علي بلاطة و من غير لف ولا دوران .. مفيش نادي في العالم بيعرف يجيب لاعيبه تتاقل بالماس مدفونة في أندية تحت بير السلم يلمعهم و يظبطهم و يبيعهم و يكسب فيهم زي نادي بنفيكا البرتغالي .. ده نادي عنده كشافين مواهب بيفهموا فشخ .. و ياريت بس كشافين المواهب .. ده نادي عنده أكاديمية ناشئين فشيخة مطلعة لاعيبه علي أعلي مستوي رغم صغر سنها زي (جواو فيليكس Joao Felix) اللي أتليتيكو مدريد خلوه أكبر صفقة في تاريخهم لما إشتروه ب113 مليون جنيه إسترليني في الميركاتو الصيفي .. و لاعيبه ممكن تشيل فرقة علي كتافها زي صانع ألعاب مانشستر سيتي (بيرناردو سيلفا Bernardo Silva) .. عشان أوريك الفن و الدماغ المتكلفة بتاعة الناس اللي شغاله في بنفيكا عايزك تبص علي التشكيلة من 11 لاعيب اللي عندك في الصورة دول .. دول 11 لاعيب نادي بنفيكا باعهم من سنة 2011 لحد السنة دي و كسب فيهم 500 مليون جنيه إسترليني .. كل لاعيب من دول له قصته و كل لاعيب من دول حالة لوحده توريك الإجابة علي السؤال المهم: إزاي انا كنادي أنافس عتاولة أوروبا و في نفس الوقت كل سنة أطلع في لاعيبه أبيعها و أكسب فيها؟ .. الخلطة دي صعبة أوي و مفيش أندية كتير بتعرف تسبكها .. الجيل الذهبي للإسماعيلي لما إتباع النادي معرفش يقف علي رجله تاني .. و لما الجيل ده بطل كورة بعد ما راح الأهلي فالأهلي ملقاش لاعيبه تعوضه .. بس النهاردة ححاول معاك أفهمك إزاي الخلطة دي بتتسبك.
حراسة المرمي .. (إديرسون Ederson):
عارف انا الخناقة اللي بيخشها أي حد بيحب يتفرج علي منتخب البرازيل اللي هو مين أحسن (إديرسون Ederson) ولا (أليسون بيكر Alison Becker) .. مين أحسن بطل إنجلترا ولا بطل أوروبا؟ .. بس انا مش ناوي أخش الخناقة دي .. أي حد بيلعب فانتازي عارف كويس أوي إن (إديرسون) ده كنز بيجيب نقط من الهوا فمينفعش انا أجي النهاردة أدافع عنه أو أثبت إنه كويس .. هو فشيخ .. الفكرة إن بنفيكا إشتروه من نادي برتغالي صغير إسمه ريو أفي و دفعوا فيه مليون دولار و الكلام ده كان سنة 2015 .. جري الشريط سنتين بس و كانوا بيبيعوه لمانشستر سيتي ب35 مليون .. انت متخيل هم كسبوا فيه إزاي؟
الباك اليمين .. (نيلسون سيميدو Nelson Semedo):
سنة 2012 كشافين المواهب بتوع بنفيكا حطوا عينهم عليه و هو بيلعب في فرقة بتلعب في دوري الدرجة الثالثة إسمها سينترينسي و كان لسه ناشيء صغير .. بنفيكا خدوه و صنفروه و سنة 2015 كان بيلعب أساسي في الفرقة .. موسم و نص يدوبك بس قضاهم في بنفيكا خلي أندية أوروبا كلها تتكلم عنه و ساعتها ركب القطر الإكسبريس بين بنفيكا و أندية الدوري الإسباني لما راح برشلونة بعد ما إتدفع فيه 26 مليون جنيه إسترليني.
قلب الدفاع .. (فيكتور لينديلوف Victor Lindelof):
سكة (فيكتور لينديلوف Victor Lindelof) هي هي بالكربون سكة (نيلسون سيميدو) .. سنة 2011 كشافين المواهب بتوع بنفيكا لقطوه وهو لسه ناشيء في نادي سويدي إسمه فاسيتراس و متفهمش هم حطوا عنيهم عليه إزاي بس هو فضل في بنفيكا 3 سنين إتصنفر فيها و إتظبط و خد وش نظافة لحد ما جه مانشستر يونايتد في 2017 خدوه بعد ما دفعوا فيه 40 مليون جنيه إسترليني.
