انا فاكر كويس أوي فرحة مشجعي الريال لما إتقالهم في مارس اللي فات إن (زين الدين زيدان) راجع عشان يمسك الفرقة تاني .. وقتها الSocial Media إتملت ببوستات من نوعية حنرجع ننيمكوا من المغرب يا أوروبا و إن أسياد Champions League راجعين .. قلنا ماشي المياه تكدب الغطاس .. لما (زيدان) رجع كان خلاص السيزون بيخلص و كان ريال مدريد معندوش إلا أخر 11 ماتش فاضلين فانا شخصياً تخيلت إن دي فرصة (زيدان) إنه يرجع يحيي اللاعيبه تاني و يورينا ريال مدريد بتاع زمان .. من ال11 ماتش دول هو خسر 4 ماتشات و إتعادل ماتشين و كسب 5 ماتشات .. وقتها ناس كتير إتكلمت إن المشكلة أكبر من تغيير المدرب .. وجهة نظرهم إن الريكورد بتاع (زيدان) في ال11 ماتش دول كان أسوأ من الريكورد بتاع اللي قبله (سانتياجو سولاري Santiago Solari) في ال17 ماتش اللي هو مسك فيهم ريال مدريد .. الفرقة تحت إيد (سولاري) كسبت 12 ماتش و إتعادلت ماتش و خسرت 4 ماتشات .. إترد عليهم وقتها إن كان خلاص الريال طلع من كل البطولات اللي هو بينافس عليها في الموسم و إن فعلياً (زيدان) مكنش عنده أي حاجة يحمس بيها اللاعيبه إلا إنهم يلعبوا عشان كرامتهم و كرامة النادي .. وقتها إتقال أصبروا بس علي الريال لحد الموسم اللي جاي و حتشوفوا إزاي (زيدان) بيعمل فريق من أول و جديد يرجع مجد الريال تاني .. قلنا و ماله نستني.
فترة الإعداد اللي بيعملها الريال دلوقتي قبل بداية الموسم فعلياً ملهاش وصف إلا إنها زي الزفت .. من ضمن ال20 فريق اللي حيلعبوا في الدوري الإسباني الموسم الجاي فريال مدريد بلا منازع هو صاحب أسوأ نتايج في الماتشات الودية في فترة الإعداد .. لو حتستخدم ماتشات فترة الإعداد دي كمؤشر لأداء الفرقة طول السيزون فبالشكل ده فرق إسبانيا كلها حتدوس علي وش ريال مدريد .. والله عارف إن فيه ناس لحد دلوقتي بتقول إن يا جدعان دي فترة إعداد .. طب ما ليفربول فترة الإعداد بتاعته كانت زي الزفت و لما الموسم بدأ خسروا الدرع الخيرية قصاد مانشستر سيتي بضربات الترجيح و كسبوا السوبر الأوروبي من تشيلسي بضربات الترجيح برده بس مش دي القضية .. القضية إن لازم تصبروا و نشوف أداء الفرقة لما السيزون يبدأ .. حتي لو انت من المتفائلين خير فانت لازم تفهم حاجة .. (زيدان) عنده 4 مشاكل لحد دلوقتي انا شايف إنه محتاس فيهم و مش عارف يحلهم: الناشئين و الصفقات الجديدة و اللاعيبه الكبيرة في الفرقة و طريقة لعب الفرقة .. النهارده ححاول أديك لمحة بس عن الأربع مشاكل دول عشان تفهم حجم المصيبة اللي ريال مدريد فيها حالياً.
