الإشتراكية .. الريمونتادا اللي حتغير شكل الإقتصاد العالمي.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/dqel4lth0r3f?si=5affd042aa794517baf8399c951494a6

هو الإقتصاد العالمي رايح فين؟ .. ده سؤال أنا بسأله ليك وحاول تفكر قبل ما تجاوب .. زمان وزمان ده اللي هو قبل سنة 1990 كانت الدنيا كلها مقسومة نصين .. يا إما إنت رأسمالي يا إما إنت إشتراكي .. الفرق بين الإتنين عشان تفهمه حاول تتخيل شلة ولاد أو بنات بس طلبة متغربين في محافظة تانية ومأجرين شقة قاعدين فيها سوا .. إنت بتتكلم مثلاً عن شقة 3 أوض كل أوضة فيها إتنين يعني 6 شخصيات مختلفة من محافظات مختلفة بعادات وتقاليد مختلفة عن بعض بس قاعدين تحت سقف بيت واحد .. خليني أزيدك من الشعر بيت ونفترض جدلاً إن واحد فيهم كمان مسيحي.

لو الستة إختاروا يمشوا بالنظام الرأسمالي فمصروف البيت حيمشي كالأتي .. كل واحد بدماغه .. أكلك وشربك علي حسب إنت تحت إيدك كام .. تشتغل بقي بعد الظهر .. أبوك يبعتلك فلوس .. أكلك وشربك وفسحك وهدومك علي حسب إنت بتعرف تجيب فلوس قد إيه ومحدش له كلمه عليك .. المصاريف المشتركة بينكوا بتتقسم علي حسب الإستخدام .. النور والمياه والإنترنت بنشوف مين بيستخدمه أكتر وبيدفع حصة أكبر في الفواتير .. ده النظام الرأسمالي ولو إنت شايفه Fair إستني تشوف النظام الإشتراكي .. النظام ده بيقول إن كلنا في البيت مسئولين عنه .. أول كل شهر بنجيب الفلوس اللي في إيد كل واحد فينا نحطها في حتة واحدة ونتشارك في كل حاجة .. الفواتير بتتقسم علينا بالتساوي .. أكلنا وشربنا تقريباً واحد لإن كلنا دافعين فلوسه بالتساوي .. اه فيه فروقات في المصاريف لإن ممكن واحد من الستة يكون من عيلة غنية بس في المجمل الفروقات في المصاريف مش حتبقي واسعة أوي زي النظام الرأسمالي .. إذا كان النظام الرأسمالي ماشي بمبدأ كل واحد يشيل شيلته فالنظام الإشتراكي ماشي بمبدأ كلنا في الهوا سوا.

من سنة 1945 لحد سنة 1990والدنيا كلها بتتعارك مين فيهم النظام الأحسن؟ .. الأمريكان والأوروبيين بيقولوا الرأسمالية هي أحسن إختراع بعد الحاجة الساقعة فيروز أناناس .. السوفييت اللي هم الروس دلوقتي والصينيين رأسهم وألف سيف إن الإشتراكية دي زيها كيلو المشكل بتاع (صبحي كابر) لو جربته مش حتطلب غيره .. سنة 1990 مع إنهيار الإتحاد السوفيتي بقي واضح للناس كلها إن الكسبان في الماتش ده هو الرأسمالية .. بس دلوقتي الإشتراكية بدأت تعمل الريمونتادا ولا ماتش الأربعة صفر بتاع برشلونة وليفربول والرابع سجله (أوريجي).

ولإن الريمونتادا في أي ماتش دايماً بتبدأ بالجون الأولاني .. الجون اللي لما تجيبه بتقول لنفسك بدأت تندع أهي .. ده إنت بتشوفه دلوقتي في موجة جديدة بيقودها ناس بيسموا نفسهم الإشتراكيين الديموقراطيين .. الإنتخابات الرئاسية الأميريكية اللي فاتت في بدايتها كنا عارفين إن داخلها (دونالد ترامب Donald Trump) بصفته الرئيس قصاد مرشح ديموقراطي وكان أهم 3 أسماء الديموقراطيين بيختاروا منهم واحد كانوا (جو بايدن Joe Biden) وده كان نائب (باراك أوباما) لو تفتكر و(بيرني ساندرز Bernie Saunders) و(إليزابيث وارين Elizabeth Warren) .. إتنين من الثلاثة دول إشتراكيين .. صحيح الديموقراطيين إختاروا (بايدن) وصحيح بقي هو الرئيس بس متنساش يعني إن كان فيه إحتمالية إن رئيس أميركا الجاي يبقي إشتراكي .. لو جيت تبص علي البرنامج الإنتخابي بتاع سواء (إليزابيت وارين) أو ( بيرني ساندرز) حتلاقيهم في المجمل قايمين علي 3 نقط ودي النقط اللي الريمونتادا بتاعة الإشتراكية دلوقتي قايمة عليهم:

• الأغنياء لازم يتفشخوا ضرائب.
• جه الوقت إننا نفكر في تطبيق فكرة Universal Basic Income أو إن كل مواطن يبقي له مرتب شهري من الحكومة سواء كان بيشتغل أو لا.
• عدد ساعات الشغل لازم تقل.

ولإن الأفكار دي تبان تافهة وسهل تتفهم بس الحقيقة الحكاية معقدة حبتين عن ما ممكن تكون متخيل وخليني أبدأ بالفكرة الأولانية .. هل الصح إنك تفشخ الأغنياء ضرائب؟ ولا الصح إنك تسيبهم عشان الناس دي هم اللي بيعملوا بيزنس بيوفر شغل للشباب؟

للإجابة عن السؤال اللي متفهمش تعرف تجاوب عليه إزاي ده تعالي أوريك إزاي واحد زي (دونالد ترامب) بيفكر .. رقم واحد (ترامب) هو رئيس أقوي إقتصاد في العالم دلوقتي .. رقم إتنين هو مش سياسي ولا جنرال في الجيش هو كان رجل أعمال شغال في الإستثمار العقاري وبالمنطق كده لازم تلاقيه مع أي حاجة حتسّمع في الأخر إن الضرائب تقل علي الأغنياء اللي هو واحد منهم .. لما تبدأ تبص لكلامه تلاقي إن حملته الإنتخابية اللي هو كسب بيها الإنتخابات بتاعة 2016 كان شعارها Make America Great Again أو يلا نرجع عظمة أميركا .. تيجي تسأله طب يا أسطي إنت قصدك إيه؟ يقولك أكتر فترة حققت أميركا أمجادها كانت فترة الخمسينات .. إشمعني يا ريس؟ .. في الخمسينات أميركا طلعت كسبانة من الحرب العالمية الثانية وبقت هي القوة العظمي علي مستوي العالم وحققت أعلي معدل نمو إقصادي في تاريخها .. حلو أوي طب هم الأمريكان حققوا كل ده إزاي؟

هل تعلم إن فترة الخمسينات كانت أكتر فترة في تاريخ أميركا الأغنياء كانوا بيدفعوا فيها ضرائب؟ .. لو إنت (ترامب) وكنت عايش في أميركا في الخمسينات فأحب أقولك إن وفق قانون الضرائب هناك إنت كنت حتدفع حوالي 90% من دخلك السنوي ضرائب .. أميركا في الخمسينات كانت إشتراكية أكتر من الإتحاد السوفيتي .. عظمة أميركا ومجدها متبناش بالرأسمالية .. لا خالص .. إتبنت بالعدالة الإجتماعية إنك لو إنت من الطبقة المتوسطة فإنت تقدر تشتغل وتتعب وحتوصل وحتبقي رجل غني .. اللي هي فكرة The American Dream أو الحلم الأميريكي .. ولو إنت رجل غني فإنت مش حتعيش في مود (محمد رمضان) أو (حمو بيكا) وتتمنظر قدام الناس بالعربيات الغالية اللي إنت جايبها .. لو إنت رجل غني وشاري أكتر من عقار فالضريبة العقارية لوحدها كانت بتعدي 70% .. هل (ترامب) كان عارف الحقيقة دي؟ بالتأكيد لا .. ده رجل عامل قانون ضرائب بيخلي حد زي (وارين بافيت Warren Baffett) واحد من أثري أثرياء العالم يقول إن قانون الضرائب بيخلي سكرتيرتي تدفع ضرائب علي الدخل أكتر من اللي أنا بدفعها .. هل أنصاره عارفين؟ بالتأكيد لا برده.

