توماس كوك وقعت .. ربنا يخليلنا بوكينج بقي.

لما عرفت خبر ان توماس كوك افلست  كنت عارف ان فيه ناس كتير في مصر يمكن متعرفش حاجه عن توماس كوك Thomas Cook ولا عمرها سمعت الاسم ده قبل كده وانا عاذرهم الحقيقه لان الحقيقه احنا في مصر مفهومنا عن الرحلات يختلف شويه كتير عن طريقه تفكير الغرب فخليني اخدك واحده واحده افهمك مين هي توماس كوك وايه اللي حصلها .. زمان و زمان ده اللي هو انت بتتكلم في الثمانينات و التسعينات ولحد مثلا اوائل الالفينات لو انت مواطن اوروبي و ليكن مثلا مواطن انجليزي عايز تطلع اجازه الصيف بتاعتك بره انجلترا فقلت ان يا واد يا (جون) ليه متاخدش الوليه (اليزابيث) و العيال (مايكل) و (روز) و تطلع بيها علي شرم الشيخ في مصر .. اهو برده توري العيال الناس اللي كانوا زمان من رعايا التاج البريطاني .. حضرتك بكل ادب بتروح لمكتب سفريات او شركه سياحه كبيره وبتدفلعهم القرشين التمام بحيث ان شركه السياحه هي اللي بتحجزلك الطياره و الفندق و بتظبطلك البروجرام بتاعك انت و العيله .. توماس كوك كانت اكبر شركه سياحه في العالم في الفتره اللي انا بتكلم عنها .. دي شركه في السوق بقالها اكتر من 178 سنه و ليها زباينها و شغلها و مكانتها .. اظن السؤال اللي مخليك تهرش في شعرك دلوقتي هو طب ازاي كيان زي ده يقع كده و محدش يسمي عليه؟

الحقيقه ان فيه تفسيرين بيتقالوا عشان تفهم هي توماس كوك وقعت ليه .. فيه التفسير السطحي اللي بيتقال قدام الناس اللي مش فاضيه تتعمق اوي في التفاصيل و التفسير ده ان والله الشركه كانت مديونه باكتر من 200 مليون جنيه استرليني ولما حاولت انها تستلف فلوس من البنوك محدش رضي يسلفها فالشركه ملقتش حل غير انها تعلن افلاسها .. لحد كده انت تقدر تقفل المقاله و تشوف انت كنت ناوي تعمل ايه لان لحد كده انت فهمت الليله .. شركه اتداينت و معرفتش تسدد فقفلت .. دي حكايه انت شفتها كتير و اتهرست قدام عنيك قبل كده .. لو انت عايز تفهم هي ازاي الشركه اصلا سابت نفسها تداين بالمبالغ الرهيبه دي فخليك معايا شويه لان القصه حتحلو.

ليه كل القصص الكئيبه بتبدا بجوازه فاشله؟ .. سنه 2007 شركه توماس كوك اندمجت مع شركه تانيه اسمها MyTravel وانت ممكن متكونش سمعت اسم MyTravel ده كتير لانها الشركه الام اللي بتملك شركتين اصغر منها اللي هم Going Places و Airtours .. الجوازه دي كلفت توماس كوك اكتر من مليار جنيه استرليني و المنطق ورا الجوازه دي ان لما توماس كوك تندمج مع MyTravel حيعملوا كيان اقتصادي فشيخ محدش يقدر يقف قصاده .. بتتكلم عن بيزنس حيخلي زباينهم يوفروا سنويا 75 مليون جنيه استرليني .. كيان حيضرب شركات السياحه اللي علي الانترنت بالجزمه القديمه و حيدوس علي وش جروبات و صفحات الFacebook اللي ماسكها شويه هواه .. اللي تقريبا الناس اللي ماسكين توماس كوك مخدوش بالهم منهم ان ورق الحسابات بتاع شركه MyTravel بيقول ان قبل الاندماج اللي حصل في 2007 الشركه طلعت محققه ارباح مره وحده بس في اخر 6 سنين .. محدش في توماس كوك كان متخيل ان الجوازه دي حتخليهم يورثوا كل ديون شركه MyTravel .. من 2007 و توماس كوك بتنزف فلوس و ياريت مثلا ان المشكله ان الوضع الاقتصادي للدول الاوروبيه و بريطانيا مخلي الناس هناك معهاش فلوس تطلع رحلات .. بالعكس .. سنه 2017 انت بتتكلم عن ان 57% من الانجليز طلعوا اجازات في الصيف بره بلدهم .. سنه 2018 الرقم ده زاد ل60% .. اللي توماس كوك مخدتش بالها منه ان الفكره مش ان الناس بطلت تطلع اجازات .. لا .. الناس بدات تغير رايها في هي حتقضي الاجازه فين و حتطلع ازاي.

