من و انا صغير في إبتدائي منهج الدراسات الإجتماعية كان بيتكلم عن إن فيه حتة إسمها الغابات الإستوائية و إن يالهوي يا خرابي الغابات دي بتقل جامد و إن لو الوضع إستمر علي كده فأحيه أحيه أحيه الدنيا حتولع و الإحتباس الحراري و ثقب الأوزون حيسيح القطب الشمالي و حنلاقي نفسنا بنبلبط في المياه مع البطاريق .. اللي انت محتاج تعرفه إن لو حاجة إتحطت في المنهج بتاع الطلبة في مصر فده معناه إن الحاجة دي عفي عليها الزمن لإن اللي بيحط المناهج عندنا رجل كبير في السن كده مش داري باللي بيحصل في الدنيا.
اللي حصل إن البني أدمين قدروا فعلاً ينقذوا الغابات الإستوائية .. من 2004 لحد 2015 عمليات إزالة أشجار الغابات الإستوائية قلت بنسبة 48% .. بس قبل ما تقول هيييييه و تسلم الأيادي فانت محتاج تفهم إننا كبني أدمين الحقيقة مأنقذناش الغابات الإستوائية أوي يعني .. مش عارف أجيبهالك إزاي بس ما يسمي Deforestation أو إزالة أشجار الغابات دي عامل زي الفسيخ كده مهما يتقالك ده مضر و حيوديك في ستين داهية إلا إنك مصر برده تاكله .. سنة 2018 بس عمليه إزالة أشجار الغابات الإستوائية رجعت تاني تزيد بنسبة 13.7% .. عشان بس أترجملك الرقم ده .. خلال سنة واحدة البشر شالوا 1.2 مليار شجرة .. تخيلت؟ .. بالله عليك متكملش قراية قبل ما تستوعب حجم الجريمة اللي إحنا كبشر عملناها.
عشان تفهم إحنا بنعمل إيه في الغابات الإستوائية فحاول تتخيل إن الأرض دي هي جسمك بحيث مثلاً البحار و المحيطات هي المعدة في جسمك .. زي ما انت بتروح تحف أكل من أي حد في الشارع و ترمي بلاوي في معدتك فإحنا برده عمالين نرمي في بلاستيك و زبالة في البحار و المحيطات .. المفروض إن الغابات الإستوائية دي تمثل الرئة بتاعتك .. ربنا لما خلق الكائنات الحية علي الأرض حط 10% من الكائنات الحية دي في الغابات الإستوائية .. ربنا لما خلق الغابات دي خلاها تقدر تمص 25% من إجمالي إنبعاثات ثاني أكسيد الكربون اللي إحنا كبشر بنرميها في الجو .. ربنا لما خلق الغابات دي خلاها ليها القدرة علي إنها تضخ أكسجين و بخار مياه عشان تشتغل كإنها نظام تبريد طبيعي رباني للكرة الأرضية .. لو لعبت في الميزان اللي ربنا خلقه حتلاقي نفسك في وضع واحد مدمن تدخين لحد ما جاله سرطان رئة و مبقاش عارف يتنفس .. اللي إحنا عملناه و بنعمله في الغابات الإستوائية إن خلال الخمسين سنة اللي فاتت خسرنا 17% من إجمالي مساحة الغابات و ده ملوش إلا نتيجة واحدة و هي إننا (سوري في الكلمة) بنفشخ النظام البيئي اللي ربنا عمله.
غابات الأمازون دي منطقة واسعة جداً مشترك فيها 9 دول مختلفة بس مينفعش خالص إني أكلمك عن Deforestation أو أجيب سيرة الغابات دي من غير ما أتكلم عن البلد اللي ورا كل المصايب اللي بتحصل و البلد دي هي البرازيل .. أغلب معلوماتنا عن البرازيل تعتبر سطحية جداً و أغلبها ليها علاقة بالكورة .. دي البلد اللي طلعلتنا (بيليه Pele) و (رونالدو Ronaldo) و (رونالدينيو Ronaldinho) و (نايمار Neymar) .. بناتها مزز أو ده اللي إحنا بنشوفه في ماتشات الكورة .. كان ماسكهم رئيس إسمه (لولا دا سيلفا Lola da Silva) مفيش حد أعرفه علي Facebook في مرحلة من حياته معملش Share لبوست عنه بيوصفه علي إنه أصلح رئيس دولة جه و مش حيجي زيه و إنه كأنه النسخة البرازيلي من الخليفة الأموي (عمر بن عبدالعزيز) الله يرحمه .. بس اللي انت محتاج تفهمه إن البرازيل بلد مفيهاش إلا حاجتين بس ممكن تلاقيهم في أي حتة .. ناس بتلعب كورة .. و موظفين بياخدوا رشوة.
