لينك التسجيل الصوتي للمقالة علي Sound Cloud:
https://soundcloud.com/user-112011687-312727988/cbma4em46d4g?si=233a904a735c45c6a7b90ab1f9b2d8e5&utm_source=clipboard&utm_medium=text&utm_campaign=social_sharing
مفيش طيار مقاتل ميعرفش مناورة كوبرا بوجاتشيف أو Pugachev Cobra اللي عندك في الصورة دي .. لو ليك حد تعرفه دخل كلية الطيران إسأله عن مين اللي عمل المناورة دي؟ و مين أول حد عملها؟ و حتلاقيه بيجاوبلك إن الطيارين الروس هم اللي إخترعوها .. ليه؟ .. أصل المناورة دي مش بتتعمل إلا علي الطيارات المقاتلة الروسي عشان قدرتها الرهيبة علي المناورة و خصوصاً الطيارة المقاتلة سوخوي-27 .. الطيارة دي في إيد طيار فاهم ممكن يعمل بيها شقلباظات تخليك تجيب اللي في بطنك و انت بتتفرج عليه .. زي ما انت شايف المناورة دي بمنتهي البساطة إن الطيار و هو طاير بيشد فرامل اليد .. انت بتخلي الطيارة تقف فجأة لدرجة إنها بتبقي عامله زي القلم الرصاص اللي بتوقفه علي المكتب بتاعك .. مين اللي عمل المناورة دي؟ و ليه؟ و إزاي بتتعمل؟ .. ده اللي حنحاول نجاوب عليه النهاردة بس الحقيقة اللي عايزك تعرفها كويس إن أبطال القصة دي مش روس .. لا خالص .. ولا أمريكان حتي .. دول عرب.
زي ما عندنا في مصر شوية ضباط إتفقوا مع بعض و غفلوا الملك و قلشوه عشان يحكموا هم فبرده عشان الدنيا دي جمعية و دايرة ففي سبتمبر 1961 شوية ضباط سوريين برده إتفقوا مع بعض و غفلوا (جمال عبدالناصر) الله يرحمه و عملوا إنقلاب عسكري عشان سوريا تنفصل عن مصر بعد ما كانوا متحدين مع بعض تحت إسم الجمهورية العربية المتحدة من فبراير 1958 .. الفكرة إن لما مصر و سوريا بقوا دولة واحدة متفهمش مين العبقري اللي هبد الهبدة العابرة للقارات بإن القوات الجوية السورية تتحل خالص و تخش تحت مظلة القوات الجوية العربية المتحدة .. ده معناه إن لما سوريا رجعت تاني تستقل عن مصر لقت نفسها محتاجة تبني القوات الجوية بتاعتها من الصفر .. متفهمش هل هي رخامه و لا عشان الجوازة إتفركشت فإحنا و السوريين إتخانقنا علي القايمة بس اللي حصل إن قيادة القوات الجوية السورية لقت نفسها معندهاش إلا سربين مقاتلات ميج-21 و 4 قاذفات إليوشين-28 اللي إسمها Ilyushin Il-28 و كام طيارة نقل .. اللي هي حاجة مينفعش أصلاً تسميها سلاح جو.
السوريين خدوا بعضهم و قعدوا يلفوا علي دول أوروبا عشان يدوروا علي بلد ترضي تديهم طيارات .. راحوا لفرنسا عشان يشتروا منها طيارات ميراج Mirage اللي بتصنعها شركة داسولت Dassault بس الفرنسيين رفضوا .. راحوا للإيطاليين عشان يشتروا منهم طيارات Fiat G.91 بس برده الطليان رفضوا .. السوريين ملقوش حل غير إنهم يروحوا للي مبيقولش لا لأي حد يقوله عايز سلاح .. السوفييت .. في يونيو 1962 السوفييت و السويين مضوا مع بعض إتفاق إن سوريا تاخد 34 طيارة MiG-21F-13.