عارف حيطلع حد يرد عليا بالمبرر الشهير بتاع إزاي بس يا جدعان تقرفوا الأغنياء في حياتهم ما الناس دي هي اللي بتحط فلوسها كإستثمارات في البلد وبتفتح بيزنس يشغل ناس؟ .. إسمحلي أرد عليك بإني أقولك قوة البلد الإقتصادية مش بعدد الأغنياء اللي فيها .. قوة البلد الإقتصادية بهل البلد تقدر تستحمل إنها تعمل برنامج تأمين صحي للمواطنين بتوعها من غير ما البرنامج ده يفشخ الميزانية أو لا؟ .. قوة البلد الإقتصادية إنها يبقي تحت إيدها مصدر دخل مش جاي من إنها تدوس علي وش الفقراء .. نقطة تانية معلش قارفاني في عيشتي .. هو (نجيب ساويراس) مثلاً كان حيقدر يبني إمبراطورية موبينيل لولا إن كليات هندسة قسم كهرباء باور وكهرباء إتصالات في جامعات الإسكندرية والقاهرة وعين شمس وغيرها بتطلع خريجين عارفين ألف بيه هندسة؟ .. الأغنياء اللي زي (نجيب ساويرس) ميقدروش يطلعوا البيزنس بتاعهم بره مصر .. حيروح فين؟ ليبيا .. حيلاقي نفسه محتاج يجيب المهندسين المصريين يوديهم ليبيا يشتغلوا هناك .. فعلياً هم محتاجين البلد أكتر ما البلد محتاجاهم.

هنا خليني أتكلم شوية عن النقطة التانية اللي قايمه عليها الريمونتادا بتاعة الإشتراكية وهي ما يسمي Universal Basic Income .. الفكرة دي بمنتهي البساطة إن الحكومة حتدي للمواطنين بتوعها مرتب شهري صحيح صغير قول مثلاً 500 جنيه سواء إنت كنت بتشتغل أو لا .. لحد دلوقتي أنا سامع ناس بتزرغط ورا .. بس إستني شوية بس .. عارف إن فيه ناس حتقول طب لو أنا شاب مش لاقي شغل وباخد من الحكومة مرتب إيه اللي يخليني أدور علي شغل أصلاً؟ الحقيقة إن قصة Universal Basic Income في أميركا بالذات تهلك من الضحك لإن أول واحد قال إن الفكرة دي لازم تطبق هو (ريتشارد نيكسون Richard Nixon) وده نفس البني أدم اللي رمي بلده في مصيبة حرب فيتنام وده نفس الرجل اللي تنحي عن الحكم قبل ما الكونجرس يطلع قرار بعزله من منصبه بعد ما أجبر وكالة المخابرات المركزية CIA تتنصت علي المكالمات التليفونية بتاعة مسئولي الحزب الديموقراطي اللي هو حزب المعارضة ودي الفضيحة اللي إتعرفت بإسم ووترجايت Watergate .. ده نفس الرئيس اللي لولاه كانت إسرائيل خسرت حرب أكتوبر لإنه هو اللي وافق علي الجسر الجوي اللي إتعمل بين أميركا وإسرائيل عشان يديهم أسلحة وذخيرة تخليهم يقدروا يقفوا علي رجليهم وقت الحرب .. سياسياً (نيكسون) ده بني أدم إبن وس&^ بس في نفس الوقت إقتصادياً كان سابق عصره شوية .. لما (نيكسون) قدم المقترح بتاعه بإن لازم أميركا تعمل مرتب شهري ثابت للمواطنين بتوعها الديموقراطيين رفضوا المقترح مش لإنهم ضد الفكرة قد ما لإنهم كانوا عايزين المرتب يزيد عن الرقم اللي (نيكسون) حطه .. عشان (نيكسون) يقنع الديموقراطيين بإن الرقم اللي هو حاطه ده كفاية أوي وبلاش طمع خلي الحكومة تختار مناطق سكنية عشوائية متوزعة علي أميركا عشان يجربوا هل الرقم اللي (نيكسون) قال عليه كفاية ولا زي ما الديموقراطيين قالوا عايز يزيد شوية؟ .. الإجابة كانت صدمة للكل.

