الفساد و إسرائيل .. الفول من الفلافل و الفلافل من الفول.

الرجل اللي علي اليمين في الصورة ده يبقي (شاول إيلوفيتش Shaul Elovitch) و ده يبقي أكتر واحد بيملك أسهم في شركة إسرائيلية إسمها بيزيك Bezeq و دي عشان تفهم هي إيه فدي تبقي النسخة الإسرائيلية من شركة المصرية للإتصالات .. بمعني .. شركة بيزيك Bezeq تبقي هي محتكرة مجال خطوط التليفونات الأرضية و بالتالي هي المحتكرة لسوق الإنترنت في إسرائيل .. حاول تتخيل شركة المصرية للإتصالات ضربوها في الخلاط مع شركة TE Data اللي هي شركة We دلوقتي تطلعلك شركة بيزيك Bezeq.

المشكلة إن (شاول إيلوفيتش) و معاه ناس تانية من مجلس إدارة الشركة بيتحقق معاهم من قبل جهة إسمها لجنة الأمن و العملة و دي في إسرائيل تعادل مباحث الأموال العامة في مصر بتهمة التربح و الكسب الغير مشروع .. عشان مدخلكش في متاهات قانونية فخليني أبسطلك الموضوع شوية .. دلوقتي (شاول إيلوفيتش) بيملك أسهم في شركات إسرائيلية كتير و الشركات دي بتملك أسهم في شركة بيزيك Bezeq فاللي حصل إن شركة بيزيك Bezeq اللي بفكرك إن (شاول إيلوفيتش) بيملك أغلب أسهمها بس من تحت الطرابيزة راحت إشترت شركة الأقمار الصناعية الإسرائيلية  .. المشكلة إن أساساً (شاول إيلوفيتش) بيملك كمان حصة من أسهم شركة الأقمار الصناعية .. يقوم الأخ بايع شركة الأقمار الصناعية اللي هي بتاعته لشركة بيزيك Bezeq اللي هي بتاعته برده بسعر أكبر من سعرها الحقيقي عشان الأرباح تروح لجيبه .. المشكلة الأكبر إن الفضيحة دي مش بس ممكن تخلي (شاول إيلوفيتش) يترمي في السجن إنما كمان ممكن تجيب رجل رئيس الوزراء الإسرائيلي (بنيامين نتنياهو) و ده يبقي الرجل اللي علي شمالك في الصورة.

ليه (نتنياهو) ممكن يتجاب في الرجلين؟ .. الفكرة إن من حوالي 5 سنين إتقال للمواطن الإسرائيلي البسيط إستعد عشان انت حتعيش ما يسمي ثورة الفايبر Fiber Revolution و اللي وعد المواطن الإسرائيلي بكده كان (نتنياهو) شخصياً اللي كان وقتها مرشح نفسه لمنصب رئيس الوزراء يعني ده كان وعد إنتخابي منه بقاله 5 سنين .. الرجل ده و هو بيرشح نفسه في الإنتخابات عشان يخلي الشباب الإسرائيلي يروح ينتخبه قالهم إن كل كابلات الإنترنت في إسرائيل حتبقي فايبر و بالتالي سرعة الإنترنت في إسرائيل كلها حتتضاعف من غير ما الشاب الإسرائيلي يدفع مليم زيادة .. طبعاً وقتها الشباب الإسرائيلي فرح أوي و قال هيييييييه و إنتخبوه .. جري الشريط 5 سنين و تلاقي إن حلم ثورة الفايبر ده كان فنكوش و محصلش فيه أي تقدم ملحوظ .. مش كده وبس .. في الفترة اللي مباحث الأموال العامة في إسرائيل بتحقق مع (شاول إيلوفيتش) فيها كان اللي ماسك وزارة الإتصالات وقتها حزر فزر مين .. كان (نتنياهو) شخصياً .. (نتنياهو) في الفترة دي أجبر إنه يقدم إستقالته من الوزارة بعد ما ريحه الفساد بدأت تنتشر أوي و ناس كتير بقت متؤكدة إنه هو و (شاول إيلوفيتش) بقوا صحاب زيادة عن اللزوم و يمكن كمان طابخينها سوا.

لحد دلوقتي لسه محدش قدم ل(نتنياهو) إتهام رسمي بإن كان له علاقة باللي عمله (شاول إيلوفيتش) بس ده يخليك تسأل هو إيه اللي وصل السياسة في إسرائيل للوضع ده؟ و علي فكرة مش (شاول إيلوفيتش) رجل الأعمال الوحيد اللي متهم بقضايا فساد لإن غيره كتير أوي:

(نوحي دانكنير Nochi Dankner) و ده الرجل اللي تحس إنه كباره في نفسه كده .. الإكسلانس ده لحد 4 سنين فاتت كان حاجة كبيرة أوي في البيزنس في إسرائيل .. حاجة كده شبه (نجيب ساويريس) عندنا في مصر بس دلوقتي مقبوض عليه و إتحكم عليه في قضية تلاعب في الأسهم في البورصة و لسه مقدم طعن علي الحكم و سكته طويلة في المحاكم .. واحد تاني هو (أليعازر فيشمان Eliezer Fishman)  يوم 21 يونيو اللي فات برده القضاء الإسرائيلي حكم عليه بالإفلاس و شركاته كلها حتتباع و حيترمي في السجن هو كمان.