مشكلة الناشئين:
الموسم اللي فات فيه 3 لاعيبه شباب سمعوا أوي مع جماهير ريال مدريد اللي هم المهاجم (فينشيوس Vincius) و الباك الشمال (سيرجيو ريجيليون Sergio Reguilon) و خط النص (ماركوس لورينتي Marcos Llorente) .. الكل توقع إن الثلاثة دول حيبقوا أساسيين تحت إيد (زيدان) خصوصاً مع سجله اللي مليان تصعيد للاعيبه شباب محدش كان يعرف عنهم حاجة و خلاهم أساسيين في الفرقة .. فجأة نلاقي إن مع بداية فترة الإعداد إن (سيرجيو ريجيليون) راح إعارة لإشبيلية و (ماركوس لورينتي) إتباع لأتليتيكو مدريد .. كلنا كنا شاكين إن (زيدان) ممكن يكون مش معجب أوي ب(فينشيوس) بس يمكن عشان لما (زيدن) جه هو كان مصاب .. قبل أخر 3 ماتشات في الموسم اللي فات اللاعيب رجع من الإصابة و كلنا كان عندنا إحساس إن خلاص بقي حيبقي أساسي و (زيدان) حيحطه تحت جناحه إذا به ملعبش إلا ماتش واحد بس من الثلاثة .. طبعاً لإنه مكنش بيلعب في ريال مدريد فلما (نايمار Neymar) إتصاب قبل بطولة كوبا أميركا اللي فاتت أخر حاجة المدير الفني للمنتخب البرازيلي (تشي تشي Tete) فكر فيها إنه يستدعي (فينشيوس).
قلنا مش مشكلة يمكن (زيدان) كان خايف عليه عشان لسه راجع من الإصابة .. جينا في فترة الإعداد (ماركو أسونسيو Marco Asensio) اتصاب و (جاريث بايل Gareth Bale) مبقاش حتي بيسلم علي (زيدان) لما يشوفه في الحمام .. قلنا إن أكيد ده الوقت اللي (زيدان) حيعتمد فيه علي (فينشيوس) بس برده ولا الهوا .. الحقيقة إن فعلياً (زيدان) مش مقتنع بقدرات (فينشيوس) او خلينا نقول انه شايفه لسه قدامه كتير عشان تقول عليه لاعيب جاهز .. في نفس الوقت (زيدان) مش هو المدرب اللي يفضل ورا اللاعيب الناشيء لحد ما يخليه حاجة .. (زيدان) مش (أرسين فينجر Arsene Wenger) .. بس علامة الإستفهام فعلاً مش علي (فينشيوس) قد ما هي علي إتنين لاعيبه ناشئين تانيين اللي هم (رودريجو جويز Rodrygo Goes) و (تاكيفوسا كوبو Takefusa Kubo) اللي (زيدان) شخصياً قال بعظمة لسانه إنه مقتنع بيهم جداً بس ده مخلاهوش يحطهم ضمن الفرقة الأولي و وداهم يلعبوا في فرقة ريال مدريد B و شوية و خلي (تاكيفوسا كوبو) يروح ريال مايوركا إعارة .. حتي (داني سيبالوس Dani Ceballos) يمكن أحرف لاعيب في تشكيلة منتخب إسبانيا تحت 21 سنة (زيدان) مش مقتنع به و وداه إعارة لأرسنال و يمكن ده القرار اللي خلي اللاعب يطلب يقابل (زيدان) في مكتبه عشان يقوله لو انت مش عايزني متشغلش بالك انا كمان مش عايز أشتغل معاك.
مشكله الصفقات الجديدة:
السر اللي عارفه الناس كلها إن لما (زيدان) قرر يرجع هو طلب 4 صفقات بالإسم عطاها لرئيس النادي (فلورينتينو بيريز Florentino Perez) زي أي ست مصرية أصيلة بتدي جوزها لستة الطلبات و بتقوله إبقي هات دول من السوق و انت جاي .. الأربع أسامي اللي (زيدان) طلبهم كانوا (إيدن هازارد Eden Hazard) و (بول بوجبا Paul Pogba) و (ساديو ماني Sadio Mane) و (فيرلاند ميندي Ferland Mendy) .. (بيريز) عرف يجيبله إتنين من الأربعة بس الإتنين التانيين ولا الجن الأزرق كان يعرف يجيبهم .. بدل (ماني) ف(بيريز) جاب ل(زيدان) المهاجم الصربي (لوكا جوفيتش Luka Jovic) و إن كان فيه تقارير صحفية بتقول إنه إتخانق مع (زيدان) و إن فيه إحتمال كبير إنه يروح إعارة في أي ستين داهية قبل ما الدوري يبدأ .. أما بقي بدل (بوجبا) فالريال مجابش حد في نص الملعب مكانه و غالباً كده مش حيجيبوا حد .. حتي الإتنين اللي جم فيهم مشاكل .. (هازارد) تقريباً معملش حاجة في الماتشات الودية بتاعة فترة الإعداد بإستثناء جون عالمي في ريدبول ساليزبورج و لحد دلوقتي تحس إن (زيدان) أساساً مش عارف حيلعبه إزاي؟ ولا في أنهي مركز؟ .. و (ميندي) أساساً جاي مصاب بس حتي لو بقي كويس فصعب أوي إن (زيدان) يقعد (مارسيلو Marcelo) دكة رغم المصايب اللي بيعملها زي ما يكون هو ماسك علي (زيدان) ذلة.