قلب الدفاع .. (ديفيد لويز David Luiz):
سبحان الله يا أخي أربع لاعيبه لحد دلوقتي شبه بعض .. زيه زي زمايله .. كشافين المواهب بتوع بنفيكا لقطوه و هو لسه ناشيء في نادي برازيلي إسمه فيتوريا .. بنفيكا خلوه معاهم 5 سنين كل موسم مستواه بيعلي عن الموسم اللي قبله لحد ما في يناير 2011 راح تشيلسي بعد ما دفعوا فيه 22 مليون جنيه إسترليني.
الباك الشمال .. (جواو كانسيلو Joao Cancelo):
يمكن اللاعيب الوحيد في خط الدفاع اللي كسر التريند .. (جواو كانسيلو Joao Cancelo) من ولاد أكاديمية بنفيكا و الغريب إنه أساساً كان باك يمين بس لما إتصعد للفرقة الأولي عشان يخلوه هو و (نيلسون سيميدو) يلعبوا سوا فإضطر إنه يحول يلعب باك شمال .. سنة 2015 علاقته ببنفيكا إنتهت لما إتباع لنادي فالنسيا الإسباني ب13 مليون جنيه إسترليني بعد كده راح يوفينتوس الإيطالي و دلوقتي هو في مانشستر سيتي الإنجليزي.
خط وسط إرتكاز .. (أكسل فايتزل Axel Witsel):
أهو ده اللي يتقال عليه صفقة القرن .. (أكسل فايتزل Axel Witsel) تحسه برج جوزاء في نفسه أوي بيتنقل بين الأندية ولا كأنه بيغيرهم زي المناديل .. ده لعب في سبورتينج لشبونة البرتغالي و لعب في بنفيكا البرتغالي و لعب في ساينت بطرسبرج الروسي و تانجين الصيني و دلوقتي أهو متلقح في بروسيا دورتموند الألماني .. هو مقعدتش في بنفيكا كتير يدوبك هو سيزون واحد بس هم كلوا من وراه الشهد لما باعوه في 2015 لنادي زينت سان بطرسبرج الروسي ب35 مليون جنيه إسترليني.
خط وسط إرتكاز .. (نيمانيا ماتيتش Nemanja Matic):
أهو ده اللاعيب اللي يوريك قد إيه إدارة بنفيكا دي ناس بتفهم .. سنة 2011 هم خدوه مطرود من تشيلسي كعلاوة فوق البيعة علي صفقة إنتقال (ديفيد لويز David Luiz) من بنفيكا لتشيلسي .. الواد راح بنفيكا حالته النفسية زي الزفت بس متفهمش هم بيأكلوا لاعيبتهم إيه ولا بيسحرولهم ولا إيه بس بعد 3 سنين الواد كان بقي من أفضل لاعيبه الإرتكاز في العالم لدرجة إن تشيلسي دفعوا لبنفيكا 21 مليون جنيه إسترليني عشان يرجعوه تاني .. زي ما تقول كده بنفيكا خدوا (ماتيتش Matic) 3 سنين إعارة و خدوا فوقيهم 21 مليون.
خط نص مهاجم .. (بيرناردو سيلفا Bernardo Silva):
أي حد بيفهم أوي في الكورة تسأله هو (بيرناردو سيلفا) كان بيلعب فين قبل ما يروح السيتي تلاقيه بيتعوج عليك أوي و هو بيجاوب يقولك في موناكو الفرنسي .. هو عنده حق .. بس قبل ما يلعب في موناكو كان من أبناء أكاديمية بنفيكا و سنة 2015 باعوه لموناكو ب14 مليون جنيه إسترليني و ده رقم خيالي في لاعيب ناشيء.