لما الفكرة إتطبقت لقوا إن ليها نتايج إيجابية كتير فشخ .. تكاليف العلاج قلت .. معدلات الجريمة قلت .. مستوي أداء التلاميذ في المدارس ضمن العائلات اللي خدت المرتب الشهري بقت أحسن بكتير .. النتيجة السلبية اللي محدش كان عامل حسابها هو إن معدلات الطلاق زادت .. الجمهوريين لإنهم زي ما أنا وصفتهم قبل كده التيار الإسلامي بتاع أميركا وأهم حاجة عندهم هي الأسرة وإن الست ملهاش مكان غير بيت جوزها وعيالها قالوا لا يا عم الفكرة دي حتخلي الستات عندها إستقلالية إقتصادية ولما يبقي في إيدها فلوس فحتقول أنا مش مضطرة أفضل متجوزة البهيم عديم الإحساس والمسئولية اللي أنا متجوزاه لمجرد إني معييش فلوس ومعنديش مصدر دخل يعيشني لو قررت أتطلق .. بعد 10 سنين إكتشف الجمهوريين إن دي كانت غلطة .. الغلطة مش إنهم قرروا ميطبقوش فكرة Universal Basic Income .. لا الغلطة إن اللي عمل الإحصائيات إفتكر إن معدلات الطلاق زادت في حين إنها مزادتش.

الفكرة الثالثة واللي ريمونتادا الإشتراكية قايمة عليها وهي إن عدد ساعات الشغل في الإسبوع لازم تقل .. الفكرة دي تبان إن اللي قالها شاب لسه متخرج من الكلية وحاسس إنه بيتفشخ ومش لاقي وقت يعيش حياته بعد ما يخلص شغل لإنه بيخلص يروح يترمي علي السرير لحد تاني يوم .. بس الحقيقة إن الفكرة دي إتقالت أول مرة سنة 1930 واللي قالها كان واحد إسمه (جون مينارد كاينز John Maynard Keynes) والرجل ده كتب بحث قال فيه إنه بيتوقع حاجتين .. الحاجة الأولانية هي إن لو أميركا مرتكبتش أخطاء هابلة زي إنها تخش في حرب عالمية فهو بيتوقع إن معدل دخل البلد حيزيد فشخ خلال السنين الجاية .. الحاجة الثانية واللي مرتبطة بالأولانية إن لما إن شاء الله ربنا يفتح علي أميركا وتتغني فهي حتبدأ تستغل الثروة دي إنها تقلل من ساعات شغلها تدريجيا كل سنة .. الرجل ده توقع إن لو الدنيا مشيت مع البلد زي ما هو بيحلم فلما تيجي سنة 2030 إن شاء الله الأمريكان مش حيبقوا محتاجين إنهم يشتغلوا غير 15 ساعة في الإسبوع .. لحد السبعينات أميركا كانت ماشية علي نفس التراك اللي (جون مينارد كاينز) توقعه .. معدل الدخل عمال يزيد .. الأسعار عماله تقل .. وعدد ساعات الشغل في الإسبوع عمال يقل .. هوبا في الثمانينات فيه حاجة إتغيرت وفجأة الناس رجعت تدوس بنزين وتزود في ساعات شغلها والأسوأ إننا بقينا نخترع وظايف ملهاش أي ستين لازمة .. سواء إنت أو حد تعرفه حتلاقيك أو تلاقيه شغال في مكتب مبتعملش حاجة غير إنك تبعت إيميلات محدش بيشوفها وتكتب تقارير محدش بيقراها ودي علي فكرة وظايف ليها مصطلح إقتصادي بيعبر عنها هي وظايف ملهاش أي ستين لازمة أو Bullshit Jobs .. أه والله هي إسمها كده .. لو إنت شغال في واحدة من الوظايف دي فإنت حتلاحظ حاجتين .. أول حاجة إنك خريج جامعة كويسة ومعاك شهادة جامعية محترمة .. ثاني حاجة إنك شغال شغلانة ملهاش لازمة لدرجة إنك لو قررت تعمل إضراب محدش حيعبرك .. عشان بس أجيبلك إكتئاب أكتر خليني أوريك حقيقة الشغلانة اللي إنت بتشتغلها:

• سنة 1986 عمال لم الزبالة في نيويورك عملوا إضراب مفتوح عشان يخلوا الحكومة تزود مرتباتهم .. الإضراب قعد 6 أيام وبسببه الحكومه أعلنت حالة الطواريء .. بلد في حجم أميركا مستحملتش أسبوع من غير عمال الزبالة.
• سنة 1970 حصلت الحالة الوحيدة المسجلة لموظفين بنوك دخلوا في إضراب والكلام ده في أيرلندا وموظفين البنوك عملوا الإضراب برده عشان خاطر المرتبات .. لما الإضراب ده أُعلن الخبراء بتوع الإقتصاد والبورصة رقعوا بالصوت .. خلاص يا جدعان جبرت كده علي الإقتصاد الأيرلندي وأيرلندا حترجع تاني للعصور الوسطي .. أول يومين 85% من الفلوس اللي جوه البلد بقت محشورة في البنوك .. بس غير كده مفيش غير صوت صرصار الحقل .. إضراب إستمر 6 شهور لا البنوك وقعت ولا البورصة إنهارت ولا العملة إتفشخت ولا أي حاجة خالص والموظفين رجعوا شغلهم من غير ما مطالبهم تتحقق.

القصتين دول يخلوك تسأل نفسك هو إحنا فاهمين الإقتصاد صح؟ .. هل الثروة بتبدأ من فوق مع الأغنياء اللي زي (نجيب ساويرس) وتبدأ تقع من جيوبهم لحد ما الملاليم توصل للطبقة اللي متداس علي وشها؟ .. ولا الحقيقة هي العكس؟ .. إن عمال النظافة والممرضات والبياعين هم دول اللي بيخلقوا الثروة واللي من غيرهم الإقتصاد ميقدرش يستحمل؟

أنا بس حابب أختم كلامي بإن متفتكرش إن ريمونتادا الإشتراكية دي مش حتكمل أو إنها مستحيل تقلب الطرابيزة علي الرأسمالية .. الأفكار الغريبة اللي فيه ناس بتسميها أفكار فاضلة أو مثالية وفيه ناس تانية بتشوفها أفكار مش واقعية دايماً بتبدأ كإقتراح لناس بتحلم وبتبدأ تكبر تكبر لحد ما بتسيطر علي عقول الناس .. الديموقراطية كانت فكرة غريبة أول ما طلعت .. إنهاء العبودية كانت هبداية عابرة للقارات لما إتقالت .. أحياناً إنت لازم تهبد في الأول ومع الوقت هبدتك بتبقي حقيقة .. نقطة تانية مهمة أوي وهي إن الرأسمالية مفيش حد بيدافع عنها غير الأغنياء وهنا إنت بتلاقي نفسك في وضع غريب جداً .. إزاي تبقي إنت رجل بنيت ثروتك علي إنك إستغليت الرأسمالية سواء بقي إستغليتها إستغلال سيء وده في أغلب الأحوال أو إستغلتها إستغلال زي ما ربنا قال وده بيبقي في حالات نادرة وتيجي تقف تشرحلي قد إيه الرأسمالية دي أحسن إختراع بعد الكنافة بالنوتيلا من عند سدرا وأنا أبقي المواطن الكحيان اللي بكح تراب أبقي مُطالب إني أصدقك؟

عشان متكلمش عن شخصيات إنت عمرك لا حتشوفها ولا حتحس بدورها زي (مارك زاكربيرج Mark Zuckerberg) مؤسس Facebook أو (ايلون ماسك Elon Musk) مؤسس Tesla فخليني أكلمك عن الأغنياء بتوعنا إحنا .. عيلة (ساويرس) أو عيلة (منصور) .. حتلاقي إن الأغنياء دول اللي لو إتكلمت معاهم حيقولوك إنهم بيدفعوا تبرعات بالمليارات لصالح مستشفيات وجمعيات خيرية .. لو حد جه قالي إن نسبة التبرعات اللي بتيجي من جيوب الأغنياء حالياً هي أعلي نسبة تبرعات تحصل في تاريخ مصر الحديث فأنا فعلياً مش حقوله إنت كداب بس في نفس الوقت إزاي الكرم الحاتمي اللي نازل علي الأغنياء بتوعنا دلوقتي ماشي جنب إننا عايشين في أكتر فترة الأغنياء مسيطرين فيها علي مستقبل البلد؟ .. أكتر من 49% من الدخل اللي بيجي لجيوب المصريين بيروح ليهم .. 0.1% من المصريين عندهم نفس الثروة اللي في إيد 80% اللي مفشوخين بسبب الظروف الإقتصادية اللي إحنا عايشين فيها .. إزاي إحنا عايشين في وقت الأغنياء فيه بيتبرعوا فيه بالمليارات بس إحنا بنكح تراب؟ الإجابة إن النظام الرأسمالي بصورته الحالية بقي متصمم مع سبق الإصرار والترصد إن الغني يفضل الغني وإن الفقير يزداد فقر.