اولا الناس دلوقتي مش كلها لما تيجي تقولها تطلع اجازه فين يقولك اروح حته فيها بحر .. فيه ناس كتير بقت بالنسبه ليها اطلع اجازه اروح تركيا او اسبانيا او اليونان عشان اتفسح في شوارع المدن و اتصور و اكل حاجه مختلفه .. تاني نقطه ان ملايين الناس دلوقتي بقت بتقضي كل مشوايرها و حياتها علي الانترنت .. انا لو طالع اجازه حخش علي Bookings او Airbnb و احجز في فندق او اجر بيت .. ايه اللي حيخليني اضرب مشوار لحد مكتب توماس كوك واخش بقي ادور عليه علي Google Maps  و لو راكب عربيه ادور علي ركنه و اروح بنفسي اطلع فلوس ورق من جيبي ويبقي نهار اسود لو الفلوس في الفيزا فانا حبقي مضطر ادور علي مكنه ATM  قبل ما اروح .. ليه وجع القلب ده كله .. توماس كوك شركه ليها اكتر من 560 مكتب حول العالم .. المكاتب دي بتكلفهم فلوس و مش بتجيبلهم فلوس في عصر الناس كلها بقت عايشه Online .. فاكر لما قلتلك ان توماس كوك دي كانت ليها شنه و رنه في التسعينات و الثمانينات .. اهو زباينها دلوقتي هم الناس اللي فوق 65 سنه اللي كانوا زباينها وهم شباب صغيرين .. دلوقتي الوضع اختلف و الدنيا اتطورت.

في 2011 الشركه دخلت العنايه المركزه بسبب الديون .. فجاه ديونها زادت ل1.1 مليار جنيه استرليني واللي خلاها لسه عايشه انها خدت قروض من بنوك بس برده انت محلتش المشكله .. انت مديون فاستلفت عشان تسدد فوايد الديون .. الفوايد دي لوحدها قصمت وسط الشركه .. انا قلتلك ان ديونهم لحد 2011 وصلت 1.1 مليار دولار .. من 2011 لحد 2019 هم دفعوا 1.2 مليار جنيه استرليني ودي فلوس الفوايد بس .. لسه الديون نفسها هم مسددوهاش .. يعني بتتكلم ان لو الشركه زي ما هي بتقول بتبيع 11 مليون رحله في السنه فحوالي 25% من الفلوس اللي بتيجي من الرحلات دي بتروح في سداد فوايد الديون .. سنه 2015 الدنيا ضحكت في وش توماس كوك لما جت شركه صيني اسمها Fosun International بيملكها رجل الاعمال (جو جوانج تشانغ Guo Guangchang) اللي يعتبر من اغني اغنياء الصين واشترت حصه من اسهم توماس كوك .. الفكره ان شركه Fosun International كانت عايزه تبقي بيزنس كبير فشخ في مجال الرحلات و الترفيه و عشان كده قبل ما يشتروا حصه من اسهم توماس كوك اشتروا شركه Club Med الفرنسيه و سيرك دي سوليه Cirque de Soleil الكنديه .. سنه 2018 الشركه بدات تحس فعلا بالخطر لان في السنه دي ربنا ابتلي اوروبا بموجه حراره خلت ناس كتير تاجل رحلاتها في الصيف و فضلوا يقعدوا في بيوتهم لحد ما الموجه الحاره دي ما تخلص .. فعلا السنه دي كانت سنه سودا علي توماس كوك .. وراها علي طول طلعلهم خازوق بريكزت Brexit و اللي انا اتكلمت عنها قبل كده و خلت ناس كتير تقلق من فكره انها تحجز اجازه بره البلد يا عالم ايه اللي ممكن يحصل.

