موضوعنا النهارده اللي حنتكلم عنه هو البني ادم اللي قدامك في الصوره .. ده في حاله انك متعرفش هو يبقي مين فده يبقي (بنيامين نتنياهو Benjamin Netanyahu) رئيس وزراء اسرائيل و سبب اننا حنتكلم عنه هو ان الرجل ده بقاله فتره عمال يعمل في مصايب اخرها ازمه المسجد الاقصي الاخيره اللي اكيد سمعت عنها في الاخبار .. طريقه تعامل (نتنياهو) مع ازمه المسجد الاقصي كانت من وجهه نظر الاسرائيليين غلط لدرجه ان استطلاعات الراي بتقول ان تلتين الاسرائيليين بقوا مش راضيين عن طريقه حكم (نتنياهو) .. زمان كانت الناس بتبص ل(نتنياهو) علي انه ثعلب او ذئب يهودي الخداع بيجري في عروقه مع الدم بس اليومين دول تحس انه من كتر الاخطاء اللي بيعملها بيلبس نفسه في الحيط .. عشان تفهم انا قصدي ايه خليني اكلمك عن 3 ازمات كلها حصلت في وقت قريب من بعضها و كلهم ليهم علاقه ببعض و الثلاث ازمات طريقه تعامل (نتنياهو) معاهم تحس ان شخصيه الملك (جيوفري باراثيانJoffrey Baratheon ) من مسلسل Game of Thrones هو اللي كان بيحكم اسرائيل:
الازمه الاولي: ازمه الجندي (ايلور ازاريا Elor Azaria):
ده يا سيدي يبقي جندي في جيش الدفاع الاسرائيلي اتقبض عليه بتهمه القتل العمد لمواطن فلسطيني كان شايل سكينه و بينفذ عمليه طعن في منطقه الخليل السنه اللي فاتت واتقبض عليه وكان متكتف فعلا بس الاخ (ايلور ازاريا Elor Azaria) اطلق النار عليه وقتله بدم بارد .. السنه اللي فاتت لما الناس كلها عرفت عن طريق وسائل الاعلام باللي حصل كان (نتنياهو) من الناس اللي كانت واقفه في صف الجندي (ايلور ازاريا Elor Azaria) وكان شايف انه معملش حاجه غلط .. رئيس وزراء دوله واقف في صف جندي قتل واحد مقبوض عليه بدم بارد .. الاهم ان لما المحكمه العسكريه الاسرائيليه حكمت علي الجندي ده بالسجن سنه ونص طلع (نتنياهو) قال ان المفروض يتم العفو عن (ايلور ازاريا Elor Azaria) لانه تاني من وجهه نظر (نتنياهو) معملش حاجه غلط .. يوم الاحد 30 يوليو اللي فات محكمه الاستئناف العسكريه رفضت الطعن اللي قدمه (ايلور ازاريا Elor Azaria) و اكدت الحكم عليه بالسجن سنه و نص .. طبعا الحكم ده فيه ناس شافته علي انه رساله واضحه من القضاء العسكري الاسرائيلي لرئيس الوزراء بانه ياريت ميتدخلش في شغلهم وانه مش وظيفته انه يقول مين ياخد براءه ومين يتسجن و رغم الحكم النهائي ده طلع (نتنياهو) برده يقول ان المفروض (ايلور ازاريا Elor Azaria) ياخد براءه.
انت لو مكان (نتنياهو) وفعلا عايز (ايلور ازاريا Elor Azaria) ياخد براءه كنت يا اهبل تستني لحد ما المحكمه تحكم و تستني لحد ما الاستنئاف يخلص ولو الطعن اترفض تقوم انت بصفتك رئيس الوزراء تتدخل و تعفو عنه .. بس مش من اول المحاكمه ما بدات و انت واقف الند بالند للقضاء .. ده لو كان (نتنياهو) دلوقتي هو (نتنياهو) بتاع زمان بس زي ما قلتلك تحس انه اليومين دول فيه حاجه غلط مبقاش مركز و صاحي زي الاول.
