لما تشتغل السنين حتعلمك أهم درس في الشغل و الدرس ده حتتعلمه سواء انت في مصر أو بره مصر مش حتفرق و هو إن اللي أهم من إنك تشوف شغلك هو إنك تبان إنك شايف شغلك .. المظاهر أهم من الشغل نفسه أو زي ما المثل بيقول اللي أهم من الشغل تظبيط الشغل و لو عايز تشوف ده بعنيك بره مصر كل اللي عليك تعمله إنك تبص للي حصل في أخر يوم في الميركاتو الصيفي .. خد إسبانيا علي سبيل المثال .. في اليوم الأخير للميركاتو إتصرف 1.3 مليار يورو علي شرا اللاعيبه و ده يعتبر نطة كبيرة عن المبلغ اللي إتصرف الموسم اللي فات و كان 888 مليون يورو صرفتهم الأندية الإسبانية في يوم .. ده إسمه شغل .. دي ناس إشتغلت و إختارت اللاعيبه اللي هم عايزينها و رزعوا مشوار لحد البنك عشان يحولوا الفلوس و إتعمل كشف طبي و ليلة كبيرة من التفاصيل اللي ملهاش أخر .. اللي يتحط بقي تحت مسمي إنك تمثل إنك بتشتغل تقدر تشوفه واضح زي الشمس في الكلام اللي إتقال علي إن (بول بوجبا Paul Pogba) رايح ريال مدريد و إن (نايمار Neymar) رايح برشلونة.
الإتنين لاعيبه فضلوا مكملين في أنديتهم .. لا (بوجبا) ساب مانشستر يونايتد ولا باريس سانجيرمان كسروا قلة ورا (نايمار) .. تدري ليش؟ .. عشان لا ريال مدريد ولا برشلونة كانوا عايزينهم .. هم بس رسموا قدام الناس إن و الله إحنا بنسعي و عايزينهم و عمالين نقدم في عروض ولا عروض كارفور للأندية بتاعتهم بس نقول إيه بقي قدر الله و ما شاء فعل .. الحقيقة مش كده و ده اللي إنا ححاول أبينه ليك النهاردة.
كان فاضل إتنين بس علي حدود موريتانيا مع المغرب مكانوش عارفين إن (بوجبا) كان عايز يمشي و يروح ريال مدريد .. حلو .. جماهير مانشستر يونايتد فعلياً مكنش عندهم مانع إنه يمشي و يمكن كانوا من جواهم بيقولوا إن السير (أليكس فيرجسون Alex Ferguson) كان عنده حق لما مشاه من النادي و هو لسه صغير .. حلو أوي .. حتي المدير الفني للفرقة (أولي جونار سولشاير Ole Gunnar Solskjaer) مكنش عنده مانع إنه يمشي طالما حيمشي بدري و الفلوس اللي حتيجي من بيعه حتتصرف علي لاعيب بديل .. يا سلام إيه الحلاوة دي .. يا مؤمن ده حتي إدارة النادي نفسها كان يا مرحب علي قلبها أكتر من إنها تخلص من (بوجبا) بشرط يجيلها من بيعه فلوس أكتر من اللي هم صرفوها عشان يجيبوه .. حلو أوي أوي .. طب هو مجاش ليه بقي؟ .. الإجابة بمنتهي البساطة إن ريال مدريد مكنش معاه و حتي لو معاه فمكنش عايز يصرف 160 مليون يورو عشان يجيبوه و هم لسه صارفين أكتر من 100 مليون يورو علي (إيدن هازارد Eden Hazard) .. إدارة الريال كانت عارفه إن (زين الدين زيدان) كان طالب (بوجبا) بالإسم بس محدش كان راضي يقوله إن طلبك ده صعب أوي .. فيعملوا إيه؟ .. رسموا قدام الناس إنهم بيحاولوا و الله يجيبوه بس يا عيني معرفناش.