تبقي في رأيي مشكلة الوساخة الرأسمالية اللي إحنا عايشين فيها دلوقتي هي الغريزة اللي موجودة جوه كل بني أدم وهي أنا عايز حاجتي تبقي بتاعتي ومش عايز حد يشاركني فيها .. زمان أيام الملكية كانت مصر بلد إقطاعية .. عندك باشا ماسك حتة أرض بتاعته يعمل فيها اللي هو عايزه ولو إتولدت إبن فلاح حتفضل طول حياتك إبن فلاح .. ده النظام الإقطاعي .. دلوقتي المفروض إن ده ميحصلش .. دلوقتي إحنا عندنا مؤسسات المفروض إنها تحمينا .. فيه حاجة إسمها الجهاز المركزي للمحاسبات وفيه حاجة إسمها نيابة الأموال العامة والمفروض إن الجهات دي تحمينا من أي رجل أعمال شايف نفسه باشا وعايز يرجعنا تاني لعصر الإقطاع .. المشكلة إن المؤسسات دي يا مش شايفة شغلها يا مستفيدة من توحش نفوذ الأغنياء .. الحل الوحيد إنك تمشي في نفس الأفكار الثلاثة اللي الإشتراكية بانيه الريمونتادا بتاعتها عليهم .. زود ضرائب علي الأغنياء عشان تقصقص ريشهم .. زود المرتبات للناس عشان لو أنا لوحدي عايش في الطبقة المتوسطة بس أنا وزمايلي نقدر نتوحد مع بعض ونعلم رجل الأعمال اللي إحنا شغالين عنده الأدب لو فكر إنه يستغل واحد فينا .. قلل ساعات الشغل عشان محسش إني مجرد جاموسة في ساقية.

الإشتراكية الجديدة اللي جايه مع الريومونتادا اللي بتكلم عنها بتقول إن فكرة الحكومة اللي تشيل إيدها من السوق وتسيب رأس المال هو اللي يتحكم في كل حاجة دي تبلها وتشرب ميتها .. الإشتراكية الجديدة بتقول إن الحكومة دورها إنها تبقي المحامي اللي دوره يدافع عن الناس .. هي بتقول إن مفيش حاجة اسمها رجل أعمال وحش و رجل أعمال كويس .. هي بتقول إن الحكومة لو لقت إن رجل أعمال بيسترزق من تعب الناس اللي شغالين عنده من غير ما يديهم حقهم بتاخده من قفاه وتدي للناس حقها  .. أنا عارف إني طولت زيادة عن اللزوم بس أهم نقطة تكون فاهمها كويس هي إن التغيير لما بيجي فيه حد بيدفع ثمنه وغالباً بيكون الطبقة اللي كان معاها السُلطة .. مش عايز أدي تشبيه يزعل ناس أو يتوجهلي لوم بسببه بس حاول تفكر كده لأيام نزول الوحي علي النبي (عليه الصلاة والسلام) .. قريش وقتها كان فيها عشرات الديانات فديانة جديدة مش هي القضية .. القضية إن الإسلام جه بتغييرات جذرية في طريقة تفكير وطريقة حياة أهل قريش .. الإسلام جه ومعاه إلغاء الربا وإلغاء عبادة الأصنام وإلغاء العبودية وبمبدأ العدالة الإجتماعية .. كل دي أفكار خلت اصحاب النفوذ والسُلطة والمال يعملوا المستحيل عشان الأفكار دي متنتشرش .. التغيير عمره ما كان سلمي من وجهة نظر أصحاب المال.

المصادر:

• أنترفيو مع (أناند جيردهاراداس Anand Giridharadas) اللي كتب كتاب Winners Take All and the Paradox of Philanthropy وكان في حلقة من برنامج The Daily Show with Trevor Noah وده لينك الأنترفيو لو حبيت تتفرج عليه:
  http://www.youtube.com/watch?v=H32z45o0WxA
• أنترفيو اتعمل مع (روتجير بريجمان Rutger Bregman) اللي كتب كتاب Utopia for Realists وكان في حلقة من برنامج The Daily Show with Trevor Noah وده لينك الأنترفيو لو حبيت تتفرج عليه:
  https://www.youtube.com/watch?v=QbTWxFwuQtM