أول غلطة عملتها سوريا لما بدأت تبني سلاح الجو بتاعها من جديد هي إنهم اختاروا الطيارين بالواسطة .. لو انت من عيلة كبيرة و ليك معارف كتير حتخش الكلية الجوية .. ملكش يبقي تقعد ساكت و منسمعش صوتك .. دي أول غلطة .. تاني غلطة و يمكن دي مش عيب منهم أوي هو إن عشان مكنش عندهم طيارين قدام يعلموا الطيارين الجداد فكان الطيارين السوريين اللي لسه بيتعلموا معندهمش مصدر للمعلومة إلا 30 خبير سوفيتي اللي جم مع الطيارات الMiG-21F عشان يدربوهم عليها .. الطيارين كانوا بياخدوا كلام الخبراء الروس ده كإنه قران نازل من السما .. بس زي ما بيحصل في أي حتة بيطلعلك طيار صغير زي الخازوق كده مبيسمعش الكلام و منفض لأي حد يقوله يعمل إيه و ميعملش إيه .. في حالة السوريين فالخازوق ده تمثل في طيار شاب إسمه (محمد منصور) الله يرحمه.
ده كان شاب من عيلة غنية جداً و ليها معارف كتير فتقدر تقول إنه كان ممكن يعمل أي حاجة هو عايزها و لو حد قاله إيه الهباب اللي انت بتعمله ده بيرد بمنتهي البرود هو انت متعرفش انا إبن مين .. بس يمكن أكتر حد كان سند في ظهر (محمد منصور) كان أخوه الطيار السوري اللي سوري في الكلمة يعني الفشيخ (فايز منصور) .. خناقة كل يوم (محمد منصور) ياخد طيارته MiG-21 يعمل بيها دريفتات في السما و الخبراء الروس يصوتوا و يروحوا يشتكوه للقادة بتوعه إن الطيار ده حيبوظ الطيارات و إن الطيارات مش متصممة عشان يتعمل بيها الشقلباظات دي.
بس الحقيقة دماغ (محمد منصور) مكنتش بس شاب فرفوش فانكي مبيحبش حد يقوله يعمل إيه و ميعملش إيه .. لا خالص .. دماغه كانت أكبر من كده .. المواجهات اللي قبل كده بين الطيارين السوريين و الإسرائيليين علمت (محمد منصور) إن لازم الطيارين السوريين يلاقوا مناورة يعملوها عشان يكسبوا الطيارين الإسرائيليين في الجو .. خليني بس أفكرك إن الفترة اللي انا بتكلم عنها اللي هي الستينات كانت المواجهات الجوية بين الطيارين كانت زي ما بتتسمي Dogfighting يعني خناقة كلاب و دي زي اللي انت شفتها في فيلم Dunkirk أو فيلم Pearl Harbour .. إتنين طيارين كل واحد معاه مدفع رشاش علي طيارته بيحاول يوقع الطيارة التانية و عشان أوقعها لازم أبقي وراها و أنشن عليها .. انت بتتكلم عن فترة ما قبل إختراع الصواريخ جو- جو .. (محمد منصور) كان بيتكلم عن إنه محتاج طريقة لو طيار إسرائيلي بيجري وراه فهو عايز يخلي فجأة الطيار الإسرائيلي يبقي قدامه عشان يعرف يوقعه.
