لينك التسجيل الصوتي للمقالة علي ساوند كلاود:
https://on.soundcloud.com/eGBgR
(عبير عبدالرحمن) بنت مصرية كانت بتلعب رفع أثقال و مثلت مصر في أولمبياد 2008 في بكين و 2012 في لندن .. يمكن إنت قريت علي النت إنها خدت مركز خامس في البطولتين في وزن 75 كيلوجرام و بعد أربع سنين يعني سنة 2016 إتسحبت الميداليات الذهب و الفضة و البرونز من اللي كسبوها بسبب إنهم ثبت عليهم تهمة تعاطي المنشطات و عطوا الميدالية الفضية ل(عبير) عن أولمبياد 2008 و 2012 .. ده اللي إحنا حنتكلم عنه النهاردة اللي هو تعاطي المنشطات أو Doping .. الحقيقة إن الروس يعتبروا أساتذة في تعاطي المنشطات لدرجة إنهم إتمنعوا في المشاركة في أولمبياد 2016 في ريو دي جانيرو .. الموضوع في روسيا منتشر لدرجة إن المخابرات العامة الروسية FSB فيها ضباط متخصصين شغلتهم إنهم يلاقوا طريقة يهربوا بيها المنشطات للاعبين الروس اللي بيلعبوا سواء في بطولات العالم لألعاب القوي أو الأولمبياد .. مبدأياً خلينا نبدأ المقالة بشوية مفاهيم لازم تتصحح عندنا عشان نفهم يعني إيه منشطات؟ و ليه اللاعيبة بياخدوها؟ و ليه محدش بيعرف يكشفهم؟
(عبير عبدالرحمن) و هي بتقع بعد ما إضطرت تشيل وزن فوق قدرتها علي أمل إنها تنافس الرباعات الروس اللي كانوا بياخدوا منشطات.
مبدأياً لازم تكون فاهم إننا مش عارفين هو فيه كام لاعب رياضي خد منشطات قبل كده ولا عارفين فيه كام رياضي بياخد منشطات .. أي حد يقولك رقم معين قوله إنت بتفتي .. بس فيه شوية إحصائيات ممكن تديلك صورة و لو مش واضحة أوي عن حجم المشكلة .. سنة 2013 جريدة The New York Times الأميريكية قالت إنها إتكلمت مع كتير من اللاعبين اللي شاركوا في بطولة العالم لألعاب القوي في 2011 و قالوا إن حوالي 29% من إجمالي اللاعيبة اللي شاركت في البطولة خدوا منشطات .. فكده إحنا عرفنا إن فيه لاعيبة كتير بتاخد منشطات .. علي الناحية الثانية فيه إجراءات كتير بتتعمل عشان اللي بياخدوا منشطات يتكشفوا .. خد عندك مثلاً لو أناً شخصياً كسبت ميدالية فضة في سباق 100 متر جري فبمجرد ما السباق ما بيخلص فيه واحد بيبقي لازق في قفايا وظيفته إنه ماسك علبة بلاستيك مستنيني أعمل بيبي فيها .. قبل ما أستلم الميدالية و قبل ما أسلم علي الناس و قبل ما أتصور سيلفي مع أي حد مطلوب مني أشرب لترين مياه بسرعة عشان مثانتي تقرب تنفجر و أجري لأقرب حمام و المسئول ده في قفايا و حيفضل واقف و أنا بعمل بيبي و بيتفرج عليا و أنا بعمل بيبي ولازم يكون شايف البيبي بتاعي و هو نازل في العلبة البلاستيك .. دي في رأيي أسوأ شغلانة ممكن أتخيل حد يشتغلها .. لو إنت مهندس موقع و زهقان من شغلانتك إفتكر إن فيه ناس شغلتها إنها تتفرج علي لاعيبة الأولمبياد و هم بيعملوا بيبي في علبة بلاستيك.