من قبل ما السيزون اللي فات يخلص لما بدأت الإشاعات تطلع إن برشلونة عايز يرجع الإيكس بتاعه (نايمار) و إدارة باريس سانجيرمان قايله لرئيس نادي برشلونة (جوزيب ماريا بارتيمو Josep Maria Bartomeu) إن (نايمار) ده بتاعنا و مش للبيع .. المعلومة دي كانت عند إدارة برشلونة من السنة اللي فاتت و رغم كده Social Media إتغرقت تسريبات و أخبار إن يا جماعة إنتظروا صفقة القرن لما الإيكس يرجع .. كل يوم الصبح الناس اللي بتشجع برشلونة تفتح مواقع أخبار الكورة مستنيه الخبر ينزل .. ولا الهوا .. سمعنا إن برشلونة عرضوا علي باريس سانجيرمان طب خدوا فلوس و فوقهم لاعيب و بوسة عشان الصفقة تكمل بس الحل ده كان فيه مشكلتين .. أول مشكلة إن لازم الأول تاخد موافقة لاعيب برشلونة اللي حيروح باريس سانجيرمان و ولا لاعيب رضي يروح عشان مجرد إن لاعيب يرضي علي الحكاية دي فده حيترجم إن سعره في السوق يقل النص لإن انت كده كأنك بتقول علي نفسك إن انا لاعيب خردة .. أسامي زي (صامويل أوميتيتي Samuel Umtiti) و (إيفان راكيتيتش Ivan Rakitic) و (عثمان ديمبيلي Ousmane Dembele) و (أرتور ميلو Arthur Melo) و (نيلسون سيميدو Nelson Semedo) كلهم رفضوا الفكرة و الوحيد اللي وافق كان (فيليبي كوتينيو Philippe Coutinho) بس راح إعارة لبايرن ميونيخ و بالتالي الموضوع إتنسف .. المشكلة الثانية إن لازم فلوس برشلونة تبقي حاضرة و علي الطرابيزة و حتي ده مكنش متاح .. طول الميركاتو و إدارة برشلونة بتقول إنها عايزه ترجع (نايمار) و أنصار النادي فرحوا أوي لما عرفوا إن فيه وفد من إدارة النادي راح باريس يقعد مع المدير الرياضي (ليوناردو Leonardo) بس اللي إحنا مكناش نعرفه إنهم قعدوا معاه شربوا شاي و قهوة و متفقوش علي حاجة.
أومال إدارة برشلونة طلعوا عينينا طول الفترة دي ليه؟ .. زي ما إدارة ريال مدريد إتكسفت تقول (لزيدان) باردون مش حنعرف نجيب (بوجبا) فعملوا مسرحية طويلة عريضة عشان يظهروا له إنهم و الله شغالين علي الصفقة بس محصلش نصيب فبرده إدارة برشلونة كانت عارفه إن (ليونيل ميسي Lionel Messi) عايز (نايمار) يرجع برشلونة و لإنهم مكسوفين يرفضوله طلبه فعملوا نفسهم قال إيه بيحاولوا .. العلاقات بين باريس سانجيرمان و بين برشلونة عمرها ما حترجع لمجاريها من بعد الطريقة اللي باريس سانجيرمان خدوا بيها (نايمار) و من بعد ما إدارة برشلونة قررت إنها مش حتبقي تحت رعاية مؤسسة قطر الخيرية و شركة طيران قطر .. مش حتفرق إذا كان جماهير باريس عايزة (نايمار ) يغور في ستين داهية .. مش حيفرق إذا كان المدير الفني للفرقة (توماس توشيل Thomas Tuchel) شايفه لاعيب مشاكله كتير .. الإدارة مش حتسمح إنه يرجع تاني لبرشلونة .. علي الناحية التانية (ميسي) بيقول إحنا أخر مرة خدنا Champions League كنت انا و (نايمار) و (لويس سواريز Luis Suarez) بنلعب جنب بعض و مش حنعرف ناخدها تاني إلا إذا رجعنا نلعب جنب بعض .. إدارة النادي فعلياً السيزون ده إتفشخوا فلوس بعد ما جابوا (أنتوان جريزمان Antoine Griezman) و (فرانكي دي يونج Frankie de Jong) و مكنش معاهم و مش حيبقي معاهم فلوس صفقة (نايمار) .. الكلام دلوقتي إن عقد (نايمار) مع باريس بيقول إن السنة الجاية حيتفعل الشرط الجزائي بتاعه بقيمة 170 مليون يورو و ده معناه إن ممكن إن شاء الله يدينا ربنا و يديكوا طولة العمر برشلونة تحاول ترجع الإيكس بتاعها السنه الجاية و عليكوا خير.
المصدر:
مقالة بعنوان Barcelona and Real Madrid were Never Serious About Big Money Deals for Neymar and Paul Pogba .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7421939/Barcelona-Real-Madrid-NEVER-mega-money-deals-Neymar-Pogba.html