عارف إننا في مصر أخر ناس مؤهلة تتكلم عن الفساد و الرشوة و المحسوبية بس صدقني لو قلتلك إن البرازيل (سوري في الكلمة كمان مرة) فشخت الواقع في موضوع الفساد ده .. أخر 3 رؤساء يمسكوا البرازيل اللي هم طيب الذكر (لولا دا سيلفا) و اللي جت وراه (ديلما روسيف Dilma Rousseff) و اللي وراها (ميشيل تيمر Michel Temer) التلاتة إتشالوا من منصبهم و دلوقتي يا بيتحاكموا يا مسجونين بتهم فساد .. كل الفضايح دي كلها بتتحط تحت مظلة أكبر قضية فساد في تاريخ الفساد من أول ما البشر إخترعوا الفساد و القضية دي إسمها Operation Carwash أو عملية غسيل العربيات .. مفيش قضية فساد في تاريخ البني أدمين عدت القضية دي .. انت بتتكلم عن 788 مليون دولار إتدفعوا رشاوي لمسئولين حكوميين برازيليين .. القضية دي جابت في سكتها أخر 5 رؤساء جمهورية يمسكوا البرازيل .. واحد من كل 5 وزراء خلال 10 سنين اللي فاتوا يا إتسجن يا بيتحاكم .. واحد من كل 3 أعضاء في البرلمان البرازيلي برده يا إتسجن يا بيتحاكم .. و رغم كل البلاوي دي كلها شوف يا إبني .. كل اللي فات ده حماده و اللي بيحكم البرازيل دلوقتي حماده تاني خالص.
(جائير بوليسنارو Jair Bolsonaro) ده اللي بيحكم البرازيل دلوقتي تحسه شبه (إفرام جرانت Avram Grant) المدير الفني الإسرائيلي اللي كان ماسك تشيلسي لو تفتكروا .. و ده رجل جاي من المؤسسة العسكرية .. أحيه .. بني حملته الإنتخابية إنه جاي عشان يمص دم غابات الأمازون .. أحيه أحيه .. عمل سلسلة قوانين تدي عفو رئاسي لأي شركة إتوقع عليها عقوبات بتهمة إزالة غابات الأمازون .. ياختاااااي .. واحدة من أشهر الجمل اللي هو قالها إن البرازيل مش مطالبة إنها تحمي الأمازون عشان سواد عيون البيئة .. يالهوي .. أهم حاجة تفهمها عن (بولسنارو) إنه بني أدم حقاً و صدقاً فيوزات دماغه ضربت .. ده رجل بيقولها علانية كده إنه مع إستخدم الأمن البرازيلي للتعذيب .. معندوش أي مشكلة إن أي مواطن برازيلي يمشي و معاه سلاح في إيده عشان يحمي نفسه .. لما جت صحفية سألته عن موقفه من المرأة و إن تصريحاته بتشجع الرجاله علي إنهم يتحرشوا بالستات كان رده عليها بإنك أساساً وحشة و متتشافيش عشان أتحرش بيكي.
بإختصار شديد حاول تتخيل إن كل البني أدمين اللي بيكتبوا كومنتات تحرق الدم و ترفع الضغط علي صفحة اليوم السابع إتجمعوا كلهم في دماغ رجل واحد .. تخيلت .. أهو الرجل ده كبر و بقي (جائير بوليسنارو) .. فيه منكوا دلوقتي بيهرش في شعره و بيسأل سؤال مهم .. انت ليه توهتني في مليون سكة .. إيه علاقة (جائير بوليسنارو) بالأمازون بالفساد و إيه الهري ده كله؟ .. الحقيقة هو مش هري لإن فيه عامل مشترك بين كل اللي انا قلته ده .. بيزنس الأغذية الزراعية أو Agribusiness.