رغم كده فيه لاعيبة بتاخد منشطات و مش بتتكشف و ده بيرجع لأسباب كتير فشخ .. منها إن عدد الإختبارات الطبية اللي بتتعمل محدود و مش بيغطي كل أنواع المنشطات اللي ممكن اللاعيبة ياخدوها .. إنت ممكن عشان متتكشفش تتعمد تاخد عينات صغيرة أوي من المنشطات لدرجة إن الإختبارات متكشفهاش .. أو تلجأ إنك تاخد دوا معين يغطي علي تأثير وجود المادة الفعالة للمنشطات فلما يجي الإختبار يطلعك سليم .. الأهم إن فيه لاعيبة بتعمل حاجة إنت ممكن تقول عليا بضحك عليك لما أقولك عليها لإن بصراحة مفيش حد ممكن يتخيل نفسه بيعمل كده .. فاكر لما قلتلك إن في عينة البول فيه حد بيبقي واقف بيتفرج عليك عشان يضمن إن عينة البول اللي بتتاخد هي بتاعتك فعلاً؟ فيه لاعب أوروبي بيلعب سباق عجل جاب كوندوم أو واقي ذكري حط فيه بول نظيف مفيهوش منشطات و حشره في مؤخرته (و المصحف ما بهزر) و بعد كده جاب شوية شعر من راسه لزقهم علي مؤخرته بلزق (و المصحف كمان مرة ما بهزر) عشان لما يجي يديلهم عينه البول يديلهم عينة نظيفة.
و حتي لما اللاعيبة بتتكشف إنها خدت منشطات فتلاقيهم بيقولوا مبررات أغرب .. عندك مثلاً العداء الأميريكي (دينيس ميتشيل Dennis Mitchell) لما إتكشف إن نسبة هرمون التستيرون في دمه أعلي من المعدل الطبيعي و إنه أكيد خد منشطات قال إن السبب هو إن قبل السباق بيوم مارس الجنس 4 مرات و شرب 5 أزايز بيرة اللي هو إحنا عبط يعني و حنصدق .. لكن أغرب مبرر أنا سمعته في حياتي كان من (تايلر هاميلتون Tyler Hamilton) بيلعب سباق عجل إتكشف إنه حاقن نفسه بدم حد تاني فلما سألوه إنت إزاي يا حبيبي فيه دم حد غريب في جسمك قالهم و الله ما أنا ده أخويا التوأم اللي مات في بطن أمي (والمصحف ثالث مرة ما بهزر).
لاعب سباقات العجل (دينيس ميتشيل Dennis Mitchell) صاحب أغرب مبرر إتقال لحد دلوقتي عن تعاطيه المنشطات.
لازم برده تكون فاهم إن المبرر رقم واحد لتعاطي المنشطات هو الفلوس .. فيه كمية فلوس إنت ممكن متكونش متخيلها موجودة في الرياضات الفردية .. فكك من مصر أنا بتكلم علي بره لإن بره فعلاً بيهتموا بالألعاب الفردية .. عندك مثلاً قناة NBC الأميريكية دخلتلها أرباح عدت المليار دولار من بيع حق بث أولمبياد ريودي جانيرو سنة 2016 .. عندك مثلاً اللجنة الأوليمبية الدولية IOC اللي هي كمان في أولمبياد ريو دي جانيرو اللي فاتت دخلها أكتر من 7.5 مليار دولار أرباح .. و طبعاً فيه الرعاة أو Sponsors اللي بيجروا ورا الأبطال الأوليمبيين عشان يعملولهم إعلانات .. مجرد إنك تشوف الخناقة اللي عملها (محمد صلاح) مع الإتحاد المصري لكرة القدم بسبب إن شركة فودافون هي الSponsor بتاعه في حين إن شركة We هي الSponsor بتاع الإتحاد يخليك تفهم قد إيه فلوس الSponsors دي بتكون سبب في خناقات كتير و بتكون سبب إن لاعيبة كتير تروح في سكة المنشطات لإنه مش عايز يخسر الSponsors بتوعه.
حط كل ده جنب بعضه .. الفلوس و إن إختبارات المنشطات مش قد كده تكتشف إن الحل الوحيد إن النظام اللي المفروض يبقي محطوط للكشف عن المنشطات يبقي ميخرش المياه .. الحقيقة إن النظام ده مخرم ولا أجدعها مصفاة و عشان تفهم أنا قصدي إيه تعالي نستلم حالة موثقة و هي تعاطي المنشطات اللي عمله لاعيبة روسيا في أولمبياد 2012 و اللي كانت من ضمن ضحاياه (عبير عبدالرحمن) و حاول تمشي معايا واحدة واحدة:
- لو أنا مثلاً عداء يعني بجري في سباقات جري فالمظلة اللي بتحميني هي إتحاد ألعاب القوي في روسيا اللي هو اسمه ARAF و دي إختصار All Russian Athletic Federation أو إتحاد كل الرياضيين الروس.