خط نص مهاجم .. (جواو فيليكس Joao Felix):
ده من اللاعيبه اللي بتخليني بضرب كف علي كف .. هو كان ناشيء في أكاديمية نادي بورتو البرتغالي شافوا إنه عيل سيس مينفعش يبقي لاعيب كورة .. بنفيكا خدوه صنفروه و لعب معاهم 43 ماتش و بعد كده باعوه لأتليتيكو مدريد .. لو انت كنت فاكر إن 14 مليون جنيه إسترليني اللي موناكو دفعوهم كتير علي لاعيب ناشيء (بيرناردو سيلفا) فأحب أقولك إن أتليتيكو مدريد خدوا (جواو فيليكس) ب113 مليون جنيه إسترليني .. إياكش حتي (جواو فيليكس) يكبر و يبقي (ليونيل ميسي Lionel Messi) الجديد تبقي الصفقة دي ضربة معلم لإدارة بنفيكا.
خط نص مهاجم .. (أنخيل دي ماريا Angel di Maria):
و يكمل معانا التريند اللي ماشي في بنفيكا .. تاني .. كشافين المواهب في النادي شافوه و هو بيلعب في نادي روزاريو سينترال في الأرجنتين و الواد تألق مع بنفيكا لحد ما في الأخر ريال مدريد إشتروه ب32 مليون جنيه إسترليني سنه 2010.
المهاجم .. (لوكا جوفيتش Luka Jovic):
اللاعيب ده حالة خاصة شوية .. كل المدريستا عارفين إن ريال مدريد إشتراه من نادي إيتراخت فرانكفورت الألماني و دفعوا فيه 53 مليون جنيه إسترليني بس اللي ناس كتير متعرفهوش إن كشافين المواهب بتوع بنفيكا شافوه و هو بيلعب في نادي ريد ستار بيلجراد الصربي و هو لسه ناشيء و جابوه النادي سنة 2016 و بعد ما لعب 4 ماتشات معرفش يجيب فيهم ولا جون ودوه إعارة لإينتراخت فرانكفورت و فضل معاهم لحد ما السنة اللي فاتت إستغلوا الأوبشن في عقده إنهم يشتروه علي طول ب4 مليون جنيه إسترليني و دي كانت صفقة العمر للنادي الألماني اللي بعدها بأقل من سنة كان كسبان فيه حوالي 50 مليون جنيه إسترليني.
دول 11 لاعيب بنفيكا جابهم برخص التراب و باعهم بملايين .. عايزك تتخيل إن فيه 7 لاعيبه تانيين تقدر تسميهم إحتياطي الفرقة اللي إتباعت دي و فيها أسامي عتاولة علي فكرة .. يعني هل تعلم إن (يان أوبلاك Jan Oblak) حارس مرمي أتليتيكو مدريد و يمكن من أفضل حراس المرمي في العالم كان بيلعب في بنفيكا و إتباع لأتليتيكو ب14 مليون جنيه إسترليني .. ريال مدريد خد علي قفاه في صفقة شرا (فابيو كوينتراو Fabio Coentrao) و اللي دفع فيها 26 مليون عشان ياخده من بنفيكا .. تشيلسي برده خدوا علي قفاهم في صفقة (راميريز Ramires) و اللي دفعوا فيها 19 مليون جنيه إسترليني .. (ريناتو سانشيز Renato Sanchez) برده من اللاعيبه اللي إتباعت من بنفيكا و جابوا منها فلوس حلوة لما إتباع لبايرن ميونيخ ب31 مليون جنيه إسترليني .. (جونكالو جويديز Goncalo Guedes) اللي راح لباريس سانجيرمان ب26 مليون و معاه (رودريجو Rodrigo) اللي راح فالنسيا بنفس المبلغ و كمان (راؤول خيمينيز Raul Jimenez) اللي راح وولفرهامبتون ب30 مليون يبقوا 3 مهاجين يقوموا هجوم أي فرقة .. 17 لاعيب إتباعوا من 2011 لحد دلوقتي جابوا للنادي 500 مليون .. لا تخرج قبل أن تقول سبحان الله.
المصدر:
مقالة بعنوان Man United and City are Among the Big Guns to Have Taken their Pick from the Brilliant Benfica Production Line .. نشرت في جريدة The Daily Mail و ده لينك المقالة الأصلية:
http://www.dailymail.co.uk/sport/football/article-7285265/Benfica-produce-best-players-world-decade.html
