بحب أنا قصص الناس اللي بتقلب فشلها لنجاح .. لما تبقي حاسس من جواك إنك كويس بس تروح للمكان الغلط وتفشل فيه وتطلع عليك سُمعة إنك فاشل ويشاء ربنا يبعتلك الوظيفة الصح عشان قبل ما تثبت للناس إنك شاطر فإنت تثبت لنفسك إنك مفيش فيك حاجة غلط .. أنا عارف إن فيه مننا كتير في Career بتاعته عدي بالمرحلة دي .. أنا شخصياً عديت بيها .. عشان كده أنا عارف كويس أوي (رونالد كومان Ronald Koeman) المدير الفني لمنتخب هولندا هو حاسس بإيه دلوقتي .. في أكتوبر 2017 الناس كلها كانت بتقوله زي ما (حسن حسني) الله يرحمه كان بيقول ل(كريم عبدالعزيز) في فيلم الباشا تلميذ .. يا فاشل يا فاشل يا فاشل يا فاشل .. وقتها كان بيدرب فرقة في إنجلترا إسمها إيفرتون وفي أول 9 ماتشات في الموسم الفرقة معرفتش تجيب إلا 8 نقط بس و من غير ما يكسبوا ولا ماتش ودي كانت أسوأ بداية للنادي في أخر 10 سنين .. المشكلة مكنتش بس الأداء اللي زي الزفت للفرقة .. المشكلة كانت إن الرجل ده إدارة إيفرتون حطت تحت إيده 140 مليون جنيه إسترليني وقالوله بعزق براحتك بس عايزين في الأخر نلاقي نتايج .. أخر ماتش له مع إيفرتون كان يوم ما إتفشخوا من أرسنال 5-2 وإدارة النادي مشته بعد ما إشتغل معاهم 18 شهر.
لما (كومان) مشي من إيفرتون .. لا مشي إيه قول إتطرد من إيفرتون كان الكلام إن الرجل ده مينفعش يدرب فرقة كبيرة .. أخره يدرب فرق من تحت بير السلم زي ويست بروميتش أو نورويتش .. من ناحيته هو كان بيصّر إن يا جدعان أنا كنت محتاج شوية وقت وكنت والله حفاجئكوا بس الصراحة كان صعب حد يقتنع بالكلام ده .. لما جاتله شغلانة إنه يدرب منتخب هولندا ناس كتير جالها ذهول من إن إزاي مستوي الفرقه إتطور بالشكل ده .. هو خلي فرقة هولندا من فرقة معرفتش تتأهل لكأس العالم 2018 لفرقة إتأهلت لأمم أوروبا 2020 ووصلت نهائي بطولة League of Nations قصاد البرتغال بعد ما طلعوا إنجلترا وفرنسا وألمانيا .. تقريباً جماهير إيفرتون لما شافت هولندا وهي بتتأهل لنهائي بطولة League of Nations وبتخسر النهائي قصاد البرتغال شافوا (كومان) وقالوا لنفسهم (كومان) مين؟ (كومان) بتاعنا؟
دلوقتي إسمه مربوط بإنه حيدرب برشلونة .. سبب الإشاعات اللي ربطت إسمه ببرشلونة إن الناس عرفت إن العقد اللي هو ماضيه مع منتخب هولندا فيه ثغرة بتقول إن لو حصل و برشلونة بالذات مش أي نادي تاني جه و قدم Offer ليه بعد ما بطولة أمم أوروبا 2020 تخلص فساعتها هو من حقه يفسخ عقده مع الإتحاد الهولندي لكرة القدم .. الرجل و هو ماضي عقده مع المنتخب في 2018 زي ما يكون قلبه حاسس إن في الوقت اللي إحنا فيه دلوقتي ده الناس كلها حتفتح بقها من مستوي المنتخب الهولندي تحت إيده و برشلونة حيجوا جري عشان يمسكوه الفرقة .. سميها بعد نظر .. سميها ثقة في النفس .. سميها زي ما تسميها .. فكك من ده .. إنت لو بتشجع برشلونة فإنت غالباً دلوقتي بتقول هييييييييييييه أخيراً (إيرنستو فالفيردي Ernesto Valverde) حيمشي.
أنا عايز أختم معاك بس بإني أفهمك ليه؟ .. ليه (كومان) إيفرتون غير (كومان) هولندا و الحقيقة السر كله في طبيعته الشخصية .. ده بني أدم مبيعرفش يشتغل و الناس كلها باصه عليه و بتراجع وراه كل إختياراته و كل قراراته .. الناس كلها عيونها علي الدوري الإنجليزي .. إنت ممكن تقعد علي القهوة في شارع من شوارع إسكندرية تلاقي ناس بتتفرج علي ماتش إيفرتون و واتفورد عادي جداً .. بس محدش بيتفرج علي ماتش منتخب هولندا و منتخب لوكسمبورج في تصفيات أمم أوروبا 2020 .. قلة الإهتمام الإعلامي خلته هادي و عارف يشتغل مع جيل شاب في الكرة الهولندية قدامه كتير يحققه و يوصله .. الرجل ده بيشتغل معاه جيل حتشوف معاه العجب في هولندا زي (فرانكي دي يونج Frankie de Jong) و (ماتياس دي ليجت Matthijs de Ligt) و (دوني فان دي بييك Donny van de Beek) و كلهم كانوا بيلعبوا في أياكس أمستردام و طبعاً معاهم (فيرجل فان دايك Virgil van Dyke) عشان محدش من اللي بيشجع ليفربول يزعل .. هنا السؤال .. تفتكر لو (كومان) فعلاً مسك برشلونة اللي لعب معاهم 6 مواسم جاب فيهم بطولة أوروبا سنة 1993 هل حيقدر يتعامل مع التركيز الإعلامي عليه؟ .. هو فشل في إيفرتون عشان العيون كلها كانت معاه .. نجح في هولندا عشان الناس طنشته .. هل تفتكر هو الإختيار الصح لإدارة برشلونة؟ .. هذا و الله أعلم.
المصدر:
- مقالة بعنوان Ronald Koeman was a laughing stock when he was axed from his disastrous spell at Everton, now he is leading Holland into Euro 2020 as genuine contender نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7690331/Ronald-Koeman-laughing-stock-left-Everton-hes-line-Barcelona-job.html