الازمه الثانيه: ازمه المسجد الاقصي:
الازمه دي ناس كتير نست او متعرفش ازاي حصلت .. اللي حصل ان فيه اتنين جنود اسرائيليين اتقتلوا بالرصاص .. رد فعل (نتنياهو) انه امر بتركيب بوابات كشف عن المعادن في ساحه المسجد الاقصي وده القرار اللي خلي الدنيا تولع .. انت كمواطن مصري ممكن متكونش فاهم اوي هي الدنيا ولعت ليه؟ طب ما يركبوا بوابات كشف عن المعادن هي فيها ايه يعني؟ .. صدقني سؤالك منطقي وخليني افهمك هي المشكله فين:
حضرتك القدس الشرقيه بما فيها المسجد الاقصي اسرائيل احتلتها بعد حرب 5 يونيو 1967 بس الاسرائيليين عملوا اتفاق مع الاردنيين هو ان الاردنيين هم اللي يتولوا مسئوليه تامين المسجد الاقصي .. يعني اي اجراءات امنيه بتعملها اسرائيل تتعلق بالمسجد الاقصي لازم تحصل بالتنسيق مع الاردنيين .. طبعا الاردنيين محدش قالهم بان الاسرائيليين حيركبوا بوابات كشف عن المعادن .. الاردنيين استغلوا النقطه دي و شحنوا الشارع ان الاسرائيليين بقوا شغالين من دماغهم .. من ضمن الناس اللي وقفت في صف الاردنيين كان رئيس السلطه الفلسطينيه (محمود عباس ابو مازن) اللي لاول مره من ساعه توليه الرئاسه سنه 2005 قرر انه ميلتزمش باي اجراءات لتامين المسجد الاقصي كان اتفق عليها قبل كده مع الاسرائيليين .. الدول العربيه اللي كانت بدات تتحالف مع اسرائيل ضد ايران فجاه بعتت رسايل تهديد لاسرائيل بانها بتلعب بالنار .. فجاه الدنيا ولعت والمسلمين حاوطوا المسجد الاقصي وحالفين ميمشوش الا لما اسرائيل تشيل بوابات كشف المعادن و كاميرات المراقبه اللي ركبوها في المسجد الاقصي .. كل ده حصل بسبب قرار غبي خده (نتنياهو) وتاني يمكن لو كان (نتنياهو) بتاع زمان هو اللي بيحكم دلوقتي مكنش عمل الغلطه المتخلفه دي.
الازمه الثالثه: ازمه الحارس الاسرائيلي اللي قتل اتنين اردنيين في العاصمه عمان:
في الوقت اللي (نتنياهو) لقي نفسه فعليا لبس في الحيط ربنا بعتله اللي ينجده .. اللي حصل ان فيه ضابط حراسه اسرائيلي اطلق النار علي اتنين اردنيين واحد فيهم حاول يعتدي عليه قام قتل الاتنين وقتل معاهم واحد ثالث كان معدي في الشارع صادف ان الثالث ده يبقي جراح ويبقي صاحب الشقه اللي الضابط الاسرائيلي ماجرها منه .. المهم ان الضابط الاسرائيلي هرب للسفاره الاسرائيليه في عمان واللي يدوبك خلال ساعات كانت اتحاصرت بمئات الاردنيين الغاضبين اللي مكنوش عايزين غير ان ضابط الحراسه الاسرائيلي ده يتقتل .. طبعا الاردنيين حبوا ياخدوا بنط علي حساب (نتنياهو) وحلفوا ان الضابط ده مش خارج من السفاره الا علي السجن .. (نتنياهو) ملقاش قدامه حل عشان يرجع الضابط ده غير انه يعمل اتفاق مع الاردنيين انه يشيل بوابات الكشف عن المعادن اللي هو ركبها في ساحه المسجد الاقصي في مقابل ان الاردنيين يسيبوا الضابط الاسرائيلي ده يرجع .. وقبل ما تقول لنفسك ان باين (نتنياهو) القديم رجع و انه بدا يركز كده و يرسي .. اذا به بيعمل مصيبه انيل لما راح بنفسه استقبل الضابط الاسرائيلي لما رجع من الاردن وخده بالحضن وفيه صوره عندك ل(نتنياهو) وهو بياخد الضابط الاسرائيلي بالحضن بس لاسباب امنيه الاعلام الاسرائيلي موراش حد وش الضابط الاسرائيلي.
طبعا الملك (عبدالله) ملك الاردن معجبوش اللي شافه وضايقه جدا ان الضابط الاسرائيلي ده يتم استقباله استقبال الابطال .. يقوم الملك (عبدالله) حالف ان السفير الاسرائيلي شخصيا مهواش خارج من عمان الا لو الضابط الاسرائيلي ده اتقدم للمحاكمه .. بعدها الحكومه الاسرائيليه قالت انها حتحقق مع الضابط وطبعا لان الملك (عبد الله) حيبقي مركز مع التحقيق فمش حيبقي تحقيق صوري وممكن فعلا الضابط يتقدم للمحاكمه وساعتها القضاء الاسرائيلي مش حيبقي في دماغه انه يعمل خدمه ل(نتنياهو) بسبب الازمه الاولي اللي كلمتك عنها.
عندك 3 ازمات كان ممكن الثلاثه (نتنياهو) يتفاداهم خالص لو كان مركز شويه وراسي كده ودارس هو بيعمل ايه .. انما لانه كان عصبي ومش بيفكر ويحسسك بجد ان (جيوفري باراثيانJoffrey Baratheon ) هو اللي بيحكم فده خلاه يلبس في الحيط مش مره انما 3 مرات.
المصدر:
مقاله بعنوان Netanyahu loses his cool in a summer of crises نشرت في Website اسمه Bloomberg وده لينك المقاله الاصليه:
https://www.bloomberg.com/view/articles/2017-07-31/netanyahu-loses-his-cool-in-a-summer-of-crises