ده بالنسبة لرجال الأعمال .. بالنسبة للسياسيين الإسرائيليين بقي فالموضوع أنيل شوية .. فيه عندك 4 وزراء حاليين في الحكومة الإسرائيلية من ضمنهم (نتنياهو) شخصياً بيتحقق معاهم في قضايا فساد .. هم كانوا خمسة علي فكرة لو حسبت معاهم وزير الدفاع (أفيجادور ليبرمان Avigador Lierberman) بس الرجل ده نفد بجلده لما النيابة الإسرائيلية قالت إن مفيش أدلة كافية لإدانته رغم إن البوليس الإسرائيلي كان بيصوت إن الرجل ده مش بس لازم يتشال من منصبه كوزير دفاع إنما لازم يتحبس .. فوق ده كله واحد زي (إيهود أولمرت Ehod Olmert) الرئيس الإسرائيلي السابق اللي كان مسجون في قضايا فساد و لسه خارج قريب والList طويلة أوي لسياسيين و وزراء و محافظين إما أدينوا أو بيتحقق معاهم في قضايا فساد .. كل ده بيخلينا نسأل هو فيه إيه بيحصل في إسرائيل؟ هو الفساد هناك بقي فرة و إنتشرت في البلد كلها؟

فيه ناس علي فكرة شايفة إن ده حاجة كويسة .. شايفين إن ده لازم يخلينا نحيي الدولة الإسرائيلية بإعتبارها دولة قانون يعني مفيش حد أكبر من القانون و إن أي مسئول في الدولة معرض إنه يتحقق معاه و يتسجن كمان لو أدين بالفساد .. بس برده حتي لو ده كان رأيك بس لازم نفهم هو فيه إيه؟ و هل اللي بيحصل ده معناه إن الفساد هو اللي زاد أوي في إسرائيل ولا إن البوليس الإسرائيلي شايف شغله حلو أوي لدرجة إن مبقاش فيه قضايا فساد بتهرب من تحت إيده؟

الحقيقه ان الاجابه اللي انا شايف انها الصح هي ان مش ان البوليس شايف شغله حلو اوي ولا حاجه انما المشكله ان الفساد في اسرائيل زاد والسبب في كده في منتهي البساطه ان خلال العشرين سنه اللي فاتوا اسرائيل تحولت من دوله تقريبا كل مواطنيها متوسط دخلهم قريب من بعضه لدوله فيه فجوه رهيبه في متوسط الدخل بتاع مواطنيها .. الفجوه الرهيبه في متوسط الدخل بتيجي غالبا كنتيجه طبيعيه لتطبيق سياسه الخصخصه زي ما حصل في مصر ان الشركات الحكوميه اتباعت وبقت قطاع خاص اللي خلينا نكون صرحاء مع بعض بيدي مرتبات علي حسب المزاج و الواسطه و المحسوبيه (وده الكوكتيل اللي بينتج عنه الفساد) .. سياسه الخصخصه لو اتطبقت غلط زي ما حصل في مصر و بيحصل في اسرائيل حيؤدي ان فيه ناس زي (شاؤل ايلوفيتش Shaul Elovitch) اللي بيعرفوا يوصلوا بطرق غير شرعيه وفجاه تلاقي بني ادم حرامي معندوش ضمير ولا ذمه يبقي من اغني اغنياء البلد.

اكبر مشكله في اسرائيل هي ان السياسه هناك شغلانه في حد ذاتها .. بمعني .. عندك في اميركا مثلا اي حد بيفكر انه يشتغل في السياسه بعد ما يكون عمل قرشين كويسين في القطاع الخاص او انه قضي سنين من عمره شغال في الحكومه .. بس في اسرائيل انت ممكن تقرر اول ما تتخرج من الكليه انك عايز تشتغل في السياسه وده بيخلي اهم حاجه تفكر فيها مش انك تخدم الناس قد ما بيكون كل اللي بتفكر فيه انك تخدم نفسك .. مستوي الفساد في السياسه الاسرائيليه وصل لمرحله ان المواطن العادي بقي بيشكك ف نزاهه حكومته .. ده في حد ذاته نقطه مهمه اوي انك تكون عارفها.

المصدر:
مقاله بعنوان Tel Aviv Diary: Why Israel is So Corrupt? نشرت في مجله Newsweek الاميريكيه وده لينك المقاله الاصليه:
http://www.newsweek.com/tel-aviv-diary-why-israel-so-corrupt-627941