي و ساعتها هي و إسرائيل حيتحطوا قدام بعض في حرب حتحصل حتحصل .. انا شخصياً معنديش إجابة علي أسئلة كتير من اللي انا عرضتها أو اللي بتدور في دماغكم بس اللي أقدر أقوله هو إن ربنا يستر علينا.

المصادر:
مقالة بعنوان Trump’s Dream Come True: Trashing Obama and Iran in One Move نشرت في جريدة The New York Times الأميريكية وده لينك المقالة الأصلية:
https://www.nytimes.com/2018/05/15/opinion/trump-obama-legacy-trashing.html?rref=collection%2Fcolumn%2Fthomas-l-friedman
 حلقة من برنامج Last Week Tonight with John Oliver بيتعرض علي قناة HBO وده لينك الحلقة علي YouTube عشان لو حبيت تتفرج عليها:
https://www.youtube.com/watch?v=5xnZ_CeTqyM