ريال مدريد محتاج لاعيب خط نص و بسرعة .. عشان كده انا فعلياً مستغرب الكلام اللي بيطلع علي إن الريال بيفكر في (نايمار) .. (نايمار) إيه يا بتوع (نايمار) .. هو اه لاعيب حريف و مهاري و علي راسي من فوق بس ريال مدريد محتاج لاعيب عربجي في نص الملعب .. لاعيب بيجري كتير و بيباصي صح و الأهم إنه يكون لاعيب ملتزم .. (نايمار) لا هو ملتزم .. ولا بيجري كتير .. ولا هو عربجي .. يبقي بتفكروا فيه ليه من الأساس؟
مشكلة اللاعيبه الكبيرة في الفرقة:
واحده من أهم نقاط قوة (زيدان) في فترته الأولي كمدير فني للريال إنه كان بيعرف يتعامل كويس أوي مع لاعيبته و بيخليهم يوصلوا لمرحلة إنهم ممكن ياكلوا النجيلة عشان خاطره .. دولقتي مفيش لاعيب إلا و سمعنا إنه شادد مع (زيدان) و طبعاً أكتر إسمين أمة سيدنا (محمد) عليه الصلاة و السلام كلها عارفة قصة خناقتهم مع (زيدان) هم (جاريث بايل Gareth Bale) و (جيمس رودريجيز James Rodriguez) .. الإتنين الخناقة بينهم و بين (زيدان) مخلياني انا شخصياً أسأل هو أنتوا ليه مسبتهومش يمشوا من بدري .. (جيمس رودريجيز) كان معار سنتين لبايرن ميونيخ و هم عايزينه و ألف من يتمناه و بدل ما انت يا (زيدان) مش عايزه مقعده ليه؟ .. نفس الكلام مع (بايل) .. (بايل) النادي قاله إحنا حنمشيك رغم إن عقدك لسه مخلصش قالهم لا مش ماشي .. جه قالهم طب فيه Offer حلو أوي ليا في الصين انا ماشي .. قالوله لا انت مش ماشي انت قاعد .. أنتوا عبط يا جدعان .. إزاي لاعيب انت مش عايزه و فضلت تطلع في الإعلام تقول إنه ملوش مكان في فرقتك تلعبه أخر ماتش ودي في فترة الإعداد اللي هو الماتش ضد روما؟ انت لعبته في الشوط الثاني و سبته يشوط واحدة من ركلات الترجيح و اللي ريال خسرها .. ما تستهدوا بالله كده و تفهمونا بس أنتوا عايزين إيه؟
مشكلة تكتيك اللعب اللي محدش فاهمه:
في ماتش روما ده بالذات اللي هو الماتش الودي الأخير في فترة الإعداد (زيدان) عمل حاجة غريبة جداً .. الشوط الأول لعبه بطريقة 3-5-2 و في الشوط التاني رجعها تاني 4-3-3 .. بص انا معنديش مشكلة إن (زيدان) يحط التاتش بتاعته .. أي مدير فني من حقه يجرب بس هي الفكرة إن طريقة 3-5-2 أو إنك تلعب ب3 قلوب دفاع أساساً طريقة معقدة و صعبة لأي لاعيب مش متعود عليها .. دي زي كده ما تقول لطالب ثانوي في علمي رياضة إنه يحل إمتحان من غير ألة حاسبة .. فمينفعش إنك تجرب طريقة صعبة زي دي في أخر ماتش ودي قبل السيزون ما يبدأ .. ده رأيي انا علي الأقل و يمكن أكون غلطان.