بص يا ريس .. زي ما السياحة و تصدير البترول بيقوم إقتصاد دول ففي حالة البرازيل 23.5% من الدخل القومي بتاعها جاي من البيزنس ده .. انت سألتني إيه علاقة كل الهري بتاع السياسة ده بغابات الأمازون؟ و الإجابة بمنتهي البساطة هي الفلوس .. البرازيل هي أكبر مصدر في العالم لشوية سلع غذائية قايمة علي الزراعة .. البرازيل هي أكتر بلد في العالم بتصدر سكر و قهوة و عصير البرتقال و زيت الصويا .. بس أهم حاجة البرازيل بتصدرها هي اللحمة .. مزارع المواشي لوحدها مسئولة عن 80% من عمليات Deforestation اللي بتحصل في الأمازون و ده سبب إن لو عندي غابة عايز أحولها لحتة مفتوحة مزروع فيها نجيلة عشان المواشي تاكل فانا لازم مش أقطع الأشجار .. لا انا لازم أحرقها .. مينفعش خالص إنك تفتح سيرة اللي بيحصل في الأمازون من غير ما تبص علي تجارة المواشي في البرازيل و اللي الحقيقة ممشياها شركة واحدة بس إسمها JBS و دي بلا منازع أكبر شركة تصنيع لحوم في العالم.
عشان برده أحطك في الصورة .. أرباح الشركة دي السنة اللي فاتت كانت 46 مليار دولار .. عارف شركة زي ماكدونالدز اللي ليها فروع في كل حتة في العالم أرباحها كانت كام السنة اللي فاتت؟ 21 مليار دولار .. شوفت الفرق .. و رغم إن JBS شركة برازيلي بس أرباحها من السوق المحلي يدوبك 24% من إجمالي الفلوس اللي بتخشلها مقارنة ب76% و دي نسبة الفلوس اللي بتخشلهم من السوق الأمريكاني .. من 46 مليار دولار الأرباح الصافية اللي بتخش الشركة منها 35.2 مليار دولار جايين من بيع منتجاتها في أميركا .. لو انت من الناس اللي مقتنعة بإن فيه حاجة إسمها مجلس إدارة العالم و جو المؤامرات ده فانت محتاج تجيب فشارك و تتفرج علي الأخوين (ويزلي باتيستا Wesley Batista) و (جوويزلي باتيستا Joesley Batista) أو اللي معروفين في البرازيل بإسم الأخوين (باتيستا) و دول شخصيتين أخوات ولاد و*&% اللي ماسكين شركة JBS ويمكن أكتر إتنين فاسدين انت ممكن تسمع عنهم في حياتك و هنا بقي الدنيا بتوريك إنها جمعية و دايرة.
مدير مكتب الرئيس البرازيلي إسمه (أونيكس لورينزوني Onyx Lorenzoni) إعترف في تحقيقات النيابة إنه قبل كده خد فلوس تبرعات من شركة JBS لصالح الحملة الإنتخابية بتاعة (بولسنارو) .. يا دي النيلة .. وزيرة الزراعة البرازيلية (تيريزا كريستينا دياز Tereza Cristina Dias) و اللي (بولسنارو) عينها معروف عنها إنها شريكة مع JBS في كذا مشروع و لما مسكت منصبها عطتهم تسهيلات ضريبية كتير .. أخر مرة الناس بتوع JBS كانوا قريبين كده من مؤسسة الرئاسة البرازيليين صحيوا الصبح علي مصيبة خلتهم يضربوا كف علي كف لما (ديلما روسيف) الرئيسة اللي (لولا دا سيلفا) إختارها بنفسه عشان تمسك وراه إتقبض عليها بتهم فساد .. البرازيليين من صدمتهم إختاروا رجل كوباره عليه شبه إجماع إنه بني أدم نظيف اللي هو (ميشيل تيمر) .. لما النيابة البرازيلية قبضت علي (جوويزلي باتيستا) ضمن التحقيقات بتاعة عملية غسيل العربيات المحامي بتاعه عمل إتفاق مع النيابة إن موكله يطلع براءه في مقابل إنه يسلمهم تسجيلات صوتية لإجتماع إتعمل بينه و بين الرئيس البرازيلي و في الإجتماع هو إعترف للرئيس إن شركته دفعت رشاوي ل1190 موظف حكومي دفعت ليهم 150 مليون دولار .. اللي قاله المحامي بتاع (جوويزلي باتيستا) للنيابة إن موكله إتكلم مع الرئيس و إعترفله بالمصايب اللي شركته بتعملها و الرئيس كان ولا هامه و ولا فرق معاه .. النيابة عرضت عليه إنها تسيبه من غير ما توجهله أي تهمة في مقابل إنه يعترف علي الرئيس اللي إتشال بعدها بتهم فساد و إنه يدفع 3.2 مليار دولار غرامة .. سنة 2018 النيابة في البرازيل قبضت علي (جوويزلي) تاني المرة دي بتهمة إن شركته بتشتري مواشي من مزارعين بيحرقوا غابات الأمازون عشان يعملوا عليها مزارع مواشي و إن لما وزارة الزراعة قفشته دفع رشاوي لكتير من الموظفين الكبار فيها .. بص فيه ناس مدمنة تدخين و فيه ناس مدمنة فرجة علي أفلام السكس و فيه ناس مدمنة تمشي في الغلط و تدفع رشاوي.