في مايو 2019 الشركه لما طلعت حساباتها بتاعه ربع السنه الماليه قالت انها حققت خساير بسم الله ما شاء الله 1.5 مليار جنيه استرليني .. في اغسطس هم طلعوا خطتهم لانقاذ الشركه من الغرق و الخطه بمنتهي البساطه انهم حياخدوا سلفه تاني من شركه Fosum International بحوالي 450 مليون جنيه استرليني في مقابل ان الشركه تتنازل عن اغلبيه اسهمها في البورصه لصالح الشركه الصينيه يعني باعوها برخص التراب .. ده كان في مقابل ان Fosum International هي تتولي دفع الديون المتلتله علي توماس كوك و اللي وصلت 1.7 مليار دولار .. اهو سبب انهيار الشركه ان حصل خلاف بين توماس كوك وبين Fosum International و الخلاف ده ادي ان الاتفاق يتلغي وبالتالي الشركه مكنش قدامها اي حل غير انها تعلن افلاسها .. الغريب في الموضوع واللي فعلا مخليني مستغرب هو تردد او خليني اقول رفض الحكومه الانجليزيه انها تتدخل .. اصل تعالي نحسبها بالورقه و القلم .. دلوقتي لما الشركه اعلنت افلاسها كل رحلاتها حول العالم و كل حجوزاتها اتلغت وده معناه ان فيه500,000  زبو لقوا نفسهم فجاه مرميين في حتت مختلفه حول العالم ومش لاقيين حد يروحهم بلدهم منهم 150,000  انجليزي و 350,000 من جنسيات تانيه .. طبعا اللي حيبقي مطالب انه يلاقي رحلات جويه يرجع بيها الملايين دول هو الحكومه الانجليزيه .. لو جيت تحسبها تلاقي ان الحكومه الانجليزيه عمليه اعاده الزباين دول لبلدهم واقفه عليها بمبلغ يعدي 200 مليون جنيه استرليني مستريح اللي هو كان ممكن الحكومه تسلفهم لشركه توماس كوك يمشوا بيهم حالهم بعد انهيار مفاوضاتهم مع Fosum International .. لكن الحكومه الانجليزيه خافت ليتقال عليها بتجري عشان تلحق شركه لان نفس البق الحمضان ده اتقال لما الحكومه الانجليزيه اتدخلت لانقاذ شركه طيران اسمها مونارك Monarch وساعتها الناس قالت اه ما هم عشان اغنيا روحتوا انقذتوهم لكن الفقراء اللي مش لاقيين ياكلوا سايبينهم يموتوا من الجوع.

زي ما المثل بيقول مصايب قوم عند قوم فوائد .. يمكن اكبر مستفيد من اللي بيحصل في توماس كوك هي شركه توي Tui ودي شركه انجليزيه المانيه برده طالع عنيها في البيزنس ومش لاقيه زباين زي توماس كوك بس يمكن الفرق انها مش مديونه اوي زيهم و كمان عندها بواخر رحلات بتاعتها و عندها الفنادق بتاعتها فممكن تاخد هي زباين توماس كوك و تدفعهم زياده و محدش فيهم حيفتح بقه يشتكي .. يمكن الحكمه اللي انت ممكن تطلع بيها من اللي حصل ده هو ان مفيش حاجه دايمه علي حالها .. سنه 1948 لما بريطانيا كانت بتفوق من صدمه الحرب العالميه الثانيه الشركه كانت قربت تعلن افلاسها بس الحكومه الانجليزيه اشترتها و انقذتها و كانت شركه تابعه لشركه سكه حديد بريطانيا لحد سنه 1972 لما الشركه اتخصخصت و اديها دلوقتي وقعت لمجرد انها معرفتش تواكب العصر اللي احنا فيه.

المصدر:
مقاله بعنوان Why did Thomas Cook collapse after 178 years in business? .. نشرت في جريده The Guardian وده لينك المقاله الاصليه:
https://www.theguardian.com/business/2019/sep/23/thomas-cook-as-the-world-turned-the-sun-ceased-to-shine-on-venerable-tour-operator