في الأول خالص (محمد منصور) خد المنهج بتاع الطيارين السوفييت يقراه يشوف هم هناك بيعملوا إيه .. لقي أن الطيار السوفيتي بيتعلم إن لما يبقي طيار مقاتل وراك عايز يوقعك انت تبدأ تهبط بطيارتك هبوط مفاجيء كذا مرة و را بعض و فجأة تقوم مشغل الAfterburner و ده تقدر تسميه كده النوكس في عربيات السباق .. ده Option بيخلي الطيارة تحرق بنزين زيادة فجأة فبيدي للطيارة قوة دفع فجائية رهيبة .. لما انت تشغل Afterburner ده و تطلع لفوق فجأة فانت الطيار اللي وراك مبيلحقش يتصرف و بيطير هو من تحت منك لقدام .. تاني يوم (محمد منصور) خد طيارته و الكلام ده كان سنة 1967 و راح يجرب المناورة دي .. متفهمش إيه اللي حصل بس و هو يهبط فجأة زي ما المنهج بتاع الطيارين السوفييت قال فمقدمة طيارته مالت لقدام أوي زيادة عن اللزوم فلما الأخ شغل الAfterburner بدل ما طيارته تطلع لفوق لقي إن طيارته وقفت علي ديلها في الجو .. لسه الطيارة حتبدأ تخرج عن سيطرته ف(محمد منصور) لحق يسيطر عليها .. الحل اللي هو فكر فيه عشان يعمل المناورة دي هو إنه ينزل بطيارته لتحت فيخليها تميل بزاوية كبيرة .. بعد كده يشد الJoystick عليه عشان يخليها تطلع لفوق فجأة و في اللحظة دي يشغل Afterburner مش إنه يشغل Afterburner قبل ما يسحب Joystick عليه عشان يطلع لفوق .. الطيارين زمايله شافوا المناورة دي و إنبهروا بيها و قرروا يسموها مناورة السرعة صفر Zero Speed Maneuver .. بعدها قامت حرب يونيو 1967 و (محمد منصور) كان أنجح طيار سوري و قدر يوقع 4 طيارات إسرائيلية بس الحقيقة هو مستخدمش المناورة دي في الحرب عشان بس أكون واضح معاك.
سنة 1968 بعد الحرب ما خلصت كان الأردنيين بيعملوا شوية إصلاحات في قاعدة الأزرق الجوية و دي تبقي القاعدة الجوية الأهم اللي تحت إيدهم .. وقتها كانت الأردن إشترت طيارات F-104A Starfighter و مكنش ينفع الطيارين الأردنيين من السرب الملكي التاسع ميتمرنوش عليها بشكل مستمر .. الأردنيين إتفقوا مع السوريين إنهم يبعتوا السرب بالطيارات و معاهم إتنين طيارين باكستانيين ضمن برنامج تبادل طيارين بين الأردن و باكستان .. المهم .. الطيارين الأردنيين و معاهم الإتنين طيارين الباكستانيين راحوا سوريا و هناك شافوا (محمد منصور) و هو بيمرن الطيارين السوريين علي مناورة السرعة صفر .. الطيارين الباكستانيين إشتغلوا مع (محمد منصور) عشان يتقنوا المناورة و يخلوها تتعمل من غير أي أخطاء .. سنة 1969 سرب طيارين مصري بقيادة واحد إسمه (محمد عكاشة) راحوا سوريا ياخدوا دورة تدريبية و هناك شافوا المناورة دي و بلموا.
(محمد عكاشة) كلم (محمد منصور) يعلمه المناورة دي بس الطيارين الباكستانيين مرضيوش عشان كانوا خايفين إن (محمد عكاشة) يوري المناورة دي للهنود .. (محمد عكاشة) حلفلهم علي المصحف إنه مش حيدي سر الصنعة للهنود و إتعلم المناورة و جه مصر علمها للطيارين المصريين .. في الفترة قبل حرب أكتوبر كان فيه خبراء سوفييت كتير في مصر لو تفتكر و هم هنا شافوا (محمد عكاشة) بيعلم الطيارين المصريين اللي بيطيروا بطيارات MiG-21 المناورة دي و عجبتهم أوي و نقلوها لبلدهم و بقوا يتفشخروا بيها قدام العالم مع إنهم مش هم اللي عملوها .. أول مرة المناورة دي تتجرب في مواجهة جوية كانت في حرب أكتوبر في معركة المنصورة الجوية .. طيار مصري عملها في طيار إسرائيلي و لهذا بقي حديث أخر وقت تاني إن شاء الله.
المصدر:
مقالة بعنوان The Unknown Story of the Syrian MiG-21 Pilot Who Developed the Cobra Maneuver .. نشرت في مجلة The National Interest و ده لينك المقالة الأصلية:
http://nterest.org/blog/buzz/unknown-story-syrian-mig-21-pilot-who-developed-cobra-maneuver-72081
بس هو كدا يبقى اكتشفها بالصدفة مش “اخترعها”.