(زيدان) مدرب كبير .. مدرب كسب 3 بطولات Champions League و دوري إسباني في أقل من 3 مواسم كاملة .. ده إنجاز مفيش مدير فني تاني عمله قبل كده .. بس يمكن هو قدر يحقق ده لإن كان تحت إيده فرقة جاهزة .. فرقة اللي جمعها مع بعضها مدير فني دماغه متكلفة زي (كارلو انشيلوتي Carlo Ancelotti) .. صحيح (زيدان) عرف إزاي يدير فرقة زي دي بس مش هو اللي صنع الفرقة .. الوضع دلوقتي مختلف .. هو مطلوب منه إنه هو اللي يعمل الفرقة من أول و جديد .. فيه ناس بتقول إن (زيدان) مبيعرفش يطور من مستويات لاعيبه ناشئة .. إديله فرقة جاهزة و إتفرج هو ممكن يعمل بيها إيه .. بس متطلبش منه يعمل فرقة من الصفر لإنها مش بتاعته.
كل المشاكل اللي انا إتكلمت عنها دي مخليه إن ناس كتير خايفة إن مصير (زيدان) ميفرقش كتير عن مصير (جوليان لوبيتيجي Julen Lopetegui) لو فاكرينه؟ .. ده المدير الفني اللي كان ماسك منتخب إسبانيا و مشوه قبل كأس العالم بكام يوم لما إتعرف إنه قبل يمسك ريال مدريد و كان لسه عقده مع الإتحاد الإسباني لكرة القدم مخلصش و لما مسك الريال نتايجه كانت زي الزفت و مشوه في أكتوبر 2018 .. لو فاكرينه فده اللي انا كان وشي فقر عليه لما قلت إنه مدرب كويس و بتاع .. ما علينا ربنا يسامحني بقي .. لإن طبيعة البشر إنهم بيحبوا دايماً يحطوا تفسيرات تخليهم يفهموا أي وضع صعب عليهم ففيه نظريتين أغرب من بعض الصراحة بخصوص (زيدان) و ريال مدريد:
- أساساً (زيدان) مكنش عايز يرجع ريال مدريد .. هو رجع لما (بيريز) قاله إن طلباتك أوامر و إن أي لاعيب تطلبه حنجيبه بس يمكن (زيدان) تاه عنه إن خلاص ريال مدريد مبقاش هو النادي الوحيد في العالم اللي معاه فلوس و بالتالي مش أي لاعيب هم يعوزوه حيجري عليهم و يزغلغلوا عين النادي بتاعه بقرشين.
- النظرية التانية إن ريال مدريد مفتقد (كريستيانو رونالدو Cristiano Ronaldo) أكتر ما هو مفتقد (زيدان) .. من غير (رونالدو) الفرقة محتاجه تتبني من أول و جديد و زي ما قلت دي مش صنعة (زيدان) و مبيعرفش يعملها.
لو أي من النظريتين دول صح فانت تقدر تتوقع من دلوقتي إن (زيدان) مش حيطول في منصبه و إن مصيره مش حيفرق كتير عن مصير (لوبيتيجي) و (سولاري) و أي مدير فني يتخيل إن كلمته ممكن تمشي فوق كلمة (بيريز).
المصدر:
مقالة بعنوان Is Zidane Nearing the End at Real Madrid Already? He Promised a Rebuild in His Image-But After a Poor Pre-season, Failing to Land Paul Pogba and His Public Fallout with Gareth Bale Could He Head Out the Door Again? .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7355979/After-nightmare-pre-season-Zidane-face-early-end-second-spell-Real-Madrid.html