- ساعتها ARAF أو إتحاد ألعاب القوي حيكون تحت رقابة جهتين: الجهة الأولانية هي جهة دولية متمثلة في الإتحاد الدولي للعدائيين أو IAAF إختصاراً .. و جهة محلية اللي هي وزارة الشباب و الرياضة في روسيا و اللي طبعاً من اسمها هي تبع الحكومة الروسية.
- الكشف عن المنشطات جوه روسيا بتقوم بيها منظمة مستقلة اسمها RUSADA أو الوكالة الروسية لمكافحة المنشطات و هي إختصار Russian Anti-Doping Agency .. لما RUSADA بتاخد عينة بول مثلاً مني اللي هو أنا عداء في المنتخب الألوليمبي الروسي بتبعتها تُختبر في معمل تحاليل بالتنسيق مع الوكالة الدولية لمكافحة المنشطات WADA و دي إختصار World Anti-Doping Agency .. عشان WADA تشتغل فهي بتاخد فلوس من اللجنة الأوليمبية الدولية IOC و ده مفهوم و كمان بتاخد فلوس من الحكومات زي الحكومة الروسية.
خريطة الطريق لتعاطي المنشطات عند اللاعيبة الروس.
لحد دلوقتي إنت شايف إن النظام ده شكله معقد و كله مشاكل و فيه هري كتير و سهل إنك تلاقي فيه مليون ثغرة .. طب فين المشكلة اللي حصلت؟ .. المشكلة إني زي ما قلتلك في أول فقرة فيه ضباط من FSB اللي هم المخابرات العامة الروسية إخترقوا معمل التحاليل اللي بيختبر العينات و اللي المفروض بيبقي معمل بيتحدد بالتنسيق بين RUSADA و WADA .. مش كده و بس .. ثبت علي RUSADA اللي هي أساساً منظمة روسية مستقلة وظيفتها مكافحة تعاطي المنشطات إنها بتاخد رشاوي من الإتحاد الروسي لألعاب القوي ARAD و من اللاعيبة الروس نفسهم عشان تسربلهم مواعيد أخد العينات .. مصيبة كمان و هي رئيس ARAF اللي هو إتحاد اللعبة في روسيا ثبت عليه تهمة إنه كان بيتفق مع مدير معمل التحاليل عشان يخفوا العينات اللي بيثبت تعاطيها المنشطات .. حتيجي تقولي طب الإتحاد الدولي IAAF بيعمل إيه مش المفروض يبقي له دخل؟ .. أحب أقولك إن رئيسه إتقبض عليه و إتوقف عن العمل 5 سنين بسبب إنه كان بياخد رشاوي .. اللي فعلاً محتاج أجيب سيرته هو أنا جبت المعلومات دي كلها منين؟.. المفروض تكون بتهرش في شعرك دلوقتي و بتسأل هو أنا إيش عرفني كل ده؟
إحنا كل ده عرفناه من إن كان فيه موظف جوه RUSADA عنده ضمير و مبيحبش ياكل من الحرام اسمه (فيتالي ستيبانوف Vitaliy Stepanov) .. الرجل ده بعت لWADA اللي هي المنظمة الدولية لمكافحة المنشطات 200 إيميل شرح فيه كل حاجةو إزاي كل حاجة بتحصل .. ردوا عليه بإيميل قالوله فيه إحنا أسفين بس إحنا ملناش دعوة و معندناش صلاحيات نحقق في أي حاجة جوه روسيا .. النظام زي ما إنت شايف مخرم و كله ثغرات و لو حتتفضح إنك بتتعاطي منشطات فغالباً اللي حيكشفك هو تسريبات صحفية زي ما حصل مع (سيرجيو راموسSergio Ramos ) كابتن ريال مدريد و اللي تسريبات صحفية إتهمته إنه بيتعاطي منشطات بقاله سنين بس بسبب شهرته فWADA معرفتش تحقق معاه .. الفلوس و الفساد لسنين و سنين بوظوا الرياضة و لو مش مصدقني روح إسأل (عبير عبدالرحمن).
المصدر:
حلقه من برنامج Last Week Tonight with John Oliver ده لينكها علي YouTube:
https://www.youtube.com/watch?v=BgyqAD5Z6_A