ده اللي غابات الأمازون واقفة قصاده .. رئيس بلد أخر حاجة بيفكر فيها هي البيئة و إنه يسأل نفسه إيه الصح و إيه الغلط إنما كل اللي هو بيفكر فيه إزاي يسترزق من وظيفته .. موظفين حكومة مش بيراعوا ضميرهم و مستعدين يشوفوا الدنيا بتولع قصاد إنهم ياخدوا فلوس .. و شركة لحمة مش بس بيدخلها فلوس حرام دي كمان حتي اللحمة اللي بتبيعها بايظة .. خلال سنة 2018 أطنان من اللحمة و الفراخ اللي شركة JBS باعتها في أميركا ثبت إنها فاسدة و ده خلي الحكومة الأميريكية تقرر إنها تمنع شراء أي منتجات لحوم من الشركة دي .. دي الشركة اللي كل اللحوم البرازيلي اللي بتتباع في مصر بتيجي منها .. قلبت بطنك ولا لسه .. لو رحت السوبرماركت لقيت Offer علي لحمة برازيلي أوعي تشتريها ده لمصلحتك و الله.
الأمل الوحيد للأمازون و للأرض كلها الحقيقة هم أهل البلد الجدعان اللي ميرضوش بالظلم بتوع البرازيل .. ناس كتير بتنسي إن البرازيل زيها زي أميركا كان عايش فيها ناس في حالهم لحد ما البرتغاليين جم قتلوهم و أحتلوا أرضهم .. البرازيل عايش فيها لحد دلوقتي مليون بني أدم من السكان الأصليين و حوالي نصهم عايشين جوه غابات الأمازون .. قبائل السكان الأصليين في الأمازون و هم تقريباً 300 قبيلة بقالهم أكتر من 6 سنين و هم عايشين دور باتمان في جوثام .. بناء علي الدستور البرازيلي فالأرض اللي الناس دي عايشة عليها هي محمية طبيعية مينفعش شركة تيجي تاخدها منهم بس عشان كله بيسترزق من كله في البرازيل فمحدش بيهتم أوي بشوية حبر مكتوبين علي ورق .. الحل اللي القبائل دي ملقتش غيره إنها تشيل سلاح و تحمي أرضها بنفسها .. حالياً البرازيل فيها حرب أهلية صغيورة بس مؤثرة جداً قصاد شركات الفلوس عمتها و قصاد حكومة كلها من أولها لأخرها بتاخد رشاوي فقرروا يحطوا الدستور و القانون و حتي ضميرهم في الدرج.
(جائير بوليسنارو) بني حملته الإنتخابية علي وعد إنه حياخد الأرض بتاعة قبائل السكان الأصليين في الأمازون يديها للشركات تشبع بيها و تجيب فلوس .. من ساعة ما بقي رئيس و أعمال العنف تجاه السكان الأصليين البرازيليين زادت .. لا زادت إيه .. دي نطت 150% .. المفروض إن حماية أرض السكان الأصليين في البرازيل دي شغلة جهة حكومية إسمها FUNAI بس أول حاجة عملها (جائير بوليسنارو) لما بقي رئيس إن خلي الشغلانة دي تحت إيد وزارة الزراعة اللي أساساً محدش فيها من أول الوزير لحد الأوفيس بوي مبياخدش رشوة من JBS .. الوضع في البرازيل صعب و حيستمر حتي لو حرايق الأمازون اللي انت بتسمع عنها في التليفيزيون سيطروا عليها فلسه برده جشع شركة زي JBS بيمثل أكبر تهديد مش بس للبرازيل إنما للهواء اللي إحنا هنا في مصر بتنتفسه.
المصدر:
حلقة من برنامج Patriot Act with Hassan Minhaj بتتذاع علي قناة Netflix و ده لينك الحلقة علي YouTube لو حبيت تشوفها:
https://www.youtube.com/watch?v=xt8EcSyjPY8
